04/10/2026
کرسٹیانو رونالڈو کے پرتگال کا تربیتی کیمپ چھوڑنے کے بعد قومی ٹیم کے انسٹاگرام اکاؤنٹ کے فالوورز میں بڑی کمی آگئی۔
پرتگالی اسٹار فٹبالر کرسٹیانو رونالڈو کے ہیڈ کوچ جورج جیسس سے مبینہ اختلافات کے بعد قومی ٹیم کا تربیتی کیمپ چھوڑنے کی خبریں سامنے آنے کے بعد پرتگال کی ٹیم کے انسٹاگرام اکاؤنٹ پر فالوورز کی تعداد میں راتوں رات تقریباً 20 لاکھ کی کمی کا دعویٰ کیا جا رہا ہے۔
رونالڈو کا کہنا ہے کہ مناسب وقت آنے پر وہ پرتگالی عوام کو قومی ٹیم سے علیحدگی کی وجوہات کے بارے میں حقیقت سے آگاہ کریں گے۔
برطانوی اخبار دی سن کے مطابق رونالڈو نے رات 2 بجے پرتگال ٹیم کا کیمپ چھوڑا، جبکہ صبح 10 بجے ان کی مشہور جرسی نمبر 7 کسی دوسرے کھلاڑی کو دے دی گئی۔
رونالڈو کی روانگی کے چند گھنٹوں بعد جرسی نمبر 7 کسی دوسرے کھلاڑی کو الاٹ کیے جانے پر ان کے مداحوں میں شدید بے چینی اور غم و غصہ دیکھنے میں آیا۔ دنیا بھر میں رونالڈو کے مداحوں نے پرتگال کی قومی ٹیم کے آفیشل انسٹاگرام اکاؤنٹ کو ان فالو کرنا شروع کردیا۔
رپورٹس کے مطابق پرتگال ٹیم کے انسٹاگرام اکاؤنٹ کے تقریباً 2 کروڑ 50 لاکھ فالوورز میں سے 20 لاکھ نے اکاؤنٹ کو ان فالو کردیا، جس کے بعد فالوورز کی تعداد تقریباً 2 کروڑ 30 لاکھ رہ گئی اور کمی کا سلسلہ جاری ہے۔
رونالڈو کا جرسی نمبر 7 حاصل کرنے والے کھلاڑی نے مبینہ طور پر کہا کہ وہ یہ نمبر نہیں لینا چاہتے تھے۔ انہوں نے کوچز سے کہا تھا کہ رونالڈو کی عزت کرنی چاہیے کیونکہ وہ ابھی ٹیم سے گئے ہیں، ایسے میں وہ ان کا نمبر کیسے لے سکتے ہیں؟ تاہم کوچز کے دباؤ پر انہیں جرسی نمبر 7 قبول کرنا پڑا۔
