Emroz tv

پاکستان نیوی فٹبال ٹیم کی تاریخی کامیابی؛ کوچ محمد ارشد کی حکمتِ عملی نے ٹائٹل کا خواب حقیقت بنا دیا

غنی الرحمن

پاکستان نیوی کی شاندار فتح؛ کامیابی کے پس منظر میں کوچ محمد ارشد کی دانشمندانہ حکمتِ عملی
پاکستان میں فٹبال کا کھیل گزشتہ چند برسوں کے دوران نئی توانائی کے ساتھ آگے بڑھ رہا ہے اور مختلف ادارہ جاتی ٹیمیں اس کھیل کے فروغ میں اہم کردار ادا کر رہی ہیں۔ حال ہی میں پاکستان نیوی کی فٹبال ٹیم نے گورنر پنجاب نائٹ فٹبال ٹورنامنٹ کا ٹائٹل اپنے نام کرکے ایک مرتبہ پھر ثابت کر دیا کہ وہ ملک کی بہترین فٹبال ٹیموں میں شمار ہوتی ہے۔
ٹورنامنٹ میں ملک کے مختلف علاقوں اور اداروں سے تعلق رکھنے والی مضبوط ٹیموں نے حصہ لیا اور شائقین کو سنسنی خیز مقابلے دیکھنے کو ملے۔ ہر ٹیم نے کامیابی کے لیے بھرپور محنت کی، تاہم پاکستان نیوی کی ٹیم نے ابتدا ہی سے منظم کھیل، بہترین فٹنس، شاندار دفاع اور جارحانہ حکمت عملی کے ذریعے اپنی برتری ثابت کی۔
فائنل مقابلے میں پاکستان نیوی کے کھلاڑیوں نے غیر معمولی کارکردگی کا مظاہرہ کرتے ہوئے حریف ٹیم کو شکست دی اور ٹرافی اپنے نام کر لی۔ میدان میں کھلاڑیوں کی باہمی ہم آہنگی، درست پاسنگ، تیز رفتار حملے اور دفاعی نظم و ضبط دیکھنے سے تعلق رکھتے تھے۔ یہی وہ عوامل تھے جنہوں نے پاکستان نیوی کو دیگر ٹیموں پر سبقت دلائی۔
اگرچہ اس کامیابی کا سہرا کھلاڑیوں کی محنت اور لگن کو جاتا ہے، لیکن اس فتح کے پس منظر میں پاکستان نیوی کے ہیڈ کوچ محمد ارشد کا کردار بھی انتہائی اہمیت کا حامل ہے۔ محمد ارشد پاکستان کی قومی فٹبال ٹیم کے سابق کپتان رہ چکے ہیں اور اپنے دور کے بہترین، تجربہ کار اور منجھے ہوئے فٹبالرز میں شمار ہوتے تھے۔ قومی اور بین الاقوامی سطح پر کھیلنے کا وسیع تجربہ رکھنے والے محمد ارشد نے بطور کوچ اپنی صلاحیتوں کا بھرپور ثبوت دیا ہے۔
انہوں نے ٹورنامنٹ سے قبل کھلاڑیوں کی جسمانی اور ذہنی تیاری پر خصوصی توجہ دی۔ ہر حریف ٹیم کی طاقت اور کمزوری کا جائزہ لیا گیا اور اسی کے مطابق حکمت عملی ترتیب دی گئی۔ میدان کے اندر کھلاڑیوں کی پوزیشننگ، گیند پر کنٹرول، دفاعی لائن کی مضبوطی اور جارحانہ حملوں کی منصوبہ بندی محمد ارشد کی پیشہ ورانہ سوچ کی عکاس تھی۔
کسی بھی ٹیم کی کامیابی صرف میدان میں دوڑنے والے گیارہ کھلاڑیوں کی مرہونِ منت نہیں ہوتی بلکہ اس کے پیچھے کوچ کی رہنمائی، تربیت اور اعتماد سازی بھی شامل ہوتی ہے۔ محمد ارشد نے اپنے تجربے کو استعمال کرتے ہوئے کھلاڑیوں کا حوصلہ بلند رکھا اور ہر مرحلے پر انہیں کامیابی کے لیے تیار کیا۔ یہی وجہ ہے کہ پاکستان نیوی کی ٹیم پورے ٹورنامنٹ کے دوران ایک منظم یونٹ کے طور پر نظر آئی۔
پاکستان نیوی کی فٹبال ٹیم کی یہ کامیابی ادارہ جاتی کھیلوں کی اہمیت کو بھی اجاگر کرتی ہے۔ ایسے ادارے نہ صرف کھلاڑیوں کو روزگار فراہم کرتے ہیں بلکہ انہیں اپنی صلاحیتیں نکھارنے اور قومی سطح پر ملک و قوم کا نام روشن کرنے کے مواقع بھی دیتے ہیں۔
ماہرین کے مطابق اگر پاکستان میں فٹبال کے فروغ کے لیے ادارہ جاتی ٹیموں، اکیڈمیوں اور تجربہ کار کوچز کو مزید مواقع فراہم کیے جائیں تو ملک میں بے شمار نوجوان ٹیلنٹ سامنے آ سکتا ہے۔ پاکستان نیوی کی حالیہ کامیابی اس بات کا واضح ثبوت ہے کہ درست منصوبہ بندی، مضبوط قیادت اور محنتی کھلاڑی مل کر کسی بھی ہدف کو حاصل کر سکتے ہیں۔
پاکستان نیوی کی یہ فتح نہ صرف ایک ٹورنامنٹ جیتنے کی کہانی ہے بلکہ یہ نظم و ضبط، بہترین کوچنگ، ٹیم ورک اور مسلسل محنت کا ایسا سفر ہے جو ملک کے نوجوان فٹبالرز کے لیے ایک مثال بن سکتا ہے۔ اس کامیابی میں کھلاڑیوں کے ساتھ ساتھ کوچ محمد ارشد کی فنی مہارت، دور اندیشی اور قائدانہ صلاحیتوں کا کردار ہمیشہ یاد رکھا جائے گا۔

