أيمن جابر - Ayman Gaber

ماذا حدث للعميد؟!

أنا هنا مش بتكلم عن خناقة أسرية، ولا معنيّ أعرف مين بدأ ومين غلطان في واقعة الساحل.. دي تفاصيل تخص أصحابها، والتحقيقات هي اللي تحدد المسؤوليات.

لكن اللي حصل النهارده في الساحل الشمالي لازم يخلينا نسأل سؤال أكبر:

ماذا حدث لحسام حسن؟!

حسام حسن مش شخص عادي..

ده «العميد».. أسطورة كروية مصرية.. واحد من أهم الأسماء اللي صنعت تاريخ الكرة المصرية.. والنهارده هو المدير الفني لمنتخب مصر.

وعشان كده، من حقنا نسأل:
هل كان لازم خلال الشهور الأخيرة تتحول حياته الخاصة إلى مادة مفتوحة للجمهور؟

قبل وأثناء وبعد كأس العالم، شفنا حضورًا متزايدًا لحياة حسام حسن الشخصية على السوشيال ميديا والإعلام، وظهور زوجته دانا بشكل متكرر، وفيديوهات ومكالمات ولقاءات إعلامية جمعتهم، لدرجة إن حسام نفسه تحدث عن إنه لم يكن معتادًا على هذا النوع من الظهور لكنه اعتاد عليه مع الوقت.

أنا مش ضد إن الإنسان يعيش حياته، ولا ضد إن زوجته تدعمه، ولا ضد إن يكون عنده حياة طبيعية بعيدًا عن الملعب.

لكن المشكلة في الحدود.

في شخصيات شهرتها ونجوميتها ومكانتها تخلي الحفاظ على الخصوصية والهيبة مسؤولية، مش رفاهية.

وحسام حسن تحديدًا كان دائمًا معروفًا بالشخصية القوية، الحادة، الثائرة، اللي ما بتسمحش بسهولة لأي حد يتجاوز حدودها.

وعشان كده المشهد الحالي محيّر جدًا..

إزاي شخصية بحجم حسام حسن، بكل تاريخه وهيبته، تقبل إن تفاصيل حياته الخاصة تبقى بهذا الشكل أمام الجمهور؟

وإزاي المدير الفني لمنتخب مصر يسمح بأن يتحول جزء من حياته الخاصة إلى مسلسل مفتوح على السوشيال ميديا والإعلام؟

والنتيجة ظهرت النهارده في مشهد مؤسف داخل الساحل الشمالي.

تقارير صحفية تحدثت عن مشادة بين زوجته الحالية وطليقته، تطورت إلى اشتباكات وانضمام أطراف أخرى، وسط تدخل الموجودين وطلب النجدة، بل وتحدثت تقارير عن سقوط حسام حسن مغشيًا عليه أثناء الواقعة.

بغض النظر عن تفاصيل الواقعة ومن المخطئ فيها..

المشهد في حد ذاته لا يليق بالعميد، ولا يليق بتاريخ حسام حسن، ولا يليق بمكانة المدير الفني لمنتخب مصر، ولا بالصورة التي يجب أن يظهر بها قائد الجهاز الفني أمام لاعبيه وجمهور المنتخب.

والأهم..

إن اللي حصل النهارده مش مجرد واقعة عائلية وانتهت.

لأن الشخص العام لما يفتح باب حياته الخاصة للجمهور، لازم يعرف إن كل تفصيلة ممكن تتحول في لحظة إلى أزمة عامة.

حسام حسن صنع تاريخًا كبيرًا جدًا في كرة القدم المصرية..

فلا تسمح لأمور خارج الملعب أن تخصم من هذا التاريخ.

ارجع يا عميد.. ارجع للشخصية اللي عرفناها.. للهيبة.. للكبرياء، ولحسام حسن اللي كانت حياته الخاصة خطًا أحمر، وتركيزه كله في الملعب والمنتخب.

قليلا من الخصوصية يا كابتن !!

✍️

بتعملوها إزاي دي ؟! انا عاوز بيان..

يبدو إن موسم الانتقالات عامل هسهس لبندق! 😂

مع كل خطوة إيجابية أو صفقة للأهلي، لازم بندق يطلع لنا بمنشور يحط علامة استفهام كبيرة حول حالته النفسية! 😂

من ساعات، وعلى صفحته الرسمية، طلب من إمام عاشور إنه يعمل بيان يعلن فيه موقفه من ملف التجديد مع الأهلي، وقارن ده ببيان عبدالله السعيد وإعلانه الاستمرار مع الزمالك.

