Fatma Gaber - life Coach

إيه رأيك لو قلتلك إن الكمالية مش عدو الإنجاز... الكمالية عدو التجربة؟
كلنا فاكرين إن الكمالية بتعطل الإنجاز.
بس ده جزء صغير جدًا من الحقيقة.
الحقيقة الأكبر...
إن الكمالية بتحرمك من إنك تعيشي التجربة أصلًا.
بتخليكي تستني السفر لحد ما يبقى مثالي.
تستني المشروع لحد ما يبقى كامل.
تستني الأمومة لحد ما تبقي جاهزة.
تستني الحب لحد ما تبقي واثقة.
وتستني الراحة...
بعد آخر إنجاز.
لكن الحياة مش بتتأجل.
إنتِ اللي بتتأجلي عنها.
الكمالية مش بتسرق منك النتائج...
بتسرق منك العمر اللي كان ممكن تعيشيه.
وده الفرق بين شخص عاش...
وشخص كان طول الوقت بيستعد للحياة.

إيه أكتر حاجة أجلتيها في حياتك لأنك كنتِ مستنية "الوقت المناسب"؟




#كوتشينج

أوقات كتير... إحنا مش بنخاف من الفشل.

إحنا بنخاف من اللي هنقوله لنفسنا بعده.

تخيلي إن حاجة كنتِ بتتمنيها ما نجحتش.

مشروع.

مقابلة شغل.

امتحان.

أو حتى موقف بسيط في يومك.

إيه أول صوت هيظهر جواكي؟

"أنا مش نافعة."

"أنا دايمًا ببوظ كل حاجة."

"كنت عارفة إني مش هعرف."

الغريب...

إننا متعودين نسمع الصوت ده لدرجة بقينا فاكرينه طبيعي.

مع إنه لو صاحبتك مرت بنفس الموقف...

مستحيل تكلميها بنفس القسوة.

هتقولي لها:

"دي تجربة."

"كلنا بنغلط."

"المرة دي ما نجحتش... لكن ده ما يقولش مين إنتِ."

طيب...

ليه الكلام اللي يستحقه الناس...

بنحرمه عن نفسنا؟

الحقيقة إن اللي بيتعبنا مش كل تجربة صعبة.

اللي بيتعبنا إن كل تجربة بتتحول لمحاكمة.

بدل ما نسأل:

"إيه اللي أتعلمه؟"

بنسأل:

"إيه المشكلة فيا؟"

وده الفرق بين الكمالية والمرونة النفسية.

الكمالية بتحول الغلط إلى حكم على قيمتك.

أما المرونة النفسية...

فبتفصل بين اللي حصل...

وبين مين إنتِ.

لأنك ممكن تغلطي...

من غير ما تكوني غلطة.

وممكن تفشلي في تجربة...

من غير ما تكوني إنسانة فاشلة.

🤍 لو كان عندك فرصة تغيري جملة واحدة بتقوليها لنفسك بعد أي غلطة...

هتغيريها لإيه؟




#كوتشينج

"أكتر جملة محيرة ممكن تسمعيها من ست:

أنا المفروض أكون مبسوطة... بس مش مبسوطة."

وعلى طول تبدأ تلوم نفسها.

يمكن أنا جاحدة.

يمكن بطلب كتير.

يمكن المشكلة فيا.

لأن منطقياً...

الحياة ماشية.

المسؤوليات متشالة.

المطلوب بيتعمل.

والناس حواليها شايفين إن الأمور كويسة.

لكن اللي محدش شايفه...

إنها بقالها سنين عايشة على وضع "التالي".

بعد ما أخلص الحاجة دي...

بعد ما المشكلة دي تتحل...

بعد ما أوصل للهدف ده...

بعد ما أبقى أحسن شوية...

ساعتها هرتاح.

ساعتها هفرح.

ساعتها هحس بالرضا.

لكن "ساعتها" مبتجيش.

لأن الكمالية عندها خدعة ذكية جدًا.

كل ما توصلي لمكان...

تقنعك إن المكان اللي بعده هو اللي يستحق الاحتفال.

فمتفرحيش.

متنبسطيش.

متقفليش صفحة وتقولّي:
"أنا عملت كويس"

تفضلي طول الوقت مستنية النسخة الأفضل.

والنسخة الأفضل.

والنسخة الأفضل.

