21/03/2021
************************** 🟢⚪🟢 **********************
آخر منشور لينا كان عقب الفوز على الإسماعيلي. موراها كان الشان و مي رجعات الرجاء ماعجباتناش بتاتا من حيت الأداء و باش مانتحسبوش كمشوشين، قررنا الرجوع للوراء لوهلة !
الرجاء منذ الرجوع من الشان تعادلات فمباريات سهلة، ريحنا اللاعبين ضد الجيش باش نخسرو فتونس ضد فريق متوسط. مافهمناش هاد سياسة التدوير من بداية السنة علمًا أن التدوير أصلا هو مي كاتبدل لاعبين حتال ثلاتة و ماشي نصف الفريق.
داك التأهل ضد المنستير خلانا نزيدو نسكتو لنفس السبب و هو أننا تأهلنا و كاينا النتيجة.. بالرغم من أن بلاصتنا في العصبة و بالرغم من أن الرجاء ماعمرها كانت فرقة تقبل الفوز بدون أداء !
اليوم وصلنا لنقطة لا رجوع و خرجنا ليكم مرة أخرى .. ماشي حيت خسرنا ضد الغريم اللي ورغم القوة ديالو هاد السنة ليس بالفريق الذي لا يقهر و الدليل التعادل الأخير ضد تطوان و لكن حيت زدنا تأكدنا بعيدا عن أي شك أننا ماعمرنا غانلعبو كرة جميلة مع السلامي!
النقطة الوحيدة اللي كانت تغفر له هي النتائج..
الفوز بالبطولة.. نصف العصبة و حتى الأداء كان أحسن من هاد السنة.
هاد العام ماكاينش الأداء .. و الأسباب عديدة أولها ضعف السلامي تكتيكيًا، فقراءة المباريات و فتوظيف اللاعبين و فكيفية الوصول و التدرج بالكرة من الثلت الأول من الملعب للأخير.
هادشي كان من ديما فقط كان مغطي على السلامي اللاعبين و الاختيارات ديالو اللي كانت موفقة.. هاد السنة الإصرار ديالو على بوطيب، جبيرة و تغاظيه على نغوما و مذكور مع غياب محسن و تراجع مستوى الحفيظي و الرحيمي بعد الشان خلا السلامي يتعرى و يبان لينا كثر الضعف ديالو اللي كان مخبيه مستوى اللاعبين.
رأي الصفحة واضح : الرجاء بهاد التركيبة قادرة على الفوز بالبطولة و بنتائج كبيرة و لعب أدوار متقدمة في العصبة.. ما ينقص .. هو مدرب محنك قادر على ضبط المجموعة و إقناعهم بقوته التكتيكية و السير بهم إلى الأمام.
السلامي وجب علينا إقالته الليلة باش ما بغا .. نتيجة و أداء ..
الحاجة الوحيدة اللي كانت تقدر تشفع ليه بهاد اللعب هو يكون هربان فالبطولة و لاعب العصبة و غادي مزيان و حتى فهاد الحالة كان خاس يمشي حيت الرجاء غير الضفة الأخرى.. توارثنا عبر أجيال اللعب الجميل دقة دقة الفرجوي.
حصيلة السنة :
-إقصاء في العصبة كارثي ضد فريق من الشارع.
-ضياع الكثير من النقط السهلة و هروب الغريم في البطولة.
-أداء باهت و ضعيف جدا خصوصا وراء الشان اللي ضيع لينا الهيبة ديالنا.
حسب الحصيلة أعلاه السلامي خاسو يبات ما يصبح ..
و باش مانكثروش من الرطوبية قررنا نحطو هاد الصورة التي تمثل جميع مدراء الصفحة بحيت كنا ضد هاد الصالير من الأول قبل النتائج و الأداء الباهت لأن السيرة الذاتية لم تكن بتلك القوة و ذلك المستوى.
ديما راجا و السلامي مع السلامة .. غذا غادا تولي سير تقود !
💚🦅
11/01/2021
ألف مبروك للشعب الرجاوي التأهل للنهائي و ضمان 2مليار و نصف حتى في حالة خسارة النهائي.
