لازم علشان نكون منصفين نعترف ان فى اطفال صعبى الطباع ...وبيكونوا متجهمين واحيانا مستفزين ...اوبااااااا😹😹هتلاقى امهات كتير دلوقتى هيقولوا شوفتى دة اللى كنا بنقوله ومكنتيش مصدقه ...و٩٠٪ من الناس اللى على الصفحه هيحلفوا ان اولادهم من النوع دة .....استنوا شويه بقى عليا وتعالوا نفهم بالراحه ....دى نوعيه موجودة فعلا لكن علشان اقول ان ابنى او بنتى منهم لازم يكون ليها شروط ..
اولا وعلشان منخسرش بعض على كلام فاضى نسبه الاطفال دول (ودة من رحمه ربنا 😹😹) لاتتجاوز ٢٪ من الاطفال
ثانيا لازم اكون انا بتعامل مع الطفل بطريقه سليمه وباسلوب تربوى ثابت بدون اهانه او ضغط من فترة زمنيه معقوله وهو بيتعامل بالاسلوب دة ....يعنى مينفعش ابقى بضرب وبشتم واقول ابنى بيعند ....لان فى الحاله دة سلوك الطفل بيكون رد فعل لتعامل الاهل معاه ...ثالثا ودة الاهم تأكدى ان مع التقدم فى العمر والتعامل السليم الامور بتتحسن كتييير بفضل الله
طيب مواصفاته ايه واتعامل معاه ازاى ...استنونا بكرة ان شاء الله ومقال تفصيلى عن الموضوع
بس محتاجه مشاركة الناس اللى عندها ابناء صعبى الطباع
ايه اكتر سلوك بيستفزكم من الأولاد
د.رولا المسلمى
21/06/2026
مع نسمات الفجر🤲🏻🤲🏻
🤲 أدعوا لطلاب الثانوية العامة
اللهم لا سهل إلا ما جعلته سهلاً، وأنت تجعل الحزن إذا شئت سهلاً، اللهم وفق طلاب الثانوية العامة وبارك لهم في وقتهم وجهدهم، وافتح عليهم فتوح العارفين.
🤲 اللهم ارزقهم التركيز والفهم والحفظ، وذكرهم ما نسوا، وعلمهم ما جهلوا، واجعل النجاح والتوفيق حليفهم.
🤲 اللهم اشرح صدورهم، ويسر أمورهم، ووفقهم لكل خير، واجعل امتحاناتهم سهلة ميسرة، واكتب لهم أعلى الدرجات.
🤲 اللهم اجعل تعبهم واجتهادهم سببا للفرحة والنجاح، وأكرمهم بنتائج تسر قلوبهم وقلوب أسرهم.
🤲اللهم اجعل يومهم هذا أوله صلاحا واوسطه فلاحا واخرة نجاحا🤲🤲🤲
اعتذر عن انقطاعى عنكم الفتره السابقه
دعواتكم لابنتى الغالية ولكل طلبة الثانويه العامه أن يسددهم الله ويوفقهم
12/06/2026
العصبيه ...ابنى او بنتى عصبيين ..طول النهار صريخ ..او لو معملتش اللى هو عاوزة يترمى على الارض او يخبط دماغه فى الحيطه ...ملوش حل ..هتجنن منه
لا متتجننيش ولا حاجه انا ميرضينيش زعلك
بصى ياست الكل وباختصار عشان متزهقوش منى لانى رغايه حبتين
العصبيه هى انفعال بدون مقدمات وبشكل مبالغ فيه وبدون سبب منطقى
الطفل وهو صغير مبيعرفش يتكلم فبيعيط عشان يعبر عن طلباته ..جعان ..تعبان ..نعسان ..زهقان ..كله يعيط وحضرتك خبيرة تترجمى نوع العياط ...لما بيكبر شويه المفروض انه يطور وسائل افضل للتواصل ..اييه بقى اللى بيخليه يفضل يعيط؟؟؟؟؟... هقولك
اولا لماوبيبدأ يكبر ويعيط ..حضرتك مش بتفهميه انك ممكن تسمعيه لو اتكلم بهدوء ..بتتعصبى وتتنرفزى وتروحى مزعقاله ...يبقى انتى علمتيه ان الزعيق وسيله مقبوله للتواصل
او بابا الجميل جاى من الشغل زهقان فبيعمله اللى هو عاوزة عشان يتكتم ويعرف هو يقعد عالنت براحته ...ودة برضه بيعلمه ان العياط بيحقق رغباته اسرع
تانى حاجه الضرب ...مينفعش اطفى نار مولعه بانى ادلق عليها بنزين .....وصلت؟؟؟؟
تالت حاجه توتر الطفل بسبب عضوى ..تعبان ..جعان ..عاوز ينام
اخر حاجه التعامل بين افراد الاسرة بصوت مرتفع ...ووصف الطفل بالعصبى
طيب اعمل ايه عشان يهدى ويبطل عصبيه
اولا ..اظهار التعاطف وتفهم مشاعر الطفل
احتضانه او الطبطبه عليه لامتصاص توترة
تلبيه الاحتياج الجسدى بسرعه
ممنوع تماما تماما الاستجابه لرغبات الطفل اثناء نوبه الغضب
استنى لما يهدأ تماما وبعدين انفذله الطلب او افهمه سبب الرفض
ممنوع الضرب او الاهانه او التعليقات السخيفه على الطفل
تجاهل نوبات الغضب والعصبيه اذا كانت فى الحدود المقبوله
التحدث مع الطفل بنبرة صوت هادئه وواثقه
مدح الطفل عند طلب الاشياء بهدوء وبصوت منخفض
آااااخر حاجه ..حضرتك لازم تبطلى عصبيه لو عاوزة ابنك يطلع هادى
بقلم
د.رولا المسلمى
12/06/2026
مع الوقت ستدرك أنَّ محبّة الناس يُيَسّرُها الله فقط، ليست منك ولا من تضحياتك ولا حروفك المبهرة ولا رحابتك وبشاشة وجهك.. فقط الله من وضع حبك في قلوبهم !!
