NileNet Sports Media

NileNet Sports Media نبض الأهلي "يبدأ من هنا"

أخبار الأهلي • انتقالات • مباريات • الدوري المصري

30/09/2026

🔥 بصمة أولى لا تنسى!
ابن الأهلي ومهاجم برشلونة حمزة عبد الكريم يسجل هدفه الدولي الأول بقميص منتخب مصر. مبروك يا بطل 🦅🇪🇬
#الأهلي #برشلونة

لسه الحكاية مكملة 🦅❤️محمد الشناوي يمدد تعاقده مع النادي حتى 2028 ليواصل مشواره مع الأهلي ويكمل رحلة بدأت من سنين ولسه في...
28/09/2026

لسه الحكاية مكملة 🦅❤️

محمد الشناوي يمدد تعاقده مع النادي حتى 2028 ليواصل مشواره مع الأهلي ويكمل رحلة بدأت من سنين ولسه فيها فصول كتير جاية

القائد مستمر والقصة لسه ما خلصتش ولسه في أحلام وبطولات ولحظات جديدة مستنية تتكتب

الشناوي حكاية مكملة للنهاية ❤️🦅

28/09/2026

القائد 👈🏻 أسطورة النادي الأهلي 🦅❤️
الأخطبوط وقائد الانتصارات محمد الشناوي 🔴🧤

حارس بطعم فريق كامل شال المسؤولية مع شارة القيادة وكان السند وقت الجد في كل معركة قارية وعالمية، هدوء وثقة وشخصية قائد وروح أهلاوية ما ترضاش غير بالقمة والفوز 🦅🔥

ومع منتخب مصر 🇪🇬 كان دايما قد المسؤولية وحارس لعرين الفراعنة في أصعب المواقف والمباريات الكبيرة

⭕ حضور قوي وثبات وخبرة تخليه واحد من أهم وأعظم حراس جيله.

محمد الشناوي قائد بيحمي العرين وحارس بيكتب التاريخ وقلبه دايما على الأهلي ومنتخب مصر 🔴🧤🇪🇬🏆

واثقين فيك يا قائد كمل كتابة التاريخ وإحنا وراك لآخر لحظة يا شناوي🦅

#الأهلي #الشناوي #الفراعنة

جمهور الأهلي 🦅❤️من "أعظم نادي في الكون" لـ "جمهوره ده حماه"،حكايات شغف وفخر مابتنتهيش مع النسر الأهلاوي.عاش الأهلي وجمهو...
28/09/2026

جمهور الأهلي 🦅❤️
من "أعظم نادي في الكون" لـ "جمهوره ده حماه"،
حكايات شغف وفخر مابتنتهيش مع النسر الأهلاوي.
عاش الأهلي وجمهوره دايماً في العالي! 🦅❤️

لما تحكي عن محمد الشناوي انت مش بتحكي عن حارس مرمى انت بتحكي عن أسطورة عاش سنين من التعب والاجتهاد والصبر وعن مشوار طويل...
25/09/2026

لما تحكي عن محمد الشناوي انت مش بتحكي عن حارس مرمى انت بتحكي عن أسطورة عاش سنين من التعب والاجتهاد والصبر وعن مشوار طويل بدأ من الأهلي وكبر مع البطولات والمواقف ووصل لمنتخب مصر لحد ما بقى واحد من اهم حراس جيله واسس لنفسه مكان في تاريخ الكرة المصرية ❤️🦅

في 2006 كان حسام حسن عنده 40 سنة وكان وقتها بيلعب مع المصري وقبل بطولة امم افريقيا اتكلم مع كابتن حسن شحاتة وطلب منه الانضمام لمنتخب مصر وقاله إنه عايز يكون موجود حتى لو دوره هيكون جمع الكرات

كابتن حسن شحاتة وافق على انضمامه لأنه كان عارف قيمة حسام وخبرته وشخصيته وكان شايف إن وجوده مع المجموعة ممكن يكون له دور مهم وكان موجود وقتها مع منتخب مصر مهاجمين زي عماد متعب وميدو وعمرو زكي وعبد الحليم علي والحكاية كملت بحصول منتخب مصر على بطولة امم افريقيا 2006 وحسام حسن كان جزء من المجموعة اللي حققت البطولة

تخيل لو كابتن حسن شحاتة وقتها طلع وقال على حسام حسن إنه منتهي لمجرد إنه عدى بفترة صعبة أو إن سنه كبر أكيد كلمة زي دي ماكانتش هتليق بتاريخ واحد من أهم مهاجمي الكرة المصرية

