Maha Emad " - Making A life difference -

الإهمال اللي بتشعر بيه الزهرة…
بيخليها تذبل… وماتثمرش 🌱

وده بالظبط إحساس ستات كتير في العلاقات…
مش لأنها ضعيفة
ولا لأنها “بتدلع”
لكن لأن الاهتمام… هو الميّه اللي بتعيش بيها العلاقة
الست كائن رقيق يحتاج الي الرعايه والاهتمام

فلما الست تحس بالإهمال

بتنسحب واحدة واحدة
تبطل تحكي
بتبطل تطلب
وتبطل تستنى
وتبطل تهتم

ومن بره تبان “هادية”…
ومن جواها كل حاجة بتقفل

والأصعب؟
إن اللي قدامها ممكن يفتكر إنها بقت مرتاحة
وهي في الحقيقة… بقت ساكتة
لانها مش حاسه انها متشافه

الحقيقة إن أي علاقة
محتاجة رعاية من الطرفين
ومحتاجة كلام حلو يتقال…

لان الاحتياج مع الوقت بتحول لجفاء
وتبدا العلاقه في الانهيار الصامت

عشان كده متبخلوش علي بعض بالكلمه الحلوه
واللمسه الحلوه
وجبر الخاطر

وكما قال سيدنا محمد صلى الله عليه وسلم
"خيركم خيركم لاهله"🤍

#مهاعمادالدين
#علاقات

مش دايما السكوت حل
ولا دايما هو علامه رضا
ساعات السكوت بيكون بدايه انهيار

حلو اننا ما نندفعش…
ما نفاجئش اللي قدامنا بكلام ممكن يوجعه.
ده مطلوب أوقات.

لكن…
في فرق كبير بين إننا نهدى قبل ما نتكلم،
وإننا نسكت خالص.

لأن السكوت الكتير…
بيعمل فجوة.
مرة على مرة…
بيبقى الطبيعي إننا نسكت
ونعدّي
ونقول: “بعدين نتكلم”…
وبعدين ده ما بيجيش.

فننسى نتكلم.
ننسى نوضح.
ننسى حتى نفهم نفسنا زعلنا من إيه.
بس الحقيقة؟
إحنا ما بننساش…
الموقف بيتخزن جوانا.
والزعل بيتراكم.
ولما يتكرر نفس التصرف…
بنزعل عليه كأنه أول مرة…
وأكتر كمان.
ليه؟
علشان ما اتكلمناش فيه من الأول.
ومع الوقت…
التراكم ده بيكبر.
لحد ما فجأة…
تلاقي نفسك واقف عند نقطة:
"أنا مش قادر أكمل."
مش علشان موقف واحد كبير…
لكن علشان حاجات صغيرة كتير…
ما اتقالتش.
أنا مش بقول نتكلم في لحظتها،
لكن بقول:
لازم نرجع نتكلم.
بعد كل موقف…
اسأل:
"إيه اللي زعلك؟"
"إيه اللي حسسك بكده؟"
"كنت تحب أتصرف إزاي؟"

الحوارات دي…
هي اللي بتحمي العلاقة.
ومرة على مرة…
هتلاقي إن نفس المشاكل
مش بتتكرر.
لكن طول ما إحنا بنسكت…
وما بنتكلمش…
هتفضل نفس الدواير تتكرر.
وللأسف…
ممكن في لحظة واحدة
تلاقي نفسك بعدت…
مش لأنك مش بتحب،
لكن لأنك بقيت مش قادر تشيل
كل اللي اتخزن جواك.

