Sondos El Hayah

🌸يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ 🌸
سورة الحجرات آية ١٣

سمعت الأية دي في صلاة الجمعة امبارح
"فيه مسجد جنب البيت بالظبط والصوت بيكون عالي طبعاً "

انا كنت بعمل حاجات ولما سمعت الأية وقفت 🤍

سبحان الله ربنا مدينا كل الإجابات

احنا ليه مختلفين ؟
رجال ونساء
عربي واجنبي
مصري،أفريقي، امريكاني، لبناني، إنجليزي، ...
ابيض، اسمر، صيني، هندي، ..
حتى في كل دولة
فيه اختلافات
يعني في مصر مثلاً
فيه اسكندراني،بورسعيدي،صعيدي،سيناوي،نوبي،اسواني،...

ليه؟
عاشان نتعرف ونقرب🤍

بس كدة بالبساطة دي ؟
اه بالبساطة دي 😊🤍

لأننا لو كلنا كنا شبه بعض
كلنا جنس واحد مفيش رجال ونساء
ولا في دول ولا الوان ولا لهجات
مش هنحب نعرف بعض
ما كلنا شبه بعض ايه الجديد

لكن لأن رب العالمين عارف بغريزة الأنسان للبحث والأكتشاف والعلم والمعرفة
وهو بكل خلقه عليم سبحانه 🤍
عارف اننا داخلياً بننجذب للغير مألوف
وبنبقى عايزين نعرف اكتر ونكتشف اكتر
الرجل ينجذب للمرأة والعكس
لأنهم مختلفين كل واحد مش عارف التاني وطبيعته وعايز يكتشفه لأنه بالنسباله مختلف عنه

العربي ينجذب للاجنبي والعكس
كل واحد يعرف ثقافة التاني حياة التاني لغة التاني وما الي ذلك

ولأن ده الي هيخلي فيه تعارف
وحب اصلاً وشغف للتعارف

انا لما اقابل بنت مثلاً لبنانية وبنت مصرية
هيبقي عندي فضول أكبر بكتير اني اتعرف على البنت اللبنانية واكون صداقة معاها عن المصرية
طب ليه؟
لأني هبقى عايزة اعرف اكتر عن لهجتها وعادتها وثقافتها
وطرقهم في الأكل وطبيعة حياتهم وووو

وهو ده فايدة الأختلاف 🤍
بيخلي فيه انجذاب 🤍
وده بسبب الغموض وغريزة حب المعرفة والأكتشاف 🤍

وكذلك الرجال والنساء
دايماً بنقول اننا مش بنفهم بعض وأننا مختلفين ووو

طب مش يمكن عاشان كدة احنا بننجذب لبعض 🤍
مش يمكن لو فهمنا بعض مش هيكون جوانا نفس الشغف اننا نقرب من بعض ؟

فا المشكلة مش في الأختلاف بالعكس
الأختلاف نعمة كبيرة على جميع المستويات 🤍
لانه بيخلينا نكتشف حاجات عن نفسنا وعن الأخرين 🤍
ونتعلم من الأخرين والآخرين يتعلموا مننا 🤍

المشكلة الحقيقية في التقبل
اني اقبل اختلافي واختلاف الأخر
وأحب اختلافي وأحترمه
وأحب اختلاف الأخر واحترمه

فأحنا مش مخلوقين عاشان نفهم بعض احنا مخلوقين عاشان نقرب من بعض ونتعرف على بعض ونتعلم من بعض
وأهم شئ "نتقبل بعض" 😊🤍
بأختلافاتنا
بمشاكلنا
بمخاوفنا
بمميزاتنا وعيوبنا 🤍

وساعتها هنحس ان مش مهم اوي الفهم مدام فيه حب وتقبل 🤍
وهنكتشف ان الحاجات الي بتجمعنا أكبر بكتير من كل الاختلافات
كفاية اننا بنتشارك نفس الأرض ونفس السما
نفس الشمس ونفس القمر
نفس الروح ونفس الحياة
نفس الأكسجين
ونفس الحب 😊🤍

