18/04/2026
كاينة واحد النظرية تتگول أنه فاش كتبدا تزيان ليك الوقت
كيعياو الواليدين ولا كيكونو غادرونا بدون سابق إنذار وكتبقى عقدة أبدية عندك أنك ماقدرتيش تفرحهم 🥀
الحياة قاصحة فهاد المعادلة ما كتسولكش واش واجد ولا لا كتعلمك وتقريك بالصدمة أنه الحب والعطاء خاصو يتعاش كيفما كانت الظروف ولو بأبسط الحوايج ماشي تأجلو وتگول فخاطرك حتى نكون واجد حيت ديك - حتى نكون - تقدر ما تجيش گاع !
فالوقت لي كنبقاو نتسناو فيه تزيان الظروف كنكونوا كتعتمدوا على واحد الفرضية وهي أن نفس الناس غادي يبقاو بنفس القدرة حتى نوصلو للمبتغى ديالنا ولكن كيوقع العكس گدما انت كتطلع وترقع گدما هوما كيهبطوا ويذبلو بشوية بشوية وداك التلاقي اللي كنا متخيلينوا ما عمرو كيجي محسوب ولاصق ..
فاش كتولي عندك الإمكانيات و الحرية المالية لي تخليك تسافر و تشري الپياس المليح و تركب على الحديد و تفاصيل زوينة ضربتي عليها تمارة باش وصلتي ليها كيكونوا دوك الجوج لي خدمتي على قبلهم وبغيتي تفرحهم وترد ليهم ولو القليل مابقاش عندهم الصحة ولا الخاطر يتذوقوا حلاوة داك الجميل ولا كتلقاهم رحلوا من الدنيا وكتستوعب من بعد أن الحوايج اللي كانت سهلة فالمخيلة ديالك ولات معقدة فالتنفيذ !
المشكل ماشي حيت النية ديالك ناقصة ولا حيت كاين تقصير مقصود منك ولكن الإشكال فداك الترتيب اللي كتفرضو عليك الحياة واللي ما كيتلاقاش مع التوقيت ديال هاد الجميل !
الحياة كتفرض عليك تدخل فمرحلة خاصك تركز فيها على ذاتك وتبني فيها مستقبلك ولكن بلا ما تحس كتدوز من جنب واحد الوقت مهم وقت إلا فات جامي يتعوض 🥀
كازافوبي ✍️
