20/09/2026
1. FC Georgia München 🤝 Putzbrunner SV II
უხვგოლიანი მატჩის დასაწყისი უკეთესი ვერც იქნებოდა: მე-4 წუთზე, მიქავას ზუსტი გადაცემის შემდეგ, გიორგი ჩილინგარაშვილმა მიჯრით მესამე შეხვედრაში გაიტანა და გუნდი დააწინაურა. სწრაფმა გოლმა მეტი დამაჯერებლობა მოგვცა და მომდევნო წუთები სრულად ჩვენი უპირატესობით წარიმართა, თუმცა საკუთარ საჯარიმოში დაშვებული დაბნეულობის გამო, მსაჯმა თავისუფალი დარტყმით დაგვსაჯა, რაც მეტოქემ გოლად აქცია.
ამ ეპიზოდმა თამაშის სცენარი შეცვალა, ფსიქოლოგიური და სათამაშო უპირატესობა მეტოქის მხარეს გადავიდა და ტაიმიც მათი გამარჯვებით დასრულდა.
შესვენებაზე მოთამაშე-მწვრთნელმა, ზურა როყვამ, ტაქტიკური ცვლილებები განახორციელა, რამაც მეორე ტაიმის სურათი რადიკალურად შეცვალა. მატჩის სადავეები სრულად ჩავიგდეთ ხელთ და საპასუხო გოლიც არ დაყოვნებულა: მეტოქის საჯარიმოში ყველაზე სწრაფად გიორგი ფარჯიანი გაერკვა სიტუაციაში და ანგარიში გაათანაბრა - 2:2.
ამას მოჰყვა შეტევების კასკადი, თუმცა ბურთს თითქოს არ უნდოდა მეტოქის კარში შესვლა, ორჯერ ხარიხამ იხსნა მეტოქე, იქმნებოდა მრავალი სახიფათო მომენტი და თამაში თითქოს ფრედ სრულდებოდა, სანამ კიდევ ერთი საკუთარი შეცდომით მეტოქეს დაწინაურების შანსი არ ვაჩუქეთ.
თუმცა, ეპიზოდის ანტიგმირმა მატჩის მიწურულს შეცდომა სრულად გამოსყიდა: მან იდეალური გადაცემით მეკარესთან პირისპირ ანრი ნაჭყებია გაიყვანა, რომელმაც შანსი ხელიდან არ გაუშვა და მატჩის საბოლოო ანგარიში დააფიქსირა. საბრძოლო ფრე - 3:3!
წარმატებულ და მშვიდ კვირა დღეს ვუსურვებთ მატჩის თითოეულ მონაწილეს! ასეთი მძიმე და ემოციური ბრძოლის შემდეგ, მთავარია ძალების სწრაფად აღდგენა. სამუშაო კვირის ბოლოს, მომდევნო კვირადღეს, ახალი გამოწვევა და მორიგი მეტოქე გველოდება, სადაც გუნდი ისევ ბოლომდე დაიხარჯება გამარჯვებისთვის! ⚽️🔥
👕 ნემსიწვერიძე; როყვა, ლომინაძე (c), ახობაძე, გვენეტაძე, ფარჯიანი; თოფურია, პოლუეკტოვი, მიქავა; ჩილინგარაშვილი, ხარაძე.
🛋️ კაიზერი, ხაძიდისი, ნაჭყებია, გოგოლაძე, გრძელიძე.
