Nour Eltoukry-بره التريند

بالنسبه لوائل جمعه معنديش عليه تعقيب هو جاى فى منصب كده كده بالنسبالى مش بفهمه و مش عاوز أفهمه بس ربنا يوفقه و يقدر يحط ضوابط الفريق يمشى عليها الفتره الجايه.

كابتن محمد يوسف تانى!!!! هو بجد انتو مزهقتوش ؟ انتو يتتنفسوا جهل طيب ؟ لا حقيقى بجد ايه المؤهلات اللى جابت محمد يوسف مدير كوره و بعدها مدير رياضى و بعدها مدير قطاع ناشئين!!!! ايه علاقة اصلا المناصب دى كلها ببعض و ازاى نفس الشخص بيتم اختياره فيها!!!! يتشيل وليد سليمان اللى هو راجل على الله حكايته اعتزل مسك رئيس قطاع ناشئين و بتجيب مكانه محمد يوسف علشان يكمل عك!!!! و فى الاخر فالحين نسفر بعثه كامله اياكس لزوم الشو من غير اى استفاده حقيقيه.

احنا حتى لجنة السكاوتنج الجديده اللى المفروض اتعملت مش بيعلنوا عن الاسامى اللى فيها و كإنه سر حربى!!!!.

للأسف الشديد الواحد كان متوسم فى ياسين منصور خير و ان يكون عنده فكر مختلف و يحاول يمشى بنهج علمى و يجيب مدير رياضى حقيقى بصلاحيات محترمه و يحط استراتيجيه جديده لقطاع الكوره فى النادى لكن واضح ان لا حياه لمن تنادي و هنفضل نلف فى نفس الدايره.

يمكن أشبه نهائى لماتش امبارح هو نهائى ٢٠٢١ بين سيتى و تشيلسى و اللى كان تشيلسى داخل فيه الماتش كالطرف الاضعف على الورق زى أرسنال امبارح لكن الحقيقه شتان الفارق بين اللى قدمه توخيل فى ٢٠٢١ و اللى قدمه أرتيتا امبارح.

توخيل فى ٢٠٢١ كان بانى فريق صلب جدا دفاعيا و بيلعب ب ٣ ٤ ٣ و كان هافريتز برضه هو المهاجم بتاعه و عنده كانتى بأدوار مشابهه لرايس فى نص ملعبه و جورجينيو بأدوار مشابهه لسكيلى و فرديا لاعيبته مكنوش احسن من لاعيبة أرسنال يعتبر اما سيتى فبغض النظر عن موضوع اللعب من غير ارتكاز فالفريق كان قوى على مدار الموسم زى باريس و عنده عناصر تأذى تشيلسى بدليل ان بعد الماتش ده كسب تشيلسى توخيل ٣ مرات ورا بعض فهنا احنا بنتكلم عن ظروف مشابهه جدا جدا لماتش امبارح بس الفرق بقى فى تعامل أرتيتا و توخيل .

توخيل قدر يعمل ماتش مثالى هجوميا قبل دفاعيا و سجل هدف من عملية بيلد اب نموذجيه و بشكل فرقته محضراه و قدر يوصل ل1.25 هدف متوقع و خلق قبل هدفه و بعده فرص لدرجة انه خلق ٤ فرص كبيره و كان قادر يأذى السيتى فى التحولات و بولسيتش ضيع انفراد تام من تحول فالراجل كان هنا محضر للماتش بشكل كامل فى كل حالات اللعب و حتى بعد ما سجل كان قادر يتحول على السيتى و كان عنده فرصه يسجل تانى و كان مستحوذ بنسبة ٤٠٪ مش ٢٥٪ زى أرسنال امبارح.

توخيل فى الماتش ده قدم بالنسبالى الشكل النموذجى للفريق اللى عاوز يدافع بشكل صلب و فى نفس الوقت قادر يأذى الفريق اللى قدامه و ده نموذج مدربين زى انزاجى و كونتى و سيميونى بيجيدوه و دى مشكلتى الكبيره مع أرتيتا امبارح بعد ما استقبل الجول من باريس و مشكلتى الأكبر انه مش عاجز انه يعمل ده بل بالعكس أرتيتا اصلا مدرب كبير لكن الخوف متمكن منه تمكن تام.

