Sayar Kyaung Sport

ဗဟိုခံစစ်ကို အားဖြည့်ဖို့ လီဗာပူးအတွက် ရွေးချယ်စရာ CB ၃ယောက်...

On-paperအရတော့ လာမယ့်ရာသီအတွက် လီဗာပူးလူစာရင်းမှာ ဗဟိုနောက်ခံလူ၄ယောက်တိတိ ရှိနေတယ်လို့ ပြောရပါမယ်။ ဗန်ဒိုက်၊ ဂိုမက်ဇ်၊ ဂျရမီယာကေးနဲ့ လီယိုနီပါပဲ...

ဒါပေမယ့် တကယ်တမ်းမှာတော့ ဂိုမက်ဇ်က ပထမဆုံးရာသီကြိုခြေစမ်းပွဲမှာပဲ ဒဏ်ရာရသွားတယ်။ ဂျရမီယာကေးက ဒဏ်ရာပြန်ကောင်းလာပြီးနောက် ကြံ့ခိုင်မှုအကောင်းဆုံးအနေအထားပြန်ရအောင် ကြိုးစားနေရဆဲဖြစ်တယ်။ လီယိုနီလည်း ဒဏ်ရာကြောင့် အနားယူနေရဆဲပါပဲ...

ဒါကြောင့် လက်ရှိလီဗာပူးရဲ့ ဗဟိုခံစစ်မှာ ဒဏ်ရာကင်းရှင်းပြီး ကြံ့ခိုင်မှုပြည့်ဝနေတာက ဗန်ဒိုက်တစ်ယောက်ထဲ ရှိနေပါတယ်။ ရာသီသစ်ကို အင်ပြည့်အားပြည့်စတင်နိုင်ဖို့ ဘယ်လိုမှ မလုံလောက်တဲ့ အနေအထားပါပဲ...

ဒီမှာ လီဗာပူးအနေနဲ့ ဗဟိုခံစစ်ကို အင်အားဖြည့်နိုင်ဖို့လည်း အရေးတကြီးလိုအပ်လာခဲ့တယ်။ လက်ရှိအပြောင်းအရွှေ့သတင်းတွေနဲ့ စျေးကွက်အနေအထားအရ သူတို့နဲ့ အနီးစပ်ဆုံးဖြစ်နိုင်တဲ့ CB၃ယောက်ကိုတော့ အခုလိုတွေ့နိုင်ပါတယ်...

၁၊ ဇာဘာညီ

၂၀၂၄-၂၅ဘောလုံးရာသီမှာ ဘုန်းမောက်အတွက် အထူးခြေစွမ်းပြခဲ့တဲ့ လူငယ်နောက်ခံလူတစ်ယောက်ပါပဲ။ မနှစ်က နွေရာသီအပြောင်းအရွှေ့မှာတော့ အသင်းကြီးတော်တော်များများက သူ့ကိုဝိုင်းလိုက်ခဲ့ကြတယ်။ နောက်ဆုံး PSGကို သူရောက်သွားပါတယ်...

ဇာဘာညီဟာ ပြီးခဲ့တဲ့ရာသီမှာ PSGအတွက် ပြိုင်ပွဲစုံ၃၇ပွဲထိ ပါဝင်ကစားခွင့်ရခဲ့ပေမယ့် ပြည်တွင်းပွဲစဥ်တွေမှာပဲ အဓိက,ကစားခဲ့ရပြီး ချန်ပီယံလိဂ်မှာတော့ league phaseအဆင့် ပွဲစဥ်တချို့မှာပဲ ပွဲထွက်ခွင့်ရခဲ့တယ်။ ရှူံးထွက်ကနေ ဖိုင်နယ်အထိ တောက်လျှောက်အရန်ခုံထိုင်ခဲ့ရပါတယ်...

ဒီအနေအထားကို ကစားသမားဖက်က သိပ်မပျော်ရွှင်တာမျိုး ရှိနေသလို PSGတာဝန်ရှိသူတွေကလည်း ဇာဘာညီကို သင့်တင့်တဲ့ ပြောင်းရွှေ့ကြေးတစ်ရပ်နဲ့ ပြန်လည်ရှင်းထုတ်ဖို့ ပြင်ဆင်လာတယ်လို့ သိရတယ်...

ဇာဘာညီကိုခေါ်ယူဖို့ PSGဖက်ကနေ လီဗာပူးကို စတင်ကမ်းလှမ်းလာတာမျိုးတောင်ရှိတယ်လို့လည်း သတင်းတွေထွက်ပေါ်နေပါတယ်။ ဇာဘာညီဟာ ဘုန်းမောက်မှာ နည်းပြအိုင်ရာရိုလာ၊ အားကစားဒါရိုက်တာရစ်ချတ်ဟုချ်တို့နဲ့ လက်တွဲခဲ့ဖူးတာကြောင့် ဒါဟာဖြစ်နိုင်ချေရှိတဲ့ အပြောင်းအရွှေ့တစ်ရပ်ပါပဲ...

သူ့ရဲ့ပြောင်းရွှေ့ကြေးကတော့ ပေါင်၅၅သန်းနဲ့ သန်း၆၀ကြားဖြစ်နိုင်မယ်လို့လည်း သိရပါတယ်...

လီဗာပူးဖက်ကသာ ဒီလောက်ပမာဏပြောင်းရွှေ့ကြေးမျိုးကို သုံးချင်မယ်၊ ဇာဘာညီကို အမှန်တကယ်ကြိုးစားခေါ်ယူမယ်ဆိုရင် ဒီအပြောင်းအရွှေ့ဟာ မဖြစ်လာစရာ သိပ်မရှိပါဘူး...

၂၊ ကွန်ဆာ

ပြီးခဲ့တဲ့နှစ်အနည်းငယ်အတွင်း အင်္ဂလန်ရဲ့၊ ပရီးမီးယားလိဂ်ရဲ့ အတည်ငြိမ်ဆုံးCBတွေထဲကတစ်ယောက်လို့ ပြောရမှာဖြစ်ပါတယ်။ ကွန်ဆာဟာ အာဆင်နယ်နဲ့ အပြောင်းအရွှေ့သတင်းတွေ ကျယ်ကျယ်ပြန့်ပြန့်ထွက်ပေါ်ခဲ့ပေမယ့် သူ့ရဲ့ပြောင်းရွှေ့ကြေးနဲ့ပတ်သက်ပြီး အာဆင်နယ်နဲ့ ဗီလာတာဝန်ရှိသူတွေ ညှိနှိုင်းလို့ အဆင်မပြေခဲ့ဘူးလို့သိရတယ်...

ဒီကစားသမားရဲ့ ပြောင်းရွှေ့ကြေးကိုတော့ ဗီလာဖက်က ပေါင်သန်း၆၀သတ်မှတ်ထားတယ်လို့လည်း သတင်းတွေ ရှိနေပါတယ်...

၃၊ တိုမိုရီ

ဇာဘာညီတို့၊ ကွန်ဆာတို့ကတော့ လက်ရှိအပြောင်းအရွှေ့စျေးကွက်အခြေအနေအရ လီဗာပူးဖက်က ပြောင်းရွှေ့ကြေးများများသုံးဖို့ လက်မတွန့်ဘူးဆိုရင် ခေါ်ယူဖို့ သိပ်မခက်ခဲနိုင်ပါဘူး....

ဒါပေမယ့် နောက်ထပ်စဥ်းစားစရာတစ်ခုက လီဗာပူးဟာ တောင်ပံတိုက်စစ်အပါအဝင် တခြားသော positionတွေကိုလည်း အင်အားဖြည့်တင်းဖို့ လိုအပ်နေသေးတယ်ဆိုတာပါပဲ...

မနှစ်ကလည်း အီဆာ့နဲ့ ဖလော်ရီယန်ဗတ်ဇ်တို့လို ထိပ်တန်းကစားသမားတွေကို အမြင့်ဆုံးပြောင်းရွှေ့ကြေးတွေနဲ့ ခေါ်ယူထားတဲ့ အနေအထားအရ လီဗာပူးဟာ FFPနဲ့အညီဖြစ်အောင် ဒီနှစ်မှာ အသုံးစရိတ်ကို နည်းနည်းထိန်းရမယ့်သဘောလည်း ရှိနေတယ်...

ဒါကြောင့် CBနေရာအတွက် ပြောင်းရွှေ့ကြေးများများသုံးဖို့က ခက်ခဲကောင်းခက်ခဲနိုင်ပါတယ်။ ဒီလိုဆိုရင် ပြောင်းရွှေ့ကြေးသိပ်မမြင့်လှတဲ့ အဖိုးနည်းဝန်ပါကစားသမားတွေထဲကလည်း စဥ်းစားရတော့မှာပါ...

