NileNet Sports Media

تلات نقاط جديدة وتالت مكسب على التوالي في الدوري 🦅❤️

الحمد لله الأهلي عرف يخطف ماتش سموحة 1 صفر ويخرج بالتلات نقط بعد هدف جه في اخر الدقايق عن طريق الرجولة ياسر ابراهيم

الماتش ماكانش سهل وسموحة حاول يصعبها على الأهلي ويقفل المساحات لكن الفريق فضل مركز لحد النهاية وقدر يخطف الهدف في الوقت المناسب ويحسم الماتش

مش كل ماتش لازم يكون فيه أهداف كتير والأهم في مباريات الدوري إنك تعرف تكسب وتحصد التلات نقط وده اللي الأهلي عمله النهارده رغم إن المباراة كانت مقفولة لفترات طويلة

وأهم ميزة شوفتها النهارده كانت نقل الكورة على الأرض ولمسة ولمستين ولعب سريع بين اللاعبين وده خلانا نشوف شكل كويس في تحريك الكورة وبناء الهجمة من الرغم الأخطاء الكتير اللي حصلت في الماتش

أكيد لسه فيه حاجات محتاجة تتحسن في الأداء خصوصا في صناعة الفرص وإنهاء الهجمات لكن البداية بالثلاث انتصارات مهمة جدا وبتدي الفريق دفعة كويسة وثقة أكبر في اللي جاي

نكمل ونبص لقدام وإن شاء الله المكاسب تفضل مكملة معانا ونكمل الدوري بنفس الروح ونفضل محافظين على سلسلة الانتصارات وإن شاء الله الدوري اللا هزيمة يكون من نصيب Al Ahly SC🦅❤️

📌 عايزين المكسب من غير حسابات إن شاء الله

الأهلي قدام سموحة لازم يدخل الماتش من أول دقيقة وهو عارف انه داخل عشان يكسب ومايسيبش سموحة ياخد راحته أو يدخل في أجواء الماتش

إحنا عايزين نشوف ضغط كويس وقوي علي سموحه من أول ما الكورة تضيع مننا ونضغط من قدام وعايزين نشوف سرعة في نقل الكورة وتحرك من غير كورة عشان نفتح مساحات ونوصل للمرمى بشكل أخطر

وفي نص الملعب لازم نبقى ماسكين الماتش كويس وننقل الكورة بسرعة وقت ما المساحة تفتح قدامنا وده هيكون دور مهم جدا لمروان عطية في تنظيم اللعب وربط الخطوط لأن الاستحواذ لوحده مش هيكسبنا الماتش ولازم الكورة تتحرك من رجل لرجل بشكل صح وبسرعة

وبرضه وإحنا بنهاجم لازم نبقى واخدين بالنا من التحولات لأن سموحة أكيد هيستنى أي غلطة عشان يطلع بسرعة ويستغل المساحات وهنا يجي دور الجهاز الفني في الحفاظ على توازن الفريق وتقفيل المساحات وتقريب الخطوط من بعضها

وقدام الجون محتاجين هدوء وتركيز لأن الفرص اللي هتيجيلنا لازم تتحط ومينفعش نفضل مسيطرين ونضيع اللي بنعمله بإيدينا

القائمة فيها اختيارات كتير وإحنا مستنيين نشوف اللاعيبة دي وهي بتعمل فرق حقيقي بجد في الملعب وتثبت إن الأهلي عنده حلول تقدر تحسم اي ماتش

في الآخر إحنا عايزين التلات نقط وعايزين كمان نشوف الأهلي هو اللي ماسك الماتش ومتحكم في رتمه من البداية للنهاية

إن شاء الله المكسب أهلاوي ونفرح كلنا بعد الماتش ❤️🦅

🚨 في لاعيبة بتلعب سنين عشان الناس تفتكرها وفي لاعيبة بتسيب أثر أكبر من عمرها في الملاعب ومحمد عبد الوهاب كان واحد من الناس دي.

محمد عبد الوهاب ماكانش مجرد لاعب لبس قميص الأهلي ده كان من ولاد النادي واحد من الناس اللي الجمهور حس إنه شبهه وقريب منه لاعب بسيط في شخصيته ومحبوب بطبيعته بيلعب برجولة وبيفرح بقميص الأهلي كأنه واحد من جمهور المدرجات.

اللي عاش أيامه مع الأهلي أكيد يفتكر الناحية الشمال وطلعاته الهجومية وتسديداته وروحه في الملعب لكن اللي فضل أكتر من كل ده هو مكانته عند الناس كان من النوع اللي تحبه من غير ما تحتاج تعرفه وتشوفه في الملعب فتحس إنك بتتفرج على واحد من أهلك.

وعشان كده السنين عدت لكن ذكراه ماعدتش وكل سنة في نفس اليوم اسمه بيرجع يتقال ومعاه نفس الحب ونفس الدعوات ونفس الحكايات، أجيال جديدة كبرت ومشافتهوش وهو بيلعب لكن عرفته من صورته ومن كلام الأهلاوية عنه ومن الذكرى اللي فضل النادي وجمهوره محافظين عليها.