أرتيتا إمبارح قدم ماتش كبير فى حاله واحده من حالات اللعب و هى الضغط و الاصطفاف الدفاعى بس غير كده فأرتيتا من اول دقيقه لاغى مرحلة البيلد اب من الأساس و لاغى مرحلة التحول من الدفاع للهجوم لإن اجنحته اصلا بتدافع على حدود منطقة جزاءه و كده كده مفيش تحول من هجوم لدفاع لإن الفريق معظم اوقات الماتش كان بيدافع بس.

مقدرش الوم أرتيتا على الكلام ده لإنه كان متقدم من اول الماتش و فريقه اصلا صلب جدا فى المرحله دى فبالتالى هو بالنسباله ده افضل اختيار و اكتر مرحله هيتفوق فيها و يقرف فيها باريس لكن من بعد ما باريس سجل و من بعد تغييرات باريس و خروج اهم لاعيبه فى الفريق فكان لازم أرتيتا يسعى للمكسب بشكل احسن من كده و كان لازم يبقى عنده الثقه انه يقدر يلعب كوره عادى و يحاول يحتفظ بالكوره فى اوقات معينه لإن فريق أرسنال ده فى العموم لما بيتخلى عن الخوف و الحذر المبالغ فيه بيظهر منه حاجات كويسه و لإن أرتيتا اصلا مدرب عنده أفكار هجوميه و استحواذيه كويسه.

لاعب زى كالفيورى امبارح كان لازم يبقى ليه دور فى الوقت الإضافى و حتى خيسوس كان ممكن يبقى ليه دور لكن احنا شايفين باريس بنص فرقه فى الوقت الإضافى هو اللى مسيطر و بيسعى للفوز.

الأمل الوحيد بالنسبالى ان أرتيتا يخرج من عباية الاندر دوج اللى لابسها دى و الخوف المبالغ فيه ده هو تصريحه امبارح بعد الماتش انه يتمنى ان فريقه يلعب زى ما ياريس بيلعب و انهم عارفين انهم محتاجين يتحسنوا و يتطوروا و عندهم نواقص و عيوب لإن أرسنال لو الموسم الجاى كمل بنفس الشكل و الأسلوب ده هيبقى بالنسبالى صدمه كبيره جدا فى أرتيتا و نهاية مدرب كان المفروض يبقى واحد من رواد الكوره الهجوميه المتزنه

أرتيتا هو اللى فاجئ انريكى بشكل ضغط ٤ ٤ ٢ باسيف زى ضغط السيتى فبالتالى صعب على انريكى الاوفرلود اللى كان متعود يعمله على الأطراف فى مرحلة البيلد اب و سيناريو الماتش خدمه انه سجل بدرى فقضى معظم فترات الشوط الأول بكتلة منخفضة و بترحيل ممتاز على الأطراف و مع اجنحه زى ساكا و تروسارد فكرة انك تخلق تفوق على الأطراف بيبقى صعب جدا.

انريكى كمان و لاعيبته تحس انهم مش حاضرين بأحسن شكل فشايف ان انريكى المفروض يحاول يعمل اوفرلود فى العمق بديمبلى و فيتينيا و نيفيس و رويز و يعلى تمركز اظهرته اكتر من كده شويه فى البيلد اب و فى التلت الأخير محتاج يحط اجنحته هى اللى على الأطراف اكتر و يحاول يخلقلهم تفوق نوعى و مواجهات واحد ضد واحد بوجود الاظهره فى الهاف سبيس.

لو فيه فريق واحد فى العالم يقدر يتعامل مع باريس و ضغطه لمدة تسعين دقيقه فهو أرسنال الحالى و المهمه بقت صعبه على باريس و شايف ان البطولة أقرب لأرسنال حاليا الا لو فرديات باريس لقت حلول.

برشلونه شبه خلص فى جوردن من نيوكاسل ب٨٠ مليون يورو و الصراحه انا مستغرب الصفقه دى لإن جوردون هو بروفايل مشابه جدا لرافينيا و لرشافورد فهو لاعب وايد ناين بيجيد اللعب فى المساحات و يستغل المساحه اللى بيفضيها المهاجم دايما و يجرى فيها و بيلعب فى فريق رأس ماله هو الضغط و التحولات و هو فعلا أرقامه فى الضغط كويسه و مناسب لبرشلونه فى النقطه دى لكن فى الاخر برشلونه معندوش الرفاهيه انه يدفع ٨٠ مليون يورو فى لاعب عنده شبهه و ممكن يجدد إعارة راشفورد او حتى يشتريه برقم اقل من كده بكتير.