لحد ما الحياة نفسها تتحول لمشروع تطوير مستمر.

مش حياة.

وعشان كده أوقات المشكلة مش إنك ناقصك إنجاز جديد.

المشكلة إنك نسيتي تستمتعي باللي موجود بالفعل.

ونسيتِ إن الرضا مش جائزة بتتاخد في آخر الطريق.

الرضا مهارة.

والكمالية للأسف...
من أكتر الحاجات اللي بتسرقها مننا.

لو حسّيتي إن الكلام ده بيوصفك...
اعملي ريأكشن ❤️




#كوتشينج

"مش إنتِ اللي قررتِ تبقي كمالية... في الحقيقة فيهحد تاني هو اللي علّمك"

يمكن تستغربي تقري الجملة دي ،

لأن الكمالية ساعات بتحسسنا إنها جزء من شخصيتنا او اننا اتولدنا بيها.

"أنا كده من وأنا صغيرة"

"دي طبيعتي"

"أنا بحب كل حاجة تبقى صح"

لكن لو رجعتي خطوة لورا...

هنكتشفي إن أغلبنا ما اتولدش وهو خايف يغلط.

ولا اتولد وهو حاسس إن قيمته مرتبطة بأدائه.

دي حاجات غلط اتعلمناها

بشكل مباشر أو غير مباشر

يمكن كبرتي في بيت كان فيه الغلط بيتقابل بانتقاد أكتر من التعلم.

أو بيت كان الحب فيه مرتبط بالإنجاز:

"شاطرة عشان جبتِ الدرجة النهائية"

"برافو عشان عملتي كل حاجة صح"

يمكن شوفتي حد كبير في حياتك ما بيرتاحش أبدًا،

دايمًا شغال،
دايمًا قلقان،
دايمًا حاسس إن اللي عمله مش كفاية.

ومن غير ما تاخدي بالك...

اتعلمتي إنك لو ارتاحتي تبقي كسوله،

وإن الغلط دايما خطر،

وإن لازم تبقي قوية طول الوقت.

المشكلة إن القواعد دي كانت محاولة للحماية وقتها...

لكن النهارده؟

بقت هي السبب في تعبك،
بقت هي السبب إنك بتحسي بالذنب لما ترتاحي،
أو إنك تأجلي حاجات مهمة لأنك عايزاها تطلع كاملة.

أو إنك تعملي 10 حاجات كويس...
وتفضلي مركزة في الحاجة الوحيدة اللي ما مطلعتش بأحسن صورة زي ما كنتِ عايزة.

والهدف من الكلام ده مش إننا نلوم أهلنا،

كل جيل كان بيربي علي قد اللي يعرفه.

لكن الهدف إننا نفهم.

لأن الحاجة اللي اتعلمتيها...
ممكن تتعلمي غيرها.

والصوت اللي اتربى جواكي سنين...
ممكن تبدئي تسأليه:

"هل فعلًا لازم أعيش بالقانون ده لحد دلوقتي؟"

فاسألي نفسك السؤال ده:

مين أكتر حد في عيلتك كان بيخاف من الغلط؟
أو كان صعب يرضى عن نفسه؟

غالبًا هتلاقي بداية الخيط هناك 🤍




#كوتشينج

"الكمالية عندها عادة غريبة جدًا…

بتخليكي تتعلمي أقل رغم إنك مهتمة تعملي كل حاجة صح"

إزاي؟

لأن أول ما تغلطي…

بدل ما تسألي:
"إيه اللي حصل؟"

تسألي:
"إيه المشكلة فيا؟"

وبدل ما تركزي على الموقف…

تركزي على نفسك.

فتتحول غلطة واحدة…
لحكم كامل على شخصيتك.

وده سبب إن ناس كتير بتفضل واقفة مكانها.

مش لأنهم مش بيتعلموا.

لكن لأنهم مشغولين بمعاقبة نفسهم.

التجاهل مش حل.

وجلد الذات مش حل.

الحل إنك تشوفي الغلط كمعلومة.

المعلومة ممكن تفيدك.

أما الإهانة؟
فعمرها ما علمت حد حاجة.

لما تغلطي المرة الجاية…

حاولي تستبدلي:
"أنا إزاي كده؟"

بـ:
"الموقف ده علمني إيه؟"

الفرق أبسط مما تتخيلي…
لكن نتائجه كبيرة جدًا 🤍




#كوتشينج