وعشان كده كابتن حسام خانه التعبير لما وصف محمد الشناوي بالمنتهي خصوصا إن الكلام جاي من المدير الفني لمنتخب مصر وعن حارس اسطورة شال مسؤولية المنتخب والأهلي سنين طويلة في أعلى مستويات المنافسة

الموضوع مش مجرد كلمة اتقالت في مؤتمر صحفي لأن محمد الشناوي وراه حكاية طويلة بدأت من ناشئي الأهلي وبعدها خرج يلعب لحرس الحدود وطلائع الجيش وبتروجت قبل ما يرجع لبيته سنة 2016 ويبدأ رحلة خلت اسمه جزء من تاريخ النادي

محمد الشناوي كسب مكانته في الأهلي بنفسه وبالطريقة اللي تليق بقميص الأهلي، ماتشات كبيرة وتصديات في أصعب اللحظات وبطولات كان لازم يكون فيها حاضر وقت ما الضغط بيزيد والكل مستني منه ينقذ الفريق ومع كل موقف كان اسمه بيكبر لحد ما بقى الحارس الأساسي للأهلي ومنتخب مصر لسنين وفرض نفسه وشخصيته ومكانه بين اللعيبه اللي حملوا مسؤولية الأهلي وبعدها حمل شارة القيادة وبقى واحد من رموز الجيل ده مع الأهلي ومنتخب مصر

وعشان كده لما نفتكر محمد الشناوي مش هنفتكر بس حارس وقف بين التلات خشبات هنفتكر حارس وقف في ضهر الأهلي في أصعب لحظاته وكان دايما جزء من الحكاية ❤️🦅

ومع الوقت بقى واحد من أهم عناصر الجيل اللي رجع الأهلي لمنصات التتويج الأفريقية وقاد الفريق في نهائيات ومباريات صعبة وحقق معاه 4 بطولات دوري أبطال أفريقيا وشارك في 3 ميداليات برونزية بكأس العالم للأندية

ولما نبص على أرقامه هنلاقي إن الحكاية أكبر من مجرد انطباع عن مستوى لاعب في فترة معينة لأن الشناوي وصل إلى 350 مباراة مع الأهلي و189 مباراة بشباك نظيفة و27 بطولة مع الفريق

البطولات دي منها 8 دوري مصري و5 كأس مصر و7 سوبر مصري و4 دوري أبطال أفريقيا و2 سوبر أفريقي وكأس القارات الثلاثة

ومع منتخب مصر الحكاية ليها فصل تاني لأن الشناوي مثل بلده في كأس العالم 2018 وأولمبياد طوكيو وكأس الأمم الأفريقية وفي أول ظهور ليه بالمونديال قدام أوروجواي قدم مباراة كبيرة وخرج بجائزة رجل المباراة رغم خسارة مصر بهدف في الدقائق الأخيرة

ودي مش مجرد أرقام بنجمعها عشان نرد على تصريح لكنها سنين من عمر لاعب عاش تحت ضغط مستمر وكان مطالب في كل ماتش يثبت إنه قد مسؤولية حراسة مرمى الأهلي ومنتخب مصر

وعلى المستوى الفني الشناوي بالنسبالي واحد من أفضل 3 حراس في تاريخ مصر وعصام الحضري نفسه سبق واختاره ضمن أفضل ثلاثة حراس في تاريخ الكرة المصرية

عشان كده كان صعب أسمع وصف منتهي خارج من كابتن حسام حسن بالذات لأنه واحد من الناس اللي عاشت معنى إن اللاعب الكبير ممكن يمر بفترة صعبة ويرجع ويكمل ويكون ليه دور مهم مع منتخب بلده

كان ممكن يتكلم عن الفترة اللي الشناوي مر بيها وعن الظروف اللي أثرت على مستواه من غير ما يستخدم وصف بالشكل ده لأن فيه فرق كبير بين إنك تحكي عن فترة في مشوار لاعب وبين إنك تختصر تاريخ اللاعب كله في كلمة واحدة

محمد الشناوي مش محتاج بروباجندا ولا محتاج حد يلمع صورته عشان ندافع عنه لأن تاريخه موجود قدام الكل ومش محتاج شهادة من حد لان اللي عمله مع الأهلي ومنتخب مصر اتبنى في الملعب بماتشات كبيرة وتصديات حاسمة وبطولات

