Sutton HKer Basketball

Sutton HKers｜全英港人籃球聯賽季後賽戰報🏀

上個星期日，Sutton HKers 首次踏上全英香港人籃球聯賽季後賽嘅舞台，為最高級別盃賽嘅冠軍殊榮而戰！

一班熱血波友晨早就出發，捱足近三個鐘頭車程遠征諾定咸，對陣北區榜首勁旅 Warrington HKers，大家都知道係一場硬仗。

比賽開局雙方都打得審慎，防守強度極高。或許係季後賽初體驗，隊員明顯有少少緊張，外圍投射頻頻打鐵，半場就已經以 17:27 落後。

下半場情況雪上加霜！對手嘅緊迫防守令我哋寸步難行，第三節竟然只得 5 分進帳，創下近年新低😓。幸好第四節我哋作出戰術調整，射手手感逐漸回暖，一度將分差追近至個位數，睇落有啲希望……可惜最終仍以 43:56 飲恨落敗。

下一關，我哋將會同老對手 Watford Elites 爭奪季後賽第三名，敬請期待！

賽後，一班香港人喺異鄉影低咗呢張大合照🇭🇰，身在英國，依然可以繼續追逐我哋嘅籃球夢，真係好難得。

想一齊打波？歡迎隨時搵我哋！我哋逢星期二晚都有練習，正為下一季聯賽積極備戰，隨時歡迎新隊員加入🏀
#我想打籃球🏀 #英國香港人籃球聯賽

話咁快已經去到英國香港人籃球聯賽常規賽嘅最後一場比賽，今日我哋主場迎戰 Northampton HKers，賽前大家目標明確：只要贏波，就可以順利鎖定南部第二，強勢進軍季後賽盃賽！
哨聲一響，我哋即刻火力全開搶佔主導權，外圍射手手感火熱，上半場成功以 31:16 ，拉開雙位數優勢。換邊之後，大家保持集中，死守領先實力，最終順利以 61:45將勝利帶走！
六月中香港人籃球聯賽季後賽正式開打！我哋將會出戰最高級別嘅盃賽，硬撼北部勁旅 Warrington HKers。到時肯定有一番龍爭虎鬥，大家一齊拭目以待，繼續為我哋打氣！

英國香港人籃球聯賽戰報17.05.2026

聯賽正式踏入白熱化階段，今場我哋主場硬撼南區排名第二嘅勁旅 Cambridge Lions。上一次作客交手，我哋都只係險勝3分，所以今場返到主場，全隊上下都打醒十二分精神，希望可以乘勝追擊，搶下南部第二嘅寶貴位置！

比賽一開始，雙方都打得相當謹慎，節奏偏慢。我哋外線手感未算太順，第一節以 10:12 略為落後。去到第二節，Sutton 火力全開，一輪猛烈「三分雨」即刻扭轉局勢，成功拉開比分，半場反超前至 33:28！

下半場我哋進一步加強防守壓迫，成功逼到對手連番失誤，慢慢將領先優勢穩住。全隊攻守兩端都保持高度集中，最終以 58:49 擊敗 Cambridge Lions，成功反壓對手，升上南部聯賽第二位！🔥💪

呢場勝仗唔單止提升士氣，更加證明我哋喺關鍵時刻有能力頂住壓力。聯賽進入最後直路，大家繼續加油！
#英格蘭香港人籃球聯賽

有興趣加入請DM

絕殺之戰！Sutton HKers 主場險勝 London Kongballers

2026年4月12日

今日絕對係難忘嘅一日！今場主場迎戰上屆南部亞軍London Kongballers，比賽氣氛濃厚，雙方球員一開波就已經感受到嗰種大戰嘅緊張感。
比賽一開始，主隊Sutton HKers明顯準備充足，入局比對手快好多，外圍投射手感火熱，頻頻命中，成功攞到領先優勢。不過Kongballers始終係上屆強隊，第二節開始佢哋重整旗鼓，加強咗防守強度，令Sutton嘅進攻受阻，比數亦隨之慢慢追近。
去到第三節，戰況更加激烈，Kongballers憑住穩健嘅表現，一舉將比數反超前至45:48。
最後第四節簡直係火花四濺，兩隊你一球我一球，比數交替領先，每一波攻勢都令全場觀眾屏住呼吸。去到比賽最後幾秒，Sutton HKers 仲落後緊，喺生死關頭打出一次極具威脅嘅進攻，仲要博到個and 1！Sutton HKers 喺最後時刻以 59:58，憑住僅僅 1 分之微，絕殺對手帶走勝利！
今場波真係打到最後一刻都未知勝負，兩隊球員都展現咗極高嘅競技水平，絕對係一場精彩絕倫嘅對決！

#英格蘭香港人籃球聯賽

一分之差！Sutton HKers 憾負榜首 Watford Elite
今日 Sutton HKers 遠征 Hertfordshire Sport Village，挑戰目前南部排名第一的勁旅 Watford Elite。面對強敵，我們毫無懼色，全程與對手展開拉鋸戰，雙方實力極為接近，比分多次交替領先，可惜最後以一分之差憾負！

勝負固然重要，但在球場上流下的汗水和永不言敗的精神才是我們的靈魂！加油！

啱啱過去嘅星期六（14/3），第一屆英國香港人籃球明星賽同三分大賽正式圓滿結束！現場氣氛真係熱血到爆燈，直迫職業聯賽啊！🔥
🏀 明星賽：南北對決，火花四濺！
我哋 Sutton HKers 派出咗兩員大將 Pong 同 Ryan，代表「南部明星隊」出戰「北部明星隊」！

比賽由頭帶到尾都係實力之爭，雙方攻守轉換極快，每一球都爭到好激烈！雖然南部明星隊全力以赴，但最後「北部明星隊」憑住穩定發揮，以 75:61 帶走勝利！

🎯 除咗明星賽，現場仲有超刺激嘅三分大賽！
我哋嘅射手 Ray 代表 Sutton HKers 披甲上陣，頂住全場壓力，過五關斬六將，激戰三輪，面對全英港人頂尖射手，Ray 依然保持高水準手感，最終勇奪 季軍（第三名）！🥉

見到咁多位移英港人聚首一堂，用籃球連繫彼此，嗰份熱誠真係好感動！多謝咁多位去現場支持嘅朋友，亦都恭喜晒所有得獎者！
嚟緊 Sutton HKers 仲會有更多精彩動向，記得 Follow 實我哋啦！

英國香港人籃球聯賽聯戰報
1/3/2026
絕地反擊！Sutton 緊逼戰術奏效，3分險勝 Cambridge Lions

今日聯賽上演強強對決，由 Sutton 客場挑戰 Cambridge Lions。兩隊實力旗鼓相當，勝負直接影響季後賽種子排名。
比賽過程峰迴路轉。首節雙方節奏較慢，比分一直膠著。然而進入第二節，Lions 憑藉精準的外圍投射發力，令 Sutton 的防線備受壓力。第三節結束時，Sutton 更一度落後 40:34，形勢不容樂觀。

進入關鍵第四節，Sutton 果斷調整，加強防守侵略性。球員憑藉高強度的緊迫打法頻頻抄截成功，打出一波反擊高潮。最終 Sutton 在驚濤駭浪中以 47:50逆轉取勝！