مـستر تـاكـتـيـكس Mr.Tactics I

01/09/2026

الصراحة، رغم وجود مستويات ممتازة حتى الآن لأكتر من لاعب، لكن رجل الـ3 مباريات حتى الآن وبلا منازع هو المهدي سليمان.

أنا شخصيًا كنت شايف إن انضمامه للزمالك مجرد ملء للقائمة، خصوصًا إن حارس عنده خبرات كبيرة لكن ماكنتش متوقع منه التأثير بالشكل ده.

لكن الراجل من الموسم اللي فات، أول ما جاتله الفرصة مسك فيها بإيده وسنانه، وفضل يثبت مباراة ورا مباراة إنه يستحق يكون موجود.

والنهارده بقيت أطمن طول ما المهدي سليمان هو حارس الزمالك.

لأن ببساطة عندنا مشاكل دفاعية بالجملة، وأخطاء بتوصل أحيانًا لفرص خطيرة جدًا على مرمانا، لكن في كل مرة تقريبًا بتلاقي المهدي موجود… سد عالي، تركيز، ورد فعل ممتاز.

بعد ربنا، المهدي كان سبب أساسي إن الزمالك ما يخسرش في مباريات كتير، وبيثبت إن الحارس مش مجرد لاعب بيقف بين القائمين… الحارس ممكن يكسبك نقاط.

والمهدي لحد دلوقتي… بيكسب الزمالك نقاط.

31/08/2026

يا كابتن معتمد جمال… حرام عليك بجد!!!

إنت شوفت اللي حصل في الشوط الأول؟!

شوط كامل الزمالك فيه مدعوك، متبهدل، مش قادر يتنفس، ومش قادر يطلع 3 تمريرات على بعض!
ولولا ستر ربنا كان الزمالك خارج خسران 3 على الأقل!

طيب يا كابتن… إنت مستني إيه؟!
مستني بتروجيت يجيب جول يعني عشان تتحرك؟!

كل الكوارث دي قدام عينك، ومفيش أي تدخل فني حقيقي!

لحد ما ربنا كرمنا بهدف، ساعتها فجأة تقول:
يلا يا رجالة! نرجع نلعب، نمسك كورة، نضغط، نعمل تحولات، وعدي وشيكو بانزا يرجعوا يقفلوا الأطراف!

والغريب إن أول ما الزمالك لعب بالشكل ده، بتروجيت اتراجع والزمالك بدأ يظهر!

ومحمد سيد نزل عمل المطلوب تحرك ضغط استلام اختراق وسجل كمان

أما آدم كايد بقى، فبصراحة أنا مش فاهم إيه اللي بيحصل!
لاعب متوسط جدًا جدا جدا جدا، ومش شايف منه الإضافة اللي تخليه أساسي في الزمالك. من الموسم السابق الصراحه
بس دي لها بوست لوحدها بالتفصيل.

نيجي بقى للكوميديا الحقيقية…

ضغطت بتروجيت وقولنا هنجيب جول تاني وهنمسك كورة … تقوم منزل ناصر منسي!!! 🤦🏻‍♂️

ليه يا كابتن؟!

ناصر منسي مش محطة تقدر تطلع عليها الكورة، ومش قادر يجري يضغط، ولا قادر يستلم في المساحات، ولا عنده السرعة اللي تخليك تعتمد عليه في التحولات.

يعني ببساطة… إنت خسرت لاعب في الملعب من غير ما تستفيد منه!

أنا كنت متوقع بعد نزوله إن الزمالك يقول:
هنضغط، هنحاصر بتروجيت، هنلعب كروسات، ونحطهم تحت ضغط مستمر.

لقيت إيه؟!

الزمالك راجع لنص ملعبه… وبيعمل مرتدات بناصر منسي!!!

يا كابتن هو إحنا بنلعب إيه بالظبط؟!

بصراحة شديدة…

ده مش مدرب بيقرأ الماتش… ده مدرب حافظ كام سيناريو وبيطبقه وخلاص!

