Eman Almaddah Relationship Coach

اتجوزت عن حب وبردو اتطلقت!!

مش كل حاجة بنتمناها لازم تتحقق زي ما احنا عايزين. ساعات، بنحب شخص ونتخيل إنه هو اللي هيكمل معانا باقي حياتنا، بس الدنيا بتخبي لينا حاجات مش متوقعة.

**ليه ممكن يحصل كده؟**

فيه أسباب كتيرة ممكن تأدي لإنهاء العلاقة حتى لو بدأت بحب كبير. ممكن يبقى فيه اختلاف في الشخصيات، عدم تفاهم، ضغوط الحياة، أو حتى تدخلات خارجية من الأهل خصوصاً لو ساكنة في بيت عيلة.

الحب لوحده ما بيكفيش لإنجاح العلاقة، لأن فيه حاجات تانية زي الاحترام، الصبر، والتواصل الجيد اللي بتكون الأساس لاستمرار العلاقة، وقبل كل دول وجود نقاط تلاقي!

**أعمل إيه بعد الطلاق؟! **

1. **مراجعة النفس:**
الطلاق ممكن يكون فرصة لإعادة تقييم نفسك وحياتك. اسألي نفسك: "إيه اللي حصل؟" و"اتعلمت إيه من التجربة دي؟". المراجعة دي مش بهدف لوم نفسك، لكن عشان تكتشفي حاجات جديدة عن نفسك وتطوري منها.

2. **ماتخافيش من الفشل:**
الطلاق مش معناه إنك فاشلة، دي مرحلة في الحياة ممكن تعدي منها وتطلعي منها أقوى. فكري في الطلاق على إنه فصل من حياتك، مش نهاية حياتك.

3. **احنا مش لوحدنا:**
الدعم النفسي مهم جداً بعد الطلاق. حاولي تقرب من الناس اللي بتحبهم وبتثقي فيهم. المشاركة والتواصل مع الآخرين بيخفف من الضغط وبيخليكي تحسي إنك مش لوحدك.

4. **الحياة مستمرة:**
الطلاق مش معناه إنك مش هتحبي تاني أو مش هتعيشي حياة سعيدة. على العكس، ممكن تكون بداية جديدة لحياة أفضل. اهتمي بنفسك، صحتك، وهواياتك، ودايماً افتكري إن الحياة لسه هتقدم لك كتير.

5. **فكري في المستقبل:**
بعد ما تاخدي وقتك للتعافي، فكري في إيه اللي عايزة تعمليه في حياتك. حددي أهداف جديدة وخطط لحياتك بطريقة تتناسب مع أولوياتك الجديدة.

**وأخيرًا...**

الزواج عن حب والطلاق بعدها مش معناه إن الحب كان غلط. هي مجرد تجربة في الحياة بنتعلم منها ونتطور. متخليش التجربة دي توقفك عن السعي، افتكري دايماً إنك تستحقي تعيشي حياة مليانة حب واحترام وسعادة.

** لحجز جلسات كوتشينج للتعافي من تجربة الطلاق، التواصل واتساب على رقم ٠١١٥٢٩٠٢٢١

#الدكتورة

جانب من ورشة عمل بعنوان Meet Your Monster
والتي عُقدت فاعلياتها بجامعة النيل - رواد النيل NilePreneurs Initiative - مبادرة رواد النيل الشهر الماضي

حيث تم دمج الأشخاص من ذوي الإعاقة البصرية مع غيرهم من غير ذوي الإعاقة، وتعرف الحاضرون على مخاوفهم، وطرق التغلب عليها

كما تم عمل تدريبات لتشكيل قيم الفرق في العمل وطرق دمج ذوي الإعاقة مع غيرهم في مجال العمل والتدريب

آراء الحضور في أول تعليق
#الدكتورة

بابا... أذان الفجر بيفكرني دايما بيك... بالحب والحنية اللي غمرتني بيهم... بدلعي عليك وأنا بطلب منك تصحيني!