အဲ့ဒီလိုကစားသမားတစ်ယောက်ကတော့ တိုမိုရီပါပဲ...

ချယ်လ်ဆီးအကယ်ဒမီထွက်တစ်ဦးဖြစ်တဲ့ တိုမိုရီဟာ ပရီးမီးယားလိဂ်အတွေ့အကြုံတချို့လည်း ရှိထားပြီးဖြစ်တယ်။ အေစီမီလန်မှာလည်း ၅နှစ်ခွဲလောက် ဖြတ်သန်းခဲ့ပြီး ပြိုင်ပွဲစုံပွဲ၂၀၀ကျော် ကစားပေးထားနိုင်ခဲ့ပါတယ်...

အသက်၂၈နှစ်အရွယ် အတွေ့အကြုံရင့်နောက်ခံလူတစ်ယောက်ကို ပေါင်သန်း၂၀ပတ်ဝန်းကျင်လောက်နဲ့ ရနိုင်မယ်ဆိုတာကလည်း အားသာချက်တစ်ရပ်ပါပဲ...

သေချာတာတစ်ခုကတော့ လီဗာပူးဟာ ဒီအပြောင်းအရွှေ့မှာ ဗဟိုခံစစ်ကိုလည်း မဖြစ်မနေ အင်အားဖြည့်ရတော့မယ်ဆိုတာပါပဲ။ ဇာဘာညီတို့လို ထိပ်တန်းCBမျိုးကို ခေါ်ယူအားဖြည့်မလား၊ တိုမိုရီတို့လို အဖိုးနည်းဝန်ပါကစားသမားတွေနဲ့ ရေတိုသဘောဖြေရှင်းသွားမလားဆိုတာကိုတော့ ကျနော်တို့ ဆက်လက်စောင့်ကြည့်ရပါလိမ့်မယ်...

ဒန်နီဝဲလ်ဘတ်ကို ချယ်လ်ဆီးခေါ်ယူခဲ့ပြီဖြစ်ပါတယ်...

ဒီအပြောင်းအရွှေ့ကာလမှာတော့ ချယ်လ်ဆီးဟာ ပရီးမီးယားလိဂ်ဝါရင့်ကစားသမားတချို့ကို အတော်လေးမျက်စိကျနေခဲ့တာလည်း တွေ့ရတယ်။ ရှာကာကိုခေါ်နိုင်ဖို့ အတော်လေးနီးစပ်ခဲ့သလို ဟန်ဒါဆန်ကိုလည်း ခေါ်နိုင်ဖို့ သေချာသလောက်ရှိနေပြီလို့ သိရပါတယ်...

အခုလည်း အသက်၃၅နှစ်အရွယ် ပရီးမီးယားလိဂ်ဝါရင့်တိုက်စစ်မှူးတစ်ဦးဖြစ်တဲ့ ဒန်နီဝဲလ်ဘတ်ကို ခေါ်ယူနိုင်ခဲ့ပါတယ်...

ယူနိုက်တက်ငယ်မွေးခြံပေါက်တစ်ဦးဖြစ်တဲ့ ဒန်နီဝဲလ်ဘတ်ဟာ ၂၀၀၈ကနေ ၂၀၁၄ထိ အသင်းကြီးမှာ ကစားခဲ့သလို အာဆင်နယ်မှာလည်း ၅နှစ်လောက် ဖြတ်သန်းခဲ့ဖူးတယ်။ ၂၀၂၀မှာတော့ ဘရိုက်တန်ကို ရောက်လာခဲ့တာဖြစ်ပါတယ်...

ယူနိုက်တက်၊ ဆန်းဒါးလန်း၊ အာဆင်နယ်၊ ဝက်ဖို့ဒ်၊ ဘရိုက်တန်အသင်းတွေနဲ့အတူ ပရီးမီးယားလိဂ်ပွဲ၄၀၀ကျော်ကစားခဲ့တဲ့၊ ပရီးမီးယားလိဂ်သွင်းဂိုး၉၀ထိ ရထားတဲ့ ဝါရင့်တိုက်စစ်မှူးတစ်ယောက်ပါပဲ...

ဘရိုက်တန်ကစားသမားဘဝ အစောပိုင်းနှစ်တွေမှာ သာမန်ခြေစွမ်းလောက်ပဲ ရှိခဲ့တဲ့ ဒန်နီဝဲလ်ဘတ်ဟာ နည်းပြဟာဇီလာလက်ထက်မှာတော့ တစ်ကျော့ပြန်တောက်ပလာခဲ့တာ တွေ့ရတယ်။ နောက်ဆုံး၂နှစ်အတွင်း ဘရိုက်တန်အတွက် ပြိုင်ပွဲစုံ၇၆ပွဲကစားပေးခဲ့ပြီး ၂၅ဂိုးသွင်းနိုင်ခဲ့တယ်။ ထိပ်တန်းဂိုးသွင်းရှင်တစ်ယောက်လိုတော့ မဟုတ်ပေမယ့် လက်သင့်ခံလို့ရလောက်တဲ့ သွင်းဂိုးပမာဏမျိုးပါပဲ...

သွင်းဂိုးတွေထက်ပိုအရေးကြီးတာက ဝဲလ်ဘတ်ရဲ့ အသင်းအပေါ် အကျိုးပြုနိုင်စွမ်းဖြစ်ပါတယ်။ ပြိုင်ဖက်ခံစစ်‌ကြောင်းနောက်က spaceတွေကို ချိန်သားကိုက်ပြေးတက်ဖို့ ကြိုးစားလေ့ရှိတဲ့ သူ့ရဲ့ well-timed runsတွေက ဟာဇီလာလက်ထက် ဘရိုက်တန်တိုက်စစ်ကို ပိုပြီးတော့ အသက်ဝင်သွားစေခဲ့တယ်...

ဒါ့အပြင် ၁၈ကိုက်စည်းအတွင်း နေရာယူပုံ၊ ရွေ့လျားပုံတွေကလည်း အတိုင်းအတာတစ်ခုထိ ပါးနပ်မှုရှိနေတာ တွေ့ရတယ်။ ဒီလိုအရည်အသွေးတွေကြောင့်လည်း ပြီးခဲ့တဲ့၂နှစ်လောက်အတွင်းမှာ ဂိုးသွင်းနှုန်းသိသိသာသာ တက်လာခဲ့တာဖြစ်ပါတယ်...

ဘယ်ခြေညာခြေမရွေး ဂိုးသွင်းနိုင်စွမ်းရှိနေသလို ခေါင်းတိုက်ဂိုးတွေပါ မျှော်လင့်လို့ရနေတာကလည်း သူ့အတွက် နောက်ထပ်အားသာချက်တစ်ရပ်ပါပဲ...

ဒါတင်မကသေးပါဘူး။ ပြီးခဲ့တဲ့၂နှစ်အတွင်းမှာ ဝဲလ်ဘတ်ဟာ big chance-created ၃၇ကြိမ်ထိလုပ်နိုင်ခဲ့တယ်။ ကိုယ်တိုင်ဂိုးသွင်းနိုင်ရုံတင်မက အသင်းဖော်တွေကိုလည်း ဂိုးရအောင် အများကြီးကူညီပေးနိုင်စွမ်းရှိနေတဲ့ သဘောပါပဲ...

ချယ်လ်ဆီးဟာ ဝဲလ်ဘတ်ကို ဒေါင်ဒေါင်မြည်ပထမဦးစား‌ပေးတိုက်စစ်မှူးအဖြစ် ရည်ရွယ်ခေါ်ယူခဲ့တာတော့ မဖြစ်နိုင်ပါဘူး။ squad playerတစ်ယောက်အနေနဲ့ ရံထားတဲ့သ‌ဘောသာဖြစ်ပါတယ်...

စိတ်လှုပ်ရှားစရာကောင်းတဲ့ ခေါ်ယူအားဖြည့်မှုမျိုးမဟုတ်ပေမယ့် ပရီးမီးယားလိဂ်အတွေ့အကြုံများစွာရှိထားတဲ့ ဝါရင့်တိုက်စစ်မှူးတစ်ယောက်ကို ပြောင်းရွှေ့ကြေးသက်သက်သာသာနဲ့ ခေါ်ယူနိုင်ခဲ့တာကတော့ ကျေနပ်စရာပါပဲ...

လူငယ်ကစားသမားလေးတွေ များပြားလွန်းနေတဲ့ ချယ်လ်ဆီးအတွက် ဝဲလ်ဘတ်လို၊ ဟန်ဒါဆန်လို ဝါရင့်တွေလည်း လိုအပ်ပါတယ်။ သူတို့ရဲ့ နှစ်ပေါင်းများစွာသော အတွေ့အကြုံတွေဟာ ချယ်လ်ဆီးလူငယ်လေးတွေအတွက် အများကြီးအကျိုးရှိစေမယ်လို့လည်း ယုံကြည်ရပါတယ်...

