02/10/2026
"أفضل بكتير من المتوقع"
إيطاليا خرجت بتعادل إيجابي أمام فرنسا في الجولة التالتة من دوري الأمم الأوروبية بهدف لكل فريق، في ماتش ظهرت فيه إيطاليا أفضل بكتير أوي مما توقعت بصراحة.
للأمانة كنت متخيل إيطاليا هتنزل تاكل علقة كورة من فرنسا بغض النظر عن النتيجة يعني، لكن دا محصلش بل شوفت إيطاليا منتخب متماسك جدًا، قادر يقف بشكل مقبول جدًا ضد أكتر منتخب معاه حلول في العالم وكمان كان ليه رد فعل هجومي قوي.
لما تيجي تبص على الإحصائيات، هتلاقي إن إيطاليا 18 تسديدة مقابل 14 تسديدة، بس مش دا المهم الفكرة إن كل منتخب ليه فرصتين محققتين بجانب إن الأهداف المتوقعة الفارق بينهم 0.2 بس بالتالي نقدر نقول نفس الخطورة من الناحيتين.
كايودي مفاجأة منتخب إيطاليا التوقف دا بالنسبالي، باك يمين هايل والله مكنتش تابعته كتير، بس حرفيًا بيعمل كل حاجة مطلوبة من الباك، دفاعيًا وهو بيلعب على دوي بيعمل 9 تدخلات دفاعية وبيفوز بـ5 التحامات من 8، وحتى هجوميًا رغم إنك بتلعب جيم دفاعي وعلى التحولات بيزيد وبيعملك فرصتين للتسجيل.
دوناروما ماتش من ماتشات العمر وهو رجل المباراة الأول بلا منازع، 7 تصديات ومنع 1.5 هدف متوقع "Goal Prevented" وعمل تصديات صعبة أوي أوي.
أتمنى مانشيني يكمل على النهج اللي واخده، والأندية الإيطالية نفسها تسير على نفس الطريق بفكرة منح الفرص للعيبة أصغر سنًا من إيطاليا والصبر عليهم لأن من الواضح فيه مواهب معقولة بس محتاجة تاخد مساحة ووقت وهتبدأ تكسب لعيبة.
