Hanan Elmasry - Resolve coach/ chromatic healer

الأشخاص مراحل في حياتك🌹
مفيش حد بيظهر في حياتك صدفه ، كل شخص بيظهر في حياتك بيظهر لسبب ، ببساطه .. الناس دروس في حياة بعض ومع كل درس جديد بنتعلم حاجه جديده تفيدنا في اللي باقي من العمر ..

دروس بنتعلم منها وبتساعدنا في حياتنا وبتشكل شخصيتنا وتنميها .. ممكن ربنا يبعتلك شخص عشان تكتسب منه حاجه جديده ، او يساعدك توصل لهدف معين .. ممكن يبعتلك شخص عشان يقف جمبك في فتره صعبه جدا من حياتك ، ممكن يبعتلك شخص عشان يفرحك ، وشخص يقولك نصيحه محتاجها ، ممكن يبعتلك شخص يضايقك ويزعلك عشان تعرف قيمة الناس الحنينه اللى في حياتك ..

الانسان الناضج بقي هو اللي فاهم كويس ان مش معنى ان الدور انتهي وكل واحد راح في طريق ان الشخص اللي مشي وحش او مش اصيل ، الفكره ان ربنا بيسبب الاسباب عشان الشخص ده يبعد .. عشان خلاص دوره خلص .. وربنا كاتب يكون له ادوار تانيه في حياة ناس تانيه وناس تانيه يكون ليها ادوار في حياتك ..

حاول تتقبل فكرة ان محدش هيفضل جمبك طول العمر ، وان في ناس بتمشي لظروف معينه ، وناس غيرهم بتيجي .. مش لازم الشخص اللي معاك دلوقتى يكون معاك في كل مراحل حياتك .. ومش لازم اللي معاك وساندك انهارده يبقي هو نفس الشخص اللي هيسندك ويكون جمبك بكره ..
🌹الحياة مراحل ولكل مرحلة أشخاصها وأثرها🌹

قوة السؤال
وقت الأزمات دماغك بتتملي أفكار كتير وأسئلة كتير بيبقي فيه دوشة جوه دماغك مع ان ده أهم وقت انت محتاج فيه تركز وتتصرف أو تاخد قرار ..
لو عرفت ازاي تختار السؤال اللي هتسأله لنفسك وقتها ده هيبقي نص الحل فالسؤال الصح في الوقت الصح هو اللي هيحدد طريقك اللي هتمشي فيه وهيوفر عليك وقت وصحة ومجهود..
خلي تفكيرك باصص علي الحل وسؤالك متوجه للحل متخليش دماغك تاخدك للماضي وتسأل (ليه) حط المشكلة وراك وخلي الحل قدامك وركز علي (ازاي) أو (ايه اللي انا محتاج أعمله عشان أوصل لكذا) وخلي دايما سؤالك بشكل إيجابي ساعتها عقلك اللاواعي هيبدأ ينبهك للحل ويوجه نظرك وتصرفاتك ناحية الحل فاللي هتحطه قدامك في مستقبلك هتروحله...
🌹نقاش المشكلة غير نقاش الحل🌹

الإنجاز هو اللي إنت شايفه إنجاز مش اللي الناس شايفينه إنجاز🎉
كل اللي بتعمله في حياتك هو من إنجازاتك لازم تفكر نفسك بده عشان ترفع معنوياتك ومتسبش المعيار أو القرار للاخرين عشان يقولو ده إنجاز ولا لأ.
اتعود تحتفل بإنجازاتك الصغيرة قبل الكبيرة وتقدر المجهود اللي انت عملته وده يعتبر آداة فعالة لتعزيز شعورك بتقدير الذات وكمان هيديك دافع إنك تكمل وتحقق أكثر وانت فخور بنفسك ❤️🎉🎉
امتي اخر مرة احتفلت فيها بإنجاز صغير؟

