Vero Verde 2011

بسم الله الرحمن الرحيم
كنا و لازلنا و سنبقى على عهدك
فدائيين نصونوا و نوڨفوا وقت الضراء قبل السراء
من أقوى و أعمق الميساجات لتبقت فعليا و ين خرجنا البرودوي الأخضر و كان عندو بعد متع وفاء في أصعب الأوقات
ميساج ولاؤنا دائم لتهز ميساج زادا في الأنترونمون
حكاية مبدأ و غرام قوي هزنا لعديد المواقف
و من الأفاق لصنعناها بغرام كبير نجحنا و كنا رجال المباريات
ڨربنا بخطوة كبيرة ليوم باش نرجعوا لبلاصتنا...
ديما معاك
Siamo stayda
Siamo verde

دخلة في طرح الباسكات بتاريخ 24/04/2016
‎تبقى ليومنا هذا رسالة قوية لجمهورنا و فريقنا
‎ Burn the ships من بعد دخلة
الموسم هذا فهمنا بلي لا مجال للرجوع للوراء مهنا كانت الصعاب الطريق و السبيل واحد إما الرجوع أو الرجوع للمكان اللائق
‎ألا وهو الوطني 1
‎اليوم مناش باش نلوموا على شكون السبب و شكون الغالط , مازلنا نكوروا و مازال عندنا هدف واحد
‎ستيدا في حاجة ماسة لينا في أكثر من أي وقت مضى
‎اليوم على خاطر الشعار نكملوا لبديناه وربي ينصرنا
‎ #نتحدوا
‎ #نقاوموا
‎ #ننتصروا
‎Con te fino Alla morte...
‎ستيدا تعيش💚

‎جبري براس مربع لابس لينات 0 في تاريخ و 0 في الموفما سارق وزيد كذابين عليه و مصدق ياكتكوت نرجع بيك 2013/11/5 وين تهزت دخلة في البلوك 10 و فوڨ من هذا تخدمت برودوي بنفس المحتوى يعني ماكانتش مجرد "ستيكر في طمبور " وزيد في 2024...
‎الفردي كي يخدم يخدم على أصوله و في وقت سابڨ أوانه مش من لاشيء وقت ڨلت فايتينكم بسنين من المعرفة لترجع من أصل الفكرة و الفازة هذي يفيقلك باها كان ولد بلاد
هاني خلاتلك capture date متع الطرح
‎و فوقهم كلمتين خسرناهم علاكم
‎
‎
بدمائنا أحيينا أرض أجدادنا...
‎فنحن الأسياد و أنتم عبيدنا ...
‎
‎تو يا أمور يا شطور عندك دخلة و برودوي و زيد خرجنا غناية تحت إسم وصية الأجداد
‎
‎نلتقي في درس جديد ويزي من الإرهاب على الصغار الصدمة لكلاتها اليوم مش باهية لجيل جاي
‎
‎don't be like don Quichotte
‎
‎

ليوم درس جديد
‎وين أثبتنا أنو الظلم مهما كان و مهما طال و أينما كان
‎لايعنينا كأعضاء ألتراس و أن المجموعة قائمة على الحريات و الإختلافات خاصة في لون البشر
‎وديما الفردي كونتر الظلم و التمييز و الإستبداد تنجموا تڨولوا مبدأ الأنتيفاشيزم فطري فينا قبل حتى ما نتبنوه
‎الطرح وقتها كونتر الترجي هزينا دخلة في البلوك 10
‎على رئيس جنوب افريقيا السابق "نيلسون مونديلا" الذي يعتبر رمز المقاومة الراجعة لمبتغى الحرية من أصل الفكرة
‎حيث قضى 27 عام في السجن و حارب نظاما للفصل العنصري في جنوب افريقيا و كان هذا النظام معروف بمصطلح "الأبارتايد" الذي ميز البيض في هذه الفترة
‎خلال هذه الفترة (من 1948 إلى 1994)، كان الناس يُفصلون حسب لون بشرتهم. وكان السود في جنوب أفريقيا يملكون حقوقًا أقل بكثير من البيض مثل مدارس منفصلة أحياء سكنية منفصلة وسائل نقل منفصلة منع الأغلبية السوداء من التصويت التمييز في العمل والحياة اليومية...
‎
‎لكن من خلال المقاومة نجح باش ينح الأفكار الرجعية هذي و أصبح أول رئيس أسود للبلاد سنة 1994.
‎
‎مع الدخلة هزينا ميساج
‎"L'argent ne créera pas le succès"
‎و زدنا كلاش للترجي
‎
‎الترجي ليست قصة كأس أو بطولة بل قصة رشوة و غورة