လွန်ခဲ့တဲ့ ၄နှစ်လောက်က ကယ်လ်ဗင်ရမ်ဆေးကို လီဗာပူးခေါ်ဖြစ်ခဲ့တဲ့ အဓိကအကြောင်းရင်းကတော့ သူဟာ အာနိုးလ်နဲ့ ကစားပုံကစားပေါက်ချင်း တစ်စုံတစ်ရာ ဆင်တူနေလို့ပါပဲ...

ဒီလိုပြောလို့ ကယ်လ်ဗင်ရမ်ဆေးဟာ အာနိုးလ်နောက်တစ်ယောက်ဖြစ်လာမယ်၊ အာနိုးလ်လောက် သေချာပေါက်ကောင်းလာမယ်လို့ ဆိုလိုတာတော့ မဟုတ်ပါဘူး။ ဒါပေမယ့် ညာနောက်ခံလူတစ်ယောက်အနေနဲ့ ကယ်လ်ဗင်ရမ်ဆေးရဲ့ ကစားပေါက်က အာနိုးလ်နဲ့ အတော်ဆင်တူနေတယ်...

အာနိုးလ်လိုပဲ ဖြတ်တင်‌ဘောတွေ၊ ဘောလုံးဖြန့်ဝေမှုတွေကောင်းတယ်။ playmakerတစ်ယောက် ဖြစ်နိုင်လောက်တဲ့ vision & passing rangeမျိုး သူ့မှာရှိနေပါတယ်...

ဒါပေမယ့် ပြဿနာက သူ့ရဲ့ကြံ့ခိုင်မှုပိုင်းပါပဲ။ လီဗာပူးကစားသမားဘဝ ၄နှစ်တာကာလအတွင်း သူဟာ ဒဏ်ရာပြဿနာတွေ အတော်များများ ကြုံတွေ့ခဲ့ရတယ်။ အဲ့ဒါကပဲ သူ့ရဲ့ကစားသမားဘဝ တိုးတက်မှုတွေကို အများကြီးနှောင့်နှေးသွား၊ ရပ်တန့်သွား၊ နောက်ပြန်ဆုတ်သွားစေခဲ့တာဖြစ်ပါတယ်...

ညာသန်ဖြစ်ပေမယ့် ဘယ်ခြေညာခြေနှစ်ဖက်စလုံးကို ဆတူအသုံးပြုနိုင်တာ၊ passing rangeကျယ်လွန်းတာတွေက သူ့ရဲ့အားသာချက်တွေပါပဲ။ တကယ်လို့ သူသာ ကြံ့ခိုင်မှုပြည့်ဝနေမယ်ဆိုရင် လီဗာပူးရဲ့ right-backနေရာအတွက် သူ့ကိုလည်း ထည့်စဥ်းစားရမှာဖြစ်ပါတယ်...

စိတ်ချရတဲ့ ကြံ့ခိုင်မှုမျိုး သူ့မှာရှိနေပြီလားဆိုတာကိုတော့ စောင့်ကြည့်ရပါဦးမယ်...

Double Pivotအတွက် မေဆန်မောင့်က အဖြေတစ်ခုဖြစ်လာမလား...

အန်ဒရေဆန်းတို့စ်နဲ့ တိုင်လေမန်းစ်... ကွင်းလယ်ကစားသမားသစ်၂ယောက်တိတိ ခေါ်ယူထားသည့်တိုင်အောင် လက်ရှိယူနိုက်တက်ရဲ့ double pivotနေရာက အင်ပြည့်အားပြည့်မဖြစ်သေးပါဘူး။ စီနီယာကစားသမားတွေထဲကဆိုရင် ဒီpositionမှာ သေချာကစားနိုင်တဲ့ ကွင်းလယ်လူက ၄ယောက်လောက်ပဲ ရှိပါတယ်...

မိုင်နူး၊ ယူဂါတီ၊ အန်ဒရေဆန်းတို့စ်နဲ့ တိုင်လေမန်းစ်ပါပဲ...

ဒီမှာ ယူဂါတီက ဒဏ်ရာပြဿနာတွေ ရှိနေသလို ခြေစွမ်းပိုင်းအရလည်း အတော်ကိုအဆင်မပြေသေးတာမျိုး တွေ့ရတယ်။ ဒါကြောင့် သူ့ကိုထည့်မတွက်ရင် ယူနိုက်တက်ဟာ ကွင်းလယ်pivotနှစ်နေရာအတွက် ဒေါင်ဒေါင်မြည်ကစားသမား ၃ယောက်ပဲရှိနေတဲ့ သဘောဖြစ်ပါတယ်...

ချန်ပီယံလိဂ်ဝင်ခွင့် ပြန်ရထားတဲ့၊ ပွဲတွေအများကြီးကစားရမယ့် ဘောလုံးရာသီတစ်ခုမှာ ဒီလောက်က မလုံလောက်သေးပါဘူး။ ယူနိုက်တက်အနေနဲ့ double pivotနေရာမှာ အဆင်ပြေပြေကစားနိုင်မယ့် ကွင်းလယ်လူနောက်ထပ်တစ်ယောက် ထပ်ခေါ်ရဦးမယ့် အနေအထားပါပဲ...

အခုရာသီကြိုခြေစမ်းပွဲတွေမှာတော့ မေဆန်မောင့်ဟာ အန်ဒရေဆန်းတို့စ်နဲ့အတူ double pivotနေရာမှာ ပွဲထွက်ကစားလာတာ တွေ့ရတယ်။ ပြီးခဲ့တဲ့ရာသီတုန်းကလည်း ဒီpositionမှာ သူပွဲအနည်းငယ် ကစားခဲ့ဖူးပါတယ်...

ဒါက မေဆန်မောင့်ကစားနေကျ positionမျိုးတော့ မဟုတ်ပါဘူး။ ဒါပေမယ့် လုပ်အားနှုန်းကောင်းကောင်းနဲ့ ကြိုးကြိုးစားစား ကစားတတ်သလို အတိုင်းအတာတစ်ခုထိ ဘောလုံးဖြန့်ဝေပေးနိုင်စွမ်းလည်း ရှိနေတယ်...

Second pivotအနေနဲ့ အံဝင်ခွင်ကျဖြစ်နိုင်လောက်တဲ့ အရည်အသွေးတွေ သူ့မှာရှိနေပြီးသားလို့ ပြောရမှာြဖစ်ပါတယ်...

ကစားနေကျ positionမဟုတ်တာကြောင့် သူ့အတွက် အခက်အခဲတချို့တော့ ရှိနိုင်တယ်၊ အံဝင်ခွင်ကျဖြစ်ဖို့ နည်းနည်းလေးအချိန်ယူရနိုင်ပါတယ်...

ဒါပေမယ့် မေဆန်မောင့်သာ double pivotနေရာမှာ အံဝင်သွားရင် သူ့အနေနဲ့လည်း အသင်းမှာ ပွဲထွက်ခွင့်တစ်နေရာရဖို့ အခွင့်အလမ်းပိုများသွားမယ်၊ ယူနိုက်တက်အနေနဲ့လည်း double pivotနေရာအတွက် ကစားသမားသစ် ထပ်ခေါ်စရာမလိုတော့ဘဲ တခြားpositionတွေကို ပိုမိုအာရုံစိုက်အားဖြည့်နိုင်မယ့် အခွင့်အရေးရသွားပါမယ်။ နှစ်ဦးနှစ်ဖက် အကျိုးရှိမယ့် ကိစ္စပါပဲ...

ဒါကြောင့်လည်း နည်းပြမိုက်ကယ်ကာရစ်က အခုရာသီကြိုခြေစမ်းပွဲတွေမှာ မေဆန်မောင့်ကို double pivotနေရာမှာ တောက်လျှောက်အသုံးပြုလာတာ ဖြစ်ပါလိမ့်မယ်...

ယူနိုက်တက်ရဲ့ ကွင်းလယ်pivotနေရာအတွက် မေဆန်မောင့်ကလည်း အဖြေတစ်ခုဖြစ်လာမလားဆိုတာကတော့...

ဗီနီးရှပ်စ်၊ ဘရူနိုဂီမားရက်စ်နဲ့ အာဆင်နယ်ခေတ်သစ်တစ်ခုလား...

အများကြီးပြောဖို့တော့ စောနေဦးမယ်။ ဒါပေမယ့် အာဆင်နယ်ရဲ့ လက်ရှိအပြောင်းအရွှေ့သတင်းတွေကတော့ အတော်လေးကို အားရစရာကောင်းနေတာလည်း အမှန်ပါပဲ...