بصراحة… مش فاهم وجه المقارنة في الحالتين؟!

عبدالله السعيد لاعب عنده ٤١ سنة، وفي نهاية مشواره الكروي، وتمرد على ناديه ورفض الانضمام لمعسكر الفريق بسبب مستحقات مالية متأخرة، وكان موقفه ببساطة: فلوسي يا بلاش.

إدارة الزمالك دبرت الفلوس، وقالت له اعمل بيان عشان شكل النادي وعشان نهدّي الجمهور.

طيب… إمام عاشور إيه علاقته بكل ده؟!

إمام في بداية مشواره، وفي عز تألقه، وأهم وأفضل لاعب في الكرة المصرية حاليًا من وجهة نظر كثيرين، وعقده مستمر مع الأهلي لمدة عامين.

واللاعب موجود مع الفريق في معسكر إسبانيا، وملف التجديد مفتوح، وربما تكون هناك عروض تمت مناقشتها، لكن في النهاية الأهلي أعلن بشكل رسمي غلق جميع ملفات التجديد أو بيع أي لاعب خلال الفترة الحالية، حفاظًا على حالة الاستقرار الفني.

فـ إيه الداعي إن إمام يعمل بيان؟!

بيان لمين؟
وعشان إيه؟
وإيه الرسالة اللي المفروض يوصلها؟!

والأهم من ده كله… على المستوى الشخصي أو حتى في شغلك الإعلامي، إيه اللي إنت عاوز توصله بالضبط؟!

والأغرب إن مفيش ساعات عدّت على إعلان الأهلي التعاقد مع أكرم توفيق بعد إصابة بلعمري وانتهاء موسمه، إلا وبدأنا نسترجع ردود أفعال ومواقف سابقة للبعض من ملف التجديد أو الاحتراف، ونسمع جملة من نوعية:

"بتعملوها إزاي دي؟!"

طيب يا بندق… إنت مش فاهم إيه بالضبط؟!

لاعب عقده انتهى، واللاعب والنادي شافوا إن احترافه يحقق مصلحة الطرفين.

البعض شاف إن استمرار اللاعب مع الفريق كان أفضل، واعتبر إن اللاعب فضّل الاحتراف على الاستمرار مع الأهلي.

والبعض الآخر شاف إن الفريق مش محتاجه، ورحّب برحيله.

طبيعي جدًا!

هتلاقي ناس بترحب بعودة اللاعب، وناس شايفة إن القرار مش مناسب.

طيب عاوزهم يطلعوا يقولوا إيه؟!

هل كل لاعب لازم يعمل بيان يشرح فيه موقفه من كل قرار اتخذه في حياته الكروية عشان خالد الغندور يكون مرتاح؟!

حد يفهمنا بس… بندق عاوز إيه؟ وعشان إيه؟ وليه عشان نريحه؟!

إحنا مقدرين إن خطوات الأهلي في موسم الانتقالات الحالي عملت لك هسهس شوية 😂

خصوصًا إن ناديك عنده عقوبات تأديبية، ولاعبين هربانين، ومفيش فلوس، والحالة دنك…

بس اهدى يا بندق…
صحتك أهم. 😂🦅
✍️
#الأهلي #الزمالك

سابقة هي الأولى في تاريخ الكرة المصرية.. درس وعِبرة..

في سابقة يمكن تكون الأولى من نوعها في تاريخ الكرة المصرية.. ويمكن ما تتكررش تاني.

في مارس 2018، كان عبدالله السعيد واحد من أهم، إن لم يكن أهم لاعب في مصر وقتها.

عقده مع الأهلي كان قرب يخلص، واللاعب كان بيطلب مبلغ كبير جدًا عشان يجدد، والمفاوضات كانت بتتسحب لحد آخر لحظة.

وفي نفس الوقت.. كان فيه سيناريو تاني بيتكتب في الخفاء.

عبدالله السعيد كان وقع للزمالك لمدة موسمين مقابل 40 مليون جنيه كاش، وحصل بالفعل على مقدم التعاقد، حسب ما أعلنه مسؤولو الزمالك وقتها. بل إن تفاصيل الصفقة اللي خرجت وقتها قالت إن اللاعب كان طالب في البداية 60 مليون على 3 مواسم، وانتهى الاتفاق على 40 مليون في موسمين تُدفع دفعة واحدة، مع امتيازات إعلانية وسكنية.

