Moumen Khairy - Self-Confidence Coach

مين اللي بيفكر !

يا ترى عمرك سألت نفسك إنت بتتعامل إزاي مع مشاكلك ! ياترى بتبص على مشاكلك و بتحاول تحلها بعقلك العاطفي ولا عقلك الواعي !

أغلب مشاكلنا راجعة لإننا بنشوف مشاكلنا دايما بعواطفنا دايما بنبص على مشاعرنا تجاه المشكلة و ازاي أثرت عليك و على حياتنا و ده اللي بيخليك "غرقان" جوه المشكلة مش قادر تطلع منها .
و مع الوقت بتحب وضعك كده مش عارف تبص على المشكلة من زاوية تانية دايما عاوز اللي يحلهالك و حاسس إن في حاجة ناقصاك حاجة كنت محتاجها و مخدتهاش.
ده بقى بيخليك حاسس طول الوقت إنك ضحية و مستضعف و حاسس بالظلم طول الوقت من الناس و المجتمع و كل اللي حواليك.

طيب ايه فرق العقل العاطفي عن العقل الواعي ؟!

١- العقل الواعي أو العقل الحكيم هو العقل اللي بيساعدك على التفكير في المشكلة بدون "ولولة" و "ندب" .

٢-إنت عارف إن المشكلة كبيرة و مأثرة على حياتك بس بتختار بوعي إنك متوقفش حياتك هنا و تكون أسير للموقف و التحربة اللي عيشتها !

٣- العقل الواعي بيساعدك تفكر بمرونة بيها تعرف إزاي تلاقي حلول لمشكلتك و تكون عندك مسؤولية قرارك بدل ما أنت طول الوقت حاسس إنك مظلوم أو مغلوب على أمرك!

يا ترى هل إنت بتسمح لنفسك إنك تفكر بعقلك الواعي ولا مستسلم لعقلك العاطفي؟!
لو عجبك البوست متنساش تعمل لايك و شير و شاركني برأيك 😊

كل إنسان فينا محتاج في حياته لعلاقة واحدة بس، علاقة عارف إزاي يكون فيها حقيقي مش مزيف ولا مصطنع قادر يكون فيها " زي ما هو" .
زي كتاب مفتوح مبيفكرش في الكلام و بيرتبه قبل ما يطلع منه مبيحاولش يبرر أو يفسر تصرفاته فيها .
علاقة شفافة كل واحد شايف فيها روح التاني زي ما هو شايف نفسه .
علاقة بدون رتوش أو زيف و مجاملات كدابة ، علاقة عارف يطلع فيها الطفل اللي جواه ، عارف يخلع فيها "وقاره و هيبته" و يكون "هو".

علاقة عارف يحب فيها نفسه و يحب اللي حوليه فيها ، علاقة فيها أمان حقيقي.
علاقة حقيقية عارف يشارك فيها همومه و وجعه و ألمه و هو عارف و متأكد إنه متشاف مسموع و متحس بيه .

إحنا مبنتشاركش ألمنا و مشاكلنا مع اللي بنحبهم علشان عندهم القدرة إنهم يلغوا ألمنا أو يحلوا مشاكلنا ؛ إطلاقا إحنا بنتشارك علشان نحس بوجودنا و تأثيرنا في حياة بعض ، علشان نحس بالدفا و الونس اللي قادر يهون علينا مشاكل الدنيا و أوجاعها اللي قلوبنا أصغر و أهون من إنها تتحملها لوحدها.

كفاياك بقى علاقات "كمالة العدد" و "ضل الحيطة" و "الضحكة الكدابة" لإنك هتفضل حاسس في وسطهم إنك وحيد و دور على ناس تشبهك و تشبهم قادرين يسندوك لما تقع ، "دور على العلاقات اللي تخليك حقيقي بجد في وسطها"❤

أكبر حاجة بتمنعك من إنك تتجاوز تعرضك "للرفض" في حياتك هو "شخصنتك" لأي رفض "Take it personaly".
ده اللي بيخليك تترجم أي رفض بيحصلك على إنه بسبب مشكلة عندك .
🔴زي إنك تشوف رفضك في العلاقات على إنك شخص غير مرغوب فيه .
الرفض هنا بيعكس حاجات كتير اوي مستخبية عن الطريقة اللي بتشوف بيها نفسك !
زي احساسك تجاه نفسك بالدونية و شوفانك ليها على إنها قليلة و متستاهلش ، ده غير ملازمة احساسك المستمر بالعار و إنك محتاج تستخبى و تتدارى!

مخك هنا لو إديته الإذن إنه يلاعبك هيسحلك معاه حرفيا .

قول ورايا ...
أنا مش ضحية !
أنا مسؤول!
أنا مش زي ما أنت عاوزني أشوف نفسي !
أنا مش هسمح لنفسي إني اتزنق جوه عينيك!

