17/04/2026
Sports PLUS 日前請嚟短道速滑運動員⛸️林靜欣Joey 去到救世軍韋理夫人紀念學校🏫，同同學仔分享佢嘅運動員生涯點滴💬！
今年二月舉行嘅米蘭科爾蒂納冬奧係Joey姐姐首次喺冬奧登場🌟，就已經喺1500米短道速滑決賽歷史性地以第7名完成，寫下港隊冬奧最佳成績✨！其實Joey姐姐自幼已經夢想有一日可以登上奧運呢個世界最大嘅舞台，更於2020年毅然決定休學兩年並轉為全職運動員，全心投入訓練💪🏻！
原來出戰冬奧時Joey姐姐嘅右腳已經負傷🤕，但比賽時全神貫注，連傷患痛楚都被佢拋諸腦後，呢種高度專注嘅表現真係好專業💯！提到近期嘅目標，Joey姐姐希望可以喺下年嘅世界大學生運動會中奪冠🏆，再下一城，大家都要繼續期待佢嘅表現，一齊打氣📣！
到咗最期待嘅遊戲環節，Joey姐姐帶領同學仔體驗短道速滑嘅基本動作——「靜蹲」同「彎道單腳」，原來一啲都唔容易！相信大家都體會到短道速滑係一項幾咁刻苦艱辛嘅運動💦！活動尾聲，Joey姐姐勉勵大家，運動同讀書一樣，只要有興趣、有目標，肯去努力就會成功🔥！所以各位同學仔喺學業同運動路上都要加油呀🙌🏻！
p.s. 想睇更多活動靚相？記得follow我哋Facebook，喺FB相簿度睇喇📸～
sportsplus
#香港體育學院 #香港賽馬會慈善信託基金 #香港 #精英運動員 #短道速滑
13/03/2026
Sports PLUS上星期邀請咗空手道運動員黃卓莉🥋 去到聖公會基福小學🏫，同學生分享佢嘅奮鬥故事！
卓莉姐姐連續2️⃣屆喺「亞洲空手道錦標賽」–女子個人組手68公斤以下組別締造佳績，分別勇奪金牌🥇及銅牌🥉🤩，戰績輝煌💪🏻！
活動當日，卓莉姐姐分享咗一段難忘嘅比賽經歷。雖然當時一度落後，而且對手係世界冠軍，但佢並無怯場，反而專注做好每一個動作👊🏻，盡力發揮最佳水平✨。佢藉此提醒同學：比賽唔需要過分著眼於輸贏，最重要係享受過程👣，盡力做好，並勇於突破自我💪🏻。
卓莉姐姐傳授完空手道小知識💬，隨即示範咗組手嘅標準得分動作🥋，仲特別邀請一位同學親身體驗「點到即止」嘅技巧。乘住同學對空手道嘅熱情🔥，卓莉姐姐再帶領全體同學練習出拳同防守✋🏻動作，並揀選幾位同學上台進行「直拳破板體驗👊🏻」。喺卓莉姐姐嘅耐心指導下，全部同學都成功挑戰直拳破板👏🏻，感受到突破自我嘅喜悅😍！
p.s. 想睇更多活動靚相📸，就記得follow我哋Facebook，喺FB相簿睇埋活動花絮啦～
sportsplus
#香港體育學院 #香港賽馬會慈善信託基金 #香港 #精英運動員 #空手道
05/03/2026
Sports PLUS上星期邀請咗乒乓球運動員姚鈞濤🏓 .1230 去到基督教香港信義會禾輋信義學校🏫做分享～
鈞濤哥哥喺國際賽事嶄露頭角✨，上年夥拍隊友勇奪「世界大學生運動會」男子雙打冠軍🥇，為香港贏得史上首面乒乓球項目嘅世大運金牌🏆🤩，狀態大勇💪🏻！
活動當日，鈞濤哥哥分享咗自己嘅訓練日常🏋🏻，以及踏上頒獎台背後嘅心路歷程—包括面對傷患、挫折，同經歷自我懷疑嘅時刻。每當出現自我懷疑，佢都會提醒自己要對自己保持希望及信心。佢亦感謝家人、教練同隊友喺傷患路上嘅支持與鼓勵👨🏼🤝👨🏻，成為佢堅持落去嘅最強後盾。鈞濤哥哥嘅故事令我哋明白到：即使遇到挑戰，只要保持積極、相信自己、努力向前，就一定可以一步步邁向成功💪🏻。
鈞濤哥哥傳授完乒乓球小知識💡後，亦即場揀選咗幾位同學一齊參與「乒乓球大挑戰🏓」。我哋仲特別安排咗雙打環節🏓🏓，等乒乓球校隊成員可以同鈞濤哥哥切磋。大家都好投入，玩得好盡興，感受到乒乓球帶嚟嘅無窮樂趣😍！
p.s. 想睇更多活動靚相📸，就記得follow我哋Facebook，喺FB相簿睇埋活動花絮啦～
sportsplus
#香港體育學院 #香港賽馬會慈善信託基金 #香港 #精英運動員 #乒乓球
17/04/2026
13/03/2026
05/03/2026