جاپان میں جاری انڈر 18 ہاکی ایشیا کپ میں پاکستان نے شاندار آغاز کرتے ہوئے اپنے پہلے میچ میں چین کو 0-3 سے شکست دے دی، قومی ٹیم اپنا دوسرا میچ کل ملائشیا کے خلاف کھیلے گی۔۔۔

نیشنل جونیئر ٹیبل ٹینس چمپئن شپ پشاور

ڈبلیو این بی اے میں امریکی باسکٹ بال کھلاڑی ہیلی وان لیتھ کو ایک بار پھر ٹیم سے فارغ کر دیا گیا۔ اس مرتبہ کنیکٹی کٹ سن نے انہیں رواں سیزن کے دوران ویو کر دیا ہے، جو اس سیزن میں دوسری بار ہے جب وہ کسی ٹیم سے ریلیز ہوئی ہیں۔
رپورٹس کے مطابق ہیلی وان لیتھ نے کنیکٹی کٹ سن کی جانب سے صرف نو میچز کھیلے، جن میں انہوں نے اوسطاً 8.1 پوائنٹس اور 2.2 اسسٹ فی میچ ریکارڈ کیے۔ شاندار شوٹنگ پرفارمنس کے باوجود ٹیم انتظامیہ نے فرانسیسی گارڈ لیلا لاکان کو اسکواڈ میں شامل کرنے کیلئے یہ فیصلہ کیا۔
یاد رہے کہ شکاگو اسکائی نے بھی مئی کے آغاز میں ہیلی وان لیتھ کو اسکواڈ سے الگ کیا تھا، جس کے بعد کنیکٹی کٹ سن نے انہیں ویور کلیم کے ذریعے ٹیم میں شامل کیا تھا۔
ہیلی وان لیتھ کو 2025 ڈبلیو این بی اے ڈرافٹ میں شکاگو اسکائی نے 11ویں مجموعی انتخاب کے طور پر منتخب کیا تھا، جبکہ وہ کالج باسکٹ بال میں اپنی شاندار کارکردگی کے باعث خاصی شہرت رکھتی ہیں۔

