14/08/2026
Í dag var móttøka í ÍSF húsinum í sambandi við, at Petur Mittún, ið hevur verið aðalskrivari, er farin frá, og Marita Debess Magnussen er sett sum nýggjur aðalskrivari í ÍSF.
F**t av fólki vóru møtt at takka Peturi fyri hansara ótroyttiliga arbeiði føroyskum ítrótti at frama og bjóða Maritu vælkomnari.
Tríggjar røður vóru hildnar. Fyrsti røðari var Elin Heðinsdóttir Joensen, forseti í ÍSF.
Petur Mittún hevur verið aðalskrivari í ÍSF meir enn 9 ár, og hann er somuleiðis eisini fyrsti aðalskrivarin í ÍSF. Tí var tað ikki løgið, at Elin vísti á, at tað var ein tíð áðrenn Petur Mittún, og so ein tíð eftir at Petur Mittún var komin í starv.
- Tað er løgið at hugsa sær, at fyri fáum árum síðani vóru eingir skúlaleikir, eingin ítróttafagnaður, væl færri skeið, eingin strategi, eingin ítróttaráðstevna, einki ítróttating osfr, osfr, segði Elin H. Joensen í síni takkarrøðu til Petur.
Elin nýtti høvið at takka og rósa Peturi fyri hansara evni til at seta mál, fáa ting at henda og skipa fyri, hansara fyrikomandi og lætta persónslyndi og ikki minst hansara evni sum starvsfólkaleiðara.
At enda takkaði Elin Peturi fyri tíðina, fyri tímarnar og fyri hansara risastóra arbeiði, áðrenn hon skifti til Maritu og alment at bjóða henni vælkomnari í starvið sum aðalskrivari. Elin viðurkendi, at uppgávan sum tvey’ari aldrin er tann lættasta, men hon fegnaðist um, at Marita longu nú hevur víst seg at megna at lyfta uppgávuna og eisini hevur sett síni egnu fingramerki á starvið.
– Tín uppgáva er sjálvandi eitt sindur øðrvísi, tí tú skalt røkja eitt starv, sum longu er definerað. Og tað er ongantíð lætt at vera nummar tvey í einum slíkum starvi. Men eg má siga, at tú ert komin sera væl inn í leiklutin sum aðalskrivari.
Elin vísti á, at hon og starvsnevndin gleða seg til gott samstarv og at byggja víðari á ta grund, sum er løgd í aðalskrivarastarvinum.
- Vit ivast ikki í, at eisini tú fert at lyfta og flyta ÍSF langt fram á leið, segði Elin H. Joensen at enda.
Eftir røðuna frá forsetanum fekk fráfarandi aðalskrivarin orðið. Petur nýtti høvið til at takka fyri tann framíhjárætt hann hevði havt hesi seinastu níggju árini. Ein hjartans tøkk var latin starvsnevnd, starvsfólkum, sambondum og samstarvsfeløgum. Eisini nýtti hann høvið til at takka øllum teimum mongu sjálvbodnu í føroyskum ítrótti, tí uttan tey var eingin føroyskur ítróttur at tosa um. Hóast hann heilt víst fer at sakna starvið og øll tey fólkini, hann er vorðin so góður við hesi árini, so kendi hann seg vísan í, at ÍSF er á einum góðum stað og í góðum honum.
Áðrenn gestirnir aftur fóru at mingla og njóta góðbitarnar á borðinum, tók nýggi aðalskrivarin orðið, har hon fyrst nýttið høvið at takka fyri álitið, ið starvnevndin hevur givið henni.
Hon hugleiddi um stóra týdningin ítróttur hevur fyri føroyska samfelagið. Alt frá at kappast og vinna heiðursmerki til hvønn týdning ítróttur hevur fyri børn og ung, at mennast og finna eitt stað at hoyra til. Hon røddi um tann góða felagsskapin, ið ítrótturin gevur. Trivnað og heilsu og allar teir tímar, sum føroyingar kring alt landið brúka upp á sína ítrótt.
Málið hjá Maritu er ikki at broyta, men at byggja upp á tað góða arbeiðið, sum longu fyriliggur og er gjørt, har eitt konkret mál her og nú er at vinna Føroyum tann sessin í altjóða olympisku nevndini, sum vit eiga at hava.
- Eg trúgvi uppá, at vit skulu seta okkum stór mál. Gamaní, eru vit eitt lítið land, men ambitiónirnar nýtast ikki at vera smáar, tvørturímóti.
Hon viðurkendi, at einki gerst av einum persóni, og gleðir hon seg tí til gott samstarv við starvsnevnd, starvsfólk, sambond, feløg, politisku skipanina og øll tey mongu sjálvbodnu, sum eru sjálvt grundarlagið undir føroyskum ítrótti.
- Tað er eitt av mínum størstu ynskjum í hesum starvi, at ÍSF skal vera ein sterkur og álítandi samstarvsfelagi fyri føroyskan ítrótt.
