Sally Malak Saleeb

حمراء؟! تعالوا أعرفكم حكايتها
ضحكت قوى من تعليقات جت على العربية اللي أهداها #أردوغان لل #السيسي
والناس تقول جايبهاله #حمراء علشان الخطوط الحمراء اللي كان حاطتهاله
واللي يقول أوعى تركبها ياريس حاطتلك أجهزة تصنت فيها
واللي يقول دفع جماركها دي يا ريس واللا عدت بالحب؟😂
واللي يقول بس الريس لابس الحزام وماشي على القواعد مظبوط

الحقيقة ان في أكتوبر 2025 أهدى أردوغان نفس العربية بنفس لونها الأحمر ل السلطان هيثم بن طارق في زيارته لسلطنة عمان

اللي بيحصل ده ترويج رئاسي لصناعة محلية تركية #تسويق يعني
مكنتش تعرف المعلومة صح
تعالى أعرفك أكتر على العربية
“توغ” (Togg) خدت اسمها من الحروف الأولى للعبارة التركية (Türkiye’nin Otomobili Girişim Grubu) ومعناها “مجموعة مشاريع السيارات التركية”.

وأما شعارها فهو دمج سهمين على شكل “مُعيّن”وبيرمز لالتقاء الثقافات الشرقية والغربية، وللجمع بين التكنولوجيا والناس.
تكلفتها 49 ألف دولار يعني كاسرة ال 2مليون وربع مصري هدية رمزية يعني لكن الإصرار على إهداء الرؤساء والسلاطين بيها ان يتروج للصناعة التركية المحلية عالية الجودة




#مصر


شيرها لو مكنتش تعرف انها اتسوقت قبل كده في عمان
دايما أجيبلكم قرار أي حاجة تحبوها
من عيوني 🥰
اللي كان عارف يعلق ب ١
واللي أول مرة يعرف يعلق ب ٢

كم شخص مركز مع صفحتك أكتر منك ؟؟
وكم شخص هيشوف البوست ده تلقيح
كم شخص بتبقي عاوز تقوله كفايه لايكات ابوس ايدك انا مش بوزع جايزه اسرع لايك
كم شخص بتبقي عاوز تقوله اللايك بتاعك فعلا يهمنى
كم شخص عاوز يعرف انت فين حالا ومع مين غيره
كم شخص بيعد عليك النفس و بيقول كفاية عليه فرحه لغاية كده اشمعنى هو يارب
كم شخص بيعد عليك لايكات الناس
كم واحد بيركز فلان او فلانه بيعلقوا عندك قد ايه وبيكتبوا ايه بالظبط
كم واحد بيستنى اى نوتيفيكيشن منك عند اى شخص ويشوف اسلوب ردودك هناك ايه وهل ده ينم عن علاقة حب ام اعجاب ام اشمئزاز وهل ستطور العلاقه بينكم وتوصل لبيت واولاد
كم شخص بيتقمص ويقول بيعمل لايك لفلان او فلانه علطول وانا لاء اشمعنى انا
كم شخص بيحسدك على حب الناس ليك
كم شخص بيتابعك علشان يوقعك فى اى غلطه ويمسكها عليك
كم شخص مش بيفوت بوست او حتى لايك بتعمله على اى حاجه ورغم كده علطول ملتزم المراقبه فى صمت بتحس يوم ما يعمل لايك كانه غلط ومكسوف يتقفش فبيسيبها
كم شخص اصلا فاكر ان اللايك او القلب الجديد معناه حب الشخص مش الاعجاب بالفكر اللى بيحمله البوست
كم شخص بيتعامل بعقل طفل لما تقربوا يهريك لايكات وتعليقات ولما تبعدوا يتقمص وكانه بيعاقبك بتجاهل منشوراتك وهو بايت فى الصفحه
كم واحد بتبقي عارف انه بيحط اللايك بمعنى عيب يا جدع رد انبوكس ماانت قاعد اهوه
وكم لايك بتحس فعلا من اللى بيحطوهالك ان عنيهم مطلعه قلوب ودباديب وبيحبوك وبيحبولك الخير
كم شخص اول ما بيفتح جهازه بيجيب صفحتك الشخصيه وينزل على البوستات بالترتيب لايك وتعليق بيشوف ايه اللى فاته النهارده
كم واحد من كتر بوستاتك وعددها وانتشارها قال ناقص افتح الحنفية تنزللى منها
كم شخص لو الف واحد عمله لايك وانت لاء ..هيبقي قاعد بيغلى وزعلان ومكبوس
كم شخص اول ما بيفتح يشوف بوست عنده بيدور علي رد فعلك ويا ترى شفت البوست واللا لاء
كم شخص بيكتب مثاليات مش عايشها وبتبقي اللايكات عنده بمعنى قول لنفسك يا بيه
كم شخص معجب باسلوبك او فكرك وبيغير حياته فعليا على توجيهاتك ونصايحك
كم شخص مش بيحب يبعت زيه زى الناس وبيبعتلك على الخاص يهنيك باى مناسبه او يفرحك بتغيير حياته لانك فعلا شخص مميز فى حياته
كم بوست انت كتبته وتقصد بيه شخص بعينه واتبسطت لما ما عملش لايك فعرفت ان الرساله وصلته بس بيحفظ ماء الوجه
وكم بوست شوفته وقلت شكرا يارب دى رسالتك ليا النهارده
كم بوست انت كتبته بنيه عامة مش فى دماغك حد فعليا وواحد خده عليه والبطحه كانت جامده لدرجة ان الكل فهم البوست عليه
كم بوست كتبته بمشاعرك الخاصه الصادقه ولقيته مسروق بدون احساس لمجرد جمع شوية لايكات
كم شخص لقيته باعتلك طلب صداقه ومفيش ولا صديق مشترك وكنت عاوز تطخه وقبل ما تطخة تسأله انت جيت هنا ازاى يا كابتن وليه ؟
كم شخص مش من الاصدقاء وينزل صفحتك على عشر بوستات ورا بعض لايكات بتبقي عاوز تقوله اتمنى يكون البروفيل بحري ومنعش وجايبلك طراوة
كم بوست صور مضروبه لتأجيج اى حادث ولدغدغة المشاعر وعلشان مشاهدات الصفحه تعلى وسعرها يزيد
كم بوست شوفته وقررت تعمل لايك وتراجعت من كتر ما الناس مركزه فى اى اكشن بتاخدة مع صاحب البوست اكتر ما هم مركزين فى حياتهم
كفاية كده واللا نكمل
لاى حد هيعجبه البوست ومش هيعمل لايك اضحك يا جدع احنا اتعودنا وقولى قهوتك ايه انت ضيفنا وكرم الضيافه واجب

