من الأخر مع محمد مجدى

رغم إني أهلاوي جدًا ❤️🦅، بس بجد مبسوط جدًا لحمزة عبد الكريم، وبتمنى أشوفه بيشارك أكتر ويهدف أكتر ويكمل بنفس المستوى.
بسم الله ما شاء الله على تحركاته في الملعب، وثقته وشخصيته.

بس اللي بيخليني أسأل: إزاي مواهب بالشكل ده ممكن تبقى موجودة عندنا ومحدش يشوفها بدري؟

والأصعب إن حمزة مش الحالة الوحيدة.. مصر مليانة مواهب، ويمكن فيه لاعيبة عندها إمكانيات أكبر، لكن للأسف مواهب كتير بتضيع بسبب قلة الضمير، والواسطة، والمصالح، وأصحاب السبوبة.. والأهم من كل ده إن عندنا ناس كتير مسئولة عن اكتشاف المواهب مش بتعرف تشوف أصلًا!

الكورة مش اسم ولا واسطة ولا ابن مين وبيتمرن فين..
الكورة موهبة، وتحرك، وذكاء، وشخصية في الملعب.

حمزة لما أخد الفرصة بدأ يثبت نفسه، وده أكبر دليل إن عندنا كنوز كتير محتاجة بس عين تعرف تشوف، وضمير يدي الفرصة للي يستحقها.

ربنا يحفظه ويوفقه، وإن شاء الله نشوفه في مكان أكبر وأكبر..
والأهم نشوف يوم في مصر الموهبة هي اللي تحكم، مش الواسطة.
@أبرز المعجبين

أنا مش منبهر بأداء حمزة والفينيش بتاعه على قد ما أنا منبهر بشخصيته وثقته في نفسه، واللي باينة جدًا حتى في احتفالاته بعد الأهداف.

متحسوش لعيب صغير لسه بيبدأ، ولا محسس نفسه إنه جاي من مصر وداخل يلعب في برشلونة وسط نجوم عالميين، فمكسوف أو خايف أو متوتر من الأجواء.

بالعكس تمامًا.. الواد تحسه متربي هناك وبيلعب وسطهم بقاله سنين. عنده جرأة، وثقة، وحضور في الملعب، ومش هايب لا اسم النادي ولا قيمة اللعيبة اللي حواليه. والأجمل إن ثقته مش باينة غرور، باينة في تحركاته، وفي طلبه للكورة، وفي قراراته، وحتى في فرحته بعد ما يسجل.

الموهبة لوحدها مش كفاية، لأن فيه مواهب كتير جدًا ضاعت.. لكن الشخصية القوية والعقلية اللي مش بتخاف هما اللي ممكن ينقلوا اللاعب لمستوى تاني خالص. وحمزة من دلوقتي بيدي إحساس إن عنده الشخصية دي.

ربنا يحفظه ويبعد عنه الحاقدين وأعداء النجاح، ويحميه من إصابات الملاعب، ويرزقه الناس اللي تساعده وتوجهه صح، ويكمل بنفس الثقة والتركيز من غير ما الضغط أو الشهرة يأثروا عليه.

وبرضه لازم أدي حق حسام حسن في نقطة مهمة جدًا.. الراجل عينه كويسة على المواهب وعنده جرأة إنه يدي فرصة للاعب لما يشوف فيه حاجة، من غير ما يخاف من سنه أو اسمه أو كلام الناس.

وبعيد تمامًا عن أي خلاف على حسام حسن أو مشاكله أو طريقته، أنا هنا بتكلم عن صفة إحنا محتاجينها في مدربين كتير في مصر: مدرب عنده فكر، وعينه تقدر تكتشف اللاعب، وعنده شخصية وجرأة إنه يراهن على الموهبة ومبيخافش.

محتاجين مدربين يدوروا على اللاعب الموهوب وصاحب الشخصية، مش بس الاسم المشهور أو اللاعب الجاهز.

ربنا يوفق حمزة.. وإن شاء الله تكون دي مجرد بداية لمشوار كبير 🇪🇬❤️

انتظروا بث مباشر بعد قليل الفائز فى توقع نهائي كاس العالم

📢 اعتذار بشأن تأجيل قرعة الفائز في توقع مباراة نهائي كأس العالم

نعتذر عن تأجيل إجراء القرعة إلى غدٍ الثلاثاء، وذلك بسبب مراجعة جميع التعليقات والتأكد من استيفاء الشروط حتى تتم القرعة بكل شفافية ومصداقية، ولا يُظلم أي مشارك.

كما أن عددًا كبيرًا منكم طلب أن تكون كوكي هي من تسحب القرعة، وبسبب سفرها تم تأجيل السحب إلى الغد.

نعتذر عن التأخير، ونشكر لكم تفهمكم، وموعدنا غدًا الثلاثاء بإذن الله في بث مباشر على صفحة من الآخر مع محمد مجدي. ❤️
@أبرز المعجبين

مش قصدي أقلل من الكابتن عبدالله جمعة، بالعكس.. ده لاعب محترم، وعمل تاريخ كويس مع الزمالك، وربنا يوفقه في اللي جاي.

تعالى وركز معايا في الكلام كويس…

لو لاعب باسم وخبرة عبدالله جمعة بقاله سنتين أو أكتر بعيد عن الكورة، أمال كام لاعب في الدرجة التانية والتالتة والرابعة موهبته ماتت وهو مستني فرصة؟

كام شاب قلبه اتكسر؟
كام واحد ساب الكورة وهو عنده حلم؟
كام موهبة تستحق تبقى في الدوري الممتاز، لكن محدش بص لها؟

للأسف، بقى فيه ناس كتير شايفة إن الكورة اتحولت عند بعض الناس لسبوبة، وإن بعض وكلاء اللاعبين وبعض المدربين اللي معندهمش ضمير بقوا يجروا ورا مصالحهم على حساب الأندية، وعلى حساب لاعيبة تستحق الفرصة بجد.

والنتيجة؟
تلاقي لاعب موهوب قاعد في بيته، ولاعب تاني إمكانياته أقل بيلعب كل أسبوع. وده شيء يقهر أي حد بيحب الكورة بجد.

إحنا مش محتاجين أسماء وبس… إحنا محتاجين ضمير.

وعبدالله جمعة نفسه ملوش أي ذنب في الكلام ده… هو مجرد مثال خلاني أتكلم عن مشكلة أكبر بكتير، وهي إن عندنا مواهب كل يوم أحلامها بتضيع لأنها مش لاقية فرصة حقيقية.

إمتى الكورة في مصر هتبقى بالعدل؟
إمتى اللي يتعب ويستحق ياخد فرصته؟
إمتى هنشوف الاختيار على أساس الموهبة والاجتهاد، مش أي حاجة تانية؟

ارحموا المواهب… لأن اللي بيتكسر حلمه النهارده، ممكن يكون نجم مصر بكره لو لقى فرصة.






@أبرز المعجبين