التغييرات لازم يكون ليها منطق، والخطة لازم تتغير حسب اللي بيحصل في الملعب.
#الزمالك #بتروجيت السويس

31/08/2026

مشاكل بجمله الزمالك لم يحضر سوا في لقطه الهدف

اجنحه الزمالك مش بترجع تدافع ولا حتي قادرين يمسكوا كورة ويخرجوا الفريق من الضغط اللي عامله سيد عيد

او ختي يضغطوا متخيل المعاناه؟

لازم واحد من عدي او شيكوبانزا يخرج ويلعب جناح يقدر يمسك كورة او ويخرج الفريق بالكورة او ممكن محمد السيد ينزل وتخرج ادم كايد وتنزل عبدالله

لازم كابتن معتمد يدخل حمد القايمه ولاعب وسط عنده قدرة علي التدرج بالكورة سواء شحاته او ربيع معندهمش الحته دي
مفيش للاسف بديل يلعب ٦ في القايمه المباراه

28/08/2026

خوان بيزيرا.. ما بين البيع والاستمرار.. تعالوا نفكر سوا بصوت عالي .

قدمنا قرارين قدامنا:
الأول هو تمسّك الزمالك بخوان بيزيرا واستمراره مع الفريق..
تعالوا نشوف سوا إيه مميزات القرار وإيه عيوبه.

أولاً: استمرار خوان بيزيرا

خوان بيزيرا لاعب حريف جدًا ومهم جدًا بصراحة، وكان واحد من أهم أسباب انتفاضة الزمالك، وكلنا شوفنا حجم تأثيره مع الفريق الموسم السابق.

دائمًا كان مفتاح لعب حقيقي، وقادر يصنع الفارق ويحسم المباريات، خصوصًا مع ثنائيته المميزة مع عدي الدباغ.

فأكيد استمرار بيزيرا هيكون مهم جدًا من الناحية الفنية.

لكن السؤال هنا:
بعد التمرد وكل الأحداث اللي حصلت.. هل أنت واثق إن لو بيزيرا رجع، هيقدر يقدم نفس المردود ونفس الشغف اللي قدمه الموسم اللي فات؟

وهنا تبدأ عيوب قرار الاستمرار.

اللاعب ومجلس الإدارة وصلوا لنقطة صعبة جدًا، وأصبح من الصعب ترجع المياه لمجاريها بسهولة.

تمرد اللاعب ووضع مصلحته فوق مصلحة الزمالك خلّى قطاع كبير من الجماهير مش متقبل فكرة التعامل معاه أو الهتاف باسمه مرة تانية.

والأهم من كل ده:
هل اللاعب نفسه هيقدر يلعب بنفس الشغف والرغبة اللي شفناها الموسم الماضي؟

أنا شخصيًا شايف إن ده سؤال صعب جدًا، ومش مجرد مسألة فنية.

---

ثانيًا: بيع خوان بيزيرا

هنا أنت بتتكلم عن ميزة مهمة جدًا بالنسبة للزمالك حاليًا، وهي السيولة المالية.

بيع بيزيرا ممكن يضخ مبلغ كبير في خزينة النادي، ويساعد في توفير الاستقرار للفريق خلال الموسم، سواء في الرواتب أو المستحقات أو تدعيم الجهاز الفني، وبالتالي الحفاظ على فرص الزمالك في المنافسة على البطولة الأفريقية.

وكلنا شوفنا خلال الفترة الأخيرة إن المجلس بيعاني في توفير الأموال، سواء للصفقات أو رواتب المدربين أو العقود والمستحقات.

وبالتالي بيع بيزيرا، لو تم بالمبلغ المناسب، ممكن يكون متنفس حقيقي للزمالك خلال الموسم.

لكن طبعًا القرار له عيوب.

أهم عيب إن قائمة الزمالك محدودة جدًا من الناحية الفنية، وخسارة لاعب بقيمة بيزيرا بالتأكيد هتأثر على الفريق.

