BLUE PRIDE 1944

جوج انتصارات متتالية …

فآخر جوج مباريات الكأس/الدوري ربحناهوم و الأهم هو الطريقة لي كتبان الخدمة دالمدرب الكبيرة ، من غير القرائة د اللعب و التخطيط و … كاين توصيل الفكرة و انه يخلي اللاعبين يتيقو فيه ويطبقو الخطة بأحسن طريقة.

الفوز على المتصدر بوحدو كيخليك توقف و تسقسي واش بصح هذا هو الفريق لي عندنا هو لي عمل هاد النتيجة و هنايا كيجي الدافع و العامل النفسي لي هاد المرة كان "كريم" و البرائة ديالو لي خلات النادي كامل ضاحك و مورال طالع و هادشي لي بان ففيديو لي تحط فالباج مع اللاعبين و الإدارة و المدرب …

عطا جو حلو و امتص الضغط على الجميع بلا ميعرف و بلا ميقصد و خلا اللاعبين بدل ما يزيدو يفكرو فأي حاجة تقدر تخرجوم من الماتش ينوضوا و يضحكو معاه و يلعبو معاه و هادشي بلا قصد طلعلوم المورال 💙

كنتمناو الخير فقادم المباريات، و عيد مبارك سعيد للجميع 🤝🏻

الباطا اللولة فكأس العرش، نقولو بإسم الله !

اليوما اول مباراة فأغلى الكؤوس "كأس العرش" نسميو مولانا و نعملو النية و إن شاءالله كولشي قريب 🤲🏼

الضرائب مخلصة و التلفزة خارج التغطية…

هادشي لي كيوقع مبقاشي مقبول نهائيا ، و بسباب الكثرة ديالو رجع غير مفهوم و غير قابل للتحليل !

كيفاش دولة غتنضم كأس العالم 2030 و بانيا ملاعب و فاتحا نالجمهور د الفريقين يدخلو يتفرجو فمباراة فكأس العرش (اعلى مسابقة فالبلاد) و المفاجأة بلا نقل و بلا VAR !

حنايا عايشين ف 2026 و قبل شهر من انطلاق كأس العالم يعني 4 سنوات باش نستاضفو هاد البطولة و عندك "بينارطي" باش تنقل المباراة لي غتلعب فملعب عالمي بحال "ابن بطوطة" و لي لقطة صغيرة من المباراة تقدر تطلعلك تراند و تسوقلك الكرة فالبلاد و تينا خارج التغطية ؟

عدم النقل د هاد المباراة داخل فواحد دوامة د العنصرية لي كتمارس على الفريق من زمان ، و كنتفكرو مباراة الموسم لي فات لي وقع نفس المنظر كذالك و خسرنا مباراة مع فريق "العصابة" بسبب غياب النقل و الVAR و كذالك واحد الواقعة كتضحك ديال تأخر إنطلاق مباراة للفريق فملعب القرية الرياضية بسبب أنه وحدة النقل مشات نتطوان عوض طنجة ، فموصيبة كبيرة و سؤال كبير واش حنايا مغاربة ؟ او بالأحرى واش الناس د SNRT مغاربة بحالنا ؟

الفاجعة و المصيبة هنايا هي ان هاد الشبكة و لي الناس د الداخل بيدوم كيسميوها "الرباط" كتسير بفلوس دافعي الضرائب ، يعني هادشي كامل من فلوس د الشعب المغربي و لي الساكنة د طنجة و ديال قنيطرة جزء منو و لي حتى هوما عندوم الحق يتابعو اللقاء دالفريق ديالوم ولاكن SNRT كتشوف مباراة "الفتح" و "الرشاد البرنوصي" أكثر أهمية ، ولي مع كامل احتراماتي للفريقين و الجمهور ديالوم فهوما قلة قليلة و محسوبين على رؤوس الاصابع !

من هاد المنبر كنستنكرو هاد التصرفات العنصرية والتمادي لي كيجي كل مرة من هاد الطرف لي معرفناشي شنو المشكل لي عندو مع اتحاد طنجة او مع طنجة بالخصوص !