قبائلی ضلع خیبر کی بیٹی صدف آفریدی نیشنل جونیئر سکواش چیمپئن شپ کی تشہیری مہم کا چہرہ بن گئیں،

پشاور میں منعقد ہونے والی نیشنل جونیئر سکواش چیمپئن شپ 2026 کی تشہیری مہم کیلئے قبائلی ضلع خیبر سے تعلق رکھنے والی باصلاحیت خاتون سکواش کھلاڑی صدف آفریدی کو آفیشل پوسٹر اور بینرز کیلئے منتخب کر لیا گیا، جس کے بعد شہر بھر میں ان کی تصاویر پر مشتمل فلیکسز اور بینرز آویزاں کر دیے گئے ہیں۔
چیمپئن شپ کی آفیشل سوشل میڈیا مہم میں بھی صدف آفریدی کی تصاویر نمایاں طور پر شیئر کی جا رہی ہیں، جو سوشل میڈیا پر تیزی سے وائرل ہو رہی ہیں۔ صدف آفریدی کی اس کامیابی کو نہ صرف خیبر بلکہ پورےخیبرپختونخوا کیلئے اعزاز قرار دیا جا رہا ہے۔

کھیلوں کے حلقوں کے مطابق کسی قبائلی ضلع سے تعلق رکھنے والی خاتون کھلاڑی کا قومی سطح کی بڑی سکواش چیمپئن شپ کی تشہیری مہم کا حصہ بننا خواتین کھلاڑیوں کیلئے ایک مثبت اور حوصلہ افزا پیغام ہے۔ صدف آفریدی نے اپنی محنت، لگن اور بہترین کارکردگی کے ذریعے یہ مقام حاصل کیا، جس پر نوجوان کھلاڑیوں خصوصاً لڑکیوں میں خوشی کی لہر دوڑ گئی ہے۔
سپورٹس شخصیات نے امید ظاہر کی ہے کہ صدف آفریدی مستقبل میں بھی قومی اور بین الاقوامی سطح پر اپنی صلاحیتوں کا لوہا منوا کر ملک و قوم کا نام روشن کریں گی۔
🏆🎾 National Junior Squash Championship 2026 🎾🏆

نیشنل جونیئر اتھلیٹکس چمپئن شپ ،پشاور

ملک ہدایت الحق کی سابق صوبائی وزیرِ صحت سید ظاہر علی شاہ سے ملاقات، عیدالاضحیٰ کی مبارکباد

پشاور: پاکستان منی فٹبال فیڈریشن کے صدر ملک ہدایت الحق نے سابق صوبائی وزیرِ صحت سید ظاہر علی شاہ کی رہائش گاہ پر ملاقات کی اور انہیں عیدالاضحیٰ کی دلی مبارکباد پیش کی۔
ملاقات کے دوران باہمی دلچسپی کے مختلف امور، کھیلوں کے فروغ، نوجوانوں کی مثبت سرگرمیوں اور صوبے میں فٹبال کی ترقی سے متعلق تبادلۂ خیال کیا گیا۔ اس موقع پر دونوں رہنماؤں نے عیدالاضحیٰ کے موقع پر ملکی سلامتی، امن و استحکام اور عوامی خوشحالی کیلئے خصوصی دعا بھی کی۔
ملک ہدایت الحق نے کہا کہ عیدالاضحیٰ ایثار، قربانی اور بھائی چارے کا درس دیتی ہے، جبکہ سید ظاہر علی شاہ نے اس موقع پر مہمانوں کا شکریہ ادا کرتے ہوئے نیک خواہشات کا اظہار کیا۔
ملاقات خوشگوار ماحول میں ہوئی جہاں عید کی خوشیوں اور قومی یکجہتی کے پیغام کو اجاگر کیا گیا۔