فات 8 سنين 31/7/2017

لو أنا مكان

أول حاجة هعملها بيان باعتذار وزير النقل عن مسؤولية وزارة النقل .. وسيادته كده كده لسه معاه الصناعة يعني معاه ملف تاني ومميز فيه
وقبول رئاسة الوزراء لذلك وإعلان الوزير الجديد بعد يومين
المسؤول المعتذر عن مسؤوليته يتوجه بخالص التعازي لأسر الشهداء
ده كده بسم الله الرحمن الرحيم قبل ما ابدأ في إدارة الأزمة

أولاً: إدارة الأزمة
• إعلان حالة طوارئ مؤقتة في المنطقة وتشكيل غرفة عمليات مركزية
• التوجه الفوري للموقع والمستشفيات لمتابعة الحالة عن قرب
• تشكيل لجنة تحقيق عاجلة من الجهات المختصة (النقل، الداخلية، النيابة)
• إعلان الحداد وتقديم المعونات العاجلة لأسر الضحايا
ثانياً: الإجراءات الأمنية العاجلة
• منع مرور سيارات النقل الثقيل على الطريق حتى انتهاء أعمال الصيانة مش العربيات ماشية عكس النهاردة
• تشغيل طرق بديلة وتحويل مسارات الشاحنات
• زيادة الرقابة المرورية ونقاط التفتيش
• تطبيق نظام مراقبة إلكتروني لرصد السير عكس الاتجاه
بخصوص وزير النقل: مش بنقول أسامي أهوه أنا دايما بقول التايتل ده مفروض يعمل ايه ايا كان هو مين
• إقالة فورية إذا ثبت تقصير في صيانة الطريق أو إدارة حركة المرور نثبت بتحقيقات فورية بقى
• في حالة عدم الإقالة: سحب صلاحيات ملف الطرق الإقليمية منه مؤقتاً وده يكون من رئاسة الوزراء او الرياسة نفسها
وبالنسبة لتصريحاته اللي مسمعناهاش حتى اللحظة كان لازم تكون:
• اعتذار واضح وتحمل كامل للمسؤولية
• إعلان خطة فورية لمراجعة كل الطرق الإقليمية
• الإعلان عن تعويضات فورية ومعاشات استثنائية للأسر
• وضع جدول زمني واضح لإصلاح الطريق وتأمينه

منع السير عكس الاتجاه هنفذه فورا ب
• تركيب حواجز خرسانية فاصلة في المناطق الخطرة
• وضع رادارات وكاميرات مراقبة ذكية
• تطبيق غرامات مالية قاسية (لا تقل عن 5000 جنيه) وتصل للحبس على زمة تحقيق
• سحب الرخصة فوراً لمن يسير عكس الاتجاه
• أجهزة GPS في كل المركبات التجارية إجبارية حقيقي وتتفعل
وهديج ديب أكتر وأشوف البنات دي الدولة مفروض تقوم بدورها ازاي علشان ميتحوجوش ينزلوا الشغل ده
• زيادة منحة الطلاب الجامعيين من الأسر الفقيرة إلى 500 جنيه شهرياً
• برنامج "كرامة التعليم": مساعدات شهرية 300 جنيه للأسر التي تمنع بناتها من العمل ويبقى فيه مراقب اجتماعي لكده
• توفير وسائل مواصلات آمنة ومدعومة للطلاب في باقي أيام السنة لأن الكارثة دي حاصلة في إجازة فما بالك بالزحمة وقت الدراسة
• برنامج تدريب مهني مسائي بمكافآت للطلاب طالما كده كده عندهم استعداد يشتغلوا بمقابل مادي ما أعلمهم حرف يدوية في الجامعة هاند ميد مثلا أو خدمات مصغرة ويسلموا منتجاتهم في الجامعة والجامعة تتولى البيع وتوزيع الأرباح
• منح زواج للخريجات من الأسر الفقيرة طالما كل اللي شاغلهم هصرف على جهازي منين لازم أساعد بابا وماما
وبما إن البنات أصلا ترس في حل مشكلة نقص الدخول وبيساهموا في رفع دخل الأسرة على قد إمكانياتهم فنديج ديب أكتر
• زيادة الحد الأدنى للأجور وربطه بالتضخم وهنا لازم المعاشات تتحط في الحسبان يعني ايه اسر الأب والأم فيها كانوا بدخل محترم قبل المعاش وفجأة خرجوا وبقى الدخل منعدم والتحسينات كلها للي لسه بالخدمة لكن المعاشات 15% سنوية فقط لا تتناسب مطلقا مع التضخم ويبتدي بنات زي الورد يساعدوهم
• برنامج سكن اجتماعي للشباب حديثي الزواج حقيقي متناسب مع دخولهم لأن شباب كتير بقوا يقولوا هي الدولة مقتنعة بجد ان الأرقام دي في الاسكان تليق بمحدود الدخل
• تأمين صحي شامل مجاني للأسر تحت خط الفقر في كل المحافظات في أسرع وقت زي المحافظات اللي بدء فيها
• برنامج "بنك الطلاب": أو أي اسم تختاروه عادي يقدم قروض ميسرة بدون فوائد للتعليم زي قروض بنك ناصر للمعاشات كده

واللي عنده حاجة تانية من المتابعين يضيفها

ده غير تشريعات مجلس النواب اللي لازم تغلظ العقوبات في محور حوادث الطرق

الله يرحمهم ويبرد قلوب أهاليهم وقلوب البلد


#حادث #الاقليمي
ضيف دول عندك يا عمرو وافتح القوص الحكاية
شير خلي المقترحات دي توصل

