La Voix De Mouvement Boufarik

بزاف من الناس تسمع بمصطلح La Banda ومتعرفش معناها لهذا حبينا ليوم نوضحو الفكرة كما هي في الحركية ، La Banda هي فرقة فنية تابعة معنويا للأولتراس دورها الأساسي هو كتابة، تلحين، وتسجيل الأغاني الي تتغنى فالمدرج و هي الذراع الإبداعي للحركية تخدم بالكلمة واللحن، وتنقل العقلية والصورة للمدرج وخارج الملعب
أعضاء La Banda ماشي لازم يكونو منخرطين في الأولتراس، لأن دورهم فني بالدرجة الأولى تقدر تصيب فيهم فيهم مغنيين ، فنانين و حتى شعراء يعني اي واحد عندو حس فني و يقدر يكتب ، وهي تخدم للفكرة وتساهم في بناء الهوية الصوتية للمجموعة
ومن هذا المنطلق، نقدروا نهدروا على la banda boufarikois،
أول Banda تأسست في بوفاريك، والتابعة ل ULTRAS HELL BOYS
هذه الفرقة كان لها دور في إعطاء صوت خاص للمدرج البوفاريكي، وقدمت أعمال تعبر على الواقع والعقلية من بينها:
Voix de Peuple
Cauchemar Jdid

ورغم ارتباطها بالمجموعة، يبقى دور La Banda واضح و هو إبداع فني ونقل رسالة و خذمة الهوية الصوتية للمجموعة و المدينة دون التدخل في قرارات تنظيمية او تمثيل الاولتراس

اولتراس Ultras hell boys تطلق اول منتوج لها و الذي هو عبارة عن وشاح جاء بعبارة la nuova
generazione والتي تعني الجيل الجديد 🟢🟠

مهم جدا ‼️ نتمنى من شعب بوفاريك يقرى بتمعن

ايه علابالنا خسرنا أول زوج مباريات في مرحلة الاياب
ايه علابلنا راهي صعيبة والنتائج جد خطيرة
نقولوها كما راهي وبلا ما نغطيو الشمس بالغربال
الشعب فقد الثقة في اللاعبين لأن المستوى ضعيف
ولأن ما يُقدم فوق الميدان ما يشرفش القميص ولا الألوان
هذا واقع ما نتهربوش منو لكن اللي رانا نشوفوه في المدرجات أخطر من أي خسارة
جات ادارة جديدة جا مدرب جديد
جاو ثلاثة لاعبين في هذا الميركاتو
محاولة تصحيح المسار وتدارك الاخطاء بدات حتى وإذا كانت متأخرة أو ناقصة لكن الفريق اليوم يلعب بلا روح مدرج، وبلا دعم، وبلا صوت.
نقولوها بوضوح الفريق يقدر يخسر لكن المدرج ما عندوش الحق يفرغ اللي يستنى الفوز باش يرجع ما راهوش مشجع و ميحبش الوداد يحب النتائج برك يحب الوداد كي تكون مليحة حب مصلحة ، الوداد يحتاج شعب حاضر وقت الشدة وقت الخسارة وفي وقت الضغط اللاعبين الجدد مهما كان مستواهم إذا مالقاش مدرج حي ما راح يعطيك والو والمدرب مهما كانت أفكاره إذا خدم في صمت ومدرج فارغ راح يسقط وحده المقابلة الحاية ما هيش تع تصفيق هي تع حضور وتع صوت وتع مسؤولية

باش نختمو القول اللي يحب المدينة و الوداد يرجع للمدرج اللي يحب الفريق يوقف معاه الآن
مش غدوة كي تتبدل النتائج




Boufarik W.A.B

جدراية جديدة لمجموعة La Fiamma🟢🟠

مهم ⚠️🚨بارتاجي 🟢🟠

رانا نلاحظو مؤخرا ظواهر غير مرغوب بها بتاتا في المدرج الودادي ومع نمو الجيل الصاعد لي يحب الوداد وحاب يكون حاضر في المدرجات ولي هاذي حاجة ايجابية حبّينا نوضحو بعض الأمور باش الصورة تكون باينة و يطلعو بالعقلية الصحيحة
خويا المدرج ماشي بلاطو تصوير وماشي مكان باش الواحد يبان في التيك توك و المواقع ولا يدير لايف ويصوّر وجوه الناس لي دايرين خدمة وتنظيم لانو هذا التصوير العشوائي داخل المجموعات يقدر يسبب مشاكل كبيرة كيما كشف هويات الأعضاء إلى نقل صور ممكن تُستعمل ضدهم إضافة إلى تشتيت التركيز وتخريب الانسجام لي تكون مبنية ، المشجع الحقيقي دوره يشجع و يغني يصفق، يطيح صوته مع المجموعة ماشي يشد الهاتف ويراقب بدل ما يكون جزء من هاذ الناس لي راهي تمد فالاضافة للالوان
الحركية مبنية على الانضباط و الاحترام والعمل الجماعي و أي تصرف فردي خارج هذا الإطار يولي عبء على المجموعات بدل ما يكون إضافة ولهذا نقولوها بكل وضوح لي حاب يصور ويتصور و يدير لي لايف منحقو و واحد مايسالو بصح يبعد على مناطق المجموعات المدرج فيه مكان للجميع ونتمنى تاخذو هاذ الهدرة بعين الاعتبار و شكرا

ميساج Ultras hell boys بالغة الصريحة الذي يفهمها الحنونيون 🧼
الرسالة جاءت بمعنى : لو كان هتـل.ر على قيد الحياة لما بقي لنا مجال للسخرية 😂