كل الدعم للقائد الأسطوري محمد الشناوي ❤️🦅

🦅 نهاية المباراةالأهلي يكسب أبو قير للأسمدة 2-0 ويحصد 3 نقاط جديدة في مشوار الدوري 🔴 الفوز مهم لأنه رجع الأهلي لطريق الا...
15/09/2026

🦅 نهاية المباراة

الأهلي يكسب أبو قير للأسمدة 2-0 ويحصد 3 نقاط جديدة في مشوار الدوري 🔴

الفوز مهم لأنه رجع الأهلي لطريق الانتصارات بعد التعادل مع المقاولون لكن لو هنتكلم عن شكل الفريق نفسه فا لسه عندنا كلام كتير.

الأهلي لسه مش بالشكل اللي إحنا عارفينه مفيش ضغط هجومي مستمر بالشكل الكافي ومفيش تنوع كبير في طريقة الوصول للمرمى ولما المنافس بيقفل المساحات الأهلي بيلاقي صعوبة في تغيير شكل الهجمة أو يسرع رتم المباراة.

مكاسب الماتش النهارده مش بس الفوز وحصد الـ3 نقاط لكن كمان رجوع زيزو لمكانه الطبيعي على الجبهة اليمين ودي نقطة مهمة جدا لأن وجوده بيخلي الأهلي عنده لاعب قادر يغير شكل الهجمة ويصنع خطورة من الطرف سواء بالواحد ضد واحد أو الدخول للعمق أو رفع العرضيات من أوضاع مختلفة وده بيدي الفريق حل هجومي مختلف.

عموتة في الفترة اللي فاتت كان بيستخدم زيزو في مركز 10 لكن المشكلة نفسها هنا وهي وجود زيزو في مكان غير مكانه وده كان بيحرمه من أهم مميزاته كجناح وهي المساحة والواحد ضد واحد والقدرة على التحرك من الطرف للعمق وصناعة الخطورة من الناحية اليمين وده ظهر النهارده لما رجع للجناح وظهر زيزو في مكانه بشكل أفضل وقدر يستفيد من المساحة اللي قدامه ويكون عنده فرصة أكبر إنه يصنع الخطورة من الطرف.

والنهارده شفنا زيزو بشكل مختلف وبقى عنده مساحة يتحرك فيها ويواجه المدافع ويشارك في بناء الهجمة من الطرف والأهم إن أول هدف جه من هجمة سريعة ومباشرة وانتهت عند زيزو اللي سجل هدف الأهلي الأول.

وده مش معناه إن زيزو هو حل كل مشاكل الأهلي لكن أحيانا توظيف اللاعب صح بيحل جزء من المشكلة قبل ما ندور على حلول تانية.

وفي نفس الوقت مينفعش نتجاهل إن الدفاع لسه محتاج شغل كتير لأن الأهلي في كذا لقطة كان بيسيب مساحات لأبو قير وبيسمحله يطلع بهجمات مرتدة وده خلى فيه لحظات مش مطمنة خصوصا إن الفريق بعد الهدف هدي شوية وسمح للمنافس يخرج من مناطقه ويدخل في أجواء الماتش.

يعني بدل ما الأهلي يفضل ويكون هو اللي فارض شخصيته ومسيطر على شكل المباراة بالكامل سمح لفريق أبو قير أنه يعمل عليه شكل يحترم عليه بصراحه ودي علامة استفهام غريبة جدا لأن مع احترامي الكامل لفريق أبو قير لكن ده فريق لسه بيخوض تجربته في الدوري وكان المفروض الأهلي يفرض شخصيته بشكل أكبر ويحسم الماتش بدري بدل ما يفضل متقدم 1-0 لحد الدقيقة 90+3 لما حسين الشحات قدر يسجل الهدف التاني وينهي المباراة.

الشباك النظيفة طبعا حاجة إيجابية لكن مش معناها إن كل حاجة في الدفاع كانت تمام لأن الأهلي محتاج يبقى أهدى وأكتر تركيزا بعد فقدان الكرة ومايسيبش مساحات بالشكل ده للمنافس.

عموتة لسه قدامه شغل كتير في شكل الفريق خصوصا في الحركة من غير كرة وربط الوسط بالهجوم وتسريع نقل اللعب لما المنافس يقفل المساحات وكمان تنظيم شكل الدفاع في التغطية والتمركز وتقارب الخطوط والتعامل مع المساحات وقت فقدان الكرة محتاج يتحسن لأن الأهلي مينفعش يدي المنافس فرصة يخرج بالكرة ويعمل خطورة بسهولة وفي نفس الوقت لازم المدرب يراجع قراراته ويشوف كل لاعب في المكان اللي يقدر يدي فيه أفضل ما عنده.