أهالــــــــــــى عاوزة الحرق
صعبة صح ؟
امال طول اليوم بتقول عيال عاوزة الحرق ليه ؟! رد عليا هنا
قبل ما تقولولى كل سنه وانتى طيبه على ال 31 احب اقولكم قواعد التربية ال 30
البيوت مليانه مشاكل ويمكن آخر بوست كتبته يوجع كان بيوت خربانه
بس اللى يوجع اكتر منه بيوت عاملة نفسها عمرانه ومقفول عليهم باب واحد
وكل واحد فيهم بيدمر فى اللى جنبه ست بتدمر فى جوزها وابن بيدمر صحته وسمعة اهله واب بيحطم ولاده
وفى الاخر يجوا يشتكوا لبتوع الارشاد الاسري احنا عملنا اية فى حياتنا ؟!
ارجع كده لورا بتاريخك قبل ما تتجوز وافتكر ايه اللى كنت كارهه فى تربية اهلك ليك .. افتكرت ؟!
لو ناسي هتلاقيه هو هو اللى بتعمله مع ولادك
خلى الماضي فى حاله ونسمع ليستة القواعد مع بعض علشان ننجز

1- احترم نفسك .. اه زى ما بقولك كده لو بتحترم نفسك وتقدرها مش هتسمح تهينها باهانة غيرك خاصة لما يكونوا اقرب الناس ليك ولادك فاوعى تضرب ابنك او تخرسة بكلة مهينة لكرامته
2- - بلاش أوامر قول اللى انت عاوزه فى أى صيغه غير اسلوب الأمر ابنك مش عبد عندك
3- نزل صوباعك ايوة هو اللى علطول مرفوع ده فى وش ولادك بعد ما بتقولهم الامر مباشرةً
4- بلاش كل شوية تقوله انا لما كنت فى سنك
5- لو عاوز ابنك يسمعك بلاش تقوله بلاش انا حاولت اقولهالك مرتين علشان استفزك وهكمل كده باقي البوست بتستفزك بلاش طيب بلاش وانا بكتب هقرفك بيها ومش عارفه لسه مكمل قراية ليه
6- لو مش هتقوله بلاش تانى قوله يكون احسن لو تعمل كذا كان هيبقي افضل لو اتصرفت بالطريقه الفلانية
7- عاوز تخليه يعمل اللي انت عاوزة من غير اوامر خيره بمعنى بدل ما اقولها قومى اكنسي الشقه قومى اغسلى المواعين قولى هتكنسي حالا واللا بعد الكارتون فهتاخدى موافقه ضمنية منها ان بعد الكرتون هكنس ولما تحبي تطبخى اكلة هى مش بتحبها قوليلها اعملك كوسه واللا سبانخ هتاخد الكوسه حتى مفيش اكتر منها فى البلد بقالنا سنين بس انها تختار افضل الوحشين احسن ليكى من ان ترفض تاكل لما يتفرض عليها
8- فيه جمل كده طعمها حلو زى قوم يا حبيبي كفاية مزاكرة انت محتاج تغير جو شوية طعمها حلو قوى جربوا تقولوها
9- التعليم قدامه كم سنه لغاية ما يتعدل فمتجلدش ابنك على تعليم فى طور التطوير ما تضربوش وتكهربة وتلسوعه بالشبشب الطائر علشان يدخل معلومات كانت هتدخل لوحدها لو بطريقه عملى مش نظرى
10- اوعى تقوله انا كنت بطلع الاول على الفصل ما كله معروف وحتى لو دى حقيقه مناهجك غير مناهجه انت وانت بتزاكرله مناهج الحضانه بتنهج دلوقتى
11- اوعى تجبرة على الصلاه .. حببه فيها حببه فى القعده مع ربنا والخلوه معاه ومناجاته طول الوقت خليه يشوفه فى كل لحظات حياته وهو من نفسه يتشوق يكلمه علطول
12- بلاش علطول هتروح النار.. هتروح النار لو عملت كذا او هتروحها لو معملتش كذا قوله ربنا بيحب الكل حتى الخطاه لكن عمره ما حب الخطية ولاد ربنا الحلويين مش بيعملوا كده وانت ابن ربنا
13- خليك دايما واثق فيه وقوله ده .. قوله انا واثق انك هتذاكر بكل قدرتك انا واثق انك مش هتخذلنى والناس كلها هتتمنى ولادهم يبقوا شبهك فى اخلاقك انا واثق انك مخليتش حاجه فى جهدك معملتهاش
14- اوعى تقارنه بابن خاله وابن عمه مش معنى انى قولتلك متقارنهوش بنفسك زمان تقوم تقارنه بابناء جيله واوعى تقارنه باخواته مش طالبة تربية عداوات قارنوه بنفسه فى الماضي بقي حبيبي اللى كانت طالع الشهر اللىفات الاول يطلع التالت حبيبي اللى عمرة ما نطق لفظ وحش يقول الكلمه الصعبه دى
15- اوعى يا ماما ابنك يقولك سر وتقومى تحكيه لباباه وتقولى لباباه بس اوعى تقول.. سيادتك هيقول بعنيه انه عرف وبتصرفه اللي هيتغير معاه وابقي قابلينى لو ابنك جه حكالك على حاجه تانى
16- يا ام يا غيرانه من ولاد كل الناس.. فيه ايه ده اكتر منك انت ناقص ايد واللا رجل منصوفين فى ولادهم وانا اللي حالى مايل دورى على ميزة ابنك وبنتك ركزى فى ولادك وملكيش دعوه بغيرك
17- بمناسبة التدوير ابنك اللي شايفه ضعيف ومهمل فى دراسته او عندى ومش بيسمع الكلام ده ناقصه ثقه فى نفسه ناقصه ميزة تخلية متفرد دور معاه هاتله كراسة رسم اورج صغيور لعبة هاتله سبورة واقلام رمى قصاده كراتين وازايز فاضية وقوله ورينا ابداعك يا بطل ركزعلى الجانب ده ونوره وقوله اللي منور كده اكيد برضه شاطر ومؤدب وومختلف وقدوة فى اخلاقه ودراسته
18- اوعى تشتم ابنك اوعى تهينى بنتك ..الكارثه اوعوا تهينوا بعض كأب وأم مش بس قدامهم لكن فى المطلق لان احترامكم لبعض بيوصلهم وبيدمر او بيقوى شخصيتهم
19- بوسه وحضن فى ايه مخك راح لفين بالظبط ؟! احضنوا ولادكم حضن تكسير زى ما بنقول خلى عضمه يوجعه من شدة الحضن اهريه بوس شبع ابنك وبنتك حب علشان لما يكبر ما يبصش بره ويريل على اول كلمه حلوه تتقاله وترجع تصوت
