07/04/2026
🚨‼️
أول حاجة سمحو لينا حيت كنغبرو بزاف، شحال من بلانات كنبغيو نديروهوم الوقت مكيعاوناش ولكن أيت والله ما منا خلانا نخليو حياتنا و نأديو الواجب الوطني الودادي ديال ندافعو على فرقتنا ضدو
غادي نبداو من الاول باش مانضيعو تا ديطاي ..جينا اليوم بغرض نعريو أقذر و أفشل رئيس فتاريخ النادي.
اولا جيتي و نتا شبعان عداوات مع الفراقي ديال المغرب كامل ، و هادوك العداوات تحولو من شخص الرئيس لنادي الوداد حيت نتا ممثل النادي .. رجعتينا اكثر فرقة مكروهة فالمغرب حيت نتا هو اكثر رئيس و اداري مكروه .
بدينا العام بشكل متدبدب و طالبنا بتغيير المدرب و تعيين واحد كبير فبلاصتو لي يقدر يجيري الوداد و ليفيكتيف ديالها..النتائج كانت كتخلينا نطيحو فمنطق "الفريق المنتصر لا يتغير" ولكن نتا مخبي لينا سر التشبت بالهاشمي تا عرفناه دابا..لي هو يسكت على التسمسير.
جا الميركاطو ديال الشتا الوداد مسينيا لزياش و هي عندها احسن ايفيكتيف فالمغرب، بمعنى غيكون حبة المشماش لي غتحط فوق الگاطو..و مامحتاجين والو من غيرو(تا من بوشتة كان صانع منو لورش انسان) شوية بديتي كتروج لصفقات بحال بوفال و اوباميانگ… هادشي خلا الجماهير تنوض تدير حملات على الرؤساء باش يديرو ميركاطو حتى هوما و ناضو داروه و ستافدو كرويا منو.و الوداد باعت الركائز فاللخر ديالو و رجعتينا حرفيا ارنب سباق الميركاطو .
ندوزو لبيع الركائز..فواحد البودكاست جنيتي على راسك بتصريح كيخلي اكلخ المكلخين يطالب بالرحيل الفوري ديالك..قلتي بلي لورش فاللخر ديال العام غيولي ليبر و مغنستافدوش منو ماديا (گاميليا) داكشي لاش بعناه دابا..شنو ستافدات الوداد كرويا من لورش باش تقلب على الاستفادة المادية؟
واش كيحساب ليك حنا المحمدية كنجيبو لعاب نجموه يولي جايب الثمن نبيعوه و نغرقو حنا؟ را الوداد هادي خاصها تستثمر فالنجاح الكروي..ماديا ا راك طلعتي التيكي و دخلنا للطواليط لي سميتها ملعب الزاولي ب60 درهم فالوقت لي كاين جماهير كيقاطعو الماتشات فتيرانات حسن من دونور حيت الورقة ب50..السطور ولاو كيساليو فيه البرودويات نهار يتحطو..البراند نشفناه تا من الكيسان شربناهم.. واش هادشي ماكافيش ايلا زدنا عليه منحة المونديال لي هي اكبر منحة صاينة خداتها شي فرقة مغربية فالتاريخ؟!!
ادارة الاتحاد الليبي ستغربو كيفاش فرقة باعت عزيز وسط العام و هادشي لي خلاهم يزعمو يحطو عرض ل لورش و فيريرا لي وافقتي عليهم و هادشي كيفسر غياب فيريرا من داك النهار..مابغاش يمشي يلعب فليبيا و يگوملك قررتي تجمدو باش ماتقبل عليه تا فرقة مني يولي ليبر
الوداد كون سدات الميركاطو فصفقة زياش كنا غنكونو بهاد المؤجلات شبه حسمنا اللقب، خليتيا دابا متقاسمين الصدارة و عارفين بلي مغنجيوش مع 4 الاولين كأحسن ترتيب محتمل
بالنسبة لرد الفعل ديال الجمهور غادي نستحضرو سنة 2019 مني كانت وداد الناصري عندها مشاكل فالاقناع ماشي واصلة لمرحلة الفشل..ولكن الجمهور لي كان داق حلاوة القمة مابغاش يشوف الوداد فديك الحالة ، فكان التعامل معاها هو التحذير من خلال الهتافات و التذكير بحادثة الدخول لبنجلون على العلماء ديال الكورة لي ماكانتش دايرة معاهم الجلدة و صافي..و دابا ولينا كنلتامسو الاعذار لبوشتة و حنا سالخين الخالقي..كنصفقو للرايحي و حنا مصرفقين ياسين الكحل.. تحولنا من حذاري حذاري وا الرئيس تابع المال و ناسي هاد النادي، إلى كيفما كان الحال غنبقا فيدال ،كتطبيع مباشر مع الفشل و تصنيف الوداد مع الاندية لي جمهورها ولف يشجعها بلا القاب بحال اسفي لي للمفارقة هاد العام خداو لقب و قصاو الوداد شخصيا.
بالنسبة للجمهور راه الدفاع ديالو على الفرقة رجع زماگري بحال المدافعين ديال الفرقة..
يعني "دفاع جمهور الوداد على الوداد اضعف من دفاع الوداد نفسو"
حنا ماغاديش ندويو معاك بالقافية ولا لغة أجنبية.. الفترة ديالك غتسالي مع يسالي العام..و غادي تمشي تقود لمزبلة التاريخ مع ولاد الق*اب..
حرِّر بالدار البيضاء بتاريخ 7 أبريل 2026 ..00:50