اتكلم…
مش علشان تعمل مشكلة،
لكن علشان تحافظ على العلاقة. ✨

#مهاعمادالدين
#كوتش #علاقات
#السكوت

مشاعرنا دايما بتيجي تعلمنا درس

ورا كل شعور في قصه وخطاب داخلي بنكون غافلين عنه

وبرغم قسواتها في بعض الاوقات

إلا انها دائما تحمل رساله

رساله عن نفسي وشويه نقط ضعف عايزه تتصلح
او مشاعر قديمه مش بتاعتي وشايلاها كوفاء لمن سبقونا
او معبر لنقطه تحول في حياتي لما افك شفره الشعور ده وما يحمله من معاني

او معتقدات وموروثات بقت عندي بالتبعيه

الفكره في كل مرحله محتاج تسمي الشعور
وتفهم رسالته
لانك طول ما انت غافل عنه
هيفضل يتكرر في اشكال مختلفه
لحد ما تشوفوا وتقبله وتشوف رساله ربنا ليك فيه
ساعتها بس هيقدر يسيبك ويمشي

قولولي بقي ايه اكتر شعور مسيطر الفتره دي وبتتصرفوا معاه إزاي؟

#مهاعمادالدين
#كوتش
#علاقات

#مشاعر

💭
طيب نعمل إيه لما الضغط يزيد فعلًا؟
مش لما نهدى…

أول حاجة:
مش لازم نحلّ كل حاجة مرة واحدة
المخ المضغوط… مش بيعرف يفكر كويس أصلًا
التنفس بهدوء وتركيز هيهدي حاله التشوش في المخ👈

تاني حاجة:
نقلّل السرعة👈
مش كل حاجة مستعجلة زي ما انتي حاسة

تالت حاجة:
اسألي نفسك:
“إيه أقل حاجة أقدر أعملها دلوقتي؟”

رابع حاجة:
عادي اننا نحس بالضغط
انتي بطله💪

الضغط مش عدو… ده إشارة إنك محتاجة تهدي شوية

واهم حاجه بقي
هي الاستعانه بالله

مفيش حد عايش من غير ضغط👈
بس الفرق في
إزاي بنتعامل مع نفسنا وقتها


لما بتتضغطي… ايه أول رد فعل ليكي؟

#مهاعمادالدين
#كوتش
#علاقات

هو ليه في أيام…
أبسط الحاجات بتبقى تقيلة كده؟

مش قادرين نركّز
ولا ننجز
ولا حتى نعمل حاجة كنا بنحبها

ونفضل نقول لنفسنا:
“أنا مالي؟ أنا بقيت كده ليه؟”

الحقيقة إنك مش لوحدك
وفي الغالب ده مش كسل خالص

ده بيبقى ضغط نفسي متراكم
وأنتِ بتحاولي تكمّلي عادي كأن مفيش حاجة

بس يمكن الحل مش إننا نضغط على نفسنا أكتر…
يمكن إننا نهدى شوية
ونمشي على قد طاقتنا

قوليلي بقى
إيه أكتر حاجة بتحسي إنها تقيلة عليكِ في الأيام دي؟

#مهاعمادالدين

هو الاول والاخر والظاهر والباطن
(٣)وهو بكل شئ عليم
سوره الحديد

....انت جئت من الاول
...وتسير الي الاخر
..وتعيش في كون يشاور على الظاهر
..وتحمل في داخلك روح هي سر الباطن


#عمروخالد

مشاعرك مش هي مشكلتك
المشاعر نعمه وفطره

طب امال المشكله فين

المشكله مش إنك بتحسي كتير.
ولا إنك حسّاسة.
ولا إن دموعك قريبة.
مشاعرك عمرها ما كانت العدو

المشكلة بتحصل

لما الإحساس يمسك الدركسيون
وانتي وراه مش واخدة بالك.

الغضب نفسه مش وحش
الخوف مش ضعف
والحزن مش عيب

اللي بيتعب
إنك تتصرفي....وانتي جوّه العاصفة.