الطفلة البريئة الصغيرة اللي عايشة جوايا محتاجة وجودك جداً... محتاجة فسحة بالعربية وعيدية وكلمة (براڤو عليكِ شطورة) !

يا رب... رضيت باللي اتقسم وبحمدك عليه... وببص لشريط حياتي وشايفة المعجزة... أب كريم وعطوف وحنين وأم طيبة
طيب هعوز إيه تاني غير الرحمة والمغفرة وبشرى تسعد قلب العيلة، ما هي ساكنة جوايا مكملة!

بابا... هقولك سلام وأنام وأنا بدعي أشوفك في المنام عشان اتأكد بإنك حي وإن في يوم هنتلاقى ومن بعديها مفيش فُرقة ولا غربة مفيش بعاد... بس متنساش تبوسني في جبيني وعلى صدرك تنيمني ولسريري تسلمني وتدعي لي بنومة هنية... متنساش تغطيني برمش عنيك... وتطبطب أوي على قلبي... أصله ملوش راجل غيرك!

تعرف يا بابا وأنا بكتب لك بحس بإيه؟!
بحس بدموعي بتسبقني بتجري عليك... مش ناوية تتأخر ولا ثانية... هو الشجن ابن الإيه واخدني في رحلة شعورية غريبة ومختلفة... يقولي بلاش م الحزن دلوقتي... بس مسموح لك بالدموع... دموع تصفي وتطهر ضلمة الخوف وتخلي باب الأمل مفتوح على البحري... ربك كريم وكرمه وسع كل شئ واللي (الله) غايته ومبتغاه عمره ما يضل ولا يشقى!

سلام يا بابا دلوقتي ولينا لقاء... أحكي لك فيه عن بكره وأسمعك أخباري عشان تفرح وتدعي لي ربنا يسلمني من شر الناس ومن كل وسواس خناس ويغفر لي ويهديني!

بابا... متنساش البوسة على جبيني!
#الدكتورة

اعرف نفسك وعلم عليها !!

شهر رمضان بيودعنا.. كل حد فينا استغل رمضان إزاي؟! فينا اللي فاز وفينا والعياذ بالله اللي خاب وخسر!!

النهارده يوم ٢٩ رمضان المبارك لسنة ١٤٤٥ هجرية.. استوقفني معنى الخسارة وسألت نفسي (مش الشياطين متسلسلة في الشهر الكريم؟!) ولأن الإجابة كانت (أيوه) فضلت أناقش نفسي وأكلمها عن حقيقتي وحقيقة كل نفس في الشهر الكريم!!

ولاقيتني بقول : (أي شرور طلعت من أي مسلم في الشهر الكريم، هي شرور نفسه.. يعني هو بس المسئول عنها.. يعني احنا وقفنا قدام نفسنا وعرفنا بجد احنا مين بعيدا عن الشياطين)!!

لو محاولناش نواجه نفسنا بعيوبها بعد الشهر الكريم، بغرض إصلاح النفس وتزكيتها يبقى نفوسنا انتصرت بشرها علينا !

يا ريت نعرف نفسنا ونعلم احنا عليها قبل ما يفوت الأوان!!
#الدكتورة

كل بنت بترمي نفسها في جوازة زبالة مع واحد عرة منها لله

المال الحلال أهو!!

عريس يوم زفافه شاف عربية العفش وصلت جري من تحت ايد الحلاق وقعد يرقص ويغني ويقول: (المال الحلال اهو)!
وبالرغم من إن العريس عارف إن اخوات العروسة الرجالة حرامية وبلطجية وسوابق بردو فرح ورقص!!

بعد كام حلقة ظهر #عاطف على حقيقته.. إنه أكبر مخادع ونصاب وهدفه يلم فلوس من وراء عروسته وأهلها بأي شكل وإن الجوازة هو مرتب لها مع صاحبه عشان يعملوا المصلحة ويخلعوا بعدها !!