الزمالك كان بيجهز للإعلان عن الصفقة باعتبارها "صفقة القرن".. وكان الهدف واضح: ضربة مدوية للأهلي وجماهيره، وانتصار معنوي كبير في صراع لا علاقة له بكرة القدم داخل الملعب.

لدرجة إن مرتضى منصور دخل في مداخلة مع عدلي القيعي، أحد أهم رجال الأهلي في ملف التعاقدات، وقال له "مبروك التجديد لعبدالله السعيد."

وكان واضح إن فيه محاولة لتسجيل لقطة انتصار.. لقطة تعيش عليها جماهير بتعشق الانتصارات حتى لو كانت وهم وكذب.

لكن الأهلي وقتها فهم إن الحكاية أكبر من مجرد لاعب بيتفاوض على تجديد عقده.... فالنادي استخدم كل أوراقه لإفشال السيناريو.

وكان لتركي آل الشيخ دور بارز وقتها في إعادة عبدالله السعيد للأهلي، حسب ما ظهر في كواليس الأزمة وتصريحات الأطراف المختلفة.

وبالفعل.. عبدالله السعيد جدد للأهلي، والزمالك اكتفى بصور توقيع اللاعب، ثم دخل في أزمة الـ40 مليون جنيه التي حصل عليها مقدم تعاقد، قبل أن يعيدها السعيد لاحقًا للزمالك في يونيو 2018.

لكن هنا حصلت المفاجأة الأكبر... الأهلي كان ممكن يقول خلاص.. اللاعب رجع، والموضوع انتهى... لكن الأهلي اختار طريق تاني تمامًا.

الأهلي أعلن رسميًا عرض عبدالله السعيد للبيع نعم.. أهم لاعب في مصر وقتها تقريبًا أصبح معروضًا للبيع، والأهلي كان عارف كويس قيمة اللاعب الفنية، وكان عارف إن القرار ده ممكن يكلفه كتير.

لكن النادي اختار إنه يقول إن هيبة الأهلي ومبادئه أكبر من أي لاعب مهما كانت قيمته، والتضحية ما كانتش باللاعب بس.

الأهلي كان بيخاطر بعلاقته بتركي آل الشيخ، أحد أكبر الداعمين لمجلس محمود الخطيب وقتها، وأحد أهم الممولين لتحركات النادي وصفقاته، بل والرئيس الشرفي للنادي، وكان فيه حلم كبير وقتها اسمه "ستاد الأهلي"

حلم كان لتركي آل الشيخ دور في الحديث عنه ودعمه، ومع ذلك.. الأهلي اختار مصلحة الكيان وهيبته على حساب كل ده.

عبدالله السعيد خرج من الأهلي راح السعودية.. وبعدين بيراميدز

الزمالك؟ بعد كل اللي حصل.. رجع يتعاقد مع عبدالله السعيد بعد سنوات، في صفقة انتهت بوجود اللاعب بقميص الزمالك.

والأغرب إن اللاعب اللي كان في يوم من الأيام سبب أزمة تاريخية بين الأهلي والزمالك، واللي الزمالك دفع فيه 40 مليون جنيه مقدم تعاقد، أصبح لاحقًا واحدًا من أهم عناصر الزمالك، وساهم مع الفريق في تحقيق بطولة الدوري.

لكن يبدو إن التاريخ أحيانًا بيحب يعمل دايرة كاملة لأن نفس اللاعب، وفي وقت الزمالك فيه بيعاني من نقص عددي، ووقف قيد، واحتياج شديد لكل لاعب مؤثر.. يدخل في أزمة مع النادي، ويرفض الانضمام لمعسكر الفريق في وقت كان الزمالك محتاجه.

يعني باختصار النادي اللي أخدته ولمّعته.. وراهنت عليه.. واعتبرته رمزًا.. في لحظة احتياجك ليه، دخل معاك في أزمة.

وهنا بقى الدرس الحقيقي... مش في عبدالله السعيد وحده ولا في الزمالك وحده.

الدرس في المبادئ... لما يكون عندك مبدأ وتحطه فوق مصلحتك اللحظية.. ممكن تخسر لاعب... ممكن تخسر فلوس... ممكن تخسر علاقات.. ممكن حتى تخسر صفقة أو بطولة... لكن تفضل محافظ على حاجة أهم.. هيبة الكيان.

إنما لما تعيش من غير مبادئ، وتتعامل مع كل موقف حسب مصلحتك اللحظية.. ما تزعلش لما الدنيا تلف.. وتاخد على قفاك القلم المعتبر.