لكن في المقابل، لازم نسأل نفسنا السؤال الأهم:

هل بيزيرا بالشكل والوضع اللي وصلنا له حاليًا، هيكون فعلًا إضافة للفريق؟

ولا الأفضل تستفيد من قيمته المالية، وتعيد توظيف الأموال في مصلحة الفريق؟

---

إذن الزمالك أمام حلين فقط تقريبًا:

الأول: تعديل عقد اللاعب ومنحه زيادة استثنائية لمحاولة احتواء الأزمة.

لكن هنا أنت بتخلق منهج خطير جدًا للمستقبل.

لأن كل لاعب مهم بعد كده ممكن يستخدم نفس الأسلوب للضغط على النادي من أجل تحسين عقده، وبالتالي تتحول الأزمة من حالة فردية إلى سابقة إدارية.

الحل الثاني: البيع.

لكن لو الزمالك قرر البيع، لازم يحقق أقصى استفادة ممكنة وأعلى سعر ممكن.

وأنا شايف إن مبلغ لا يقل عن 5 ملايين دولار لازم يكون نقطة البداية، لأنك مش بتبيع لاعب عادي، أنت بتبيع واحد من أهم وأغلى أصول الفريق.

وفي نفس الوقت، لازم الفلوس دي يتم توظيفها صح، مش مجرد حل أزمة مؤقتة.

---

ولو الزمالك قدر يستغل الأموال الناتجة عن البيع في التعاقد مع جهاز فني أجنبي كامل ومميز، مناسب للمرحلة الحالية، وقادر على تطوير المجموعة الموجودة واستغلال العناصر الشابة، فده ممكن يكون من أفضل القرارات اللي يتخذها مجلس الإدارة.

لأن الزمالك في المرحلة دي مش محتاج أسماء كتير وخلاص..

الزمالك محتاج مشروع فني حقيقي، وانضباط، وتطوير، واستغلال صح للموارد الموجودة.

وفي النهاية، القرار مش عاطفي..

هل تتمسك بلاعب مهم رغم كل ما حدث؟
ولا تستفيد من قيمته وتبدأ في إعادة بناء الفريق؟

تعالوا نفكر فيها سوا بصوت عالي.

27/08/2026

الزمالك والبنك الأهلي.. أول 3 نقاط فوز في رصيد الزمالك

الشوط الأول

الشوط الأول البنك الأهلي عمل ضغط عالي جدًا بطول الملعب، خلّى الزمالك مش قادر يبني أي هجمة بشكل سليم، وكان الحل الوحيد هو الكرات المباشرة، واللي كنا بنفقد بسببها الكرة بشكل مستمر.

ودي نفس مشكلة ماتش الاتحاد: معندناش لاعبين قادرين يستلموا ويسلموا تحت الضغط، أو يستلموا بين الخطوط، وحتى مفيش جناح يقدر يمسك الكرة ويكسب المواجهة الفردية.

البنك الأهلي ضغط، وكان قريب جدًا من التسجيل في أكتر من فرصة.

والغريب هنا إننا عارفين إن الزمالك هجوميًا عنده مشاكل، لكن في نفس الوقت كان فيه علامات استفهام كتير على التنظيم الدفاعي، سواء في قرارات بعض اللاعبين أو في الشكل الجماعي للفريق.

الموضوع مش مجرد إنك ترص 4 لاعبين في الخط الخلفي وخلاص، لازم كابتن معتمد يحاول يلاقي حل للشكل الدفاعي اللي ظهرنا بيه، لأن فيه أخطاء لازم تتعالج.

الشوط الثاني

كابتن معتمد مستناش كتير، وأشرك ربيع، والراجل للأمانة حسن شكل الزمالك؛ لأنه لعب في مكانه الطبيعي، وفي نفس الوقت وظّف شحاتة في المكان اللي بيظهر فيه بشكل أفضل.

