03/10/2026
احمد عز عبر بودكاست نجم الجماهير : في كل البودكاستات لما يستضيفوا حد، يقوم قايل هما برشلونة شافوا إيه في حمزة عبدالكريم فيرد عليه المذيع : والله ما أعرف لغة حوار صعبة، طب هقولك أنا هما شافوا إيه. عندهم حاجة اسمها Wyscout، دخلوا عليها واتفرجوا على الـPerformance وأداء اللاعب، وشافوا إن عنده قوة انفجارية وسرعة. والسرعة أول حاجة بتلفت انتباه الأندية الأجنبية، لأن بره عندهم ميثاق اسمه S.P.I.T، وأول حاجة فيه الـSpeed؛ لأن السرعة لا تُنمّى، فلما يشوفوا مهاجم بالطول ده، وعنده سرعة وقوة انفجارية، يقولك: «الحق هاته»، إنت شايفه دلوقتي ضعيف، أنا شايفه كمان 10 شهور بعضلات. إنت شايفه دلوقتي مش عارف يتحرك كويس على الجول، أنا شايفه بعد سنتين وهو بيتدرب تحت إيد مدرب جامد بيعلمه إزاي يتحرك وإزاي ينهي، هو شايف بكرة، إنت شايف تحت رجلك. الأمر عدى مرحلة الحقد على حمزة الناس اه ممكن تبقى بتستعجل إنه مش بيشارك بس هنا أنا ليه هستعجل وأقيّم عليه الفشل والنجاح؟ ما تسيبه، والله لو نجح... برافو عليه، لو ماعملش حاجة، إيه اللي يخليني أتكلم؟ يقولك: «أصل أنتم بتتكلموا عنه كتير»، طب ما نتكلم، هل كلامنا ده يضايق حد؟ ما إحنا بنتكلم في كل حاجة، هو إحنا سايبين حاجة ماتكلمناش فيها؟ ده كلمة «منتهي» دي قعدت 3 أيام تريند على الإنترنت، على الأقل أدينا بنتكلم في حاجة كويسة مبشرة.