بسم الله الرحمن الرحيم
كل حاجة في حياتنا بنبدأها بسم الله الرحمن الرحيم أي حاجة عايز تعملها أو تكملها أو تصلحها أو حتي تلاقيها بتبدأ بسم الله الرحمن الرحيم وده أكيد له حكمة ف بسم
الله تحل البركة وبالرحمة تحل الأمور وتتيسر❤️
الرحمة علي قد بساطتها علي قد صعوبتها تقدر تتصف بالرحمة وقت الرخاء لكن من الصعب إنك تفضل محافظ عليها وقت الشدة وقت الأذي وقت الألم ومن أعلي درجات الرحمة إنك تقدر ترحم من أساء إليك خاصة إذا كان من أهل الرحم❤️
الرحمة من أسماء الله سبحانه وتعالي ومن أسمى الصفات الإنسانية اللي ليها ثواب عظيم من الله وليها أطيب الأثر في نفوس البشر❤️
الرحمة هي المفتاح اللي هتقدر تعدي بيه اللي فات وتكمل بيه في اللي هييجي فبشرى لكل من يمتلك قلبا رحيما قول الرسول صلي الله عليه وسلم "حرم علي النار كل هين لين سهل قريب من الناس"❤️
شكرا يا نهي علي المحاضرة الرائعة واليوم المميز
Noha Zahra ❤️❤️
في اخر الطريق أكيد هتلاقي النور❤️
🌹رحمة تصلح ما أفسده الرحم🌹

سبتمبر 1999 أول يوم جامعة
ذكريات أول يوم جامعة مبتتنسيش أول مرة أدخل جامعة القاهرة كنت تايهة مش عارفة رايحة فين وجاية منين، زحمة،مباني كتير وطلبة كتير كل حاجة كتير ومش هنكر اني كنت خايفة شوية عشان داخلة علي مرحلة جديدة وفي نفس الوقت كنت فرحانة بالتغيير الكبير اللي بيحصل من المدرسة للجامعة من أول اليونيفورم اللي معدش له مكان في الدولاب والمواعيد المختلفة عن مواعيد المدرسة ووقت المحاضرة وقعدة الصحاب بين المحاضرات لحد المنهج وطريقة الشرح والمستر اللي بقى يتقاله يا دكتور... ذكريات كتير وسنين من أحلي سنين عمري عدت هوا في غمضة عين وصحاب عمر مكملين معايا لحد النهاردة ❤️❤️..
سبتمبر 2025 أول يوم جامعة
عدى 26 سنة على أول يوم جامعة
بس النهاردة الصورة مختلفة النهاردة أنا ماما اللي قاعدة في العربية وبوصل بنتي أول يوم جامعة وبقولها في حفظ الله وهي بتبدأ مرحلة جديدة في حياتها.. إحساس مختلف إحساس غريب أوي بس حلو أوي..
الأماكن بتتغير والصورة بتتبدل والعيال بتكبر والحياة ماشية ومكملة بحلوها ومرها بفرحها وحزنها.. ربنا يبارك لنا جميعا في ولادنا ويفرحنا بيهم ويديم علينا فضله ونعمه.. الحمدلله حمدا كثيرا طيبا مباركا فيه ❤️❤️
صباحكم سعادة وتفاؤل بإذن الله ❤️❤️❤️❤️
يا تري ايه ذكرياتكو عن أول يوم جامعة؟

ليه دايما الناس التوكسيك هي اللي بتدخل حياتي؟
ليه طول الوقت حاسة اني مضغوطة ؟
حاسة اني تعبانة وكل ما أعمل تحاليل واروح لدكتور يقولي كل كويس مفيش حاجة. امال انا تعبانة ليه؟
ده اللي هنعرفه في ايفنت
Yin Yang restoring balance
يوم السبت 28/6 الساعة 6 مساء اونلاين علي zoom
للحضور اكتب كلمة مهتم في كومنت وهبعتلك اللينك