ဘရူနိုဂီမားရက်စ် တဲ့၊ ယူလီယန်အယ်လ်ဗာရက်ဇ် တဲ့၊ အခုနောက်ဆုံး ဗီနီးရှပ်စ် တဲ့...

လတ်တလောမှာတော့ ဘရူနိုဂီမားရက်စ်၊ ဗီနီးရှပ်စ်တို့နဲ့ပတ်သက်တဲ့ အပြောင်းအရွှေ့သတင်းတွေက ပိုပြီးတော့ ကျယ်လောင်လာပါတယ်...

“ဘရူနိုဂီမားရက်စ်ရဲ့ အနာဂတ်နဲ့ပတ်သက်ပြီး ကျနော်ကိုယ်တိုင် သေချာမသိရသေးပါဘူး။ ဒါက ကျနော်ထိန်းချုပ်လို့ရတဲ့၊ အဆုံးအဖြတ်ပေးနိုင်တဲ့ ကိစ္စလည်း မဟုတ်ပါဘူး”လို့ ဒီရက်ပိုင်းအင်တာဗျူးတစ်ခုမှာ နည်းပြအက်ဒီဟောင်းက အတိအလင်းပြောခဲ့တယ်။ ဘရူနိုဂီမားရက်စ်အပြောင်းအရွှေ့အတွက် နှစ်ဖက်တာဝန်ရှိသူတွေ အကျေအလည် ညှိနှိုင်းဆွေးနွေးနေကြပြီဖြစ်ကြောင်း သွယ်ဝိုက်ပြီးဝန်ခံလိုက်သလိုလည်း ရှိပါတယ်...

တစ်ဖက်မှာတော့ ဗီနီးရှပ်စ်နဲ့ပတ်သက်လို့ အာဆင်နယ်ဖက်က တိုက်ရိုက်ကမ်းလှမ်းမှုမျိုး အခုဒီစာရေးနေချိန်ထိ မရှိသေးပါဘူး။ ဒါပေမယ့် ဗီနီးရှပ်စ်သာ ရီးယဲလ်နဲ့ စာချုပ်သက်တမ်းမတိုးခဲ့ဘူးဆိုရင် သူ့ကိုခေါ်ယူနိုင်ဖို့ အစွမ်းကုန်ကြိုးစားသွားမယ်လို့ နည်းပြအာတီတာ၊ အားကစားဒါရိုက်တာဘာတာတို့နဲ့တကွ အာဆင်နယ်တာဝန်ရှိသူတွေအားလုံးက တညီတညွတ်ထဲ ဆုံးဖြတ်လိုက်ပြီဖြစ်ကြောင်း သိရပါတယ်...

ဗီနီးရှပ်စ်က ရီးယဲလ်နဲ့ စာချုပ်တစ်နှစ်ပဲ ကျန်တာကြောင့် စာချုပ်သက်တမ်းတိုးဖို့ သဘောတူညီမှုမရခဲ့ဘူးဆိုရင် ရီးယဲလ်အနေနဲ့ ဒီအပြောင်းအရွှေ့မှာပဲ သူ့ကိုလက်လွှတ်ရဖို့လည်း ရှိနေပါတယ်။ လာမယ့်နှစ်မှ၊ စာချုပ်သက်တမ်းပြည့်မှဆိုရင် အလွတ်ပြောင်းရွှေ့ကြေးနဲ့ ဆုံးရှူံးရမှာမို့လို့ပါပဲ...

ပွင့်ပွင့်လင်းလင်းပြောရရင် အာဆင်နယ်ရဲ့ လက်ရှိလူစာရင်းကိုက အတော်လေးအားရစရာကောင်းနေခဲ့ပြီးသားဖြစ်ပါတယ်။ ပြီးခဲ့တဲ့ရာသီမှာ သူတို့ဟာ ဖလား၄လုံးလမ်းကြောင်းပေါ်မှာ အချိန်အတော်ကြာရှိနေခဲ့တယ်။ ပရီးမီးယားလိဂ်ချန်ပီယံဖြစ်ခဲ့သလို ချန်ပီယံလိဂ်မှာလည်း ဖိုင်နယ်ထိရောက်ခဲ့တာဖြစ်ပါတယ်...

ဒီလိုအတော်အတန်အားရစရာကောင်းနေပြီးသား လူစာရင်းတစ်ခုထဲကို ဘရူနိုဂီမားရက်စ်နဲ့ ဗီနီးရှပ်စ်လို တကယ့်ထိပ်ဆုံးအဆင့်ကစားသမားတွေ ထပ်ပေါင်းလိုက်မယ်ဆိုရင်တော့ လာမယ့်နှစ်အာဆင်နယ်ဟာ ခုထက်အများကြီးပိုပြီး ကြောက်စရာကောင်းသွားမှာပါ...

ဇူဘီမန်ဒီနဲ့ ဒီကလန်ရိုက်စ်ရှိနေပြီးသား ကွင်းလယ်ကို ဘရူနိုဂီမားရက်စ်လို ကစားသမားမျိုး ထပ်ရောက်လာခဲ့ရင် အာဆင်နယ်ကွင်းလယ်က အများကြီးပိုပြည့်စုံသွားမယ်။ ကွင်းလယ်မှာ သူတို့၃ယောက်တွဲ တစ်ပြိုင်နက်ပွဲထွက်လာတာပဲဖြစ်ဖြစ်၊ (ဇူဘီမန်ဒီနေရာမှာ ဘရူနိုဂီမားရက်စ်ဖြစ်လာပြီး) ဂီမားရက်စ်-ဒီကလန်ရိုက်စ် pivotအတွဲနဲ့အတူ အိုဒီဂတ်/အက်ဇေ No.10 roleတစ်ယောက် ပွဲထွက်လာတာပဲဖြစ်ဖြစ် အာဆင်နယ်ဟာ အခုထက်ပိုပြီး ခံစစ်-တိုက်စစ်ဟန်ချက်ညီသွားမှာ အသေအချာပါပဲ...

ဗီနီးရှပ်စ်ကတော့ အာဆင်နယ်တိုက်စစ်ကိုတင်မက တစ်သင်းလုံးကို နောက်ထပ်lvတစ်ဆင့်မြှင့်တင်ပေးနိုင်စွမ်းရှိတဲ့ ကစားသမားမျိုးပါပဲ။ အထူးသဖြင့် ဗီနီးရှပ်စ်ရောက်လာရင် အာဆင်နယ်ရဲ့ ခံစစ်-တိုက်စစ်အကူးအပြောင်းတွေက ဒီထက်အများကြီးပိုမြန်သွားဖို့လည်း ရှိနေတယ်။ possession gameကို ပိုင်ပိုင်နိုင်နိုင်ကစားနိုင်ပြီးသား၊ ခံစစ်ကြောင်းခိုင်မာမှုလည်း ရှိနေပြီးသား အာဆင်နယ်ဟာ transitionတွေပါ မြန်ဆန်လာမယ်ဆိုရင် ပိုမိုပြီးပြည့်စုံတဲ့ အသင်းတစ်သင်းဖြစ်လာမယ်။ လက်ရှိသူတို့ရဲ့ အဓိကရည်မှန်းချက်လို့ပြောရမယ့် ချန်ပီယံလိဂ်ဖလားနဲ့လည်း ပိုပြီးတော့ နီးစပ်လာမှာဖြစ်ပါတယ်...

တကယ်ရောက်လာဖို့ပဲ လိုပါတယ်...

ယူနိုက်တက်အကယ်ဒမီရဲ့ စိတ်လှုပ်ရှားစရာ လူငယ်လေးများ...

မှန်ပါတယ်။ ဒါက ခြေစမ်းပွဲတစ်ပွဲသာလျှင်ဖြစ်ပါတယ်။ အလွန်အမင်း ချီးကျူးဖို့၊ ပုံကြီးချဲ့ဖို့တော့ မဟုတ်သေးပါဘူး...

သို့သော် ရိုဆင်ဘော့ဂ်နဲ့ပွဲမှာ ယူနိုက်တက်လူငယ်လေးတွေ အသီးသီးပြသခဲ့ကြတဲ့ တစ်ဦးချင်းနဲ့ အသင်းလိုက်ခြေစွမ်းတွေဟာ အတော်လေးကို သဘောကျစရာကောင်းနေတာလည်း အမှန်ပါပဲ...