20- الترهيب واللا الترغيب؟!امتى اقوله النار وامتى اعشمه بالجنه لما تكون طاسه مولعه وبتغلى وهو مصمم يجى جنبها قوله النار دى هتكويك هتحرقك ولو صمم قوم اهبشه ابعده عن النار بايديك وسنانك وعارف المعلقه السخنه اللى جنب الطاسه اللى بتغلى هاتها وخليها تلمس جسمه علشان يحس بحرارتها ويخاف ويحرم لكن مش عمال على بطال تقوله هتخش النار هتموت هتولع لو فضلت تكدب لوسرقت هنقطع ايدك لو .... ربنا هيعلقك من رموشك وام رجل مسلوخه والكلام الخايب ده .. قوله الصدق دايما احلى والامانه محبوبه عند ربنا وهتلاقى كل الناس كمان هتحبامانتك وصدقك
21- اوعى تقول لابنك ملناش دعوه بيهم فهمتنى غلط برضه مقصدش قرايبه اللى فى سنه اللى بتقارنه بيهم انا اقصد الولد اللى محتاج حد يشرحله او اللى نفسه فى ساندوتش بسطرمه من بتوعه بلاش تقوله ركز انت فى مزاكرتك ملكش دعوه بحد هيضيعوك متديش اكلك لحد هيستهبلوك . من فضلك سيبه يساعد غيره قوله اشرحهاله زى ما شرحتهالك وغنيتهالك وبكره هعملك ساندوتشات زياده ليك وليه
22- صاحبوا ولادكم لما يرجعوا اسألوهم اسئله مفتوحه اللى هى تشجع على الحكاوى مش اسئلة قطم اللى هى بتتجاوب بأيوة ولاء والسلام عليكم اكيد مش هعلمكم لما بتحبوا تجرجروا حد فى الكلام تعملوا ايه
23- بلاش تحفز عنده دايما انه يبقي الاوحد يعنى بلاش تقوله باذن الله هتبقي انت الوحيد اللى حافظ والباقي كله زى خيبتها
ابنك هيبقي احسن لو فى جو من المنافسه شاطر وسط شاطرين شاطر ويساعد اللى وقعوا فى السكه علشان يبقوا شاطرين زيه وينافسوه دى متعتها احسن كتير
24- ربيه ان الصدق احسن ولو قاله حتى لو اتعاقب ووقع عليه ضرر فهو مكسب لشخصيته مكسب فى احترامه لنفسه اللى تستحق ان تحترم
25- ربيه مايكونش بوشين يقول رأيه الصادم والحقانى لكن بأدب ما ينافقش لكن يتكلم بحكمه يضرب بلسانه من غير ما يعور حد والضرب يكون بغرض ان اللى بيعاملهم يبقوا افضل اقولك متقولهوش اعمل ده وهو هيتعلمه من نفسه وافتكرى طنط اللى بتشتمى عليها اول ما تقفلى الباب قصاده وهو لسه شايفك من 5 دقايق واخداها بالحضن هل هيصدقك تانى واللا هيتعلم نفاقك كان احسن تواجهيها باللى تاعبك منها فى وشها باسلوب حكيم وهو هيتعلم ازاى يصلح غيره بالادب
26- ما تنيمش ابنك او بنتك ودموعهم على خدهم وخصوصا فى ميعاد العشا وياسلام لو كنت قايل قبلها انشاله عنه ما كل لما الجوع يقرصه هيجى لوحده انت مش شارى عبد وبتأدبه ..اشرحله ايه سبب غضبك فهمه انه لو مكانك مكنش قبل بالغلط ده ومش ده ابنه اللى بيحبه وواخد عليه انه غير كده وطول عمره محترم اللى يعمل كده
ومينفعش يعدى الموضوع من غير مناقشه انت هنا فكرته بادبة علطول رجعتله ثقته فى نفسه وحملته المسؤليه قدام نفسه انه ميخونش ثقتك فيه
27- سيب ابنك يختار لون اللعبه اللى عاوزها وشكلها وطعم الايس كريم اللى بيحبه ولبس العيد والشوز خليه يكون زوقه الخاص بحرية من غير ترشيحاتك اللوزعيه نظرتك غير نظرته لما يكبر هيعرف ياخد قرارات صح والفضل هيرجع ليك
28- سيب ابنك وبنتك يستقلوا عيب يبقي شحط وتاخده وتوديه من الدرس او تستنيها بعد الدروس وتروحى توديها الجامعه ولو فيه خناقه مش بعيد تشمرى وتتخانقى بدالها ما تسلبوش شخصية ولادكم متخلقوش اتباع
29- بلاش تسممى ودان ولادك بالنقض دايماً ..طريقتك مش منزله فى الكتب السماويه اقبلى انها تطبخ بطريقتها وتكنس بطريقتها وتلبس بطريقتها طالما ما ضرتش غيرها طالما مراعيه قواعد الادب والاحترام بلاش كل ما تشوف وشه تقوله انت طريقتك مقرفه اعمل كذا زى البنى آدمين مين آدمين دى هو آدم واحد سيادتك ورغم كده هو بيعديهالك لانك اخدت عليها وورثتها بس هو فوتهالك طالما مش بتتضر فحاول انت كمان تقبله وتقبل مصطلحاته وطريقته وعشوائيته فى اوضة نومه مملكته المستقله
30- ما تعوضش نقصك فى ابنك الكلمه صعبه قوى بس حاجه معرفتش تعملها هو مش مجبر يحقق طموحك ويعملهالك ..كليه معرفتش تدخلها هى مش قميص وهيجيبه علشان يرضيك ده مستقبل هيلبسه وهتلبسوه كلكم .. ولما تحسي فى بنتك بالنقص دورى فيها على مميزات شخصيه عليها طين ولمعيها وخليها تشوف نفسها صح عالجيها واحتويها مش تروحى تزودى نقصها بالتعويض خدى يا حبيبتى عاوزه عربيه عاوزه عشرين شنطه ماركه واحسن لبس يجيلك من بره انتى هتحرقى قلبك ليه ده الوحشين بس اللى بيتجوزوا دلوقتى انتى قاعده فى ارابيزى يا حبيبتى علشان غالية محدش قادر على تمنك
لاء هى قاعده علشان انتى عملتى منها بيعه وشروه وخليتيها سلعه واغلى حاجه فيها ممتلكاتها مش عقلها خلتيها رخيصه قوى مفيهاش اى ميزه تشجع حد يحفى علشان يقول هى دى اللى تبنى معايا اسره تشرف

