02/01/2026
الكلام دا كتبته لبداية سنة 2022 وملقتش كلام افضل افكر نفسي وافكركم بيه كل سنة 💖✨
ضفت في 2023 حاجة واحدة هي "أصبر على ظهور النتائج ومتستعجلش...استمرار السعي في حد ذاته متعة"
وسنة 2024 ضيفت "حافظ على صحتك النفسية و الجسدية ومتخليش الشيطان يشتغلك علشان هو شاطر و شغلته الوحيدة أنه يوقعك و يلهيك عن أهدافك و يشكك في قدراتك و أهدافك و يضللك علشان متوصلهاش ... متخليش الشيطان يضخملك و يكبر ليك السلبي و يعمي عيونك بيها، كبر ربنا على كل معيق و ثق أنك هتعديه بربنا"
تقريباً مضفتش حاجة في 2025🤗
لكن في بداية 2026، وبعد انتهاء 2025 إللي كان شعارها ليا
Apply, Joy & Enjoy
واللي كان فيها Apply كتير، حابه أقول "ركز واسعى يكون عندك رؤية و vision واضحة وأسعى لتحقيقها ومتخليش مشتتات تبعدك عن رؤيتك وهدفك، واستعين بنقاط قوتك إللي هتساعدك تتأكد من رؤيتك "رسالتك بالحياة" وتضيف لحياتك معنى و تشجعك على الإستمرار وتزيد ثقتك بنفس وبخطواتك، وقتها هتكون راضي أكتر وبقوة أكبر.
دي بقى نقاط 2022 👇
حاجات بسيطة ممكن تخلي بالك منها وانت بتبدأ سنة جديدة
1- اسمح لنفسك تجرب حاجات جديدة هتساعدك تتعرف على نفسك اكتر وتتأكد من اللي عارفه عن نفسك.
2- اسمح لنفسك تخطأ وتتعلم من الخطاء دا ... الخطأ فرصة جديدة للتطوير والتعليم.
3- كون دائرة دعم قوية من أشخاص ذات ثقة وداعمين وإيجابيين حتى لو كانت الدائرة صغيرة .. بتفرق كتير في الرحلة.
4- اتعلم تعمل توازن في جوانب حياتك الحياة عمرها ما بتستمر بالاهتمام بجانب واحد أو اتنين بس.
5 - خطواتك البسيطة المستمرة أهم بكتير من الخطوات الكبيرة ... خطواتك الصغيرة هي اللي بتساعدك تعمل خطوات كبيرة.
6- اتعلم تكافئ نفسك على خطواتك البسيطة ... خصوصاً لو استمريت فيها أو كانت صعبه وتقيله في البداية.
7- اقعد مع نفسك كل فتره وصاحبها وحبها وشجعها وساعدها على التطوير ..هي اللي هتساعدك تكمل وتستمر.
8- جدد النيه قبل كل خطوه ... بتفرق كتير و بتيسر تنفذها.
9- أسأل كتير في أي حاجة حابب تتعلمها ... بس اختار الشخص الصح اللي تسأله.
10- خليك مرن في تنفيذ خطتك و خطواتك وأهدافك ...عليك السعي وعلى الله التوفيق.
11- طبق اللي اتعلمته وتعرفه وفي إيدك هيجيلك إللي متعرفوش وبعيد عنك.
12- كن انت و متسمحش لحد ولا لحاجة تحرمك من الحق دا .
13- خلي ثقتك في ربنا كبيرة حتى في أصعب المواقف و الظروف.
14- ثق بنفسك دائماً حتى لو أخفقت في مرة.
15- استثمر في نفسك وفي تفكيرك وفي التعليم ..هيختصر عليك كتير.
يارب عام كله خير و علم و نفع و تطوير و مساعدة و احسان و سلام و حب و تأثير و أثر ✨🙏💕