الله أكبر الله أكبر الله أكبر لا اله إلا الله
الله أكبر الله أكبر ولله الحمد
عيد سعيد 🌹وكل سنة وانتو طيبين🌹
خلي عيدك السنة ديه أحلى لما تاخد قرار إنك تبدأ:
تبدأ تاخد خطوة كنت مأجلها بقالك كتير..
تبدأ تحقق هدف نفسك فيه بس مش بتتحرك..
تبدأ تحل المشكلة بدل ما أنت مستني غيرك يحلها..
تبدأ تخلي نفسك أولوية من غير ما تيجي علي حد..
تبدأ تلاقي نفسك اللي منها هتوصل للسعادة الحقيقية..
قال تعالى "إن الله لا يغير ما بقوم حتى يغيروا ما بأنفسهم" صدق الله العظيم
🌹البداية دايما من عندك والحل موجود جواك🌹
لو أخدت أول خطوة وقررت إنك تبدأ وعندك نية حقيقية إنك تلتزم بس مش عارف تعمل إيه هتلاقيني مستنياك في تاني خطوة عشان أساعدك وأنورلك الطريق المناسب ليك عشان توصل بإذن الله..
🌹التغيير عبارة عن خطوات وأول خطوة بتبقي قرار وإلتزام🌹
كل سنة وانتو محققين كل اللي نفسكو فيه بإذن الله

أنا متفائل...
أنا عندي أمل.....
كام مرة قلنا الجمل ديه بس هل واحنا بنقولها بنبقي عارفين الفرق بينهم؟😊
ممكن منبقاش عارفين لكن أكيد هنبقي حاسين بالفرق لان احساسك وانت متفائل مختلف عن احساسك وانت عندك أمل... طب ازاي ؟ هقولك🌹
التفاؤل هو حالة عقلية فيها توقعات إيجابية قابلة للتنفيذ فالتفاؤل بيركز علي القيمة بغض النظر عن النتيجة فأنا بسعي وبأخذ بالاسباب وانا من جوايا حاسس ان الجاي خير وان رب الخير لا يأتي إلا بالخير حتي لو الظاهر غير كده...🌹
الأمل هو وقود العمل فالأمل هو اللي بيخلق التحفيز وبتحس إنك عايز تعمل وعايز توصل فبتقدر تحط هدف وتصحي كل يوم الصبح وانت عارف انت عايز ايه وكمان الأمل يحول دون الافكار السلبية فاللي عنده أمل يقدر يتحرك في الحياة لقدام... 🌹
علم النفس الايجابي بيقولنا ان الأمل والتفاؤل هما أحاسيس إيجابية وبيكملو بعض فاللي عنده أمل هيقدر يحط هدف ويسعي لتحقيقه وهو متفاؤل ان ربنا هيكرمه حتي لو محصلش اللي عايزه هيبقي واثق من جواه ان ده الخير اللي ربنا كاتبهوله لان الحياة ما بين عسر ويسر وشدة ورخاء... ❤️

هل فيه فرق بين التفاؤل والأمل؟ ولا الاثنين زي بعض؟ 😉
تفتكرو الإجابة ايه

التسويف😒 من أكبر معوقات ادارة الوقت🙁
كلنا عندنا أهداف عايزين نحققها لكن هتلاقي احيانا انك مش بتحققه مع انك عندك رغبة قوية انك توصله. طب ليه مش بتحققه؟ ايه اللي بيوقفك او بيمنعك انك تحققه؟ ايه اللي بيرجعك لورا بعد ما كنت واخد الطريق؟
لو فكرت شوية هتلاقي ان فيه دايما عامل محدد هو اللي بيحدد سرعتك ووصولك لهدفك و كل ما قدرت تحدد السبب ده وتركز عليه وتطور نفسك فيه ده هيساعدك انك تتقدم و توصل لهدفك في فترة زمنية اقصر..
العوامل اللي بتخلينا منكملش الطريق بنقسمها ل 80 و 20 :
80 ٪ منها عوامل داخلية: من صميم خصائصك الشخصية وقدراتك وعاداتك ونظامك
20٪ منها عوامل خارجية : عوامل محددة من خارجك
❤️يبقي المفتاح اللي تتغلب بيه علي التسويف ويقدر يوصلك لهدفك هو انك تعرف السبب اللي موجود جواك وبيخليك متكملش ❤️
ابدأ اي هدف عايز توصله بإنك تمسك المفتاح اللي يخليك تكمل الطريق اعرف السبب الداخلي اللي جواك واشتغل عليه وطور نفسك فيه هتلاقي الطريق قصر والوصول لهدفك بقي اسهل وهتقدر تحقق اللي عايزة بإذن الله🌹