خلاص ال 30 نقطه كملوا والكلام لسه ما خلصش بس باختصار كون الاب والام اللى اتمنيت انهم يربوك واللى ولادك بعد كم سنه يقولوا لاولادهم احنا اتربينا صح فى وسط جيل صعب

اى شخص محترم وانت واخده قدوه فى حياتك اعرف ان وراه اهل ربوة بطريقه صحيه حاول تبقي زيهم
ولو عندك الاب والام دول اشكر ربنا عليهم كل يوم

انت لو قريت كل ده تبقي بطل انا تعبتلك سلف بأمانه بس كان لازم اعذبكم زى ما بتعذبوا ولادكم وبتعذبونا بكلمه اعمل ايه تانى
اشوفكم احسن اهل فى الدنيا

أدخل ولادي ايه ؟
ثانوي عام واللا فني
جامعة خاصة واللا حكومي
مدرسة حكومي واللا تجريبي واللا لغات واللا دولي
ربوا عيالكم
يوميا في جروبات مليونية بلاقي أهالي بتسأل
وكأنكم بتتسابقوا مين يتمنظر بولاده أكتر من التاني
هتستفاد ايه لو دخلته حاجة فوق مستواه الاستيعابي ويحس طول الوقت انه مضغوط واقل من السباق اللي رميته فيه
هتستفاد ايه لو فضل شايفك بتتسلف كل شهر من ده وده علشان تطلعه مستوى فوق مستواكم وهو مش عارف يجاري زمايله اللي زرعته وسطهم
هتستفاد ايه لما كل ما يغلط تسم بدنه بأنا مقصرتش معاك في حاجة اناطفحان الدم علشان اجيبلك بدل المدرس ٣ في المادة الواحدة
هتفرح بيه لما يصدقك وانت طول اليوم رايح جاي تقوله يا فاشل وادي دقني لو فلحت
مهو طبعا هيطلع فاشل
انت دايما بتقارنه بصورة رسمتهاله في دماغك
صورة بعيدة عن امكانياته ويمكن طموحاته
هتفرح بيه لما ينتحرررررر
تنحت ليه دمه هيبقى في رقبتك
هو ممكن ينتحر يوميا بدون نقطة دم واحدة
لكن في الحساب أمام الله هتسمع كلمة أياديكم ملآنة دماء
ربي أبنك انه مميز في الحاجة اللي يحبها ويرتاحلها وحتى لو أقل من معايير المجتمع لو ركز فيها هيتميز مش هيبقى خروف زي باقي القطيع
هينور وهيلمع في مجاله وهيقدم رسالته وهو سعيد
علمه ان اخلاقه أهم من تعليمه وسلوكه مع غيره هيشهد هو ابن السما واللا ابن الارض
لما تقارنه قارنه بحاله سابقة ليه علشان تحفزه مش تقارنه بابن عمه وابن خاله علشان تحبطه وتطفيه
قوله انا بحبك زي ما انت وواثق انك هتعمل أقصى مجهود ومش هتدلع واثق في أمانتك قدراتك بقى دي هبة من ربنا هو هيسوقك للمكان الأنسب ليك واللي هتنور فيه
ملكش دعوة الناس هتشوفك ازاي ..لأني واثق أن ربنا راسم طريقك بعناية لأنك محبوب عنده وهو ضابط الكل هيرتب أمور حياتك ويصنعلك الخير
خفوا على ولادكم المدرسة اللغات مش نهاية المطاف
الثانوية العامة مش أحسن من الفني
الكلية الخاصة مش هي اللي هتخلي ابنك بشرطتين
تربيتكم وحبكم لولادكم وثقتكم فيهم هم اللي هيرفعوهم لأعلى مكانة

هل أنت شاب شغوف بالمناخ والطاقة؟ هل تحلم بصنع تغيير حقيقي في منطقتنا الأورو-متوسطية؟
✨ فرصتك الآن!
الاتحاد من أجل المتوسط يفتح باب التقديم لبرنامج المندوبين الشباب للطاقة والعمل المناخي لعام 2025!
🌍 لماذا تنضم إلينا؟
كن صانع تغيير: شارك في صياغة سياسات إقليمية مؤثرة في مجالي المناخ والطاقة.
طور مهاراتك: احصل على تدريبات متقدمة في الدبلوماسية المناخية، الابتكار الأخضر، وتطوير المشاريع.
وسع شبكتك: تواصل مع قادة شباب وخبراء من جميع أنحاء المنطقة.
ارفع صوتك عالميًا: مثّل الشباب في فعاليات دولية كبرى مثل COP30.
اصنع أثرًا حقيقيًا: ساهم في مشاريع إقليمية تدعم التحول العادل في الطاقة والتكيف مع التغير المناخي.
🎯 هل أنت الشخص المناسب؟
عمرك بين 20 و30 عامًا.
لديك خبرة أكاديمية، مهنية، أو تطوعية في المناخ، الطاقة، أو الاستدامة.
تتقن اللغة الإنجليزية وتتمتع بالشغف وروح الفريق.
⏳ لا تفوت الفرصة!
آخر موعد للتقديم: الأحد 25 مايو 2025 (منتصف الليل بتوقيت وسط أوروبا الصيفي).
📢 خطوتك القادمة:
زوروا موقع الاتحاد من أجل المتوسط الآن لمعرفة المزيد عن معايير الأهلية، الوثائق المطلوبة، وكيفية التقديم

https://ufmsecretariat.org/ar/ufm-energy-climate-action-youth-delegate-programme/
🌟 كن جزءًا من التغيير. المستقبل يبدأ بك!