جميعاً خلف الإتحاد …

كنثمنو هاد التجاوب الإيجابي مع مطالب خفض اثمنة التذاكر (لي عطينا الرئي ديالنا فيه) ، و المفاجأة لي كانت هي انه الطيكي غيتقام على الواحد بـ25 درهم فقط (عمرنا دخلنا بهاد الثمن) ، و هادشي لي كيعطي حسن النية د المكتب مقابل الجمهور د الفريق …

هاد الخطوة يمكن تبين بزاف دلحاجات ، و كتخلي المشوشين لي كيحاولو يگيدو الجمهور ضد الفريق (بنادم باغي الفريق يفشل صحا باش يقضي الغرض نراسو) ، و غنشوفو هاد الطبقة لي كتقول ان الطيكي غالي واش فعلا كيعنيوها اولا فقط كيتفششو علينا !

و من هاد المنبر كنشجعو الدراري انهم يشريو هاد الباص لي غيهنيهوم من التقطاع كل مرة و غيسهل عليهوم و يرخص عليهوم المهمة د مساندة الفريق !

اليوم التاريخي …

فكل ذكرى دهاد اليوم التاريخي كيرجع بينا شريط الذكريات و كيدغدغلنا المشاعر ، بعد سنوات الدمار جاو سنوات الفريق قدر يعمل مستوى كبير …

من الهدف ديالنا الأوحد لي كان هو الإتحاد يرجع نـ "بريميرا" الى التألق فالبطولة و كأس العرش و تذوق طعم المنافسات الإفريقية إلى فرحة كبيرة بتحقيق أول بطولة فتاريخ الفريق …

ديك السنوات خاصة المواسم لي تحت قيادة الربان الحالي سي "عبد الحق بن شيخة" غاليين علينا ، الأداء و النتيجة ولاكن للأسف دون تتويج !

حتى جا موسم أسطورة النادي الشريف "إدريس المرابط" ولي جات معاه اول بطولة بعزيمة الرجال و القتالية لي غابت علينا من بعد للأسف .

هاد اليوم بقى محفور فذاكرةكل طنجاوي و دابا كنطالبو بالمزيد 💙💙

نرجعو نواحد الموضوع من المواضيع المهمة لي كناقشوهوم فالباج و لي كتهم المدينة ديالنا و ولادا …

قضية دالملاعب و د الفرق الأخرى ، لي للأسف طنجة مدينة د الكورة و هي أول مدينة لعبات هاد الرياضة فالبلاد عندا ملاعب قليلة !

الرباط العاصمة تبناو فيها ملاعب عالمية (فوق الشبعة) ، كازا ملعب جديد فبن سليمان و ملاعب أخرى بحال فيليب و التيسيما غيتعاودو …

بينما فهاد المدينة مكاينشي حتى الملاعب د 11 غير الرقعة ، و المثال هنايا هو "كامبو د الواد" لي دابا مشهور بالاسم د كامبو د عشابة و لي فبوسط سابق طرحنا فكرة انه يرجع ملعب 11 باش يحل المشكل د القرية الرياضية، ولاكن ؛ شكون كيسمع ؟

اليوم و بعد مدة طويلة الملعب تصلح و بقى فالحجم ديالو و توقفات فيه الممارسة لضروف غابرة (مكنعرفوهاشي) ، و فالمقابل كنشوفو الجمعيات لي كانو كيسيرو الملعب تحرمو منو و كيحاولو يطلعو الصوت ديالوم باش يرجعو ليلو …

من الجانب ديالنا حنايا مع الساكنة د المنطقة و ولادوم لي من حقوم يكون عندوم ملعب د الكرة فالحومة ديالوم و يحاولو يجيبو العز مع الفرق ديالوم فدرجات العصبة و يكونو هاد الفرق خزان المواهب للفريق الأول د المدينة "الإتحاد" .