بنشوف كتير زي (عاطف) بيغني ويرقص للمال الحلال وهو عيشته كلها شمال !!

بيسعى للجواز الشرعي وهو بالنسبة له كوبري يعدي عليه للمال الحرام!!

متصدقوش اللي زي عاطف حتى لو بانوا على نياتهم ودمهم خفيف وبتوع تلطيف!!

#العتاولة
#الدكتورة

نعمة وصلاح.. الحب المريض!

واحدة من أكبر مشكلات علاقات الحب والارتباط هي الهوس. اللي بيحب قلبه بيدق وعقله في إجازة.. بيحب عمياني ومش شايف حقيقة الحبيب!!

ده باين جداً في علاقة نعمة وصلاح.. كل الناس حوالين نعمة شايفين صلاح على حقيقته.. لكن مراته الوحيدة اللي مش عاوزة تشوف الحقيقة دي!!

أبوها شايفه (نطع)، الجيران مسمينه (عالة)، زمايلها بيقولوا لها (مالك كل ما تسمعي اسم صلاح جوزك نحسك مغيبة؟!) كلام للأسف الشديد بيحصل فعلاً في الواقع في علاقة الحب المريض اللي من طرف واحد!!

الحب لو مش متبادل ومتكافئ بيتحول للعنة نهايتها بتكون مؤلمة جداً جداً !!

* لو مريتي أو بتمري بعلاقة حب مريض وعاوزة تتعافي احجزي معايا جلسات كوتشينج تتواصلي فيها بحرية كاملة مع نفسك وتوصلي لقرار يريح قلبك المرهق!!

* للاستفسار وحجز الجلسات التواصل واتساب على رقم
٠١١٥٢٩٠٢٢٠١
#الدكتورة

الجواز أصعب امتحان في الحياة!!

حياتنا مليانة امتحانات.. أصعبها.. الجواز.. اتنين مختلفين في النوع، والشكل، والطباع، والاحتياجات وطريقة التربية والتفكير.. مطلوب منهم يعيشوا مع بعض ويفهموا بعض وكمان يراعوا احتياجات بعض المختلفة.. امتحان فعلاً صعب!

عشان كده تلاقي أغلب الجوازات فاشلة أو في طريقها للفشل لأن بوضوح وصراحة أغلب الناس مش فاهمة نفسها أو مش متصالحة مع نفسها (بعيوبها وميزاتها) وكمان (ماضيها وحاضرها) عشان تقدر تفهم شخص تاني !!

والموضوع يزداد صعوبة لما يبقى يتولد الأطفال ويحتاجوا لبيت هادي ومستقر بس ميلاقوش غير صراع بين أم وأب عمرهم ما فهموا نفسهم عشان يقدروا يفهموا بعض!!!

* لو بتعاني في الجواز أو بتعاني في فهم نفسك واحتياجاتك
احجزي معايا جلسات كوتشينج تعبري فيها عن نفسك وتختبري حقيقة مشاعرك!

* للحجز والاستفسار واتساب على رقم ٠١١٥٢٩٠٢٢٠١
#الدكتورة

أحياناً كتير بيبقى نجاحك وانتصارك كله في المقاومة.. غالبية الناس عايشة مستسلمة للشر وناسه.. تحايل، سرقة، غش، كذب، وغيرها من الصفات والتصرفات الحقيرة!

فكرة مقاومة الحرام والشر والغلط اللي بقى عادي، في حد ذاتها انتصار كبير، ومش بس كده، دي كمان سبب رئيسي لحقد الناس عليك وحسدهم المستمر ليك!

الأخلاق المحترمة في زماننا كنز وثروة لا تباع ولا تشترى!
افرحوا إنكم محترمين.. انتوا أكبر المنتصرين!!
#الدكتورة