✍️
#الزمالك #الأهلي

تحية خاصة لأحدث المتابعين لي! يسرني انضمامك! ياسر عاشور آل عويضة, Ahmed Moustafa, أبو رقيه, Marwan Ramoon, شاكر عطية, هلال عبدالله جاد, محمد السيد جمعة, Samir Esmail Mekky, امير محمد فهيم, وائل سمير, كرم الصعيدي, Mostafa Ahmed Elsharkawy, المتولي راشد, سعيد زامل, اشرف محمد عبد الفتاح, ابو كريم, Moustafa Hussain, الافندى الافندى, محمود صالح ابومروان, الناظر ابوجمال, ام محمد خالدأبوالجود, ممدوح سباق, محمد عبده, المسك العطر, صاحب السعادة, Mohamed Youesf, وليد الحسيني, Abu Mohamed, Gamal Nageeb, Ahmed Khawas, احمد بسطويسي, Hassan Salah

المغمور وكفاح الظهور !!

فيه تصريحات لازم تتفهم في سياقها قبل ما نحكم عليها، وتصريحات كامل أبو علي رئيس النادي المصري واحدة منها.

الرجل قال بوضوح إن الأهلي «هو الكبير بتاعنا»، وقال إنه بيرفض التعصب الأعمى، وأكد على علاقته الطيبة بالنادي الأهلي والكابتن محمود الخطيب، ودعا للروح الرياضية والتنافس بعيدًا عن التعصب.

طيب.. إيه اللي يخلي رئيس النادي المصري يقول الكلام ده؟

ببساطة لأن فيه جرح قديم ولسه مالتئمش.

العلاقة بين الأهلي وجماهيره وبين النادي المصري وجماهيره مرت بواحدة من أصعب وأقسى مراحل الكرة المصرية، خصوصًا بعد أحداث استاد بورسعيد اللي راح ضحيتها 72 من شباب الأهلي.

والنتيجة إن لحد النهارده مباريات الفريقين بتتلعب في أجواء استثنائية وعلى ملاعب محايدة وبدون حضور جماهيري، بسبب إرث طويل من التوتر والاحتقان.

فهل لما يطلع رئيس النادي المصري ويقول: خلينا نفتح صفحة جديدة ونقلل التعصب ونحسن العلاقات.. دي حاجة تستحق الهجوم؟

بالعكس تمامًا.

ده اسمه حسن نوايا ومحاولة لتهيئة الأجواء، حتى لو العودة الكاملة للعلاقات لسه محتاجة وقت.

كامل أبو علي مش بيحفل على الزمالك، ومش بيحاول يستفز جماهير بورسعيد، ومش بيقول الكلام ده علشان يكيد لحد.

الرجل ببساطة بيتكلم عن علاقة بين ناديين مصريين، وبيحاول يهدّي أجواء متوترة بقالها سنين.

والأغرب بقى هو الاعتراض على كلامه.

لأنك لما تقرأ رد المغمور أسامة خليل، تكتشف إن القضية بالنسبة له مش في تصريحات كامل أبو علي أصلًا.

القضية في حاجة تانية خالص..

راجل مش قادر يتقبل حقيقة إن الأهلي متفوق على كل الأندية المصرية تقريبًا، وعلى مستوى القارة كمان.

فبدل ما يناقش الفكرة، بدأ يتكلم عن «التملق» و«المجاملة» و«العشق والولاء للأحمر»!

طيب يا أستاذ أسامة..

هو كامل أبو علي قال إيه غلط؟

لما قال إن الأهلي كبير أفريقيا.. دي مش حقيقة؟

الأهلي كبير أفريقيا بالتاريخ.. بالبطولات.. بالأرقام.. بالجماهيرية.. بالاستمرارية.. وبحجم تأثيره في الكرة المصرية والأفريقية.

دي مش وجهة نظر أهلاوي متعصب.

دي حقيقة تثبتها الأرقام والتاريخ.

والمفارقة إن أسامة خليل نفسه سبق وقال إن الأهلي نجح في صناعة أمجاده من خلال استثمار مواهب لم تستطع أندية أخرى استثمارها بالشكل نفسه.

يعني لما الكلام يخدم وجهة نظره، الأهلي عنده أمجاد.

ولما رئيس النادي المصري يعترف بمكانة الأهلي، فجأة يبقى «متملق»!

الحقيقة إن المشكلة مش في كامل أبو علي..

المشكلة إن فيه ناس بتعتبر مجرد الاعتراف بتفوق الأهلي إهانة شخصية ليها.