التذاكر …

كاملين تابعنا فالساعات القليلة الماضية و حتى فالمباريات السابقة الهدرة على الثمن د طيكي على انه غالي و ماشي فالمتناول د الجمهور خاصة ان المباريات لي بقاو مهمة و مصيرية و فمدة زمنية صغيرة …

و حنايا واعيين بأنه الملعب الجديد عندو دفتر تحملات و سومة كراء مرتفعة زيد عليها الأمن و … و عارفين أنه المداخيل يالاه كتجيب التعادل و شي بركة د الرباح ، ولاكن …

فنفس الوقت كنشوفو ان الكامبو عندو Potentiel كبير باش يهز كثر دالجمهور و يدخل كثر د الفلوس و بلا مغامرة مكاينشي الرباح …

المنطقة 1 (الكورفا) :
طيكي دائما كان كيكون 30 درهم فطبقة وحدة ، مور التوسيع د كامبو رجعات 40 درهم (موسم البقاء) ، و حاليا 50 درهم لي هو مبلغ منطقي ولاكن ماشي دابا !

شفنا خاصة فالمباراة اللخرة ان الكورفا كانت Soldout و هادشي مبانشي فالواقع ، حيت الطبقة الوسطانية كانت خاوية كاملا ، و هادشي بسبب ان كولشي خصو يطلع نفوقي و هنايا كنطرحو عدة إشكالات ؛

- واش عادي نبيعو طيكيس على أساس أن كولشي جالس و نجبرو الخوى فكامبو ؟
- واش عادي يبقاو بلايص خاويين بلا منستافدو منوم ؟

و الجواب المنطقي كيقول انَّه خصو يتعمل جهد أكبر فعملية الولوج باش كل واحد يمشي على الأقل نالطبقة ديالو (إذا مقدرتيشي تجلسو فبلاصتو) .

و أيضاً بما أن كل طبقة كتهز كثر من الطاقة الإستعابية ديالا نقدرو نبيعو طيكيس زايدين و علاش لا نزولو كراسا نهائيا ، حيت فهاد الحالة كيرجعو عائق قدام هاد النوعية د الجمهور لي مكتجلسشي و لي كتبقى تحرك 90 دقيقة.

و بالتالي :

20 ألف (نعتابروها عدد المقاعد فالكورفا) x 50 درهم = 100ألف درهم .

30 الف (الطاقة الإستعابية القصوى للكورفا بلا كراسا) x 40 درهم = 120 ألف درهم .

و الفرق واضح حيت غتشجع طبقة اكبر تدخل و تدخل كثر د الفلوس .

المناطق الأخرى فالملعب مكيتمشاوشي بنفس المنطق حيت الجمهور ديالوم بوحدو ، ناس باغا تدخل تفرج و تفوج ، عائلات و ناس ماجين يعيشو التجربة و طبعاً بما أنَّ هاد الجمهور قليل ثقافياً لبزاف د الأسباب كنتمناو الثمن و حتى العرض و الوصول ليلوم إعلامياً يكون افضل و فنفس الوقت خص تهتم بالتجربة ديالوم خاصة فSkybox و فـHospitality باش فالمواسم المقبلة تكون ضمنتيهم يجيو عندك (واخا تزيد فالثمن من بعد) …

لاحظنا ان ملعب القرية فادنا بزاف فالمباريات لي تلعبات فيه بلا جمهور ، حتى رجعنا كنشوفو الجمهور مع الملعب مباشرة حدا اللاعبين بلا حتى شي انفلاتات و زيد عليها جمهور واعي كرويا و ماشي غي ماجي يجيب الساعة ، كيحتج و كيصفر فالوقت المناسب و هايدا خصنا نتعاملو مع هاد الملعب فهاد الموسم ، نجربو و نحاولو نعوطو و نطورو الجمهور د الإتحاد دقة بدقة حيت للأسف تاحاجة مكتجي فدقة وحدة 🙏🏼💙

و أخيرا …

مند مدة طويلة و حنايا كمتابعين لكرة القدم العالمية كنحسو ان كرة القدم مبقاتشي غير رياضة او ترفيه … و رجع عندا بعد إجتماعي كبير ، و من هاد النقطة انطلقنا دائماً باش نهدرو على الهوية ديالنا و شكون حنايا ، و التاريخ ديالنا و ماين جينا …

اليوما كنشوفو النادي ديالنا رجع كيهتم بهاد التفاصيل لي كاين لي كيحسبا زواق و فوق الفيغي بينما فهاد الزمان رجعات هي علاش كدور الكورة …

و فهاد الصدد بغينا نذكرو جمعية القدماء و لي بحالا بحال الإتحاد كانو فيها مشاكل و انقسامات (جوج كيانات) و طبعاً هادشي حنايا رافضيناه قَلْباً و قَالِباً بينما المباراة الودية لي تعلن عليها من طرف الجمعية ضد قدماء نادي تولوز الفرنسي نهار الجمعة و بدعم من النادي كتعني حاجة كبيرة !