بتمنالكم كل خير وحب وسعادة😊🤍🌸
يومكم جميل 😊🤍🌸

فصول السنة الأربعة 🤍
الي كل فصل منهم ليه رسالة جميلة 🕊🤍
عاشان نتعلم شئ عن نفسنا
وعن إمكانياتنا

🌫شتاء
بيعلمنا التفرد والأنعزال والقوة والتفكير العميق والشفاء
"زي ما الشجر بيكون من غير اي ورق وبيجهز نفسه لأستقبال الربيع بغصون أقوى وامتن بعد ما بيواجه لوحده الأجواء الشتوية القوية "

🌿🌸ربيع
بيعلمنا أكتساب العلاقات الجديدة
والمعارف والصداقات وننهي فترة الانعزال
ونبتدي الانفتاح والنشاط والبهجة
"الأزهار بتتفتح والشجر بيتملي أوراق جديدة خضرة وجميلة 🤍🌿"

🏖صيف
بيعلمنا الاستمتاع بالعلاقات الي اكتسبناها
والنشاط والحيوية والحركة والانسجام
برغم الحرارة العالية احياناً

🍂خريف
بيعلمنا التنظيف
وفلترة العلاقات
"زي الشجر بالظبط لما بيتخلى عن أوراقه "

بيكون الموضوع في الأول صعب اننا نتأقلم مع التغيير
لكن لما نتعلم ان احنا بنمر بفصول في حياتنا
وان الي حوالينا هما كمان بيمروا بفصول في حياتهم
ولازم نحترم ده

وفي وقت لازم حاجات تتخلى عننا وحاجات نتخلى عنها
ووقت تاني لازم نكون فيه لوحدنا تماماً
مش لأى شئ غير اننا نكون أقوي
وان كل شئ مُقدر ومكتوب
ومفيش اي داعي للمقاومة والسيطرة
وان الحياة مش كلها ربيع وصيف وبهجة وزحمة

ساعتها فصول حياتنا هتمر أسهل بكتير عن الأول 😊🤍
لأننا ساعتها هنبقى مدركين ان التغيير ضروري عاشان نتعلم حاجة مختلفة 😊🤍
وهنحترم فصولنا وتقلباتها 🤍
وفصول الي حوالينا وتقلباتهم 🤍
بكل حب 😊🤍

بل وكمان هنحب التغيير ونستمتع بكل لحظة وكل فصل
وجوانا أمل أن اكيد الي جاي هيكون مختلف ويمكن يكون الربيع مين عارف 😊🤍🌿

بتمنالكم يوم جميل 😊🤍🌸

النهاردة بسأل عادي جداً
هو النهاردة ايه ؟
"لأني حرفياً ذاكرة سمكة مع حبي الشديد واحترامي للسمك 🤍"
فالرد المنطقي من الي حواليا كان ان النهاردة الأحد
فرديت انا بكل تلقائية
"النهاردة الحد محدش يكلم حد"

جدو الله يرحمه كان لما يسأل حد انهاردة ايه ويصادف انه يبقى الحد
كان دايماً يرد الرد ده
" انهاردة الحد محدش يكلم حد "

ففكرت اننا اد ايه بناخد من كلام ومعتقدات أجدادنا بشكل رهيب
وبنردده من غير حتى منفكر

انا فاكرة لأني كنت طفلة فضوليه وبحب أسأل كتير
كنت اقول ليه يعني محدش يكلم حد ؟
كانوا يقولولي أهلنا قالولنا كدة

انا فاكرة بردو جدتي كنت كل لما اضحك بصوت عالي
وانا اصغر كانت ضحكتي عالية وعلى طول بحب الضحك والفرفشة في أي تجمع عائلي
كانت تقولي
" متضحكيش للضحك يرميكي يطمع ابن الحلال وابن الحرام فيكي "
وكنت كل لما اسألها ايوة يعني مضحكش ليه يعني وايه علاقة ابن الحلال وابن الحرام بالضحك مش فاهمة
هو فيه حد غيرنا في البيت
كانت تقولي هي امي كل لما كنت اضحك زيك كدة كانت بتقولي كدة
وبعدين افرضي حد طالع او نازل عالسلم سمع ضحكتك