نفرح بالـ3 نقاط طبعا ونساند الفريق لكن من غير ما نجامل في شكل الأهلي. الفوز النهارده مش معناه إن كل حاجة اتصلحت لأن الأهلي لسه محتاج يستعيد شخصيته وهويته وشكله اللي يخلي المنافس يحس من أول دقيقة إنه قدام الأهلي.

كلنا ورا الفريق لحد ما يرجع الأهلي للأهلي اللي إحنا عارفينه واللي يليق باسمه وتاريخه 🦅❤️

الفوز مهم والـ3 نقاط أهم في مشوار الدوري لكن لسه قدامنا شغل كتير علشان الفريق يوصل للشكل اللي نتمناه ويكون عنده شخصية واضحة في الملعب من ماتش للتاني

3 نقاط مهمة في مشوار الدوري وإن شاء الله يكون الدوري أهلاوي 🔴

🦅 المباراة القادمةبعد التعادل مع المقاولون العرب، الأهلي يعود من جديد للدوري ويدخل مواجهة جديدة بحثا عن الفوز 🔴🏆 الدوري ...
15/09/2026

🦅 المباراة القادمة

بعد التعادل مع المقاولون العرب، الأهلي يعود من جديد للدوري ويدخل مواجهة جديدة بحثا عن الفوز 🔴

🏆 الدوري المصري | الجولة الخامسة

🔴 الأهلي 🆚 أبو قير للأسمدة

📅 اليوم الثلاثاء 15 سبتمبر
⏰ 8:00 مساء بتوقيت القاهرة
🏟️ ستاد القاهرة الدولي

المباراة دي فرصة جديدة للأهلي علشان يصحح اللي ظهر في اللقاء اللي فات ويقدم رد فعل أقوى على أرض الملعب

المطلوب مش النتيجة وبس لكن المطلوب نشوف الأهلي بشكل أفضل وشخصية هجومية أوضح وخطورة أكبر قدام مرمى المنافس 🦅🔴

كل التوفيق للأهلي في مواجهة النهارده ❤️

#الأهلي

🔴 خبر صعب على عمرو الجزار وعلى الأهليعمرو الجزار كان بدأ يثبت نفسه مع الأهلي في الفترة الأخيرة وقدم ماتشين من أحسن مباري...
10/09/2026

🔴 خبر صعب على عمرو الجزار وعلى الأهلي

عمرو الجزار كان بدأ يثبت نفسه مع الأهلي في الفترة الأخيرة وقدم ماتشين من أحسن مبارياته مع الفريق وبدأ ياخد ثقة أكبر في مركز قلب الدفاع

علشان كده خبر إصابته بقطع في الرباط الصليبي الأمامي وقطع في الغضروف الداخلي جه في وقت صعب جدا خصوصا إن عمرو كان بدأ يدخل في حسابات الفريق ويثبت فعلا إنه يقدر يكون لعيب مهم في خط الدفاع

الدكتور أحمد جاب الله رئيس الجهاز الطبي للفريق أكد إن الأشعة كشفت تفاصيل الإصابة وإن عمرو هيخضع للجراحة بعد تحديد موعدها خلال الفترة القادمة

الفترة اللي جاية مش سهلة على عمرو خصوصا إنه بدأ بالفعل ياخد مكانه ويثبت نفسه مع الأهلي لكن قدر الله وماشاء فعل، أهم حاجة دلوقتي إنه يركز في العملية وفي علاجه وتأهيله وياخد وقته كامل لحد ما يرجع للملعب وهو جاهز من غير استعجال

ألف سلامة عليك يا عمرو ❤️
ونتمني نشوفك إن شاء الله راجع للملعب أقوى من الأول وتكمل اللي بدأته مع الأهلي وتثبت نفسك أكتر مع الفريق 🦅🔴

#الأهلي

🔴 التعادل مع المقاولون مش مجرد نقطتين ضاعوا لان اللي شفناه في الماتش بيأكد ان المشكلة اكبر من النتيجة نفسهاالاهلي لسه بي...
10/09/2026

