02/09/2026
كنت مستنى سوق الانتقالات يقفل فى إنجلترا علشان نقيم واحد من أشرس و أغرب أسواق الانتقالات اللى عدت عليا طول فترة متابعتى للكوره فى إنجلترا فتعالى نشوف كده السيتى عمل ايه فى السوق ده.
مبيعات مانشستر سيتي فى الصيف
سافينيو — 100 مليون يورو
رودري — 76 مليون يورو
تيجاني رايندرز — 61 مليون يورو
عمر مرموش — 60 مليون يورو
نيكو غونزاليس — 60 مليون يورو
جيمس ترافورد — 47 مليون يورو
مانويل أكانجي — 18.5 مليون يورو
جَهماي سيمبسون بوسي — 9.5 مليون يورو
لاعبان من الأكاديمية — 13 مليون يورو
- إجمالي مبيعات اللاعبين المذكورين = 445 مليون يورو
اتعاقد مع
إنزو فيرنانديز — 145 مليون يورو
إليوت أندرسون — 135 مليون يورو
أيوب بوعدي — 100 مليون يورو
إليمان نداي — 76 مليون يورو
الان الياس ــ 40 مليون يورو
جيرونيمو رولي — 3.5 مليون يورو
الإجمالي = 459.5 مليون يورو
طبعا عمليات البيع اكتر من ممتازه السيتى اتخلص من لاعيبه زى سافينيو و مرموش و نيكو جونزاليس بأرقام كبيره جدا خصوصا سافينيو لكن للأسف الفريق فرط فى حارس موهوب و كان أفضل لمستقبل النادى اكتر من دوناروما و بالنسبه لصفقة رودرى فالفريق اتعامل معاها بشكل ممتاز و قدر ياخد المبلغ اللى كان عاوزه من البدايه.
بالنسبه بقى لعمليات الشراء فهوجو فيينا و الاداره كان واضح انهم عاوزين يقللوا الفتره الانتقالية للفريق على قد ما يقدروا فبيتعاقدوا مع ثلاثى فى نص الملعب ب٣٨٠ مليون يورو و ده رقم خزعبلى طبعا و غير منطقى لكن الهبل ده سايق إنجلترا كلها و الصفقات كلها بأرقام مشبوهه لكن الحقيقه معنديش تصور ازاى ماريسكا هيعرف يوظف الثلاثى مع بعض فى وجود شرقى ولا هيقعد لاعب ب١٠٠ مليون يورو احتياطى ولا هيعمل ايه بالظبط ، بو عدى لاعب كويس طبعا لكنه over priced جدا و خصائصه تميل لتدوير الكوره بشكل سلبى و قليل لما بيلعب لعب عمودى و عنده نواقص فى بروفايله محتاج يحسنها ، انزو لاعب ممتاز و بالنسبالى واحد من احسن لاعيبة الوسط فى العالم و بيعرف يعمل كل حاجه فى نص الملعب و يقدر يلعب ريجيستا و يقدر يلعب ارتكاز مساند و يقدر يكمل جوه منطقة الجزاء و يقدر يلعب فى الهاف سبيس ناحية الشمال يعيبه بس انه اوقات مجهوده البدنى مبيبقاش كبير ، اليوت إمكانيات جباره لكن الخوف دايما انه لاعب بيطلب انه يكون حركى و متحكم فى شكل الجيم و دى حاجه نوتنجهام كان قادر يوفرهاله مش سهل ولا منطقى تتوفر فى السيتى و هنشوف ماريسكا هيوظفه ازاى.
نداى هو الجناح اللى جيه بتدابير ربنا بعد ما الاداره كانت هتكمل اختياراتها الغريبه فى الاجنحه و تروح تجيب جاكبو ب١٠٠ مليون الصفقه تقف من ناحية ليفربول و بالصدفه ريتشارلسون يوقف صفقة ناداى و اللاعب ييجى السيتى و ده جناح مثالى لفريق كبير عنده القدره يلعب ناحية اليمين و ناحية الشمال و مراوغ ممتاز وصانع فرص بإمتياز و واحد من أفضل الاجنحه فى الدورى.
إجمالا فهو صيف عنيف فيه عدد كبير خرج و فيه ٢ لاعيبه من احسن لاعيبة العالم خرجوا زى بيرناردو و رودرى و فى المقابل فيه صفقات عنيفه دخلت لسه مش واضح هيتم استغلالهم أزاى لكن فى رأيى انه سوق إيجابى للسيتى حتى لو كان ممكن يبقى أفضل من كده نسبيا.