هل الحاجات دي صحيحة
أكيد لا
هل صدقتها في وقت من الأوقات
طبعاً اه
وقعدت فترة كبيرة مش بضحك في تجمعات
وبعد ما كنت فرفوشة بقيت كئيبة
منا خايفة بقى ابن الحلال وابن الحرام يطمعوا فيا من ضحكتي الي من ورا الباب دي 😄

احياناً بنصدق المعلومات مش لصدق المعلومة
لكن لصدق الي قايلها وقربه العاطفي
طب هل المعلومة دي صحيحة ؟
مش مهم
المهم ان الي قالها مهم عندي

طب هل المعلومة دي هتفيدني في حياتي ؟
مش مهم تفيدني
المهم اسمع كلام الي قالها لأني بحبه ولأنه بيحبني وأكيد يعني الحد ده مش هيأذيني لأن ده جدي ده جدتي ده امي ده ابويا وهكذا

وانا مش بقول منسمعش الكلام
لكن نعقل الكلام
وخصوصاً المعتقدات والموروثات الثقافيه
الي اغلبها نابع من جهل وعدم ايمان وخوف من المجهول والاختلاف مش أكتر

ونتقبل خطئها عادي
ونشيل الكبر والإيجو على جنب
ومنعملش غلطة الجاهليه
لما سابوا دين الله الحق
لتمسكهم بما كان عليه آبائهم الأولين

يومكم جميل 😊🤍🌸

حب وسلام 🤍🕊

مرشدتي راشيل اللبنانية 🤍
رشا صاحبة الروح الطيبة الجميلة 🤍
انقطعت عنا بسبب الأحداث
لكنها طمأنتنا اليوم انها بخير الحمدلله 🤍
بس قلبها حزين على بلدها وأهلها
ربنا يسلمها ويسلم أهلنا بلبنان 🤍
ويسلم كل البلاد العربية والعالم كله 🤍
وتعدي الفترة الصعبة دي على خير 🤍

قلبنا حزين ..
لكن رب العباد دايماً موجود هو مولانا ونعم النصير 🤍

الي بيحصل حالياً في الأرض في رأيي هو شئ طبيعي
لأننا نسينا للأسف اساس وجودنا هنا ايه
وده بقاله سنين
وعي جمعى كله ظلام وأفكار مليانة خوف وقسوة وكره للأخر
خلانا ننسى فطرتنا وسبب وجودنا الأساسي هنا على الأرض

نبدئ من الأول ونفكر بعض
سبب وجودنا ايه ؟

١- عبادة رب العالمين
٢- إعمار الأرض
"بالخلفة والأولاد ، والحفاظ عليها وعلى مواردها ونشر المحبة والسلام"
٣- الحب
" حب رب العالمين ، حب بعضنا البعض ومساعدة بعض بكل حب "
القوي يساعد الضعيف
الغني يساعد الفقير
المتعلم يساعد الجاهل
ونكمل بعض ومنحكمش على بعض

وكل الرسل الي كانت بتيجي كانت بتذكر الناس بده
-من اول سيدنا إبراهيم
لما قومه نسيوا اهم حاجة وهي عبادة رب العالمين

-سيدنا لوط
لما قومه نسيوا تاني حاجة وهي إعمار الأرض
وقومه بقوا بيأتوا الرجال ش**ة من دون النساء
وبالتالي كانت مسألة وقت ومش هيكون فيه ذرية وأولاد