لكن ربيع نفسه عنده مشاكل في التمركز، وكنا هنستقبل هدف بسبب رعونته في إحدى اللقطات.

ومع ذلك، الزمالك عنده لاعبين تانيين في نفس المركز يستحقوا الفرصة، سواء الفرنسي اللي شايف إنه أحق بالفرصة، أو حتى جهاد اللي الزمالك بيدفعله راتب في النهاية ولازم نستفيد منه. لكن ربيع قدر مع شحاته يقفلوا قلب الملعب ويمسكوا وسط الملعب .

شيكو بانزا ما زال عندي عليه تحفظات، لكن للأمانة نشّط الشق الهجومي بشكل واضح، سواء بانطلاقاته السريعة أو بالضغط، وده شيء كان مختلف تمامًا عن شريف.

لكن التغيير الأهم بالنسبة لي كان محمد السيد.

محمد السيد غيّر شكل المباراة فعلًا. اتوظف كلاعب وسط بواجبات هجومية، وعمل مثلثات على الطرف الأيسر، وكان نشيط جدًا في التحرك والضغط، وبصراحة أجاد بشكل كبير وحوّل شكل المباراة تمامًا.

كل ده تزامن مع فتح البنك الأهلي لخطوطه، لأنه كان بيحاول يعوض الهدف، وهنا ظهر الزمالك اللي بيعرف معتمد جمال يلعبه بشكل أفضل: فريق يعتمد على التحولات والمساحات.

الزمالك استغل المساحات وقدر يسجل الهدف الثاني والثالث، وحوّل المباراة من معاناة في الشوط الأول لانتصار بثلاثية.

وبالتأكيد لازم نشيد بالمهدي سليمان، اللي بصراحة للمباراة التانية على التوالي بينقذ الزمالك بتصدياته المميزة، وكان له دور مهم جدًا في الحفاظ على تقدم الفريق.

في النهاية، أهم حاجة إننا نبني على الفوز، ونحاول نعالج الأخطاء اللي ظهرت، لأن الفوز مهم، لكن الأهم إننا نفهم إيه اللي خلّى الزمالك يظهر بشكل أفضل في الشوط الثاني، وإزاي نحافظ على ده ونطوره.

ويارب النصر دوما للزمالك. 🤍

27/08/2026

شوفنا كلنا شكل الزمالك اتحسن بشكل واضح لما بدأ يلعب بالأجهز.

فتوح وشريف ظهروا بشكل أفضل، ومنسي أكيد بيحاول يثبت نفسه أكتر في المباراة دي.

وبعيدًا عن جاهزية ربيع من عدمها، شحاتة في مركز الـRight Midfielder بيضغط من قدام، وبيعمل زيادة عددية على الأطراف، وقدم أكتر من عرضية خطيرة، وفي نفس الوقت بيحاول يدخل للعمق.

محمد السيد كان نشيط وفَرّاك، وبدنيًا أجهز بكتير من فتوح، وده انعكس على شكل الفريق وحركته.

ويمكن أهم حاجة إننا قولنا قبل كده إن الموضوع مش بالأسماء. ناشئين الزمالك كانوا سبب أساسي في الفوز، مع المهدي سليمان.

شفنا حسام، وإيشو، ومحمد السيد… لاعيبة صغيرة لكن عندها شخصية، وبتقدر تدي الفريق طاقة وحيوية وشكل مختلف.

26/08/2026

غير راضي عن التشكيل للامانه . خصوصا قدام خصم اقوي واشرس
لكن خلونا نشوف كابتن معتمد هيلعب ازاي ومحهز ايه

24/08/2026

أنا مش من أنصار فكرة إننا نقول: «لازم معتمد جمال يلعب كذا»، ونكتب تشكيل وخلاص؛ لأن الموضوع عمره ما كان مجرد رص لاعيبة في الملعب.