အသက်၁၉နှစ်အရွယ် လူငယ်လေးရှေးလေစီ ပွဲထွက်ကစားခွင့်ရခဲ့တယ်။ အဖွင့်ဂိုးကို သွင်းပေးနိုင်ခဲ့တယ်။ ဇာ့ခ်ဇီးရဲ့ ပေးပို့မှုကနေ ချိန်သားကိုက်ပြေးတက်ဆွဲပြေးလာပြီး အလယ်ထဲတစ်ချက်ချိုးဝင်ပုံ၊ အဝေးထောင့်ထဲကို လှလှပပ ကန်သွင်းသွားပုံတွေက တကယ်ကို သပ်သပ်ရပ်ရပ်ပါပဲ...

ဒုတိယပိုင်းအစမှာတော့ မက်ဂွိုင်းယားနဲ့ လုခ်ရှောနေရာမှာ အသက်၁၉နှစ်အရွယ် လူငယ်Fullbackတစ်စုံဖြစ်တဲ့ ဂျေဒန်ကမာဆန်နဲ့ ဟယ်ရီအေမက်စ် လူစားဝင်ကစားလာတယ်။ အဲ့ဒီနောက် ဇာ့ခ်ဇီးက ဒုတိယဂိုးကို သွင်းပေးခဲ့တယ်...

ပွဲချိန်မိနစ်၆၀ကျော်မှာတော့ နောက်ထပ်ယူနိုက်တက်လူငယ်လေး ၈ယောက်တိတိ လူစားဝင်ကစားလာခဲ့ပါတယ်...

အသက်၁၈နှစ်အရွယ် လူငယ်နောက်ခံလူဒန်အာမာနဲ့ တိုက်စစ်မှူးချီဒိုအိုဘီ၊ အသက်၁၉နှစ်အရွယ် ဖလက်ချာအမြွာညီနောင်နဲ့ ဂျက်ကော့ဘ်ဒီဗာနေး၊ အသက်၂၀အရွယ် တိုက်စစ်ကစားသမားအီသန်ဝီလီယံစ်၊ ၂၁နှစ်အရွယ် ဒန်ဂိုးနဲ့ ၂၂နှစ်အရွယ်တိုဘီကော်လီယာ...

ဒီဗာနေးက ထောင့်ကန်ဘောကနေတဆင့် တတိယဂိုးကို သွင်းပေးခဲ့တယ်။ အဲ့ဒီနောက် ဟယ်ရီအေမက်စ်နဲ့ အီသန်ဝီလီယံစ်တို့က တစ်ဂိုးစီ ထပ်သွင်းခဲ့ကြတယ်။ အဲ့ဒီနှစ်ဂိုးစလုံးကို ဂျေဒန်ကမာဆန်က ဖန်တီးပေးခဲ့တာဖြစ်ပါတယ်...

ဒီပွဲအတွက် ယူနိုက်တက်ရဲ့ ဂိုးသွင်းရှင်၅ယောက်ထဲမှာ ၄ယောက်က လူငယ်လေးတွေဖြစ်တယ်။ အကယ်ဒမီထွက်စစ်စစ်တွေ ဖြစ်နေပါတယ်...

ဒီလူငယ်လေးတွေထဲက တစ်ယောက်ယောက် ဒါမှမဟုတ် တချို့တဝက်ဟာ လာမယ့်ရာသီ အသင်းကြီးမှာ squad playerတွေ ဖြစ်လာမလား၊ နောင်တစ်ချိန်မှာ အသင်းအတွက် အားကိုးရတဲ့ ကစားသမားကောင်းတွေအဖြစ် မြင့်တက်လာနိုင်မလား ကျနော်တို့ စိတ်လှုပ်ရှားစွာပဲ စောင့်ကြည့်သွားရပါမယ်...

တချို့လူငယ်လေးတွေကတော့ ယူနိုက်တက်မှာမဟုတ်ဘဲ တခြားရေကြည်ရာမြက်နုရာကို အငှါး ဒါမှမဟုတ် အပြီးပြောင်းရွှေ့ဖြစ်ဖို့လည်း ရှိကောင်းရှိပါလိမ့်မယ်...

လူငယ်လေးတွေတင်မကပါဘူး။ ရိုဆင်ဘော့ဂ်နဲ့ပွဲမှာ ယူနိုက်တက်ရဲ့ အသင်းလိုက်နဲ့ တစ်ဦးချင်းခြေစွမ်းတွေဟာ အားရစရာအချက်တွေ အတော်များများရှိနေတာလည်း တွေ့ရပါတယ်။ လိုအပ်ချက်လေးတွေလည်း ရှိတော့ရှိနေသေးပေမယ့်ပေါ့လေ...

ဗီတက်ခ်
ယော်ရို၊ မက်ဂွိုင်းယား၊ ဟေးဗန်းစ်၊ လုခ်ရှော
အန်ဒရေဆန်းတို့စ်၊ မေဆန်မောင့်
အမ်ဘူမို၊ ရှေးလေစီ၊ ဒိုဂူ
ဇာ့ခ်ဇီး။

မိုက်ကယ်ကာရစ်လက်ထက် ကစားနေကျပုံစံအတိုင်းပဲ on-paper 4-2-3-1ကစားကွက်နဲ့ ပွဲထွက်လာခဲ့တယ်။ ကိုယ်ကဘောလုံးကိုင်ပြီး တိုက်စစ်ဆင်ကစားချိန်တွေမှာရော၊ without possessionတွေမှာရော အသင်းလိုက်ကစားပုံက တိုးတက်မှုလေးတွေ ရှိနေတာ တွေ့ရပါတယ်...

အထူးသဖြင့် without possessionမှာ 4-2-4 shapeကို ပြောင်းပြီး ပြိုင်ဖက်ကို အလယ်ကြောကနေ တိုက်စစ်လမ်းကြောင်းဖော်ဆောင်လို့မရအောင် စနစ်တကျ ပိတ်ဆို့သွားပုံ၊ တောင်ပံဇုန်တွေဆီ ပါးပါးနပ်နပ်မောင်းကစားသွားပုံလေးတွေက သဘောကျစရာပါပဲ...

ယူနိုက်တက်ဟာ အရမ်းကောင်းနေပြီ၊ အကောင်းဆုံးပုံစံရနေပြီ၊ လာမယ့်နှစ်ကတော့ ယူနိုက်တက်နှစ်ပဲလို့ ကျနော်ပြောချင်တာမဟုတ်ပါဘူး။ ပွင့်ပွင့်လင်းလင်းပြောရရင် အသင်းဟာ အဲ့ဒီလောက်အနေအထားမျိုးတော့ မရောက်သေးပါဘူး...

ဒါပေမယ့် မိုက်ကယ်ကာရစ် တည်ဆောက်ချင်နေတဲ့ အသင်းလိုက်ကစားပုံတစ်ခုကို အရိပ်အမြွက်လေးဖြစ်ဖြစ် စမြင်လာရတယ်။ မနှစ်ကတော့ ချန်ပီယံလိဂ်ဝင်ခွင့်ရဖို့ အရေးတကြီးလိုအပ်နေတဲ့ အနေအထားမှာတော့ ရေရှည်အတွက် တည်ဆောက်မှုတွေထက် ရေတိုရလဒ်ကောင်းဖို့ကို အဓိကလုပ်ဆောင်ခဲ့ရတာဖြစ်ပါတယ်...

အခုတော့ ကာရစ်ဟာ ခံစစ်၊ တိုက်စစ်နှစ်ရပ်စလုံးမှာ စနစ်တကျရှိတဲ့၊ အသင်းကြီးဆန်တဲ့ ကစားကွက်တစ်ခုကို သေသေချာချာတည်ဆောက်နေပြီလို့ ယုံကြည်ရပါတယ်။ သူ့ကို လုံလောက်တဲ့အချိန်ပေးဖို့၊ စိတ်ရှည်ဖို့တော့ လိုအပ်နိုင်ပါတယ်...

ရိုဆင်ဘော့ဂ်နှင့်ပွဲမှ ယူနိုက်တက်ကစားသမားများ၏ စွမ်းဆောင်ရည်သုံးသပ်ချက်...

ရာသီကြိုခြေစမ်းပွဲကာလအဖွင့်ပွဲစဥ်မှာ ဝရက်ဇ်ဟမ်းကို ရှူံးနိမ့်ခဲ့ရတဲ့ ယူနိုက်တက်ဟာ အခု ဒုတိယပွဲမှာတော့ ရိုဆင်ဘော့ဂ်ကို သက်တောင့်သက်သာနဲ့ ဂိုးပြတ်ခြေပြတ် အနိုင်ကစားသွားခဲ့ပါတယ်...