برنامج المندوبين الشباب للطاقة والعمل المناخي التابع للاتحاد من أجل المتوسط برنامج المندوبين الشباب للطاقة والعمل المناخي التابع للاتحاد من أجل المتوسط ما هو برنامج المندوبين الشباب للطاقة والعمل المناخي؟ برنامج المندوبين الشباب للطاقة و....

متحاولش .. اللي عاوز يغلطك هيغلطك🥲
لما يبقى قدامك حد مشهودله الحمد لله محليا وعربيا في مجال تحليل البيانات والتفكير المنطقي بالتميز ودوليا كمان بس في مجال تحليل البيانات البرمجية ودي طريقة تفكيره الطبيعية في أي خبر
وشاف بلده اللي بيحبها فيها قضية مهمة طلعت للنور وبقى فرحان ان فيه وعي مجتمعي
وهوب وقت قليل وبالمصطلح الأمني اتركبت من لجان إلكترونية مسيحية وإسلامية ولقى السوشال ميديا طرفين استباقيا ده راجل كبير ٨٠ سنة جسديا ميعملهاش دي متلفقاله والقصة مش منطقية
فابتدت تقولهم مين قال ٨٠ سنة ما يعملهاش وليه دماغك جايبة طريقة واحدة بس في عمل ده فيه طرق تانية كتير ربنا يحافظ على كل الأطفال
وابتدت بالمنطق تمهدلهم ان ممكن عادي ولأن دي مش هتكون الواقعة الأولى ففيه ناس واجبها تروح تشهد عليه
ففجأة ظهرت اللجان اللي بتقول الحق ده عرضوا عليهم ٣٠ كيلو دهب وهوب لاء علشان تبقى منطقية خليها ٣ كيلو مجابتش طيب خليها فيه مدرسة مسلمة اهيه كمان بندينها طيب ما جابتش طيب بص محافظة البحيرة عرضت على الأهل وساومتهم واستغلت نفوذها وده لعلاقتها بالانبا باخوميوس مالك المدرسة طيب ما جابتش الحق المحامي متصور مع الجاني علشان لو الحكم لأي أسباب أو أدلة تانية كان غير المرغوب يبقى المحامي قابض
طيب الحكم طلع الحمد لله كويس وفقا للأدلة المقدمة وشهادة الأم الأم بطلة والقاضي مسيحي وإداله الحكم علشان أسبوع ويخرجوه عفو صحي
بعد الحكم المنشورات لسه مستمرة من محامين بفيديوهات لايف حضروا الجلسة وقالوا الأدلة ضعيفة ولولا شهادة الام والاحتشاد بره والمحامي اخواني وده يخليك تتشكك في قضائك وده المطلوب من المؤامرة واللجان دي
فلما تحاول تاني ترجعهم للمنطق ان فيه يا جماعة درجات تقاضي جاية اللي شايف الأدلة غير وافية ابتدوا اشتغلوا كمحامين متستسهلوش
عندكم كذا خيط إدانة دامغة لو ثبت يقطع أي شك
السور اللي بيروج لطمسه والناني اللي الأطفال هيبقوا فاكرين انها كانت فعلا دائما تاخد الولد والكاميرات اللي فترة الواقعة اللي بتثبت خط السير وشهادات أي معتدى عليهم تانيين اللي قالوا كان بيوقف البنات يروحوا يشهدوا بنفسهم سهلة
وان همشي معاكم للسيناريو التاني انه غير مدان لكن ده محتاج شغل مش هتندبوا بس ده ظلم ومش ظلم لمجرد انكم معتقدين ان ده بيمس سمعة الدين
ومن امتى المذنب بيكون واخد فكره من الدين والا مكنش يبقى مجرم ده لازم عمايله بتكون مخالفة للدين والشرائع والقوانين
ووريتكم في بوست كامل عقم الفكر ده
لكن لسه اللجان مستمرة سواء بياللا بسرعة مدارس الراهبات بيوت ...... وطلعوا ولادكم منها ده فيها فتن واجبار على العقيدة كمان لدول بيطرمخوا وبيستغلوا نفوذهم للمديرة أمريكانية جاية بأجندتها
للجان ان دي حرب ع المسيحية والمسيحيين والاضطهاد والمظلومية
فيه درجات تانية للتقاضي يا حضرات القضاء يستقر ضميره تماما قبل اصدار الحكم بالمعطيات اللي قدامه أي حد معترض يحاول يظهر معطيات جديدة غير كده القضاء يحترم ما أمامه مش مفروض يحكم بأهوائكم وتحليلاتكم
محدش فينا اضطلع على محاضر ولا كاميرات ولا شهادات كل ده بيتقدم وعلى أساسه بيستقر ضمير القضاة لحكمهم
فكفاية بقى وانتبهوا بس للي بتنشروه من كلام أطفالكم بيقروه بيلخبطهم في تقبلكم للفعل زي المنشورات اللي كتبتهالكم امبارح عن صباحية مباركة 😭
دور أي مواطن صالح في القضية دي أو غيرها مش يقتاد بأي فكر دون ان يعمل عقله
اقرا كتير جمع منشورات حللها شوف كل الأجندات ارسم كل السيناريوهات حتى لو منحاز لسيناريو زي كل اللي كلموني وقولتلهم لاء عادي انا مصدقة انه يعملها بس متسمحش للسيناريو اللي انت وفقا للمعطيات الحالية وللحكم مقتنع بيه انه يعميك عن سيناريو تاني قد يثبت أيضا في درجات التقاضي الجاية
لازم تمرن فكرك على تقبل الوقائع الحقائق البراهين حتى لو ضد ما تشعر
متلغوش دماغكم هنا او في أي قضية تانية
والقضية دي جس نبض للشارع المصري وخليكم فاكرين وواعيين للكلمة دي
في عصر الذكاء الاصطناعي على السوشال ميديا ممكن تقول أي حاجة لكن في غرف المحكمة الموقرة الأدلة سيدة الموقف وراعية الحكم
فاللي ناوي يكمل شعللة على النت قوم هات أدلة أكتر تمنع أي لغط وتكتم الكل او هات أدلة تنفي التهمة وتوجهها لمجرم تاني حقيقي
اللي مفيهوش جدال ان عندنا مجني عليه طفل ملوش ذنب في أي أجندات
قربوا لولادكم صاحبوهم حكوا معاهم بدون ترهيب أي حاجة مهما كانت يتعرضولها أنتوا في ظهرهم
وربنا مش بيضيع حق حد بيجري وراه
اللي عاوز يشوفني بأي شكل غير ده مش هقدر أعملك بلوك بس تقدر تعفي نفسك من متابعتي بضغطة واحدة
سهلة
أنا حاولت استخدم مهارة الفرز والتحليل اللي ربنا مديهالي اني امنع فتنة شايفاها بتطبخ قدام عيني كل يوم ببوست جديد
اعملوا العقل .. ربنا يحافظ على مصر