جربتي
إنك تسمعي مشاعرك
من غير ما تغرقي فيها

لو بدات اقول لنفسي

تقبلي وجود الشعور وقت وهيعدي
افهمي الرساله وراءه
انتي تقدري تتعاملي معاه

ابدائي بتغيير واحد عن رد فعلك المعتاد
مره علي مره
هتتحولي من انسان متلغبط ومتوتر
لانسان فاهم ومتقبل نفسه ومشاعره

ربنا ما خلقش إحساس عبثا…
خلقنا نحس ونفهم ....وبعدها نقدر نتحرك

#مهاعمادالدين
#علاقات
#شعور
#توازن

عمرك سألت نفسك
ليه بتتعصب على أكتر ناس بتحبهم؟

مش عشان هم وحشين
ولا عشان العلاقة بايظة
لكن عشانك
مستنزَف… ومش واخد بالك

تلاقي نفسك بتنفجر
من أقل كلمة
وتستغرب
هو إيه اللي خرجني من شعوري كده؟

دماغك مليانة...وانت المفروض نايم
أو بتاكل،أو قاعد مع اللي بتحبهم
بس مش حاضر

ووقتُك مستباح
الشغل داخل في كل حتة
والتليفون عمره ما بيقفل

وهنا بقى تحصل المشكلة الحقيقية:
أغلب المشاكل الزوجية
مش سببها قلة حب ؛ سببها قلة حضور

واحد موجود بجسمه - وغايب بعقله
واحدة محتاجة قرب ... ومش لاقية مساحة

فنزعّل من أقل حاجة
ونقفل بدل ما نتكلم

والعلاقة... تبتدي تبعد حتة حتة

مش بخناقة كبيرة لكن بتراكم ،عصبية
سكوت وإهمال غير مقصود

وأحيانًا
مش لأن اللي قدامك مش مهم
لكن
لأنك مش فاضي له بجد

عشان كده
تظبيط الأولويات مش رفاهية... ده إنقاذ

إن يبقى:
وقت النوم للراحة
وقت العيلة للدفا… من غير تليفون
وقت الصحاب للفصلان
وقت الشغل تركيز كامل
وقت بابا وماما للبر والشحن
ووقت الزوج/الزوجة ليها وبس

لأن لو ماعملتش كده
هتفضل تعبان
ومشدود
وعصبي
وهتدفع تمن ده
في أقرب علاقة ليك

مع إن الحل بسيط:
ادي كل حاجة وقتها
وتكون هي… هي وبس

السؤال المهم:
إنت حاضر مع اللي بتحبهم؟
ولا سايبهم يدفعوا تمن ضغطك؟

#مهاعمادالدين
#علاقات
#اولويات

"ليه كلمة صغيرة بتولّعني؟
ليه موقف بسيط بيقلب يومي؟
ليه نفس الدائرة بتتكرر؟"
ليه بيحصل معايا كده؟

اسئله ممكن تكوني بتساليها لنفسك

بصي يا ستي

المشاعر اللي بنطمّن نفسنا إنها “عدّت”
هي في الحقيقة ما عَدّتش… بس اتخزنت.

إنتي يمكن اخترتي وقتها تسكتي…
تعدّي…
تغلّفي وجعك بـ “أنا كويسة”.
بس المشاعر اللي اتدفنت، عمرها ما بتدفن فعليًا.
هي بتغيّر شكلها… وتطلعلك في كل حدث جديد.

تجاهلتي زعلك؟ يرجعلك غضب.
كتمتي وجعك؟ يطلع انسحاب.
طنّشتي إحباطك؟ بيقلب تعلّق بزيادة.

الذكاء العاطفي مواجهه مش كبت…

إنك تواجهِي مشاعرِك بشجاعة احسن ما تدفنيها…
وتسمعي الرسالة اللي ورا الإحساس بدل ما تهربي منه.

طيب… تعملي إيه علشان الدوّامة دي تقف؟

1️⃣ اهدي وخدي نفس عميق
واستقبلي الإحساس كرسالة مش خطر.

2️⃣سَمّي الإحساس.
"متضايقة… موجوعة… متقلّقة."
أول ما يسمي نفسه، بيهدى.

