محمد فاضل

إرمي العيش المجمد في الزبالة لأنه بيجيب سرطان!".. الحقيقة ولا هبد؟ 🧐

الفترة اللي فاتت انتشرت فيديوهات بتخوف الناس من تجميد العيش، والكلام دخل في سكة "السموم" و"السرطانات". بصفتي مدربك، واجبي أوضح لك العلم بيقول إيه بعيداً عن البروباجندا.
العيش في الفريزر.. إيه اللي بيحصل جواه؟

التجميد مش "بعبع"، بالعكس! درجة الحرارة المنخفضة بتعمل (Pause) لكل حاجة؛ بتوقف البكتيريا وبتفرمل التفاعلات الكيميائية. يعني التجميد في حد ذاته براءة من تهمة السرطان.
المفاجأة: العيش المجمد "أصح" من الطازة؟! 🍞

لما العيش بيبرد أو يتجمد، النشا اللي فيه بيغير شكله لعملية اسمها (Retrogradation). هنا بيتكون حاجة اسمها "النشا المقاوم" (Resistant Starch):

1. صديق الدايت: امتصاصه أبطأ بكتير، فمش بيرفع سكر الدم بجنون زي العيش اللي لسه طالع من الفرن.

2. بريبايوتك طبيعي: بيعتبر "أكلة هنيّة" للبكتيريا النافعة في أمعائك، يعني بيحسن الهضم.

طيب الخطر فين؟ (ركز في الـ 3 نقط دول):

⚠️ كارثة الكيس البلاستيك: أكبر غلط بنعمله إننا نجيب العيش سخن ونكتمه في كيس بلاستيك فوراً. بخار الميه مع الحرارة بيخلي مركبات البلاستيك "تهاجر" للرغيف.. الحل؟ سيبه يبرد الأول أو لفه في قماش.

⚠️ فخ "التقمير" الزايد: لو سخنت العيش لدرجة إنه "اتحرق" وبقى لونه أسود، هنا بتتكون مادة (الأكريلاميد)، وهي دي اللي عليها محاذير طبية. سخنه لكن بلاش تحرقه!

⚠️ نوع الدقيق: مهما كان العيش مجمد أو طازة، "الدقيق الأبيض الزيرو" هيفضل فقير غذائياً. خليك دايماً في القمح الكامل (الردة) عشان الألياف.

الخلاصة من الآخر:
تفريز العيش تكنيك ذكي وصحي لو عملته صح.
وكل عيشك وأنت مطمن بس بلاش بلاستيك وهو سخن!

صلوا على النبي ❤️