နည်းပြမိုက်ကယ်ကာရစ်ဟာ ပထမပိုင်းအပြီးမှာတင် မက်ဂွိုင်းယားနဲ့ လုခ်ရှောကို အနားပေးခဲ့သလို ပွဲချိန်မိနစ်၆၀ကျော်မှာ နောက်ထပ်ကစားသမား၈ယောက်လောက် အပြောင်းအလဲလုပ်ခဲ့တယ်။ အကယ်ဒမီထွက်လူငယ်လေးတွေကို အခွင့်အရေးပေးခဲ့တယ်။ မိနစ်၇၀ကျော်မှာတော့ ဂိုးသမားကိုပါ လူစားလဲခဲ့တာဖြစ်ပါတယ်...

ဒီပွဲအတွက် ယူနိုက်တက်ကစားသမားတွေရဲ့ တစ်ဦးချင်းခြေစွမ်းပိုင်းကို အကြမ်းဖျင်းသုံးသပ်ကြည့်မယ်ဆိုရင်တော့...

ဗီတက်ခ်- ၇

ဝရက်ဇ်ဟမ်းနဲ့ပွဲမှာ ဒုတိယပိုင်းလူစားဝင်ကစားခဲ့တဲ့ လူငယ်ဂိုးသမားဗီတက်ခ်ဟာ ဒီပွဲမှာတော့ ပွဲထွက်ခွင့်ရလာခဲ့တယ်။ ဒါပေမယ့် ဒီပွဲမှာတော့ သူ့အတွက် လုပ်စရာ သိပ်များများစားစားမရှိခဲ့ပါဘူး...

ယော်ရို- ၇

ရာသီကြိုခြေစမ်းပွဲတွေမှာ ညာနောက်ခံလူအဖြစ် ပွဲထွက်ကစားနေရတဲ့ ယော်ရိုဟာ positionသစ်မှာ တဖြည်းဖြည်းပိုပြီးအထိုင်ကျလာတာ တွေ့ရပါတယ်။ ဒါက ယော်ရိုအတွက်ရော၊ ယူနိုက်တက်အတွက်ရော အများကြီးအကျိုးရှိမယ့်ကိစ္စပါပဲ။ သူအဓိကပွဲထွက်ကစားရမယ့် positionကတော့ CBပဲဖြစ်နေဦးမယ်၊ ဒါပေမယ့် အသင်းအတွက် လိုအပ်လာရင် right-backအနေနဲ့လည်း သူဝင်ကစားလာဖို့ ရှိနေပါတယ်...

မက်ဂွိုင်းယား- ၈

အသင်းခေါင်းဆောင်အဖြစ် ပွဲထွက်လာခဲ့တယ်။ လူငယ်လေးတွေကို အကောင်းဆုံး ဦးဆောင်သွားနိုင်ခဲ့ပြီး ခံစစ်တာဝန်ကျေခဲ့တဲ့အပြင် build-upတွေကိုလည်း အကောင်းဆုံးစတင်ပေးနိုင်ခဲ့ပါတယ်...

ဟေးဗန်းစ်- ၆
မက်ဂွိုင်းယားနဲ့ အတွဲအဖက်မိမိ ကစားသွားခဲ့တယ်။ ရှေးလေစီရဲ့အဖွင့်ဂိုးအတွက် တိုက်စစ်လမ်းကြောင်းဟာ သူ့ဆီကနေ အစပြုလာခဲ့တာဖြစ်ပါတယ်...

လုခ်ရှော- ၆
ရိုဆင်ဘော့ဂ်ညာခြမ်းတိုက်စစ်ကို အကောင်းဆုံးထိန်းထားနိုင်ခဲ့တယ်။ ဒါပေမယ့် အသက်အရွယ်နဲ့ ကြံ့ခိုင်မှုအရ လုခ်ရှောဟာ ဟိုအရင်ကလို overlapတွေတော့ သိပ်မလိုက်နိုင်တော့တာလည်း တွေ့ရပါတယ်...

အန်ဒရေဆန်းတို့စ်- ၇
ခံစစ်ကို အကောင်းဆုံးကာကွယ်ပေးနိုင်ခဲ့တဲ့အပြင် ပထမပိုင်းမှာ ဒိုဂူအတွက် အခွင့်အရေးကောင်းတစ်ကြိမ်လည်း ဖန်တီးပေးသွားခဲ့ပါတယ်...

မေဆန်မောင့်- ၇
Deep-lying playmakerဆန်ဆန် တာဝန်ယူကစားသွားခဲ့တယ်။ သူ့ရဲ့ဘောလုံးဖြန့်ဝေမှုတွေကလည်း ယူနိုက်တက်အတွက် အရေးပါခဲ့သလို ခံစစ်အနေအထားတွေမှာလည်း လုပ်အားနှုန်းကောင်းကောင်းနဲ့ ကြိုးကြိုးစားစား ကစားသွားခဲ့တာ တွေ့ရပါတယ်...

ရှေးလေစီ- ၈
အဖွင့်ဂိုးကို လှလှပပသွင်းပေးခဲ့တယ်။ တိုက်စစ်မှာရော၊ ခံစစ်မှာရော မခိုမကပ် အားထည့်ကစားသွားပုံကလည်း သဘောကျစရာကောင်းပါတယ်။ ဒီပွဲရဲ့ Man of the Matchပါပဲ...

အမ်ဘူမို- ၅
သူခြေစွမ်းပြနိုင်ချိန်တွေလည်း ရှိခဲ့ပါတယ်။ ဒါပေမယ့် ဘောလုံးအထိန်းအသိမ်းတွေ သိပ်မသေသပ်တာမျိုး၊ လိုအပ်တာထက်ပိုပြီး ဘောလုံးအပျက်များနေသေးတာမျိုးလည်း တွေ့ရတယ်။ ပုံစံကောင်းမရသေးဘူးလို့ ပြောရမှာဖြစ်ပြီး ခြေစမ်းပွဲတွေ အရှိန်ရလာတာနဲ့အမျှ တဖြည်းဖြည်းပိုကောင်းလာဖို့‌ မျှော်လင့်ရပါတယ်...

ဒိုဂူ- ၅
ဒိုဂူလည်း အကောင်းဆုံးခြေစွမ်းမရသေးပါဘူး။ လာမယ့်ရာသီ ယူနိုက်တက်ဘယ်ခြမ်းတိုက်စစ်မှာ ပုံမှန်ပွဲထွက်ခွင့်ရဖို့ဆိုရင်တော့ သူဒီထက်အများကြီးပိုကောင်းလာဖို့လည်း လိုအပ်နိုင်ပါတယ်...

ဇာ့ခ်ဇီး- ၈
အထောင်တိုက်စစ်နေရာကနေ ကွင်းလယ်ကို မကြာခဏဆင်းကူပြီး အသင်းဖော်တွေနဲ့ ချိတ်ဆက်ကစားခဲ့တယ်။ သူ့ရဲ့link-up playတွေက ယူနိုက်တက်တိုက်စစ်ကို ပိုသွက်လာစေခဲ့တာ တွေ့ရပါတယ်။ ရှေးလေစီရဲ့ အဖွင့်ဂိုးကို ဖန်တီးပေးခဲ့သလို ဒုတိယဂိုးကိုလည်း ကိုယ်တိုင်သွင်းခဲ့ပါတယ်...

လူစားဝင်ကစားသမားများ...

ဟယ်ရီအေမက်စ်- ၇
ဘယ်နောက်ခံလူဖြစ်ပေမယ့် တိုက်စစ်ထိလိုက်ပါကစားပြီး ဂိုးပါသွင်းနိုင်ခဲ့ပါတယ်...

ဂျေဒန်ကမာဆန်- ၈
ညာနောက်ခံလူနေရာကနေ တိုက်စစ်ကို အကြိမ်ကြိမ်လိုက်ပါပံ့ပိုးပေးခဲ့တယ်။ သူ့ရဲ့ဖြတ်တင်ဘောပေးပို့မှုတွေက အတော်ကောင်းပါတယ်။ အေမက်စ်နဲ့ အီသန်ဝီလီယံစ်တို့ရဲ့ဂိုးတွေကို သူဖန်တီးပေးနိုင်ခဲ့တာဖြစ်ပါတယ်...

တိုင်လာဖလက်ချာ- ၆
ထူးထူးခြားခြား ခြေစွမ်းပြတာမျိုး မဟုတ်ပေမယ့် အဆင်ပြေပြေပါပဲ...

ဒန်အာမာ- ၆
ဗဟိုနောက်ခံလူနေရာမှာ တည်တည်ငြိမ်ငြိမ်ပဲ ကစားသွားပါတယ်...

ဂျက်ကော့ဘ်ဒီဗာနေး- ၇
ထောင့်ကန်ဘောကနေတဆင့် ဂိုးသွင်းနိုင်ခဲ့တယ်။ နေရာယူပုံ၊ ရွေ့လျားမှုတွေလည်း ပါးပါးနပ်နပ်ရှိခဲ့တာ တွေ့ရပါတယ်...