للرجوع لأطوار المباراة قمنا بتنبيهكم قبل بدايتها بأن اللعب بثلات ارتكاز لا يعطي نفع و يصبح الرجاء عقيم هجوميا بحيث متولي يرجع للوراء لاستلام الكرة و البناء للاعبين فقط أمامه عوض ثلاثة.
تم الانتباه لهاد النقطة و دخل بنحليب مكان الوردي.. و صراحة لم يتغير الكثير و مالانغو بدا كايسخن فالوقت اللي سفيان المشاغب بتحركاته جاب ضربة جزاء اللي سهلات علينا المباراة.. تحررنا من الضغط و الخصم ماعرفش كيفاش يلعب و جات الضربة القاضية من مالانغو بتمريرة جميلة لمذكور باش يعمق جراح الإسماعيلي. الهدف الثالت خلانا نعيشو كمشجعين نهاية المباراة بأريحية.
أظن باللي الصطاف تكنيك أخطأ في اختيار الفريق اللي يدخل لكن الراحيمي عتقهم و عتقنا أيضا كجمهور من خيبة أمل زايدة.
غادي نعطيو حسب رأي الصفحة أحسن ثلات لاعبين في المباراة.
١-الرحيمي : رجل المقابلة واخا ماسجلش. سخاء كبير و جاب ضربة جزاء من مجهود فردي.
٢-مالانغو : واخا مايسجلش، بين لاعب مهم في خلق المساحات و الضغط على المدافعين. سجل هدف جميل و حتى فاللعب كان جد مهم.
٣-مذكور : مشروع مدافع أيمن من الطراز الرفيع. مشكلته فقط اتخاذ القرار و اليوم جاوبنا بتوزيعة و لا في الأحلام.
نقدرو نزيدو موراهم الثنائي زريدة عرجون، جبيرة و أيضا محسن اللي بعد الهدف الأول تحرر.
هاد الفلوس غير كافية باش تحل النزاعات اللي فالطاس مع بعض اللاعبين و فاخر زيادة لمنح بعض اللاعبين دون نسيان البريم الكبيرة ديالهم فهاد المسابقة. لذلك من الضروري اللعب على الكأس ب 100% و حتى في حالة الفوز خاس إدارة تقنية و مدير رياضي باش يقادو الماص صالاريال مستقبلًا.
بالنسبة للإتحاد قدمو مباراة متواضعة ضد الشباب رغم الفوز لكن فمباراة واحدة كلشي ممكن و غادي نرجعو لتحليل مفصل لهاد الفريق فيما بعد.
غادي نختمو بمقولة أخرى من ذهب من الرائع فارس عوض : "الرجاء تكفيه ربع ساعة للعودة، فكيف بشوط كامل يا إسماعيلييي"
ديما راجا 🦅
11/01/2021
من مور الخسارة اللي كانت صعيبة على أي رجاوي حر.. العديد من الأشياء وقعو أو عفوًا البسالة مثل الخروج الإعلامي الفاشل "للناطق الرسمي" في إحدى القنوات المصرية، الصطوريات المثيرة للاشمئزاز ديال بعض اللاعبين و أخيرا قضية الورفلي اللي جبر إدارة الرجاء يعطيوه جزء من المستحقات ديالو باش يلعب.
قررنا نغمضو عينينا و نعطيوهم فرصة أخرى يوم الإثنين باش يبينو لينا أن قد بسالتهم قد لعبهم.
اليوم مع السابعة سنعيش منعرج فهاد الموسم.. يا إما التأهل و زيادة الحظوظ لنيل الجائزة المالية الكبيرة.. يا إما الخسارة و غادي نجبدو البسالة كاااملة و غادي نقومو بتغربيلة كبيرة للعديد من الأشخاص اللي ماشي مربحين لينا.
الإسماعيلي كأسماء و كمستوى لاعبين مابيهمش لكن كمستوى جماعي هاد العام ضعاف.. كايحتلو المركز العاشر بعد ست جولات في ظل استياء الجمهور ديالهم اللي يعد الأكثر شعبية وراء الأهلي و الزمالك. إلا كنتي أخي الرجاوي كاتبان ليك الرجاء فأزمة نتائج و أيضا غايبين عليها بعض اللاعبين فحال الإسماعيلي ليس بالأحسن !