والأغرب إن رئيس نادي جماهيري بيحاول يقتل التعصب ويقرب المسافات..

فيطلع واحد بدل ما يشجع على المبادرة، يحاول يشعل الخلاف من جديد!

يا أستاذ أسامة..

لو عندك اعتراض على سياسة كامل أبو علي ناقشه.

لو شايف إن الأهلي مش كبير أفريقيا، ناقش التاريخ والأرقام.

لكن تحويل تصريح عن نبذ التعصب إلى حفلة من التراكمات والغل تجاه الأهلي مش نقد..

ده كفاح مستمر للظهور على حساب الأهلي.

والأهلي مش محتاج حد يعترف إنه كبير..

الأهلي تاريخه هو اللي بيتكلم عنه.

✍️
#الأهلي #الخطيب #الزمالك

🔴 التحقيق في "عقود الأهلي الثنائية"..

الأهلي يتلاعب في عقود لاعبيه للتهرب من الضرائب.. هذا ما قاله مسئولين وإعلاميين وصفحات ينتمون للزمالك، والحقيقة إنه اللي بيقول الكلام ده إما جاهل باللوائح والقوانين إما مغرض هدفه التشويه! تعالى نحقق في الموضوع ونفهم الحقيقة والواقع بمنتهى الموضوعية...👇👇👇

أولا: الحكاية من البداية:

يعني إيه عقد رياضي وعقد تجاري؟ اللاعب المحترف في زمن الاستثمار مابقاش مجرد لاعب بيجري ورا الكورة، اللاعب بقا "براند" وعلامة تجارية. الأهلي بيعمل مع اللاعب عقدين:العقد الأول (رياضي): ده اللي بيتنظم فيه حقوق النادي واللاعب كرياضي، وده اللي بيتسجل في الاتحاد المصري لكرة القدم.العقد الثاني (تجاري): ده بيتم بين اللاعب و"شركة الأهلي لكرة القدم"، وبينظم الحقوق التجارية، الإعلانات، الرعاية، وحقوق الصور (Image Rights).

ثانيا: ده قانوني وبيوافق لوائح الفيفا (FIFA)؟

نعم، وقانوني جداً: النظام ده مش بدعة من الأهلي، ده النظام المتبع في ريال مدريد، وبرشلونة، ومانشستر سيتي، وأكبر أندية العالم.الفيفا لا تمنع ذلك: الفيفا بتعترف بفصل الحقوق التجارية عن الرياضية، شرط إن العقود دي ماتكونش وسيلة لحرمان اللاعب من حقوقه أو الالتفاف عليها في حال وجود نزاع.

ثالثًا: فزاعة "التهرب الضريبي".. جهل أم تدليس؟

اللي فاكر إن العقد التجاري مابتتدفعش عليه ضرائب يبقى مابيفهمش قانون! العقد التجاري مع شركة الكرة بيخضع لـ ضريبة القيمة المضافة وضريبة الدخل وفقاً للقوانين المصرية.شركة الأهلي بتخصم الضرائب دي وبتوردها لمصلحة الضرائب المصرية بانتظام وبشكل رسمي، يعني مفيش مليم واحد بيضيع على الدولة.الفرق الوحيد: إن نسبة توثيق العقود اللي بياخدها اتحاد الكرة بتتدفع على العقد الرياضي بس، وده منطقي وقانوني لأن الاتحاد بينظم الشق الرياضي مش البيزنس والإعلانات!

رابعًا: الفائدة الإستراتيجية للأهلي:

النظام ده بيفصل ميزانية النشاط الرياضي عن ميزانية شركة الكورة، وبيسمح لدخول رعاة يشيلوا جزء من قيمة العقد التجاري للاعب مقابل استغلال صورته، وده قمة الذكاء الاستثماري اللي بيخفف العبء عن خزينة النادي.

دي حقيقة الأمور فيما يخص عقود اللاعبين في الأهلي، لو حضرتك شايف غيرها، عندك النائب العام، والنيابة العامة، ومصلحة الضرائب، والفيفا.. فوراً تقدم ببلاغات لمحاسبة الأهلي ومسئوليه، ده إذا اعتبرنا إن مؤسسات الدولة غافلة ومغيبة!

