03/10/2026
خسارة الديربي …
كاملين بينا تفرجنا البارح فالديربي و لي رجع من بعد موسم توقف و لأول مرة فإبن بطوطة بالحلة الجديدة ، الجو د البارديدو كان جو كيليق بكلمة "الديربي" و لولا غياب جمهور الخصم لكان بارديدو أسطوري …
فالمحتوى د بارديدو و كيف ما كنعرفو و كان متوقع الكرمة داخل ببلوك طايح و بحال البارديدو ديالوم مع "بركان" وهادشي لي بان احصائيا 61٪ د الاستحواذ مقابل 39٪ ليلوم و هنايا بنشيخة للأسف طاح فخطأ كبير لي هو الإستحواذ السلبي ، و هادشي حيت ملاعبية كانو كيوصلو الكورة نالشبكة و كيضيعوها فالدحاس ولا كتوصل عند بورطيرو باردا ، و هادشي حتى إذا عندك الكورة مغيفيدك فوالو خاصة مع إشراك إبراهيما ديانغ لي غيضيع فالدحاس …
فوسط هاد الدحاس و المحاولات جا سي "سعود" و عمل بري أسيست عالمي نملاعبي دالخصم و خلا بارديدو يتحرك 1-0 ليلوم !
التغييرات د المدرب فالشوط الثاني مبدلوشي بزاف صراحة حيت الفعالية بقات غايبا واخا جا التعادل ، ولاكن بنفس الطريقة ضيعنا قفة د الغوان لي مكانتشي كضيع فأيام د بنشيخة و الرجال …
و فالدقيقة 93 جا الكادو الثاني من نفس اللاعب ، ضربة جزاء لي واخا ضاعت ولاكن ضاع معاها جوج دالنقاط فالمتناول حيت مقدرنا نعملو والو …
الخسارة بنسبة أولى كيتحملا المدرب و القرائة الغريبة لي عمل و تانيا اللعابة بالرعونة ديالوم بغارط الشبكة … ولاكن "سعود" ولي ميكنا عليه شحال من مرة ، و فالديربي لي ضيع فيه بينارطي برعونة هو لي غياكل الدقة !
و لنا عودة…