مكرهناشي صراحة المباراة تنقل من ملعب الزياتن لملعب القرية الرياضية و تكون مباراة بحضور جماهيري و نقل و تعليق (لما لا) باش يكون عندا impact كبير فهاد الصدد ، و هادي ماشي اول مرة حيت ديجا تابعنا مباريات للقدماء و آخرها ضد فريق فلىىىطيني لي تابعنا فيه لاعبين كبرنا بيهوم فعلا …

كنتمناو يتصلحو الخواطر بين قدماء اللاعبين كاملين واحد واحد و يبقاو مكملين فالمشاركة فهاد الجانب التاريخي و الإجتماعي و بإحتضان من النادي بالضرورة 💙

نقطة نقطة يحمل الواد !

البارح تابعنا ملحمة من ملاحم الإتحاد و قدرنا نجيبو نقطة ضد فريق منضم و عندو كاليطي كبيرة فبزاف د المراكز و بانكييو واقف ، و الدليل طبعاً هو أنه قدر يوصل نالفينال دكأس إفريقيا فهاد النسخة و هادشي كيخلي المباراة طعم خاص …

نقطة صراحة كانت أضعف الإيمان خاصة مقابل الأداء الرجولي لي كان من عند ملاعبيا ديالنا ، لي طبعاً كيف ما عيينا منقولو و نعاودو ناقصاهوم الكاليطي و نقص فالمراكز لي تزاد عليه نقص فالعامل البشري خاصة بالإصابات الأخيرة …

البارديدو كان الحسم ديالو يكون فأكثر من كرة و للأسف من نفس العنصر ، ولدنا و حبيبنا "عبد الحميد" لي بين نيفو مزيون من نهار رجع من الزمالك و قدر يعطي 4 تمريرات حاسمة ، يعني قدر يساهم فـ50٪؜ من غوان دالفريق (من نهار رجع) ، و بينما كنا كنتسناو يتعملق فهاد بارديدو باش نطبلولو مزيان ، قدر الله و ما شاء فعل و بين أنه باقي خصو الخدمة و كنتمناو يخدم على راسو كثر خاصة فالتشوطيس لي عندو ضعافين للأسف …

فالجانب الأخر و فلفتة تاريخية تكريم اللاعب الكبير "محمد المصاوري" الملقب بـ "الجن" و لي كان جزء من التاريخ د الفريق ديالنا قبل ما يمشي يلعب فالجيش كذالك و يكتب معاهوم التاريخ ، و لي مكيعرفشي شكون هو "المصاوري" ولا محضرشي عليه فقط التأمل فاللقب ديالو كيخليك تفهم شكون هو و شنو هو التأثير لي خلا ، الله يشافيه 🤲🏼

إنتصار مهم بزااااااااااف و 3 نقط جدادين فالمشوار ديال الفريق و 4/6 نقاط متوفرة للمدرب الجديد عبد الحق بن شيخة !

هاد الإنتصار الأهمية ديالو ماشي ف 3 دالنقط فقط ، الأهمية كتبان فـ الفوز على منافس مباشر و الحاجة لي مهمة كثر هي شخصية البطل و القتالية لي مكرهناشي ترسخ عند الفريق و يكبرو عليها الأجيال القادمة 🤝🏻💙

الحرية للأحرار و الحرية كلمة كبيرة …

الأغلبية ديال دراري لي متبعين دومين ultra’ كيعرفو هاد الشخصية الغنية عن التعريف "السيد مشاغب" و لي مكيعرفوشي يمشي يقلب عليه …

هاد الإنسان دوز كثر من 10 سنين فسجون النظام المصري الضالم ، هاد المدة كان فيها حر فكرياً و كان راجل وخا كلا الدقة من عند صحابو و رفقاء الدرب ، لي خواو بيه فأول فرصة و كاين منوم لي باعو مباشرة باش يزيد يغرقو …

ولاكن كل ما طال الليل ستشرق شمس الحرية ☀️