🔴 التعادل مع المقاولون مش مجرد نقطتين ضاعوا لان اللي شفناه في الماتش بيأكد ان المشكلة اكبر من النتيجة نفسها

الاهلي لسه بيحاول يوصل للشكل اللي عموته عايز الفريق يظهر بيه والاستحواذ موجود لكن لسه مش بيتحول بالشكل الكافي لخطورة حقيقية على مرمى المنافس لان المهم مش انك تمتلك الكرة لكن ازاي تستخدمها علشان تحرك دفاع المنافس وتفتح مساحات وتوصل لمنطقة الجزاء بفرص حقيقية وده كان من اكتر الحاجات اللي غابت عن الاهلي قدام المقاولون

الفريق كان بيوصل بالكرة لمناطق متقدمة لكن التحركات اللي قدام ماكانتش بتدي صاحب الكرة اختيارات كفاية وده كان بيصعب مهمة نقل الهجمة للثلث الهجومي ورغم ان مروان عطية حاول يعوض ده بتمريرات في ضهر دفاع المقاولون لكن المحاولات دي ماكانتش بتلاقي تحركات كفاية تستغلها او تفتح مساحات بعدها فكانت الهجمة بتفقد سرعتها ونرجع نعيد بناء اللعب من جديد

الاهلي كان محتاج في اللحظات اللي الهجمة فيها بتقف ان حد ياخد قرار يغير شكل اللعب بدل ما الكرة تفضل تتنقل بنفس الطريقة لان تمريرة واحدة في المساحة او تحرك مفاجئ من غير كرة او انطلاقة من لاعب في موقف واحد ضد واحد ويعدي من المدافع كانت كفيلة تجبر دفاع المقاولون يخرج من مكانه وتفتح طريق للهجمة لكن ده ماحصلش بشكل كفاية غير في هجمة بن شرقي اللي قدر يحصل فيها على ضربة الجزاء اللي سجل منها زيزو هدف التعادل ودي تقريبا كانت المرة الوحيدة اللي شفنا فيها قرار فردي غير شكل الهجمة وعلشان كده الاهلي كان بيوصل لقدام لكن من غير ما يحول الوصول ده لخطورة حقيقية بشكل كافي

ولما الماتش مشي بنفس الشكل كان واضح ان الاهلي محتاج حلول اكتر من مجرد الاستحواذ لان المنافس قدر يحافظ على تنظيمه لفترات طويلة والاهلي ماقدرش يعمل حاجة تخلي دفاع المقاولون يتحرك من مكانه وتدي الفريق فرصة يدخل لمنطقة الجزاء بشكل اخطر

وده مش معناه ان المشكلة كلها في الهجوم بس لان شكل الفريق في المباريات دي محتاج يكون متكامل من بداية بناء اللعب لحد لحظة انهاء الهجمة وكل لاعب يبقى عارف دوره ومكانه والقرار اللي محتاج ياخده حسب شكل المباراة

عموته لسه في بداية شغله مع الفريق وده يديه وقت للتعديل لكن في نفس الوقت لازم يتحاسب على اللي ظهر في الملعب لان الاهلي كان محتاج حلول اكتر في الثلث الهجومي والمباراة كشفت ان الفريق لما بيكون قدام دفاع منظم بيصعب عليه تغيير إيقاع الهجمة وصناعة فرصة واضحة ودي نقطة لازم الجهاز الفني يشتغل عليها بشكل اكبر

الاهلي محتاج يطور شكل لعبه بشكل واضح لان الاستحواذ لوحده مش كفايه ولو الفريق فضل يلعب بنفس الطريقة من غير ما يضيف حلول جديدة هيفضل يعاني في صناعة الفرص وخلق الخطورة والمطلوب من عموته انه يخلي الفريق اسرع في اتخاذ القرار واكثر تنوعا في الهجوم بحيث يكون عنده اكتر من طريقة للوصول للمرمى بدل ما يعتمد على شكل واحد طول المباراة

التعادل ده جرس انذار مش حكم على الموسم كله ولسه بدري نحكم على الفريق لكن لو نفس المشاكل فضلت بتتكرر في الماتشات الجاية ساعتها لازم نسال بجد الاهلي بيتحسن ولا بنعيد نفس الاخطاء بشكل مختلف

Address

الاسكندريه
Alexandria
21500

Website

Alerts

Be the first to know and let us send you an email when NileNet Sports Media posts news and promotions. Your email address will not be used for any other purpose, and you can unsubscribe at any time.

Shortcuts

Share

Category