Orca club swimming academy

فوائد السباحة: رياضة كاملة للجسم والعقل

السباحة من أقدم وأجمل الرياضات اللي كيعشقوها الصغار والكبار. ماشي غير وسيلة للترفيه، ولكن عندها بزاف ديال الفوائد المهمة للصحة والراحة النفسية.

أولا، السباحة كتساعد على تقوية العضلات والمفاصل بلا ما يكون ضغط كبير على الجسم، بحيث الما كيساند الوزن وكيقلل المجهود على العظام. هادشي كيجعلها مناسبة حتى للناس اللي عندهم مشاكل في الركبة أو الظهر.

ثانيا، كتساهم في تحسين اللياقة البدنية والتنفس، بحيث السباح كيدير مجهود منتظم على القلب والرئة، وهادشي كيعاون على تنظيم التنفس وتقوية الدورة الدموية.

ثالثا، السباحة مهمة بزاف في الوقاية من الغرق، خصوصا عند الأطفال، حيت كتعلّمهم يثقو في راسهم ويتحكمو في الما.

من جهة أخرى، السباحة كتعاون على الحد من التوتر والضغط النفسي، حيث الما كيعطي احساس بالراحة والهدوء، وكينقص العصبية والتعب اليومي.

وأخيرا، كتساهم في تنمية روح الانضباط والالتزام عند الطفل، بحيث كيحترم القوانين ويتعلم يتحمل المسؤولية.

لهذا، تعليم السباحة راه استثمار مهم فصحة وراحة أولادنا، وكيصنع جيل واثق، نشيط وصحي.

الكرول ماشي غير سباحة… الكرول رحلة.

ماشي غير حركة ديال يدين ورجلين…
هادي رحلة داخل راسك، رحلة فـي جسمك.

منين مكتبقاش تقاوم، وكتخلي جسمك ينساب على سطح الما…
كتفهم أن الكرول ماشي تمرين… راه تأمل.

ضحكو عليك مني قالو ليك: "غادي نعلمك الكرول فـجوج دقايق".

ولكن الكرول اللي بصّح
هو اللي كيبدّلك من الداخل
ماشي بالمتر كيتقاس… كيتحس بقلبك ❤

كتحسب راسك كتعلّم السباحة الحرة؟
لا… السباحة الحرة هي اللي كتعلّمك.

كتعلّمك كيفاش تنفس بلا ما تخلع.
كتعلّمك كيفاش تدوّر راسك بلا ما تحاول تحكم فكلشي.

كتعلّمك تسكت… وتسمع.
تحس داك اللحظة اللي بين نفس و نفس…و بين فكرة و فكرة.

ساعتها كتفهم…
أنك فـي رحلة.

رحلة فـي الاسترخاء، فـي الانسجام مع ذاتك.
رحلة تكتاشف فيها بلايص فـي جسمك مشدودة وانت ما عارفهاش.
رحلة فـي دماغك اللي تعوّد يربح كلشي بالقوة… ماشي باللّيونة.

ولكن الكرول؟
كيكره القوة.
مكيحملهاش
كيعاقبها.

وعلاش الطفل كيعوم حسن منك؟
ماشي غير حيث جسمو مرن…
ولكن حيت ما كيبغيش يسيطر.
هو غير كيلعب.
كياخد النفس ديالو مع الما…
وكيعيش اللحظة.

وأنت؟
باغي تتحكم فكلشي.
وهو؟
عايش مع الما… ومع النفس… ومع اللحظة.

كتحسب السرعة هي تتحرك بزاف؟
غلط.
السرعة الصح؟
هي تحرك أقل… وتحرك بسهولة.

إلى بغيتي بصّح تتعلم تسبح حر…
نسا التكنيك شوية، وسوّل راسك:

"وش أنا بصّح كتنفّس؟
وش جسمي مرتاح؟
إلى خفت نغرق… وش نقدر نبقا واقف في الما؟
وش نقدر نقبل أنني باش نتحسّن… خاصني نبطّأ؟"

الكرول ماشي جري.
الكرول تأمل.
النفس كيولي إيقاع.
والإيقاع كيولي موجة.
وجسمك كيولي ماشي مع هاد الموجة… فـي انسجام تام 🌊

وساعتها؟
ماشي كتسبح…
راك كتطير تحت الما.

ما بقيتش كتسبح حر…
راك وليتي انت هو الحرية.

مدرسة تعليم و تدريب السباحة في طنجة لجميع الفئات العمرية بمواصفات عالية الجودة و مدربين محترفين
مسبح نصف أولمبي مغطى كيخولك تعلم السباحة طول السنة
للمعلومات أكتر المرجوا التواصل على الأرقام الموجودة في الإعلان