الأهم إننا نشوف أسلوبك، ونشوف العناصر اللي تقدر تنفذ الأسلوب ده. وشوفنا كلنا إزاي الزمالك عانى في ماتش الاتحاد من عدم وجود لاعب يقدر يتحكم في رتم المباراة، بالإضافة لغياب لاعب في الجناحين قادر يصنع فرص ويخلق الخطورة.

ونصيحتي لكابتن معتمد: العب بالجاهز والأجهز.

شوفنا حمد لما نزل في الوينج، ورغم إنها كانت دقايق معدودة، لكن لاحظنا لاعب قادر يحط الكرة تحت رجله، يراوغ، ويكسب المواجهات الفردية. وتخيلوا لو بدأ المباراة في مركز الوينج وكان عنده وقت أكبر لإظهار إمكانياته.

في المقابل، شوفنا كلنا إن فتوح وآدم كايد كان مستواهم سيئ جدًا، وبالتالي تغيير التركيبة واستخدام عناصر جاهزة ممكن يكون حلًا منطقيًا.

ممكن مثلًا شحاتة يلعب rightmidfielder يقدر يعمل كثافه هجوميه وزيادة في الطرف الايمن ، ومعاه محمد السيد left midfielder، يقدر يعمل كثافه داخل الصندوق وعلي الطرف ايضا غير قدرتهم علي الضغط واستخلاص الكرات وتلعب بجهاد أو الفرنسي في مركز 6 قدرتهم حتي في التدرج في الكورة افضل من شحاته

وبما إنك معندكش عدد كبير من الوينجرز، تقدر تعمل جبهة يسرى بشكل مختلف، سواء بالخضري مع بنتايك، أو إيشو مع بنتايك، حسب طبيعة المباراة والتعليمات.

الحلول موجودة، خصوصًا إن كل العناصر دي شاركت معاك وفاهمة تعليماتك، وبالتالي أنت عندك مساحة كبيرة لتغيير الطريقة وتوظيف اللاعبين بشكل يخدم الفريق.

ممكن كمان تلعب بمهاجمين، مع أدوار مركبة، خصوصًا لو حسام أشرف جاهز، بجانب عدي الدباغ.

لكن إنك تحط عدي في مركز الجناح، فأنت كده بتخسر جزء كبير من إمكانياته، وفي نفس الوقت تلعب بمهاجم زي منسي وهو مش جاهز، فبالتالي أنت خسرت لاعبين داخل الملعب بدون الاستفادة الحقيقية من أي منهما.

والمشكلة أصلًا إن الزمالك بقاله 3 مواسم وأكثر وهو بيعاني من نقص واضح في مركز الوينج، وبالتالي لازم نتعامل مع الأزمة بحلول فنية، مش بمجرد الالتزام بمراكز ثابتة.

كابتن معتمد، المطلوب إنك تفكر في الحلول، وتغيّر العناصر بالعناصر الجاهزة، وتوظف كل لاعب في المكان اللي يقدر يديك فيه أكبر إضافة.

بداية الدوري مهمة جدًا، وبتقدر بشكل كبير تحدد شكل الموسم؛ لذلك كل نقطة وكل قرار فني من البداية له ثمن.

22/08/2026

الزمالك والاتحاد السكندري.. السيطرة وحدها لا تكفي

بالتأكيد كلنا شاهدنا صور لاعبي الزمالك، ولاحظنا بوضوح الزيادة في الأوزان لدى عدد من اللاعبين، وهو أمر بالتأكيد يرتبط بتأخر فترة الإعداد، مع تحمّل اللاعبين أنفسهم جزءًا من المسؤولية.

الزمالك ظهر في الشوط الأول مسيطرًا على مجريات اللعب، لكن كانت سيطرة بلا خطورة حقيقية؛ لأن الفريق يفتقد للاعب القادر على صناعة الفرص وإرسال الـ«أسيست» أو خلق الحل الهجومي في الثلث الأخير.

