06/10/2026
အမြန်ပြန်လာနိုင်ပါစေ🇲🇲🇲🇲🇲🇲
မောင်မောင်လွင်၊ ဟိန်းဖြိုးဝင်းနဲ့ လွင်မိုးအောင်တို့ရဲ့ ဒဏ်ရာအခြေအနေကို MFF ထုတ်ပြန်
===================
မြန်မာ့လက်ရွေးစင်အသင်း ပရိသတ်တွေအတွက် စိုးရိမ်စရာဖြစ်နေခဲ့တဲ့ အဓိကကစားသမား ၃ ဦးရဲ့ ဒဏ်ရာအခြေအနေတွေနဲ့ ပတ်သက်ပြီး မြန်မာနိုင်ငံဘောလုံးအဖွဲ့ချုပ် MFF က နောက်ဆုံးရ ဆေးစစ်ချက်တွေကို ထုတ်ပြန်ကြေညာလိုက်ပါတယ်။
မြန်မာ့လက်ရွေးစင်အသင်းရဲ့ အဓိကကစားသမားတွေဖြစ်တဲ့ မောင်မောင်လွင်၊ ဟိန်းဖြိုးဝင်းနဲ့ လွင်မိုးအောင်တို့ဟာ ဒူးဒဏ်ရာတွေကြောင့် အရေးကြီးတဲ့ နိုင်ငံတကာပြိုင်ပွဲတွေကို လွဲချော်ခဲ့ကြတာဖြစ်ပါတယ်။
ပထမဆုံးအနေနဲ့ ကွင်းလယ်ကစားသမား မောင်မောင်လွင်ရဲ့အခြေအနေကို ပြောရမယ်ဆိုရင် မောင်မောင်လွင်ဟာ ဟံသာဝတီအသင်းနဲ့ ခြေစမ်းပွဲကစားစဉ်မှာ ဒူးဒဏ်ရာ ရရှိခဲ့တာဖြစ်ပါတယ်။
ဒဏ်ရာရရှိပြီးနောက် ထိုင်းနိုင်ငံ၊ ဘန်ကောက်မြို့မှာ သွားရောက်စစ်ဆေးခဲ့ပြီး အစောပိုင်းသတင်းတွေအရ ခြောက်ပတ်ခန့် အနားယူရနိုင်တယ်လို့ သိရပါတယ်။
အလားတူ နောက်ခံကစားသမား ဟိန်းဖြိုးဝင်းကလည်း ဒဏ်ရာရရှိခဲ့တာကြောင့် မောင်မောင်လွင်နဲ့အတူ ဘန်ကောက်မှာ ဆေးစစ်ဆေးမှုနဲ့ ကုသမှုတွေ ခံယူခဲ့ရတာဖြစ်ပါတယ်။
ဒါကြောင့် အဓိကကစားသမားနှစ်ဦးစလုံးဟာ မြန်မာ့လက်ရွေးစင်အသင်းအတွက် အရေးကြီးတဲ့ ပြိုင်ပွဲတွေမှာ ပါဝင်ကစားနိုင်ခြင်း မရှိခဲ့တာဖြစ်ပါတယ်။
အခုနောက်ဆုံး MFF ရဲ့ ထုတ်ပြန်ချက်အရတော့ သတင်းကောင်းတစ်ခု ရရှိလာပါတယ်။ MRI စစ်ဆေးမှုတွေအရ ဟိန်းဖြိုးဝင်းအနေနဲ့ လက်ရှိအချိန်မှာ ခွဲစိတ်ကုသမှု ပြုလုပ်ရန် မလိုအပ်တော့ဘဲ MFF Medical Team ရဲ့ ကြီးကြပ်မှုနဲ့ လေ့ကျင့်ရေးတွေကို ဆက်လက်ပြုလုပ်သွားရမယ်လို့ သိရပါတယ်။
မောင်မောင်လွင်အနေနဲ့လည်း ခွဲစိတ်ကုသမှု ပြုလုပ်ဖို့ မလိုအပ်တော့ဘဲ အပေါ့စားလေ့ကျင့်ခန်းတွေကို ပြန်လည်ပြုလုပ်နေပြီဖြစ်တယ်လို့ MFF က အသိပေးထားပါတယ်။
ဒီအခြေအနေဟာ မြန်မာ့လက်ရွေးစင်အသင်းအတွက် သတင်းကောင်းတစ်ခုလို့ ဆိုနိုင်ပါတယ် ဒါပေမယ့် ကွင်းလယ်ကစားသမား လွင်မိုးအောင်ရဲ့ အခြေအနေကတော့ အနည်းငယ်ပိုပြီး စိုးရိမ်စရာ ဖြစ်နေပါတယ်။
