Hala Elsayed Relationships Coach

المشاعر اللي بنكتمها.. بتروح فين؟ :
الجسم مش بيعرف ينسى.. هو بس "بيخزّن" كل اللي إنتِ مش قادرة تقوليه!
:
الكلمة اللي بلعتيها عشان "المراكب تسير"، الغضب اللي كتمتيه عشان "ما تعمليش مشاكل"، والحزن اللي قفلتي عليه جوه قلبك..
كل ده مش بيختفي مع الوقت، ده بيتحول لجيش بيحارب "صحتك" من جوه.

فجأة تلاقي صداع مش بيمشي، وجع في ضهرك ملوش سبب طبي، أو قولون عصبي مش بيهدى.. دي كلها "رسايل" من جسمك بيقولك فيها: "أنا تعبت من الشيل.. ارحميني".

شفاء القلب بيبدأ لما نعترف بالمشاعر دي، نسميها بأسماءها، ونسمح لنفسنا نخرجها "نفرغها" بشكل صحي. ما تحبسيش جواكي طاقة ممكن تهد كيانك.. اتكلمي، عبري، وخلي جسدك يتنفس
غمضي عينك لحظة واسمعي لجسمك..
لو جسمك النهاردة يقدر يصرخ بكلمة واحدة "مكتومة" جواه.. هيقول إيه؟ (اكتبيها هنا عشان تبدأي رحلة التحرر). تفرغي طاقتك هنا
#الزواج #علاقات #التواصل s

: فن الـ "لأ".. من غير تبرير ولا ذنب
كلمة "لأ" هي جملة كاملة لوحدها.. مش محتاجة بعدها قصة ولا تبرير!:
عارفة لما حد يطلب منك طلب وإنتِ مش قادرة، فتبدأي تألفي "سيناريو" أعذار طويل عشان تحسسي اللي قدامك إنك معذورة؟
الحقيقة، إنتِ هنا بتقولي لنفسك: "أنا ماليش حق أرفض إلا لو في كارثة تمنعني".

احترافية الوعي الحقيقية هي إنك توصلي لمرحلة التصالح مع حدودك.. إنك تقولي: "شكراً ليكِ، بس الموضوع ده مش مناسبني دلوقتي".. وتقفلي القوس لحد هنا، من غير ما تحسي بذنب ولا جلد ذات.

"لأ" الواعية مش قلة ذوق، دي "سور" بيحمي طاقتك، وقتك، ومساحتك المقدسة اللي من حقك تحافظي عليها عشان تقدري تستمري وتدي بجد.

تعالي نتدرب سوا هنا في المساحة الآمنة دي..
قولي "لأ" لأي حاجة بتستنزفك حالياً (حتى لو بينك وبين نفسك).. اكتبي "تم" لو بدأتي تحطي حدودك النهاردة.

اكتبي في التعليقات: "أنا متصالحة مع ماضيّ".. وابدأي صفحة جديدة ونضيفة مع نفسك..
#الزواج #علاقات #التواصل

خلف كل غياب… قصة محدش شايفها.

الفترة اللي فاتت كانت رحلة صعبة مع الحموضة وارتجاع المريء، لحد ما الحمد لله عملت عملية بالمنظار وبدأت رحلة التعافي.

أصعب حاجة اتعلمتها؟
إن الضغط، والغضب، وتجاهل تعبنا… ممكن يستهلكوا جسمنا بهدوء.

خدوا بالكم من نفسكم،
لأن الصحة مش شيء بنفتكره بعد التعب… الصحة هي الحياة ❤️

#علاقات