-سيدنا موسى
لفرعون وطغيانه ومعاملة من حوله كعبيد وهو اله لهم
غير الفساد

- سيدنا عيسى
لبني إسرائيل
وحبهم لأنفسهم فقط

- سيدنا محمد
للعالمين

وكانت مهمتهم جميعاً يفكروا الناس بكل ده
عبادة الله
وان كلنا سواسية
وحب الخير للغير
وإعمار الأرض بالذرية الطيبة والعلم والعمل الطيب والخير

احنا دلوقتي بقينا بنعمل ايه
ولا اي حاجة
عبادة رب العالمين بقت اخر حاجة المهم الفلوس والمادة وووو

الذرية والأولاد
أغلب الناس مبقتش عايزة تخلف
خايفة من المستقبل وهيصرفوا عليهم ازاي ووو
ده غير الكارثة الي بقت مقننة عادي في الدول الأجنبية الي هما نفس منهج قوم لوط

المحافظة على الأرض ومواردها
بالعكس بيدمروا الأرض ومواردها

حب بعضنا البعض
كل واحد بيقول انا ومن بعدي الطوفان

مساعدة بعض
والفقير يساعد الغني والدولة القوية تساعد الضعيفة
لا للأسف العكس القوي بيضرب الضعيف وعايز يدمره على اد ما يقدر
وفيه كمية كره غير طبيعية

فأحنا بنعمل ايه هنا
بندمر بعض وبندمر نفسنا وبندمر الأرض
الي ربنا نزلنا فيها عاشان نعمرها

الأرض بقت مليانة خوف
والخوف للأسف هو الدافع لكل الكوارث دي
من حروب وفقر ودم وموت وكره
والخوف اساسه الشيطان
وسبب انتشاره قلة وضعف الأيمان برب العالمين
الي خايف على سلطته والي خايف من الفقر والي خايف من الموت والي خايف من المرض والي والي ...

نسينا قوله تعالي
🌿الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ وَاللَّهُ يَعِدُكُمْ مَغْفِرَةً مِنْهُ وَفَضْلاً وَاللَّهُ وَاسِعٌ عَلِيمٌ 🌿
[سورة البقرة:268]

الي بيحصل دلوقتي استغاثة من الأرض
وصحوة للكون كله عاشان يستيقظ من الظلام الي بقاله سنين
والي هيختار انه يفضل غافل هيجنى نتيجة ده
لأن الي بيحصل ده المفروض يهز اي انسان ويفوقه

وبتمنى وبدعي من كل قلبي ان الأرض ترجع تاني مليانة بالحب
بالرحمة والتسامح والمحبة
وان الخوف ينتهي من قلوب البشر للأبد
وتتبدل كل ذرة قسوة بالرحمة 🤍
زي ما الخوف هو مُحرك لكل الدمار ده
الحب هيبقى هو المحرك للجمال والرحمة والطيبة والمحبة 🤍🌿
وترجع الأرض أجمل واحسن من الأول 🤍🌍
واحنا كمان نرجع أجمل واحسن من الأول 🤍
نرجع لفطرتنا ولأسلامنا وتسليمنا لرب العالمين 🤍

وعجبي 😊🤍

لا تجبر الإنسان ولا تخيّره يكفيه ما فيه من عقل بيحيّره اللي النهارده بيطلبه ويشتهيه هو اللي بكره ح يشتهي يغيّره عجبي! صلاح جاهين الغناء في الخلفية : سيد مكاوي #خالد_النبوي #خالد_النبوى #khaledelnabawy #العربي_أصلي #سيد_مكاوي #صلاح_جاهين

بقيت بحب القهوة 😊🤍

الي يعرفني من زمان يعرف اني مش بحب القهوة وبتعب منها
كان بيحصلي ضربات قلب سريعة على ضغط عالي يعني شوية حاجات حلوة كدة 😅
كنت بشرب شاي بس
ومش بشكل عادي
بشكل رهيب كل شوية شاى او شاي بلبن
وكنت بتعب برده بالمناسبة 😅

بس الغريب بعد رحلتى وشغلى على نفسي
ولما بدأت احب نفسي أكتر 🤍
تلقاءياً بقيت أوقف اي شئ بيأذيني او مش بيساعدني
سواء أشخاص او عادات
وفجأة بطلت الشاي وبقيت العكس تماماً مبقتش احبه ومش عايزة اشربه خالص