الدراما .. اللجان الإلكترونية .. الطائفية .... أبطال رواية ياسين
مش هقول آلاف الوقائع يوميا لكن خلينا نقول مئات علشان منرعبش حد مع أننا متجاوزين ال 100 مليون
الضحايا في منهم اللي بيقتلوه أهله بدافع التخلص من العار
فيه منهم اللي بيقتلوه نفسيا سواء ولد أو بنت فتاة أو سيدة أو راجل كبير بكلمة واحدة إخرررررررررررس أوعى تقول حاجة عن اللي حصل
فيه منهم اللي بيحكي وكل اللي حواليه يقولوله وأنت ما رفضتش ليه مقاومتش ليه مصرختش ليه مهبشتوش بسنانك ليه أنت شريك في اللي حصلك
الجاني بيكون شخص غير سوي واعي تماما للي بيعمله لأنه بيخطط ويختار ضحيته بعناية وينفذ ويخفي آثار الجريمة ويرجع يعيش بين الناس عادي خالص ويمكن يمشي جنبهم كمان في المظاهرات المناهضة للفعل الأثيم وهو بيعيط
مئات القصص اليومية دي مش بتوصل للميديا اللي بيوصل منها قليل جدا وده لا يعني عدم وجودها
فيه امبارح بس قضيتين ظهروا للسوشال ميديا ومش هياخدوا نفس الضجة
لأن القضية دي بالمصطلحات الأمنية أتركبت وأشتغل عليها لجان إلكترونية من الطرفين علشان البطل الثالث يمسك القضية وطبعا اسمه معروف الفتنة
فبقت اللجان الإلكترونية ترمي على متودوش ولادكم مدارس الراهبات معلومة بس للي بيكتبوا كده المسيحيين نفسهم بيحفوا علشان يدخلوا ولادهم مدارس راهبات ومش أي حد يدخلها وأعلى تعليم وتربية فعلا فيها
وسيبالكم ده في التعليقات
واللجان المسيحية ترد وتحاول تنفي التهمة عن الكهل غير السوي وكأنه بيمثل المسيح بعمايله اللي متهم فيها ونصبوا نفسهم محامي ومدافع عنه وقالك أصله 80 سنة جسديا أصلا مينفعش وأصل جد الواد ممسوك في رابعة وإخوان وكمان عليه قواضي مالية مع المدرسة فبيصفوا حسابهم مع المتهم والطفل فعلا حصله كده فقالوا فرصه نلبسها للراجل ده
واللجان الإخوانية هوب جابت أسماء المتهمين والمشتركين وبروزتهم الإرهابيين المسيحيين لفظ حتى لا يمت لطبيعة القضية
معلهش ككاتب محتوى محترف آداء اللجان الإلكترونية مش عاجبني للطرفين
حشد وتجمعات وتأجيج للرأي العام وتديين القضية لإشعال فتنة
ده العاصفة مسلمتش من تريقتهم مع إنها كانت قاسية جدا امبارح على بعض مدن مصر وقالك الحكومة عملت مسلسل العاصفة دي علشان تحد من التظاهرات وكأننا رشينا الجو
تدخل وتحفيز مش طبيعي وتدخل في أحكام قضاء وتعليق شماعات استباقية المحامي متواطئ وباعهم علشان لو الحكم مكنش مؤبد يلبسوهاله
ولما الأم اترافعت قالك بطلة وجابت حق ابنها ووقفت في ظهره ولما قاضي ضميره استقر لمعطيات وأدلة وشهادات قدامه قالك أصله قاضي مسيحي وحكم مؤبد علشان يحميه منهم اسبوع وياخد إفراج صحي ويسفروه
ونسيت أقولكم على تحابيش اللجان بقى إلحق جاكلين محافظة البحيرة كانت بترشيهم علشان يسكتوا ونواب جابوهم وطلبوا تصالح وقعدات عرفية كده
والمدارس دي بتاعت أنبا باخوميوس ياللا نحاكم صاحب المدرسة .. في تربته طبعا
الأم والأب في الميديا قالوا ان النواب حاولوا اصلاح ما اتكتبش في اي تحقيق محافظة البحيرة المسيحية اللي فجأة لقت أسمها وصورها في كل حته بس خليني أقولك ان دي براعة الخداع أقولك معلومة غلط في وسط معلومتين صح فتبلعها بالشفا على قلبك
ياريت تكونوا فهمتوا اللعبة
المجرم الغير سوي ملوش علاقة بدين ولا له شكل مرعب أو فاسد أو مظاهر تخلي الناس تشك فيه وعلشان كده كان شابوه لام شمسية على دور شاهين
اسمع كل التفاصيل من المجني عليه وصدقه وسيبه يعبر عن ألمه
قوله زي ما الدكتور النفسي ما قال ليوسف أنت مش وحش
حاول تجيبله حقه وتدق كل البيبان وتعمل اللي عليك وسيب ربنا يكمل
صحصح لأي فتنة بتتنسج حواليك بكم جهاز موصول بالنت لأنهم قابضين ولازم يحللوا اللقمة
ديانة أي مجرم ملهاش علاقة بأفعاله غير السوية
مفيش دين بيحلل الخمر خليني أفاجئك إن المسيحي متقاله كمان مش بس ما يشربهاش لاء ده لا تنظر إلى الخمر كمان
أفاجئك انه بيصلي 7 صلوات
وبيصوم حوالي 260 يوم صيام في السنة من 12 نص الليل ل 3 العصر
وخد التقيلة بقى بيستحمى عادي
والمسلم والمسيحي كمان دينهم بينهيهم عن الحاجات اللي كل الأديان نهت عنها ورغم كده فيه منهم ماليين صالات القمار وبيشربوا مخدرات ومعمرين بيوت ال ....
متبقاش ساذج وتربط الخطية بالدين ولا تاخد الموضوع على صدرك وتحاول تدافع عن المجرم بدافع الانتصار لدينك
حبيبي الدين برئ من الأفعال دي الدين هو اللي بيعلمنا ان الأفعال دي بتحزن قلب ربنا
جميع البرنتات اللي متاخدة ومنشورة من المحاضر أو الطب الشرعي إيه اللي أكدلك أنها حقيقية في زمن أنا ممكن بالذكاء الاصطناعي أعملك فيديو كامل بصوتك تقول فيه اللي أي حد عاوزه
القضية لم تنتهي
والوقائع الأخرى لن تنتهي
والوقت اللي كتبت البوست ده فيه في شخص ما في مكان ما قابل نفس الواقعة فمتصعبوهاش عليه وغيروا ثقافتكم ووعيكم مش بس بالدراما كمان بالنشر الواعي علشان المجني عليه يعرف يتكلم والجاني يتحاسب حساب يليق بالجرم
وبالحساب الدائم هتقل الوقائع دي وتنتهي بمعونة ربنا ووعيكم