منقول واعجبنى
بلال البخارى
جمعتكم مباركه 😊😊
أذكركم ونفسى بقراءة الكهف والصلاة والسلام على رسول الله صلى الله عليه وسلم
07/05/2026
جاهزين تتعرفوا علي انماط الشخصيات في عدة فيديوهات وتتعرفوا عن جزء من علم الأنياجرام ؟😀
07/05/2026
إنّ البيوتَ إذا البناتُ نزلْنَها
مثلُ السماءِ .. تزيّنتْ بنجومِها
هُنَّ الحياةُ ، إذا الشرورُ تلاطمتْ
و إلى الفؤادِ تسلّلتْ بهمومِها.....
طبطبوا على البنات ياجماعه
اللى عنده ابنه او زوجه او اخت يطبطب عليها ويحضنها
طمتوا البنات ومتسيبوهومش للقلق والحزن
إذا كان ربنا فى كتابه العزيز لم يرض الحزن للنساء
المؤنسات الغاليات💖💖💖💖
كى تقر عينها ولا تحزن
06/05/2026
لما بنفهم سمات كل مرحله عمريه ...بيبقى سهل علينا نتعامل مع ولادنا لأننا بنكون فاهمين ايه التصرفات اللى لازم نوقفها ونعدلها
وايه طبيعى لأنه من سمات المرحله
قولولنا اعمار اولادكم ايه علشان نقولكم سمات كل مرحله بيمروا بيها
04/05/2026
يوم السبت كان اللقاء الأول من كورس مراهقه بلا صدام 💖💖
سعيده جدا بأجمل مجموعه من الأمهات وسعيده باحساس الونس والطمأنينه وجو الألفه اللى كان موجود ...وبآراء الامهات الجميلات فى نهايه السيشن
اتكلمنا عن سمات مرحلة المراهقه والتغيرات اللى بتحصل لعقل وجسد المراهقين ...التغيرات النفسيه واسبابها وازاى نتعامل معاها ..
وكان أهم جزء ليه احنا كأمهات لما بنتعلم حاجه جديده او نحضر كورس او محاضره مينعرفش نطبق اللى اتعلمناه 😪وبنرجع لنقطة الصفر وممكن نعمل ايه مع التحدى دى
كمان اخدنا واجب صغنن علشان نبقى عملنا خطوات عمليه
متحمسه جدااا للقاء الثانى يوم السبت القادم ان شاء الله
30/04/2026
الحمد لله كورس مراهقه بلا صدام كامل العدد بفضل الله وتم اغلاق باب الحجز
لكن لازال عندنا مكانين متاحين بخصم 80%لأى حد حابب يكون معانا وعنده تحدى مالى ☺️
استأذنكم اى حد حابب يشارك او يعرف حد حابب يشارك وعنده تحدى فى تكلفة الكورس ...يتواصل معايا على الخاص بكود (ماما🥰)
بدون اى حرج فهذا حقكم وهذا واجبنا
دمتم فى امان الله
27/04/2026
مراهقه بلا صدام 🥰
ليه قولت الأمهات غلابه ....لأنهم حقيقى بيصعبوا عليا ...الجيل ده من الأمهات مطحون بين حاجات كتير ...الطريقه القديمه اللى أثرت عليهم هما نفسهم ...والطريقه الحديثه اللى مش عارفين نتيجتها هتكون إيه ...وبين ضغوط الحياه والدراسه والعيشه واللى عايشينها😅...خايفين على ولادهم وحياتهم طول الوقت من حاجات كتير ...السوشيال ميديا والأصحاب وحاجات كتير ..حتى خايفين يغلطوا وهما بيتعلموا يحسنوا علاقتهم بولادهم 😪...
الأمهات حقيقى محتاجين طبطبه ...محتاجين اللى ياخد إيديهم بالراحه
ياأمهات ياجميلات 🥰🥰🥰....انتوا حلوين وناجحين فى كل حالاتكم والله ...بتتعبوا وبتبذلوا جهد علشان تتعلموا وربنا ان شاء الله مش هيضيع تعبكم ..
محتاجين ناخد نفس ....نهدى ....نطبطب على نفسنا 💖....ونجرب ناخد امورنا وأمورهم بالهداوه ....هتلاقوا الدنيا أسهل كتير ...
ولو حابين تغيروا خطوه خطوه ...احنا عاملين تحدى على جروبات الواتس اب استعادة العلاقه فى ٣٠ يوم 😍😍لو حابين نعمله معاكم هنا على الصفحه ....بس هيكون بشرط الالتزام والتفاعل 🙄يعنى مش هينفع متايعه فى صمت😅😅اكتبولنا فى الكومنتات ٣٠ يوم وهنزلكم كل التفاصيل
Be the first to know and let us send you an email when بستان تربية مع د.رولا المسلمى posts news and promotions. Your email address will not be used for any other purpose, and you can unsubscribe at any time.