برشلونه محتاج مهاجم حقيقى زى اوسومين مثلا و محتاج باك رايت طبعا و محتاج سينسى و برناردو اللى هيبقوا ببلاش و ساعتها يبقى عمل ميركاتو مثالى و سد نواقصه و مدفعش فلوس غير فى مركزين باك رايت و مهاجم انما الفريق يروح يدفع ٨٠ مليون يورو فى جوردون فى الظروف دى شايفه شئ مش منطقى و مش صح.

أنا فاكر الرحله دى من اول جول ليه مع المقاولين و فاكر لما سجل فى الاهلى و رقص احمد السيد على الخط و الناس قالت مين الواد الاشول السريع اللعيب ده و فاكر و ممدوح عباس بيقول صلاح اقل من انه يلعب فى الزمالك و مش مناسب لينا و فاكر ثنائيته التاريخيه فى المنتخب مع تريكه و فاكر جوله فى بيتر تشيك مع بازل و القهوه كلها بتشجع كإن المنتخب بيلعب.

فاكر لقاءه مع كريم حسن شحاته و هو مش عارف يقول كلمتين على بعض و إنه مكسوف و مخضوض و مش عارف رايح سويسرا هيعمل ايه هناك.

فاكر فخرنا كمصريين لما عرفنا انه رايح تشيلسى و احباطنا و هزارنا عليه بعد موسم كامل على الدكه و الكوميكس اللى كان كلها طلع هازارد و نزل صلاح.

فاكر لما اختار رقم ٧٤ فى فيورنتينا و علقنا بيه اكتر و اكتر و لما سجل فى اليوفى جول خيالى و القهاوى كلها بتختفل و التايم لاين كله مشير الجول.

فاكره بالمصحف مع روما و ان بدأنا نصدق ان عندنا فعلا محترف مننا بس بطموح حقيقى مختلف و قادر يحقق كل احلامنا.

فاكر اول ما الليفر اتعاقد معاه و خوفنا انه يرجع يقعد احتياطى تانى لكن الراجل قدر ياخد هداف الدورى برقم قياسى فى اول موسم ليه و يبدأ رحله تاريخيه لواحد من أعظم لاعيبه فى تاريخ الدورى الإنجليزى.

النهارده بتنتهى رحله أسطورية للاعب أسطورى حقق كل حاجه فى أوروبا ابتداها محمد صلاح ابننا و نهاها مو صلاح ابنهم.

أصدق تصريح قاله مدرب فى بداية مسيرته مع فريق ،
انا عشت الرحله دى يوم بيوم عشتها و هو بيكسب اول ٦ ماتشات فى الدورى و بعدها بيخسر من توتنهام فإعلام و محللين إنجلترا كلهم ينزلوا يسلخوا فيه و أهلا بيك فى دورى لا يوجد فيه هامبورج و فرنكوفرت و عشتها بعد اول موسم لما جوارديولا كان ملك صفحات الساركزم و عشتها و هو بيعلم الدورى ده كله كورة جديده عكس هويته و قد ايه الدورى ده خضع لأفكاره و يكسب دورى تاريخى كسر فيه كل الارقام القياسيه ب١٠٠ نقطه و ب١٦ فوز خارج الارض و بأكبر عدد أهداف مسجله و اكبر عدد ماتشات فوز متتاليه.

عشت أعظم منافسه فى تاريخ الدوريات على دورى ٢٠١٨ ٢٠١٩ مع ليفربول و ازاى الفريق ده قدر يكسب اخر ١٤ ماتش متتالى و يرجع من تأخر ٧ نقط لبطل الدورى.

عشت و شوفت خيبات أمل فى الشامبوينز تكره اى حد فى الكوره من أول خروج موناكو فى ٢٠١٦ لحد الفما حاجه و ماتشات الريال مرورا بصدمة توتنهام و ليون و تشيلسى.

شوفت يعنى ايه فعلا كلمة هيمنه كامله على دورى بفوز ب٤ دورى متتالى و ده رقم إعجازى معتقدش إن هنشوفه تانى لحد ما نموت و بأداء مبهر و بكوره جميله بتحترم المشاهد و المشجع و العالم كله.

كنت بستنى كل ماتش و كل شوط علشان اشوف بيب هيقدم ايه جديد النهارده و ايه الفكره اللى هتعلمها و اشوفها و ايه الدور المركب اللى هيحصل للاعيبه.

عشت أعظم لحظه فى تاريخ النادى ده فى ٢٠٢٣ و بثلاثيه تاريخيه عظيمه و بأداء تصاعدى جميل على مدار الموسم و بأختراع جديد اسمه جون ستونز و ملك اللحظات الحاسمه جندوجان.