شير وقفوا الفتنة ووعوا الناس

ما بين المنطق وفن صناعة الفتنة
بوست مفتاح حل القضية هو البوست السابق لده
ممكن تعيد قراية البوست السابق ليا بوجهة النظر دي

القضية بإيد قاضي وتنتظر حكم مش السوشال ميديا اللي بتحكم
مفتاح الحل هو اللي طرحته في البوست السابق على فرضية القصة المطروحة بالسوشال ميديا
هو أقوى شاهد إثبات أو نفي
لأن بهذا العمر الموجود في القصة إن صحت الرواية فمؤكد معه وجود ضحايا كثر ومنهم الحديث مثلما حدث في لام شمسية ويستطيعون إدانته
ومالم يوجد على مدار ٨٠ سنة ولا شخص تم الاعتداء عليه من هذا الشخص وأثبتت التحقيقات روايات وتقارير طبق شرعي عكس المنشور فلابد ان يعمل القارئ نفس العمل للتيقن من أن الرواية قصد بها فتنة

اما الان بدون الدعوة لشهادة كل من تعرض لتعدي من هذا الشخص او من غيره سيبقى كل معتدي طليق وكل راغب فتنة ينشر سم أشاعاته أنا فقط أنشر الوعي

بالتحليل اللي عملته معاكم على مدى سنيني

الاسم كامل مكتوب قبل ظهور الحكم والتركيز على كونه مسيحي والمديرة والدادة مسيحيين وعلشان نسبكها نقول اهوه دي المدرسة اهي مسلمة وبرضه منصفتهوش لاتكونوا فاكرينا بنأجج فتنة لا سمح الله

ونكتب بشوية فلفل وشطة ده عرض عليهم ٣٠ كيلو دهب علشان يسكتوا

ونقول دي مدرسة مطرانية ومالكها أسقف علشان البهارات تذيد فيرد اللي بينفوا كل ده لمصلحة مدرسة تانية أخوانية أو سلفية ما احنا مش هنخلص بقى هتحدفونا هنحدفكم

طيب أنتي رأيك ايه
رأي ايه في ايه ده حكم قضاء وفوق القضاء قاضي بيحاكم فوق في سماه ده مش ماتش وبيعزموا عليك تحكم

على رأي صبحي في تخاريف مااااااا يحكمشي

تاني رأي ثابت احنا مش جهة حكم او قضاء لكن في ايدنا آداة تساعد العدالة وتستخدم دليل منطقي للإثبات او النفي

السن في هذه الرواية لن يكون ذلك اعتدائه الأول ان صحت الرواية

لهذا على كل ضحية له ان تتكلم ان كانت تريد حقه وحق كل ياسين من كل صبري

أما ان لم تظهر شهادة أي ضحية سابقة فالتلتقطوا أنفاسكم وتستغنوا عن دور الحكم وتتقبلوا حكم القاضي الأرضي بما توفر له من أدلة

إدانة ان توفرت الاثباتات ونفي إن لم يجد أدله وهنا نقف أمام أمرين
نفي لأنه فعلا برئ او نفي لأنه مذنب والعالم قرر أن يتستر على المجرمين
وننتظر وقتها الحكم السماوي العادل

وبقولكم من دلوقتي مش هتنشروا البوست أنا عارفة لأن الإيد بتسبق وتنشر اللي ممكن بفكرها يأذي مع ان السابق برضه كان بوست عام لإعمال العقل وترسيخ فكرة مفتاح القضية المنطقي

شيروا دي كمان علشان اللي عاوز يعمل فتنة يتهد وينتظر حكم القضاء
لأن أنا صانع محتوى وقارية كويس قوي ما وراء منشورات كل الأطراف

فيه اللي واخدها فرصة فتنة دينية
وفيه اللي بيصفي مصالح اقتصادية
وفيه اللي داخل يهدم فكرة مداس الاقباط بوجه عام واللي ملهاش أي محل من الإعراب لأن الحادثة دي وزيها كتير بتحصل في مدارس..... أي كان نوعها

أعملوا العقل وشيروا الاتنين خلي الناس تتوعى وتعمل حكم العقل وتنتظر حكم القضاء