يمكن دي من أجمل الحاجات في كرة القدم إن اللاعب ممكن يغيب عن الملاعب لكن يفضل حاضر في ذاكرة الناس وكل ما اسمه يتقال تلاقي الحب سابق الحزن.

محمد عبد الوهاب واحد من الأسماء اللي الأهلي عمره ما نسيها وجمهوره عمره ما نساها عشرين سنة عدوا ولسه اسمه حاضر بنفس المحبه ولسه مكانه محفوظ في قلوب الأهلاوية.

ربنا يرحمك يا محمد عبد الوهاب ويفضل اسمك دايما مرتبط بالخير والمحبة وبأيام جميلة عشناها معاك.

20 سنة عدوا ولسه محمد عبد الوهاب في قلوبنا. ❤️

📌 لن ننساك

#الأهلي

🔴 الحمد لله الفوز التاني على التوالي لفريقنا في بطولة الدوري 🦅

الأهلي يواصل البداية القوية ويحقق الفوز التاني على التوالي في مشوار الدوري ويحصد 3 نقط جديدة تقربنا خطوة من هدفنا.

المشوار لسه طويل لكن كل فوز وكل نقطة من دلوقتي ليها قيمتها والأهم إن الفريق يفضل بنفس التركيز والجدية من مباراة للتانية ونتعلم من أي أخطاء ونطور من نفسنا مع كل جولة.

هدفنا واضح من البداية إحنا عايزين الدوري ومش بس عايزين الدرع إحنا عايزين موسم استثنائي ونكمل الدوري من غير هزيمة بإذن الله.

خطوة جديدة اتحققت ولسه المشوار مكمل وإن شاء الله الفوز ده يكون بداية لسلسلة انتصارات طويلة لحد ما نرجع درع الدوري للجزيرة ❤️🦅

من قلب المدرجات بنحكي الحكايه | NileNet Sports Media

#الأهلي
Al Ahly SC

🔴 التشكيل المتوقع 👈🏻 الأهلي 🔴 زد 🦅

مواجهة جديدة للأهلي في الدوري والمرة دي قدام زد في الجولة الثانية واللقاء هيكون الساعة 8م وده التشكيل الأقرب اللي ممكن الأهلي يبدأ بيه المباراة:

🧤 حراسة المرمى: مصطفى شوبير.

🛡️ خط الدفاع: محمد هاني، عمرو الجزار، ياسر إبراهيم، كريم فؤاد.

⚙️ خط الوسط: أحمد سيد زيزو، مروان عطية، علي محمود.

⚡ خط الهجوم: أشرف بن شرقي، سفيان بنجديدة، طاهر محمد طاهر.

🚫 خارج القائمة: إمام عاشور لعدم الجاهزية.

ده التشكيل المتوقع والقرار النهائي هيكون للجهاز الفني قبل انطلاق المباراة.

من قلب المدرجات بنحكي الحكاية | NileNet Sports Media 🦅❤️

#الأهلي

🔴 المباراة القادمة 👈🏻 الأهلي 🔴 زد🦅

النهارده راجعين للدوري من جديد وهنواجه زد في الجولة الثانية من البطولة الساعه 8م في مباراة لازم الأهلي يدخلها بنفس الجدية والتركيز من أول دقيقة.

الدوري مش بيتحسم في جولة ولا في ماتش واحد لكن الفرق الكبيرة بتعرف إن البداية القوية هي اللي بتبني مشوار طويل وده تاريخ الأهلي ومعروف عشان كده كل نقطة بنجمعها دلوقتي ممكن تفرق جدا في نهاية الموسم وكل مباراة لازم يكون ليها نفس الهدف وهو الفوز بالدوري.

مواجهة زد مش مجرد 90 دقيقة وخلاص لكن هتكون خطوة جديدة في طريق طويل مليان تحديات عشان كده نفسنا نشوف الأهلي بيفرض شخصيته ويسيطر على المباراة من اول دقيقة ويحقق المطلوب منها وال3 نقط من غير ما يسيب أي فرصة سهلة للمنافس زي ماحصل في المباراة اللي فاتت ولازم نتعلم من أخطائنا ونبنبي عليها عشان متتكررش تاني.

وبالنسبة لينا الهدف واضح من بدري إحنا عايزين الدوري ونفسنا الموسم ده نكمله من غير هزيمة وإن شاء الله نمشي خطوة خطوة ونكسب مباراة وراء مباراة لحد ما نرفع درع الدوري في اخر الموسم وإن شاء الله يكون الدوري من غير هزيمة.

المشوار لسه طويل ومليان تحديات وإن شاء الله تكونوا قدها زي ما عودونا دايما علي الإنجازات إنتوا لعيبة رجالة وقد المسؤولية وليكم مننا كل الدعم والثقة في كل خطوة لحد ما نحقق هدفنا ونرجع درع الدوري 🦅❤️

من قلب المدرجات بنحكي الحكايه | NileNet Sports Media

#الأهلي

@أبرز المعجبين Al Ahly SC