الزمالك ببساطة لا يمتلك وينجرز حقيقيين. شريف والضباغ في الأساس مهاجمان، ولاعبي الوسط لا يمتلكون هذه النوعية من القدرات الهجومية. اللاعب الوحيد الذي يستطيع القيام بهذا الدور، ولو على فترات، هو عبدالله السعيد، لكن عامل السن بالتأكيد أصبح مؤثرًا على قدرته ومستواه.

حتى كايد، ورغم أهميته، فإن أبرز ما يستطيع تقديمه هو الخروج بالكرة من الخلف وفتح زوايا التمرير ومساعدة حامل الكرة، لكنه ليس اللاعب الذي يستطيع التحكم في رتم المباراة أو صناعة الفرص باستمرار.

أما فتوح، فأنا من البداية غير مقتنع بفكرة توظيفه في وسط الملعب، خصوصًا أنه حتى الآن ليس جاهزًا بدنيًا بالشكل الكافي.

لذلك، لا بد أن نعوّض هذا النقص بتكتيك جماعي وطريقة لعب لا تعتمد على لاعب واحد قادر على صناعة الفارق.

وهنا يجب أن ننظر بشكل أكبر إلى قطاع الناشئين. كلنا شاهدنا حمد عندما شارك، وشعرنا أن لديه شيئًا يمكن أن يقدمه، إذا استطاع المدير الفني العمل معه وتطويره بالشكل الصحيح. وكذلك إيشو والخضري، فهما قادران على شغل مراكز هجومية وصناعة الفارق.

وفي المقابل، ما زلت غير مقتنع بشيكوبانزا منذ الموسم الماضي، وأرى أن الاعتماد عليه كحل أساسي لا يعالج المشكلة الحقيقية التي يعاني منها الفريق.

الزمالك يحتاج إلى حلول جماعية، وأفكار واضحة، واستغلال أفضل للمواهب الموجودة، وليس انتظار لاعب واحد لينقذ الفريق كل مباراة.

14/08/2026

كل الاخبار اللي كانت منتشرة حتي الان عن عودة الجفالي كلها كانت كاذبه من شخص كان بيحاول يصبر الجمهور عن غياب او بيع بيزيرا

لكن الحقيقة الدوري متبقي له اسبوع للبدء وعدم عودته اللاعب حتي الان كل ذلك لا يفسر سوء تمرد او عدم رغبه اللاعب في اثبات نفسه

لما يتم قيده بالقائمه وترك لاعبين شباب كانوا اولي بالفرصه اذا كان سيتم فسخ عقد سيف فاروق جعفر لما لم يتم قيد مواهب كان الزمالك اولي بيهم حتي ان لم يكونوا ضمن أولويات كابتن معتمد كان الاولي اعارتهم

الصراحه فشل اداري كبير واخطاء يتحمل مسؤوليتها المدير الرياضي ومجلس الادارة العاجز الجاهل .

جريمة أخرى
بعد جريمة تطفيش المدير الرياضي وجهازه الإداري، انتشر خبر عن رغبة مجلس الإدارة في بيع خوان بيزيرا. وإذا صح هذا الخبر، فسيكون بمثابة حكم مبكر على موسم الزمالك قبل أن يبدأ، لأن بيزيرا ليس لاعبًا عاديًا يمكن الاستغناء عنه، بل هو أحد أهم الأوراق في الفريق.
أتمنى أن تحافظ الإدارة عليه، فهو من ضمن عدد محدود جدًا من اللاعبين الذين يعلّق عليهم جمهور الزمالك آمالًا كبيرة لقيادة الفريق نحو موسم ناجح.
كما انتشر أيضًا خبر عودة الجفالي، وكنت أتمنى أن يتولى تجهيزه مدير فني أجنبي قادر على تطويره فنيًا وبدنيًا، إلى جانب رفع مستوى باقي عناصر الفريق. لكن في ظل الظروف الحالية، لا نملك سوى دعم معتمد جمال ومنحه كامل المساندة، على أمل أن ينجح في تحقيق أفضل النتائج الممكنة.