လွင်မိုးအောင်ဟာ မြန်မာအသင်းနဲ့ တီမောအသင်းတို့ ကစားခဲ့တဲ့ပွဲစဉ်မှာ ဒူးအရွတ်ဒဏ်ရာ ရရှိခဲ့တာဖြစ်ပါတယ်။ အဆိုပါဒဏ်ရာကြောင့် အရေးကြီးတဲ့ ကမ္ဘောဒီးယားအသင်းနဲ့ ပွဲစဉ်ကိုလည်း လွဲချော်ခဲ့ရပါတယ်။MFF ရဲ့ နောက်ဆုံးထုတ်ပြန်ချက်အရတော့ လွင်မိုးအောင်ဟာ လာမယ့်သောကြာနေ့မှာ ခွဲစိတ်ကုသမှု ခံယူရမယ်လို့ သိရပါတယ် ခွဲစိတ်ကုသမှုခံယူပြီးနောက်မှာတော့ အချိန်လုံလောက်စွာ အနားယူပြီး ပြန်လည်ထူထောင်ရေးလုပ်ငန်းစဉ်တွေကို ဆက်လက်လုပ်ဆောင်ရမှာဖြစ်ပါတယ်။
ဒါကြောင့် လွင်မိုးအောင်အနေနဲ့ ဘယ်အချိန်မှာ ပြန်လည်ကစားနိုင်မလဲဆိုတာကတော့ ခွဲစိတ်ကုသမှုနဲ့ ပြန်လည်ထူထောင်ရေးအခြေအနေတွေပေါ် မူတည်သွားမှာ ဖြစ်ပါတယ်။ အဓိကကစားသမားတွေ ဒဏ်ရာရရှိခဲ့တာကြောင့် မြန်မာ့လက်ရွေးစင်အသင်းအနေနဲ့ အရေးကြီးတဲ့ပွဲတွေမှာ အင်အားပြည့်မကစားနိုင်ခဲ့တာလည်း ဖြစ်ပါတယ်။
အခုနောက်ဆုံးအနေနဲ့ MFF ဘက်က မြန်မာ့လက်ရွေးစင်အသင်းအတွက် နောက်ထပ်အစီအစဉ်တစ်ခုကိုလည်း ထုတ်ပြန်ထားပါတယ်။ အဲဒါကတော့ လာမယ့် နိုဝင်ဘာလအတွင်း FIFA International Friendly ပွဲစဉ်တွေ ကစားနိုင်ဖို့ နိုင်ငံတကာအသင်းတွေနဲ့ ချိတ်ဆက်ဆောင်ရွက်နေပြီ ဆိုတာပဲ ဖြစ်ပါတယ်။ ဒါဟာ လက်ရွေးစင်အသင်းအတွက် အရေးကြီးတဲ့ ပြင်ဆင်မှုတစ်ခု ဖြစ်လာနိုင်ပါတယ်။
အထူးသဖြင့် ဒဏ်ရာကနေ ပြန်လည်သက်သာလာမယ့် မောင်မောင်လွင်နဲ့ ဟိန်းဖြိုးဝင်းတို့ကို ပြန်လည်အသုံးချနိုင်မယ်ဆိုရင် မြန်မာအသင်းရဲ့ ကွင်းလယ်နဲ့ ခံစစ်ပိုင်းမှာ ပိုပြီး အင်အားေတာင့်တင်းလာနိုင်ပါတယ်။ တစ်ဖက်မှာလည်း လွင်မိုးအောင်ရဲ့ ပြန်လည်ထူထောင်ရေးအခြေအနေကတော့ ပရိသတ်တွေအနေနဲ့ ဆက်လက်စောင့်ကြည့်ရမယ့် အခြေအနေ ဖြစ်ပါတယ်။
မြန်မာ့လက်ရွေးစင်အသင်းအနေနဲ့ အခုလို ဒဏ်ရာပြဿနာတွေကို ကျော်ဖြတ်ပြီး နိုဝင်ဘာလ FIFA International Friendly ပွဲစဉ်တွေမှာ အသင်းအင်အားပြည့်နီးပါးနဲ့ ပြန်လည်တည်ဆောက်နိုင်မလားဆိုတာ စိတ်ဝင်စားစရာပါ မောင်မောင်လွင်နဲ့ ဟိန်းဖြိုးဝင်းတို့ အမြန်ဆုံးပြန်လည်သက်သာလာပြီး မြန်မာ့လက်ရွေးစင်အသင်းအတွက် ပြန်လည်ကစားပေးနိုင်ကြပါစေ၊ လွင်မိုးအောင်လည်း ခွဲစိတ်ကုသမှု အောင်မြင်ပြီး အမြန်ဆုံး ဘောလုံးကွင်းထဲ ပြန်ဝင်လာနိုင်ပါစေလို့ ဆုတောင်းပေးလိုက်ပါတယ်။
မြန်မာ့လက်ရွေးစင်အသင်းရဲ့ နိုဝင်ဘာလ FIFA International Friendly ပွဲစဉ်တွေနဲ့ ကစားသမားတွေရဲ့ ဒဏ်ရာအခြေအနေ နောက်ဆုံးရသတင်းတွေကိုလည်း ဆက်လက်တင်ဆက်ပေးသွားမှာဖြစ်လို့ စောင့်ကြည့်အားပေးပေးကြပါဦး။
#မြန်မာဘောလုံးသတင်း