لكن نصيحتي ليك.. اهتم بشئونك وشوف بيزيرا الهربان، وعبد الله السعيد المتغيب، وشيكو بانزا ومصيره المجهول وغيرهم من اللي رافضين ينضموا لمعسكر الفريق بسبب مستحقاتهم المالية! 😉🦅

✍️
#الاهلي #الزمالك #الفيفا

خلصت خلاص... مش عارف نزعل ولا نفرح؟

طرابزون سبور أعلن رسميًا موعد وصول محمد صلاح لتركيا، وكمان كشف تفاصيل استقباله، وبكده بقت المسألة مجرد وقت قبل ما يبدأ مشواره الجديد.

بس بعيدًا عن الانتقال نفسه... محمد صلاح كان يستحق نهاية مختلفة.

كان يستحق يعلق حذائه وهو لابس تيشيرت واحد من أكبر أندية العالم، وفي دوري يليق بالاسم اللي بناه على مدار سنين.

صلاح مش لاعب عادي... ده واحد كتب تاريخ، كسر أرقام قياسية في اعظم دوري في العالم، نافس على أكبر البطولات، وخلى اسم مصر يتردد في كل ملاعب أوروبا.

علشان كده، طبيعي إن ناس كتير كانت تتمنى آخر محطة في مشواره تبقى بنفس حجم الأسطورة اللي صنعها، مش خطوة لدوري أقل من المكانة اللي وصل لها.

في النهاية القرار قراره، وكل الاحترام ليه، لكن أمنية أي واحد حب وشجع محمد صلاح كانت إنه يختم رحلته الكروية على أكبر مسرح ممكن... لأنه ببساطة يستحق ده.
✍️
#طرابزون #تركيا

قبل الحديث عن العقود... راجعوا التاريخ... بيان الزمالك الأخير حاول يلمح إن الأهلي بيسجل عقود لاعبيه بأقل من قيمتها الحقيقية... وكأن مجرد وجود أكتر من عقد مع اللاعب يبقى جريمة!

الحقيقة إن الكلام ده يا إما جهل بلوائح الاحتراف... يا إما محاولة لتضليل الجماهير.

بيان الزمالك لم يجرؤ على اتهام الأهلي صراحة، لكنه حاول الإيحاء بأن عقود لاعبي الأهلي لا تعكس قيمتها الحقيقية.

الحقيقة إن وجود عقد عمل بين النادي واللاعب، إلى جانب عقود تجارية مستقلة تخص حقوق الصورة أو الحملات الإعلانية أو الرعاية مع شركة الكرة، مش مخالفة في حد ذاتها، وده نموذج معمول بيه في كرة القدم الاحترافية، طالما كل عقد له غرض حقيقي وملتزم بالقانون واللوائح.

لكن لو الزمالك عنده دليل إن الأهلي زور عقود، أو سجّل عقودًا صورية، أو تهرب من الضرائب... يتفضل يقدمه للنيابة العامة أو مصلحة الضرائب أو اتحاد الكرة. أما البيانات اللي كلها تلميحات، فلا تثبت مخالفة ولا تدين حد.

والأغرب إن اللي بيتكلم النهارده عن نزاهة العقود هو نفس النادي اللي ارتبط اسمه بإحدى أشهر أزمات التعاقدات في الكرة المصرية... قضية ناجي جدو.

وقتها الأزمة ما كانتش على قيمة عقد أو بند مالي، لكن على مستندات وتوقيعات مزورة نُسبت للاعب لإثبات تعاقد محل نزاع، ووصل الأمر لتحقيقات أمام النيابة، واتهم فيها حازم امام وبقت واحدة من أشهر قضايا التعاقدات في تاريخ الكرة المصرية.

وكمان قضية إبراهيم حسن، اللي بدأت بانتقاله للزمالك قبل ما ينضم للإسماعيلي، وانتهت بحكم من المحكمة الرياضية الدولية ضد الإسماعيلي في نزاعه مع نادي النجوم.

عشان كده، قبل ما توزعوا اتهامات مبطنة على الأهلي، افتكروا إن ملف العقود تحديدًا مش الملف اللي يسمح لكم تتكلموا فيه من موقع الواعظ.

✍️
#الأهلي

طبيعي جدًا أن يخرج الزمالك للدفاع عن هاني أبو ريدة ورجاله، فهو كان ولا يزال أكبر المستفيد من سياسة "الاحتواء" و"روح البروتوكول" التي تحكم المشهد الكروي منذ سنوات.

ومن باب رد الجميل، يصبح الدفاع عنهم أمرًا متوقعًا... خاصة بعد الحصول على رخصة يراها كثيرون غير مستحقة في ظل كل ما أثير حول استيفاء شروطها.
المواقف لا تُنسى، والمصالح دائمًا تفرض نفسها.
✍️
#الزمالك #الأهلي