3️⃣ اسأليه: جاي ليه؟
بيطلب حدود؟
فاكرّك بحاجة قديمة؟
ولا بيقولك “خدي بالك من نفسك”؟

4️⃣اكتبي اللي حاساه—حتي ولو كلمتين.
الكتابة بتفكّ التراكم اللي عامل قفله جواكي

🌿 المشاعر مش جاية تعقّبك… دي جاية تنقذك.

وربنا عمره ما خلق جواكي شعور ملوش حكمة.
كل إحساس باب…
يا إما تفتحيه وتعدّي،
يا إما تفضّلي واقفة قدّامه كل مرة في شكل تريجر (محفز)جديد.

قوليلي

لو في إحساس واحد خايفه تواجهيه… تتخيلي هو مين؟ وليه؟

#مهاعمادالدين
#كوتشينج
#علاقات

الاحتياج إني أكون متشاف
افعال كتير اوي بنقوم بيها واحنا مش واخدين بالنا ..عشان بس نتشاف

احتياج فطري بنسعي إليه من واحنا صغيرين
لما مش بناخده كفايه ..بنفضل ندور عليه في كل علاقاتنا

الاحتياج ده كلنا بنحس به ودائما محتاجين لوجوده
اطفال او شباب أو كبار
احتياج طبيعي ميخلكش تحس بالخجل منه

المهم متفضلش تحاول تاخده من ال مش مقدرين قيمتك اصلا

متحاولش
_مع ناس بتقلل منك وبتحسسك انك نكره
_ناس بتتريق عليك طول الوقت
_ناس مش مقدره قيمتك ولا كل ال انت بتعمله بتكسر فيك وبس
_ناس تصرفاتها كلها بتقولك انك ملكش لازمه
_متفضلش مع مجتمع مش شبهك بيحط عليك عبء التظاهر والتكلف عشان بس تكون شبهم ويشوفوك

خليك قريب من
✨ ال قربهم بيعلي منك
✨بيحسسك بقيمتك الحقيقيه
✨بتقدر تكون علي طبيعتك معاهم
✨مش بيقللوا من كل إنجاز ليك حتي لو بسيط

✨أخلق مجتمع شبهك مجتمع موازي
تكون فيه انت كما انت
يكون داعم وعارف قيمتك

✨حاول دائما عطاءك يكون في مكانه الصحيح واخلص النيه لله وبطل تدي للي مش مقدر

واعرف أن البدايه عندك اول ما تحبها وتقدرها وتشوفها ...هتبقي مرتاح ومتشاف ومتقدر من الكل... ومن نفسك اولا 🌹

كن أنت..تزداد جمالاً ❤️

#مهاعمادالدين

بعد وفاه أمي
حبيبتي رحمه الله عليها

✨اكتشفت إني للاسف فقدت احسن مستمعه ليا ولمشاكلي😔

✨إكتشفت إن مش كل الناس بتعرف تسمع

✨عرفت أد ايه مهم التعاطف مع ال بيحكيلي عن إحساسه

✨عرفت إن ممكن حد يبطل يحكي.. لمجرد أن ال قدامه تفه من إحساسه ومشاعره،او حسسه أن كلامه ملوش قيمه

✨عرفت إن اختيار الوقت المناسب للكلام من أهم عناصر
الاستماع الجيد

✨عرفت اني لما بسمع بإهمال أنا بكسر بخاطر القدامي.

👈مهم اوي أننا نعبر عن الجوانا
👈بس الاهم أننا نعبر للي بيحب يسمعنا
للي بيحس بينا و يتعاطف معانا
👈بال بيبصلك وقت ما تكون بتتكلم بكل إهتمام
مش سامعك وخلاص..

📌لو انت المستمع ...اسمع بقلب واجبر خاطره

📌ولو هتعبر عن اللي جواك..... اختار 👈صح