ဒန်ဂိုး- ၆
တချို့သောပေးပို့မှုလေးတွေ အတော်ကောင်းပါတယ်...

အီသန်ဝီလီယံစ်- ၇
ကမာဆန်ရဲ့ဖြတ်တင်ဘောကနေ အမှားအယွင်းမရှိ ဂိုးသွင်းနိုင်ခဲ့ပါတယ်...

ချီဒိုအိုဘီ- ၆
ပရိသတ်အများစုက စိတ်ဝင်တစား စောင့်ကြည့်နေကြတဲ့ လူငယ်လေးတစ်ယောက်ပါပဲ။ ဒီပွဲမှာတော့ သိပ်အများကြီးခြေစွမ်းမပြနိုင်ခဲ့ပါဘူး...

တိုဘီကော်လီယာ- ၆
သူကစားနေကျပုံစံအတိုင်းပဲ တည်တည်ငြိမ်ငြိမ်နဲ့ ကွင်းလယ်ကို ထိန်းကျောင်းသွားခဲ့ပါတယ်...

ဂျက်ဖလက်ချာ- ၆
လူငယ်လေးတစ်ယောက်အနေနဲ့ သဘောကျစရာခြေစွမ်းမျိုးပါပဲ...

ဒါမော့မီး- ၆
မိနစ်၇၀‌‌ကျော်မှာ ဂိုးသမားဗီတက်ခ်နေရာ လူစားဝင်ကစားခွင့်ရခဲ့တယ်။ ရိုဆင်ဘော့ဂ်တိုက်စစ်က ထင်သလောက်အလုပ်မဖြစ်ခဲ့တာကြောင့် သူ့အတွက် ဘာမှသိပ်လုပ်စရာမရှိခဲ့ပါဘူး...

Ref: MEN

လီဗာပူး vice-Captainအသစ် ဘယ်သူဖြစ်သင့်သလဲ...

ယာဂင်ကလော့ပ်ဟာ လီဗာပူးနည်းပြဘဝမှာ အသင်းအတွက် leadership groupတစ်ခုကို တည်ဆောက်ပေးနိုင်ခဲ့ပါတယ်...

အသင်းခေါင်းဆောင်ဟန်ဒါဆန်နဲ့အတူ vice-Captain lvကစားသမား၅ယောက်ထိ အသင်းမှာ ရှိနေခဲ့တယ်။ ဗန်ဒိုက်၊ အာနိုးလ်၊ ရော်ဘတ်ဆန်၊ ဆာလာနဲ့ အယ်လီဆန်ဖြစ်ပါတယ်...

ဗန်ဒိုက်ကတော့ တရားဝင် vice-Captainဖြစ်ပြီး ကျန်တဲ့၄ယောက်ကလည်း vice-Captain lvကစားသမားတွေပါပဲ...

ဟန်ဒါဆန်အသင်းကနေ ထွက်ခွာသွားချိန်မှာတော့ ဗန်ဒိုက်က အသင်းခေါင်းဆောင်ဖြစ်လာတယ်။ အာနိုးလ်က vice-Captainဖြစ်လာခဲ့ပါတယ်...

တစ်ခါ အာနိုးလ်ထွက်ခွာသွားချိန်မှာတော့ ရော်ဘတ်ဆန်က vice-Captainအဖြစ် တာဝန်ယူခဲ့ပြန်ပါတယ်...

အခုတော့ ရော်ဘတ်ဆန် စပါးကို ပြောင်းရွှေ့သွားခြင်းနဲ့အတူ လီဗာပူးရဲ့ vice-Captainရာထူးကလည်း နောက်တစ်ကြိမ်လစ်လပ်သွားခဲ့ပြန်တယ်...

တစ်ချိန်က ကလော့ပ်တည်‌ဆောက်ခဲ့တဲ့ leadership groupမှာလည်း ဟန်ဒို၊ အာနိုးလ်၊ ရိုဘိုနဲ့ ဆာလာတို့ အသင်းမှာမရှိတော့ဘူး။ ဗန်ဒိုက်နဲ့ အယ်လီဆန်နှစ်ယောက်ပဲ ကျန်ခဲ့ပါတယ်။ အချိန်နဲ့အမျှ ပြောင်းလဲစီးဆင်းနေတဲ့ ဒီနေ့ခေတ်ဘောလုံးကမ္ဘာမှာ ဒါက ဝမ်းနည်းစရာတော့လည်း မဟုတ်ပါဘူး...

ဘာပဲဖြစ်ဖြစ်ပေါ့လေ။ လစ်လပ်နေတဲ့ vice-Captainရာထူးနဲ့ ဘယ်သူက အသင့်တော်ဆုံးဖြစ်မလဲ။ ဒါကို ကျနော်တို့နည်းနည်း အသေးစိတ်ဆွေးနွေးရအောင်ပါ...

၁၊ ဆိုဘော့ဇ်လိုင်...

ဒုတိယအသင်းခေါင်းဆောင်ရာထူးနဲ့ အသင့်တော်ဆုံးတစ်ယောက်ပါပဲ။ သူ့ကို လီဗာပူးရဲ့ အနာဂတ်အသင်းခေါင်းဆောင်အဖြစ် ပရိသတ်တွေက ရှုမြင်ထားကြတာလည်း ဖြစ်ပါတယ်...

လက်ရှိဟန်ဂေရီလက်ရွေးစင်အသင်း‌ခေါင်းဆောင်တစ်ဦးလည်း ဖြစ်နေတာကြောင့် leadershipပိုင်းနဲ့ပတ်သက်ရင် ထိုက်သင့်တဲ့ အတွေ့အကြုံကောင်းတွေ ရှိထားပြီးသားလို့ ပြောရပါမယ်...

ကွင်းထဲမှာ နေရာစုံဖြည့်ကစားပေးတတ်တဲ့ သူ့ရဲ့ကစားဟန်၊ အသင်းအတွက် လိုအပ်တဲ့ positionတိုင်းမှာ ဝင်ကစားပေးဖို့ အသင့်ရှိနေပုံတွေအရ ဆိုဘော့ဇ်လိုင်ဟာ ကိုယ့်အကျိုးထက် အသင်းအကျိုးကို ရှေ့တန်းတင်တဲ့ ကစားသမားတစ်ယောက်ဖြစ်တယ်ဆိုတာလည်း ထင်ရှားနေပါတယ်...

၂၊ အယ်လီဆန်
ဂိုးသမားတစ်ယောက်က အသင်းခေါင်းဆောင်အဖြစ် တာဝန်ယူရတဲ့အခါ တချို့အပိုင်းတွေမှာ အကန့်အသတ်လေးတွေ ရှိတတ်ပါတယ်။ ဥပမာ- ပွဲချိန်တွင်း တချို့အနေအထားတွေမှာ အသင်းခေါင်းဆောင်ဟာ ကိုယ့်အသင်းဖော်တွေရှေ့ကနေ မားမားမတ်မတ် အကာအကွယ်ပေးရတာမျိုး၊ ပြိုင်ဖက်ကစားသမားတွေ၊ ကွင်းလယ်ဒိုင်တွေနဲ့ အခြေအတင် ပြောဆိုရတာမျိုးတွေ ရှိတတ်တယ်။ ဂိုးသမားတစ်ယောက်အနေနဲ့ကျတော့ သူနေရာယူထားရတဲ့ positionအရ ဒီလိုအနေအထားတွေမှာ အခင်းဖြစ်ပွားရာနေရာကို ချက်ချင်းရောက်လာနိုင်ဖို့ နည်းနည်းခက်ပါတယ်။ ဒါ ဥပမာပြောတာပါ...

ဒီလိုအကန့်အသတ်လေးတွေကြောင့် ဂိုးသမားတစ်ယောက် အသင်းခေါင်းဆောင်အဖြစ် တာဝန်ယူလာတာမျိုးကို တချို့က သိပ်သဘောမကျကြပါဘူး...

ဒါပေမယ့် အခုအယ်လီဆန်ကိစ္စမှာတော့ တခြားတစ်ဖက်က စဥ်းစားကြည့်ရင် သူဟာ လက်ရှိလီဗာပူးရဲ့ ဝါအရင့်ဆုံးကစားသမားတစ်ယောက်အဖြစ် ဗန်ဒိုက်နဲ့အတူ ရပ်တည်နေခဲ့တယ်။ ပြီးခဲ့တဲ့ ၈နှစ်၊ ၉နှစ်လောက်အတွင်း လီဗာပူးရဲ့အောင်မြင်မှုတွေမှာ အဓိကထောက်တိုင်ကစားသမားတစ်ယောက်လည်း ဖြစ်ခဲ့တယ်...

