01/10/2026
ئەخیل مەزنترین جەنگاوەری یۆنان بوو لە جەنگی ترۆیدا خاوەنی جەستەیەکی پۆڵایین بوو ، کاتێک منداڵ بوو دایکی (تیتیس) بۆ ئەوەی لە مەترسییەکانی مردن بیپارێزێت لە ئاوی ڕووباری پیرۆزی "ستیکسی" هەڵیکێشا تا نەمر بێت ، دایکی ئەخیل بە پاژنەی پێی هەڵیکێشا لە ئاوەکە ئەمەیش وای کرد ئاوەکە نەگاتە پاژنەی پێی ، پاژنەی پێی بووە تەنها خاڵی لاوازی ، ئەخیل سەدان دوژمنی کوشت و لە هیچ جەنگێکدا نەشکا بەڵام لەبەر ئەوەی نەیدەزانی چۆن لە کاتی گونجاودا سنور بۆ خۆی دابنێت و هەمیشە دەویست لە هێڵی پێشەوەی جەنگدا بمێنێت ، تیرێک ڕاست بەر پاژنەی کەوت و کۆتایی بەو هەموو شکۆمەندییە هێنا
ئەستێرە گەورەکانی تۆپی پێش وەکو کریستیانۆ ڕۆناڵدۆ لە کۆتاییدا مرۆڤن و خاوەن "پاژنەی ئەخیل"ی خۆیانن ، کە ئەوەیش سروشتی بێبەزەیی تەمەن و گۆڕانکارییە فیزیکییەکانە ، کاتێک کەسێکی وەکو ڕۆناڵدۆ بەهۆی گەورەیی مێژووەکەیەوە باوەڕی وابێت تواناکانی هەرگیز کاڵ نابنەوە و هەمیشە لە لووتکەدا دەمێنێتەوە ، تەنها بە یەک تیر کە لێرەدا تیرەکە گەورەبوون تەمەن و گۆڕانی جیهانی تۆپی پێیە تەواوی ئەو مێژووە مەزنە دەکەوێتە بەر ڕەخنە و هێرش.