الكلمة "المؤذية" سهم مسموم ، بيفضل سايب حفرة جوه قلب صاحبها اللي بينزف و جرح ما تداويهوش السنين ، مهما صاحبها اعتذر ✋. حفرة ماليها الوجع ، الكلمة اللي بتتقال في خناقة أو نهاية علاقة أو بعفوية و بتسجنك جواها سنين و سنين ، الكلمة اللي بتخليك تسأل نفسك كل يوم "هو أنا وحش اوي كده؟!" 😔 ، الكلمة اللي بسببها مبقتش عارف تبص لنفسك في المراية ، و لا عارف تقبل كلمة حلوة او مجاملة حتى ؛ لإنك ببساطة معدتش مصدقها ولا حاسسها !__________________________________________
إزاي أقدر أتعامل مع وجع الكلمة المؤذية
الكلمة محدش بيحس بأذاها غير اللي داق وجعها وعاشه 💔 .

🔴 ازعل
الكلمة محدش بيحس بأذاها غير اللي داق وجعها وعاشه ؛ علشان كده بقولك ازعل و اتضايق و متقولش محصلش حاجة و تضحك و تعدي .
زعلك جزء منك
استهتارك بزعلك = استهتارك بنفسك

🔴عَبَّر
متخليش الزعل يتحوش جواك ، عبر عن زعلك و خليه يطلع من جوه قلبك و عقلك علشان ميسيطرش عليك و يوقفلك حياتك.

🔴سامح
و هنا مش مطلوب منك إنك تسامح اللي وجعك و أذاك ، إنك تسامح نفسك إنك قابل تشوفها بالشكل ده و إنك مش رافضها و مش هتجلدتها ، إنك تطبطب على قلبك المجروح و تقوله إنك مصالحه و معاه و مش هتسيبه يتإذي تاني.

لو عجبك البوست متنساش تكتب رأيك و تعمل لايك و شير ❤

الحياة دومًا تستسلم في الجولات النهائية أمام أولئك الذين يصمدون ويسيرون في طريق تحقيق ذواتهم.
يسعد صباحكم ❤

يا ترى ايه اللي ممكن يجبرني استمر في علاقة بتإذني و أنا عارف و متأكد من ده ؟!
ببساطة الخوف! .
الخوف هو "لِحام" أي علاقة مؤذية و سبب لإستمرارها. خوف إنك هتتساب و هترجع لوحدك تاني ، إحساسك بالفقد و رجوعك للفراغ العاطفي من تاني ، المؤذي برضه بيخاف على فكرة ، بيخاف من فقدانه نشوة سيطرته عليك ، و شعورة بالعظمة و هو بيتلاعب بيك و بمشاعرك .
خوفك من خسارة العلاقة بيكون أضعاف مضاعفة ؛ لإن المؤذي بيتغلب على خوفه بإيجاده ضحية جديدة يقتات عليها ، أما أنت فخوفك من "فزاعة" الفراغ العاطفي و خسارتك لإحساسك "المزيف" بالحب هو اللي بيجبرك تِبلع الأذى و تستسحمل الإهانة و تكمل رافع شعار
"ألم المؤذي ولا ألم الوحدة".

إزاي أقدر أميز الشخص لو كان نرجسي ولا لا ؟!
زي ما مفيش "جريمة" كاملة .. مفيش نرجسي ملوش علامات مبتدلش على نرجسيته حتى لو حاول يخفيها

قوانين ميرفي للشخصية "النرجسية"👇

قانون رقم ١: ابهر عيون الناس عمرها ما تعرف تشوف حقيقتك.
النرجسي بيعشق الابهار ، المظاهر عنده زي الأكل و الشرب ، بيبان في مستوى اجتماعي مش بتاعه ، المهم يكون آخر "ألاجة" حتى لو هيبات من غير عشا.

قانون رقم ٢: كل حاجة هتاخد لفتها و هترجعلي في النهاية.
كل المواضيع في النهاية بتصب في "حِجْر" النرجسي ، هتلاقي أي موضوع بتتكلم فيه معاه بينتهي بالكلام بموضوع متعلق بيه .

قانون رقم ٣: الطربيزة اللي متعجبكش اقلبها!
النرجسي مبدع في "قلب" الطربيزة ، و عارف إزاي يلعب على وتر الذنب جواك و يقلب المشهد بشكل دراماتيكي يخليه ضحية و إنت الجاني.

قانون رقم ٤: قاموس النرجسي خالي دائما من الإعتذار أو الأسف.
عند النرجسي أنت دايما غلطان حتى لو ثبت العكس .

قانون رقم ٥: النرجسي لما يفلس بيدور في علاقاته القديمة.
النرجسي بيسيب باب العلاقات موارب دايما ، علشان لو حب يرجع في أي وقت ، النرجسي بيراهن دايما على حنينك و لهفتك عليه وإنك قاعد مستنيه على حطة ايدك.

وقت الزعل بيبان ولاد الأصول ❤
وقت الزعل بيبان اللي معدنه من "بلاستيك" من اللي معدنه زي "السمنة البلدي" ✋