သဘာဝကျစွာပဲ အယ်လီဆန်ဟာ လက်ရှိလီဗာပူးအဝတ်လဲခန်းထဲမှာ အသင်းဖော်တွေအပေါ် သြဇာလွှမ်းမိုးမှုအရှိဆုံး စီနီယာကစားသမားတွေထဲမှာ တစ်ယောက်အပါအဝင်ဖြစ်နေပါတယ်...

ဒါကြောင့် ဒုတိယအသင်းခေါင်းဆောင်အဖြစ် အယ်လီဆန်တာဝန်ယူမယ်ဆိုရင်လည်း ဖြစ်သင့်တာပါပဲ။ သူနဲ့လည်းထိုက်တန်ပါတယ်...

၃၊ ဂျိုးဂိုမက်ဇ်...

အသင်းနဲ့အတူဖြတ်သန်းခဲ့တဲ့ သက်တမ်းအရဆိုရင်တော့ ဂျိုးဂိုမက်ဇ်ဟာ လက်ရှိလီဗာပူးရဲ့ သက်တမ်းအရင့်ဆုံးကစားသမားတစ်ယောက်ပါပဲ။ ဒါပေမယ့် တစ်ခုရှိတာက သူ့အနေနဲ့ အိုင်ရာရိုလာရဲ့လီဗာပူးမှာ ပုံမှန်ပွဲထွက်ခွင့်ရဖို့တော့ အခွင့်အလမ်းနည်းနေပါတယ်။ squad playerအနေနဲ့ပဲ ဖြည့်ကစားပေးရမယ့်သဘောရှိနေတယ်...

သက်တမ်းအရင့်ဆုံးကစားသမားတစ်ဦးအနေနဲ့ သူလည်း ဒုတိယအသင်းခေါင်းဆောင်နေရာကို မျှော်လင့်လို့ရပေမယ့် ကွင်းထဲမှာ အမြဲရှိနေရဖို့ သိပ်မသေချာတာက သူ့အတွက် အကန့်အသတ်ဖြစ်သွားနိုင်ပါတယ်...

၄၊ မတ်အယ်လစ္စတာ

ပုံမှန်ပွဲထွက်ခွင့်ရဖို့များတဲ့ ကစားသမားတွေထဲကနေပဲ ဒုတိယအသင်းခေါင်းဆောင်နေရာကို စဥ်းစားကြမယ်ဆိုရင်တော့ မတ်အယ်လစ္စတာကိုလည်း ကျနော်တို့ ထည့်စဥ်းစားဖို့ လိုအပ်ပါတယ်။ ၂၇နှစ်ဆိုတဲ့ အသက်အရွယ်နဲ့ သူ့ရဲ့ကစားသမားဘဝ အတွေ့အကြုံတွေအရ မတ်အယ်လစ္စတာလည်း ဒုတိယအသင်းခေါင်းဆောင်တစ်ဦးအဖြစ် တာဝန်ယူဖို့ လုံလောက်တဲ့အရည်အသွေးတွေ ရှိနေတယ်လို့ သုံးသပ်ရမှာဖြစ်ပါတယ်...

ပြီးခဲ့တဲ့ရာသီ လီဗာပူးမှာ သိပ်ခြေစွမ်းမပြနိုင်ခဲ့ပေမယ့် ၂၀၂၆ကမ္ဘာ့ဖလားမှာ သူ့ရဲ့အကောင်းဆုံးပုံစံတချို့ကို ပြန်မြင်လာရတာလည်း ကျေနပ်စရာပါပဲ...

၅၊ ဂတ်ပို

ပရိသတ်အကြိုက်ကစားသမားမျိုးတော့ ဟုတ်ချင်မှဟုတ်ပါလိမ့်မယ်။ အိုင်ရာရိုလာရဲ့ လီဗာပူးမှာ သူပုံမှန်ပွဲထွက်ခွင့်ရနိုင်မလားဆိုတာကလည်း စောင့်ကြည့်ရဦးမယ့်အချက်ပါပဲ...

ဒါပေမယ့် ဂတ်ပိုဟာ PSVမှာ ငယ်ငယ်ရွယ်ရွယ်နဲ့ အသင်းခေါင်းဆောင်အဖြစ် တာဝန်ယူခဲ့ဖူးတယ်။ ၂၇နှစ်ဆိုတဲ့ အသက်အရွယ်အရ (မက်ကာလိုပဲ) vice-Captainဖြစ်ဖို့ လုံလောက်တဲ့ အသက်အရွယ်နဲ့ အတွေ့အကြုံမျိုးတွေ သူပိုင်ဆိုင်ထားပါတယ်....

လီဗာပူး vice-Captainရာထူးနဲ့ ဘယ်သူအသင့်တော်ဆုံးလဲ။ အမြင်လေးတွေ ပြောခဲ့ကြပါဦး...

ကျနော်ကတော့ ဆိုဘော့ဇ်လိုင်ပဲဗျာ...

တစ်ကိုယ်ရည်တစ်ကာယ အောင်မြင်မှုအတွက် ကျနော် ဒီအလုပ်ကို လက်ခံခဲ့တာ မဟုတ်ပါဘူး။ ဂျာမနီပရိသတ်တွေအားလုံးအတွက် ကျနော် လက်ခံခဲ့တာပါ...

ခင်ဗျားတို့(မီဒီယာတွေ) နာဂျယ်စ်မန်းကို ဘယ်လိုဆက်ဆံခဲ့ကြသလဲ၊ သောမတ်စ်တူချယ်လ်ကို ဘယ်လိုဆက်ဆံခဲ့ကြသလဲ သေသေချာချာ မြင်တွေ့နေတဲ့ကြားက ကျနော် ဒီရာထူးကို လက်ခံခဲ့တာဖြစ်ပါတယ်...

ဒါပေမယ့် တစ်ခုတော့ ကြိုပြောထားချင်တယ်။ ကျနော့်မိသားစုကိုတော့ ဘယ်လိုအကြောင်းကြောင့်နဲ့မှ ပစ်မှတ်ထားတာမျိုး၊ ဝေဖန်တိုက်ခိုက်တာမျိုး မလုပ်ကြပါနဲ့။ အဲ့ဒီလိုဖြစ်လာခဲ့ရင် ကျနော်ချက်ချင်းနှုတ်ထွက်သွားမှာပါ...

ကျနော်အသုံးမကျဘူး၊ ကျနော့်နည်းလမ်းတွေက အလုပ်မဖြစ်ဘူးထင်ရင် ကျနော်နဲ့ မျက်နှာချင်းဆိုင် ချက်ကျလက်ကျ လာပြောပါ။ ဝေဖန်ပါ။ ကျနော် လျော်ကြေးတစ်ပြားမှမယူဘဲ နှုတ်ထွက်ပေးသွားပါမယ်...

(ယာဂင်ကလော့ပ်)

🚨🇳🇴 𝐎𝐅𝐅𝐈𝐂𝐈𝐀𝐋: နော်ဝေမှာ ခြေစမ်းပွဲကစားမယ့် မန်ယူနိုက်တက်ရဲ့ ၂၅ဦးလူစာရင်း 📋

🚨 ဂိုးသမား- တွမ်ဟီတန်၊ ဗီတက်ခ်၊ ဒါမော့မီ

🚨 နောက်တန်း- မက်ဂွိုင်းယား၊ ယော်ရို၊ လုခ်ရှော၊ ဟေးဗန်းစ်၊ ဟယ်ရီအေမက်စ်၊ ဂျေဒန်ကမာဆန်၊ ဒန်အာမာ

🚨ကွင်းလယ်- မေဆန်မောင့်၊ အန်ဒရေဆန်းတို့စ်၊ ဂျက်ဖလက်ချာ၊ တိုင်လာဖလက်ချာ၊ တိုဘီကော်လီယာ၊ ဒန်ဂိုး၊ ဂျက်ကော့ဘ်ဒီဗန်တီ၊ ဂျင်မ်တွိုက်စ်

🚨 တိုက်စစ်- ဇာ့ခ်ဇီး၊ အမ်ဘူမို၊ ဒိုဂူ၊ ချီဒိုအိုဘီ၊ ဂျေဂျေဂါဘရီရယ်လ်၊ ရှေးလ်လေဆီ၊ အီသန်ဝီလီယံစ်။

🚨 အသက်၁၅နှစ်အရွယ်လူငယ်တိုက်စစ်မှူးလေး ဂျေဂျေဂါဘရီရယ်လ်အပါအဝင် လူငယ်လေးတွေ အတော်များများ ပွဲထွက်ခွင့်ရဖို့ ရှိနေတာကတော့ စိတ်လှုပ်ရှားစရာပါပဲ...