27/04/2026
الله يرحمك يا عالم يا طبيب يا انسان
أنا لا مقتنع بكلام ضياء العوضي ولا معارض له لأني مؤمن بأن كل شئ طبيعي ربنا خلقه هو مفيد ومحمود للأنسان , ولا يعنيني ما يدور من جدال حول مـ ـوته أن كان طبيعي ولا مدبر لأنه الله وحده قادر علي اظهار الحقيقة ورد مظلمة عباده أن وقعت ، ولكن أنا بني أدم عالاقل ربنا زرع فيا شوية رحمه وأحساس بغيري ..
الي لفت نظري أن الراجل ده بعيدًا عن كونه طبيب، انه كبني أدم كان بيمر بأزمات نفسيه وكان باين عليه أوي في شكله وتصرفاته وعصبيته ونرفزته وهجومه علي أي حد ينتقده أو يجادله ومحدش من المقربين له حس بكده أو وقف جنبه ومدله أيده , سواء هو كان صح ولا غلط بس ده بني أدم أتحـ ـارب من جميع الجهات ، كان كل مايفتح عيادة تتقفله ،اتشطب من نقابة الاطباء وخسر شغله ومكانته وسط زملاؤه + كان بيمر بمشاكل مع أخوه الدكتور "ك" الي ذكر أنه خذله واتخلي عنه , مر بمشاكل أسرية وعائليه بينه وبين زوجاته وابناءه وطلق وأتجوز أكتر من مره وذكر انه عياله مبيسألوش عليه وكل ده قاله بلسانه في لايفاته , فالنهاية ملقيش غير البث المباشر الي يطلع يتكلم فيه مع الناس ويحس أنه مسموع ولسه مؤثر وأنه شقا وتعب عمره مراحش هدر وأنه قادر يغير من حياة الناس للأفضل وبالمجان ، لأن ببساطة هو لو كان غرضة السبوبة من ورا كل الي بيقوله بما أنه صنع طفرة في مجال التغذية العلاجية ، كان كسب ملايين الجنيهات شهريًا من الكورسات والجلسات الأونلاين الخاصة والاشتراكات وغيرها
أنا الحقيقة أكتر حاجه مأثره فيا في قصته هي النهاية , بعد مسافر الإمارات كوسيلة هروب من واقعة المرير, قابل بالصدفة شباب مصريين في كافية وكانوا أصغر منه فالسن, راحوا وسلموا عليه وقعدوا معاه شوية ، بعدها عرضوا عليه أنهم يعملوا بودكاست معاه وأفتكروا أنه هيرفض لأنه ميعرفهمش , بس اتفاجؤا أنه وافق بسرعة وكأنه مصدق , وعمل أكتر من لقاء معاهم وأتكلم فيها عن نفسه بأستفاضة تامة وأتكلم عن نظرياتة وابحاثة وكإنه بيوثق قصة حياته للناس قبل أن يغادر الحياة ،
- إمبارح شاب منهم أسمه طارق طلع في فيديو وقال أنهم كانوا واخدين عنه فكره وحشة فالأول ولكن لما قعدوا معاه أكتر من مره حسوا أنهم هما الي وحشين أوي لأنهم أكتشفوا أنه انسان طيب جدا وعفوي وجدع جدا , وقال أنهم حبوا يصلحوا خطأهم ده وكانوا قاعدين معاه بيحكوا عادي قبل مايسجلوا البودكاست ، فا عرضوا عليه بيـزنـس كبير هيكسب من وراه فلوس كتير ، فقالهم حاجه غريبه أوي " أنا الحمدلله مش محتاج فلوس ومتشغلنيش ، انا بالنسبالي كفاية قعدتنا دي مع بعض أنتم كأن ربنا باعتكم ليا , انا قاعد لوحدي بقالي فتره وحسيت أنكم زي أخواتي , شكرا ليكم "
- بعدها بيومين رنـوا عليه علشان يتقابلوا تاني بس مكنش بيرد عليهم ، لأنه كان مـ ـات ، مـ ـات لوحده في غرفة مفيهاش روح في فندق علي أرض تبعد عن وطنة حوالي 3000ك ولأكتر من 3 ايام من غير ماحد يحس بيه ولا يسأل عليه غير ناس غريبة اتعرف عليهم بالصدفة , مـ ـات لوحده من غير زوجة ولا عيال ولا أخ ولا أخت يغسلوه ويحزنوا عليه ويدعوله ويشيلوا خشبته علشان يكرموه ويدفنوه , مـ ـات ومـ ـاتت معاه اقتنعاته وافكاره وأسراره ومشاكله وكل حاجه كان هو مؤمن بيها
- قال الله في كتابه ﴿إِنَّ اللَّهَ عِندَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الْأَرْحَامِ ۖ وَمَا تَدْرِي نَفْسٌ مَّاذَا تَكْسِبُ غَدًا ۖ وَمَا تَدْرِي نَفْسٌ بِأَيِّ أَرْضٍ تَمُوتُ ۚ إِنَّ اللَّهَ عَلِيمٌ خَبِيرٌ﴾
- كلنا بلا استثناء لأحد ، بنمر بلحظات صعبه، بنبقى فيها مش نفسنا الي أتعودنا عليها ، المشاعر السلبية بتتمكن مننا والغضب من كل حاجه حولينا بيغـلبنا وكلامنا بيكون تقيل وجارح ، وبنأذي ناس ملهاش ذنب غير إنها قريبة مننا ، مش لأننا وحشين ، لكن لأن اللي جوانا كان محتاج يتسمع
الغريب إن كل القسوة دي ممكن تختفي قدام شخص واحد بس ، شخص يسمعك من غير ما يقاطعك، يستحملك من غير ما يزهق، يحتويك وانت في أسوأ نسخة منك. ساعتها قلبك بيلين، وبتفوق لنفسك، وبتحاول تصلّح اللي اتكسر
- مش مهم أنت بتحبه ولا لأ , ادعيله وترحم عليه هو مأذكش ولا باع حاجه ليك ولا تاجر بيك ولا ضـ ـربك علي أيدك , هو كان عنده عقيدة وإيمان بشئ وحـ ـارب علشانه ، مقتنع أو مش مقتنع دي حاجه ترجعلك , الراجل مأجـ.رمش علشان يستاهل كل التقـ.طيع والتجـ.ريح ده
- قال الله تعالي ﴿وَالَّذِينَ جَاءُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَءُوفٌ رَّحِيمٌ
ترحموا علي أبنكم وأخيكم وواحد منكم ، ترحموا عالدكتور ضياء العوضي وكفايه ..
10/03/2026
26/02/2026
25/02/2026
24/02/2026
16/02/2026
15/02/2026
08/02/2026