هاد الفقرة الأخيرة غاندخلو فيها لما هو تقني باش نعطيو الرأي ديال الصفحة، الرجاء فهاد السنوات الأخيرة كاتلقا مشاكل مع غياب الحفيظي خصوصا أن مع الغياب ديالو السلامي كايختار ناناح أو زيادة وسط محوري و بالتالي الرجاء كاتولي عقيمة هجوميا خصوصا أن عدنا أجنحة ماشي حقيقية يعني خاسك ضروري تمدهم بالكرات.
الحل اليوم هو متولي يبدا مكان الحفيظي كرقم 10 باش يعطي التمريرة الأخيرة و ياخد المسؤولية.. أي قرار من غير هذا من الصطاف غادي يحطنا فموقف صعب جدا. محسن فايت لعب كرقم 10 فمباراة مصيرية ضد فيتا فالكونغو و اللي قدم فيها أداء كبير بزاف.
الرجوع ديال مالانغو غايعطينا الكثير لكن بالنسبة لينا من الأحسن نخليوه لبداية الشوط الثاني. بنحليب فالدور ديالو كجناح أيمن مزور كايلقا صعوبات حيت هو المركز ديالو مهاجم ثان و فأي شيما تاكتيك من غير هادا كايلقا فيه صعوبات لكن ماكاينش اختيار آخر في السكواد. بالنسبة للوسط الدفاعي فحسب رأينا هادشي راجع لأرضية الملعب إذا كانت جيدة فعلينا البدء بالعرجون و الوردي باش يوصل الكرة حيت لاعب جيد في التسليم و الاستلام و اللعب للأمام أما إذا كان الملعب صعيب تدرج فيه الكرة فضروري زريدة مكان الوردي.
هذا هو أحسن فريق تقدر تدخل بيه الرجاء اليوم و نلعبو لعب هجومي من الدقيقة الأولى، حتى إلا تسجل علينا فالرجاء قادرة تسجل أكثر من هدفين على الإسماعيلي.
ديما راجا 🦅
08/01/2021
************************** 🟢⚪🟢 **********************
مازال طعم الشمتة مر، الإقصاء ماكانش سهل من البطولة المفضلة للرجاويين .. صحيح مافزناش بيها من 1999 و مانافسناش عليها من 2005 حتال السنة الماضية لكنها تبقى قريبة لقلوب الرجاويين و لعبنا فيها مباريات بطولية, الخسارة أسبابها عديدة بداية بالملعب الكارثي مرورًا بالإدارة، غياب إدارة تقنية، الصطاف تكنيك وصولًا لللاعبين اللي ماكايحلوش فلوسهم....
غادي نرجعو لهاد الخسارة فيما بعد و غانجبدو الأشخاص بسمياتهم باش يفيقو معانا و يعرفو وزن و قيمة الرجاء !
التركيز ديالنا الآن غانحولوه كليًا للمباراة المصيرية ضد الإسماعيلي، مباراة مصيرية لينا كجمهور باش نخرجو شيء ما من الأزمة المالية الناتجة عن بعض الأخطاء فالانتقالات و بعض الصاليرات الفلكية لبعض أشباه اللاعبين. سطرت على أنها مصيرية لينا حيت حنا كجمهور اللي هاممنا الفريق و باغين نخرجو من الأزمة المالية أما الإدارة فهي فقط مؤقتة و من مصلاحتها يخرجو ليك كل مرة أسطوانة الأزمة.
المباراة مصيرية أيضا للأخ السلامي صاحب اللقب الوحيد في مسيرته و صاحب 35 مليون شهريًا.. أكيد المدرب يلعب وجوده يوم الإثنين رفقة بعض اللاعبين و أي نتيجة من غير التأهل تعجل برحيلهم في أقرب وقت.
الإسماعيلي فريق عادي جدا وجب علينا تمزيق شباكه و التغلب عليه بأكثر من هدفين.
كل الضغط على متولي و جميع ركائز الفريق ..
نعم كل الضغط و ليس كل الدعم لأن الدعم لم يؤتي جدوى أخي الرجاوي !
ديما راجا 🦅...
************************** 🟢⚪🟢 **********************