انا النهارده بعد أعظم عشر سنين فى تاريخ النادى ده فخور انى بنتمى للكورة اللى لعبها النادى ده و فخور انى مشجع بيب جوارديولا فى اى زمان و اى مكان و على مر العصور.

لو كان لزاما علينا الرحيل كارهك يا وداع ولا بديل يا أسطورتى الحيه دائما و أبدا 😢❤️

توخيل قرر يعمل أغرب قايمة منتخب فى كأس العالم و واخد لاعيبه غريبه و سايب لاعيبه أغرب.

ستونز الموسم ده ملعبش ١٢ ماتش على بعض ليه موجود على حساب تومورى ؟ دان بيرن ليه موجود على حساب هال اللى بيلعب معاه فى نفس الفريق و مقدم موسم عظيم ؟ سبينس ليه موجود على حساب سكيلى؟ و نقطة ارنولد دى متفهمها لإنه كده كده مش بيحبه و مش مقتنع انه ينفع يبقى باك مناسب ليه عادى.

نيجى بنص الملعب العجيب بقى ، احنا فى ٢٠٢٦ و تستدعى هندرسون!!! و سايب وارتون و سكوت و اصلا كل أسامى نص الملعب دى مفيهاش ارتكاز واحد حقيقى.

خط الهجوم كده كده كان فيه اسامى كبيره هتخرج و بالمر و فودين الاتنين يستحقوا انهم ميروحوش بناء على الموسم اللى قدموه لكن واحد زى جيبس وايت عمل موسم كويس جدا كان طبيعى يبقى موجود و مش طبيعى تونى يبقى موجود برضه.

انا بحب توخيل و شايفه مدرب كبير لكن القايمه ده غريبه جدا و مش مفهومه.

برشلونه قدامها مساك مثالى للفريق و ببلاش و بيلعب فى فريق بيستخدم اسلوب مشابه لإسلوب فليك فى الضغط و بيسيل مساحات فى ظهره فبالتالى مش هيحتاج تأقلم كبير مع الفريق.

سينسى مدافع عنده جودة جباره على الكوره و كل هجمات بورنموث لازم تبدأ من عنده و الفريق دايما فى مرحلة البيلد اب بيبنى اللعب من ناحيته و هو مسئول عن لعب الباص العمودى على كروبى جونيور او ترفنيير او إنه يفتح اللعب لترافورد ناحية الشمال و الراجل بيقدر يعمل كل ده بسلاسه و إتقان شديد جدا.

بورنموث امبارح كل اختراقاته لضغط السيتى كانت من ناحية الشمال بفضل وجود سينسى و جودته فى الباص و قدرته على خروج الباص الأول و بعد كده تحميل بورنموث على الطرف الشمال و الفريق سجل و صنع اكتر من ٣ فرص من نفس الفكره.

شايف انه بروفايل مثالى لبرشلونه لتعويض انييجو مارتنيز و انسب من باستونى اللى هو مدافع كبير جدا لكن متعود يلعب فى خط خلفى مكون من ٣ مدافعين فممكن ياخد وقت فى التأقلم.

نهاية منطقيه لموسم جوارديولا و الاداره و اللاعيبه كانوا ممكن يخرجوا منه بشكل احسن من كده بكتير سواء اوروبيا او محليا فالخروج قدام النسخه الحاليه من الريال بالشكل ده كان فضيحه كبيره و شكل الفريق فى الدورى على مدار الموسم كان سئ.

مشاكل كتير على مستوى الصفقات فى الفريق و مشاكل أكبر على المستوى التكتيكى خصوصا على مستوى الضغط العالى سواء لما كان الفريق بيضغط بشكل دايموند غريب و كان اى فريق بيخرج من ضغطه وصولا للشكل الجديد للضغط بال ٤ ٤ ٢ باسيف اللى فى الأول الفرق عطلت قدامها لكن بعد كده بقى سهل التعامل معاها و فرق كتير قدرت تتغلب عليها.

لاعيبه كتير اقل من ان هى تلعب فى السيتى و لاعيبه تانيه للأسف خلاص صلاحيتها انتهت لاعيبه تانيه لسه محتاج وقت علشان تنضج و تقود فريق للفوز ببطولات كبيره.

كان نفسى الرحله تخلص بثلاثيه محليه بس للأسف هو ده الواقع و فى الأخر الدورى راح للى يستحقه و اللى كان قد مسئوليته.