وفي نفس الوقت بقيت منفتحه اوي اني اجرب حاجات جديدة واماكن جديدة وأدي فرصة تانية للحاجات الي مكنتش بحبها

وانا اساساً كنت شخص لما بروح اي مكان بطلب نفس الطلب الي بقالي سنين كل لما بروح بطلبه كل مرة 😅
بروح نفس الأماكن بطلب نفس الحاجات بشرب نفس المشروب " ملل😅"
مكنش بحب اجرب او اغامر واهو الي نعرفه احسن من الي منعرفوش وخلاص 😅
فأني اجرب ده في حد ذاته معجزة اصلاً 😅🤍
فكرة "التغيير" مكنتش بفكر فيها خالص

ابتديت الأول اجرب اعشاب مختلفة وقعدت فترة بشرب أعشاب وحبتها اوي بالمناسبة 😊🤍

بس فجأة انا عايزة أجرب القهوة 😊
مع اني جربتها قبل كدة و المفروض بتعب منها
بس فيه صوت كدة جوايا عايز يجربها

المدهش اني بجد شربتها كأني اول مرة اشربها في حياتي
والغريبة اني حبيتها جداً 😊🤍
والأغرب اني متعبتش زي ما كنت فاكرة 🤍

سبحان الله 😊🤍

مع اني نفس الشخص بس فيه شئ اتغير
فيه شئ مختلف
ومش في ده بس في حياتي كلها
نظرتي للحياة وللناس الي في حياتي
ولنفسي

بقيت عايزة اجرب واكتشف طول الوقت
لأنها بالنسبالي حرية 😊🤍
عكس النمط السلبي المتكرر الي كنت بلف جواه الي مش عايزة اخرج منه أو أغيره وأجرب شئ جديد غيره

ولأني عشت الحرية وجربتها 🤍
عرفت قيمتها 😊🤍
وانها اد ايه حلوة 😊🤍

و الي بيجرب الحرية مرة
للأسف مبيعرفش يبقى أسير تاني 😊🤍
ودي أحلى حاجة 😊🤍

يومكم جميل 😊🤍🌸

حاجة سريعة لو عايزين تعرفوا انتوا عندكوا اتزان ولا لا

لو انت ذكر 🩵
ولاقيت نفسك بتنجذب للأنثى المليانة شوية وعندها أنوثة عالية يعني صوتها واطي رقيقة وما الي ذلك
يبقي عندك ذكورة عالية

لو بتنجذب لأنثى متوسطة في كل شئ
تبقى انت كمان اتزانك متوسط

لو رفيعة ومعضلة وصوتها عالي وعندها ذكورة عالية
يبقى عندك أنوثة عالية جداً

ولو أنثى 🩷
ولاقيتي نفسك بتنجذبي للرجل الطري المطيع الخجول " الأجنبي 😄"
يبقى عندك ذكورة عالية جداً
قال اجنبي قال مالهم المصريين مش فاهمة والله 😅🤍

لو الرجل متوسط في كل شئ
يبقي اتزانك متوسط

لو بتنجذبي للراجل الي فعلاً يستحق كلمة راجل حمش غيور على أهل بيته ناشف مع الكل بس لين معاكي بيحترمك وبيخاف عليكي بيعرف يحميكي

وعادي بالنسبالك تسمعي كلامه وتخضعي ليه من غير متحسي بالدونية او او " ودي مهمة جداً "
ومش بدافع خوف
بل لأنك واثقة في نفسك وواثقة فيه وعارفة ان انتي تهميه
يبقى عندك أنوثة متزنة وعالية لحد كبير

وربنا يقدرنا علي فعل الخير 😁🤍
وفيديوهات د. احمد الدملاوي بتشرح كل ده بتفصيل اكتر 😊🤍
يومكم جميل 😊🤍