‎هيا يا سيدي باش نرجع بيكم للزمن الجميل أيامات العز و الزهو و الڨرينتا وين خلانا تراس موش كان في مخاخ التوانسة بل في الأفريك
‎
‎وقتها الڨوابسية يعيشوا كورة كبار و صغار … تيفوسي يتنفّس بالستاد يغطّي لفيراج ،
‎طنابر ما تسكتش، وعباد داخلة للـStayda موش باش تتفرج على ماتش كورة كهو ... باش تعيش حرب 90 دقيقة على خاطر الراية والمدينة .
‎اليوم إخترت نجبدلكم طرح مايتنساش وين ربحنا و ماتعديناش ماتش ما كانش مجرد مقابلة إفريقية، كان اختبار هيبة للفيراج الكل. وقتها طلعنا ميساج:
‎"SEUL DIEU LE PLUS PUISSANT"
‎من أقوى كونتر كلاشات في الموفما لشفتهم
‎وين كان إسم الفريق المنافس
" tp mazembie"
‎يعني مازمبي الأقوى على لإطلاق
‎و من هني تفهم قوة الرد إلي خرج من روح الفيراج
‎ إنتوم عندكم الاسم والمال والتاريخ… أما القوة المطلقة موش عند بشر. الله وحدو الأقوى. كانت رسالة من ناس عايشة في peak mentalité: لا تخويف باسم، لا رهبة من تاريخ، لا حسابات لفلوس ولا نفوذ… وحدو الله الأقوى، وين كان و مزال في الفيراج رجال واقفة باسم المدينة وباسم الانتماء. الباركور وقتها كان بطابع
‎ old school... والفيراج يحس روحو دولة وحدها عالم منفصل عندو قوانينو الخاصة: الأخوّة، الوفاء، والوقوف مع المجموعة مهما يصير. لذلك الميساج هذا ماتهزش من فراغ بل من قول و فعل وين ربحنا الطرح ، mentalité تقول إنّ الهيبة موش تتشري، والاسم الحقيقي يتبنى بالتعب وبالرجال اللي تبقى واقفة حتى كان الدنيا الكل ضدّها
‎
‎من للخر و على اللخر حكاية سوليداريتي
‎تنجم تڨول الأقوى تهزم في ظل تظافر الجهد و لحمة
‎الفيراج ...
‎

‎اليوم درس جديد في عفسة جديدة وين كان الفردي مخلي بصمتو في باركور الألتراس على المستوى العالمي
‎وين دافعنا على الليبرتا وساندنا عديد الڨروبات خاصة المصرية منها ودخلنا عفسة جديدة في الدخلات في ڨابس وين كان أول ظهور للكوليڨرافي و ساندنا فيه الوايت نايتس التابعة للزمالك فوڨ من هذا كان أول
ظهور لباش الكورفا سود ڨابس بعد دخلة " صنعوها
رجال كبار بعرقهم صرنا الأسياد" لكانت 3D و كوليڨرافي في نفس الوقت و زيد في المنصة
‎
‎في البلوك 10 ترفعت كلمة الليبرتا و معاها شعار الوايت نايتس و كسبنا برشا قدر و محبة في وقت غابت فيه الشهرة المصطنعة كيما تو و زدنا معاه ميساج "عيب أن تقطع يدا أطعمتكم حرية"
‎
‎و في مرحلة أخرى بعد التعازي لجمهور الأهلي المصري في مذبحة بورسعيد
‎ألتراس أهلاوي مانسوش الڨروبات لحكت علاهم و هزولهم خدمة مع أسامي الڨروبات لحكت و شاركت القضية وين كان إسم المجموعة حاضر إلى جانب عديد المجموعات منها للدول المجاورة

‎هيا السلام عليكم في درس جديد
‎تنجم تڨول كان رانا روبار في الحركية.
‎
‎
‎اليوم باش نحكوا على فازة قوية في وقت مابعد الثورة لكن في الفترة هاذي تميزت بتفشي العنصرية و الجهويات في أغلب الولايات إلى جانب المجال الرياضي وين نلڨوه فاسد بالرشوة و الوسخ و القمع المسلط نحو التيفوسي من 18- لمنع الديبلاسمونات و أنتا ماشي ...
‎كما نذكروا على المستوى العالمي أمور القضية الأم ماتعجبش...
‎
‎في هذا الكل الفردي ماكانش ساكت وين فرغ ضغط الكل في تبنيه لمبدئ ألا وهو الأنتيفاشيزم وين لڨيناه في الستادات في البركاجات و أهمية اللون البرتقالي !
‎و في البرودويات إلي توقفوا علاهم من ميساج رجال المقاومة إلى أن أصبح نمط معيشي ذو طابع ثقافي له أبعاد فوق الخيالية
‎لكن شنوة هذا الكل فاش تحكي ؟
‎شنوة يعني ؟
‎
‎باهي مبدأ الأنتيفاشيزم (Anti-fascism) هو موقف سياسي وفكري يعارض الفاشية وكل الأنظمة أو الحركات التي تقوم على الدكتاتورية القومية المتطرفة العنصرية قمع الحريات وتمجيد العنف والزعيم الواحد.
‎وين ظهرت الأنتيفاشيزم بقوة في أوروبا خلال صعود أنظمة مثل نظام Benito Mussolini في إيطاليا وAdolf Hi**er في ألمانيا خلال الثلاثينيات.
‎
‎باهي سامحني شدخل الفايكينغ في هذا !!؟
‎
‎لهني الفايكنغ جسدت كل ما تعيشه الموفمون التونسي و المجتمع وين ڨداش من مرة تكلاشي أنظمة الدولة الإستبدادية و القمعية التي لاعبتها أنظمة ديمقراطية لكن هي في الحقيقة ديكتاتورية
‎ودعت ڨروبات تونس ڨاتلهم يزينا خلي نتحدوا و نحاربوا المنظومة الفاسدة و تو في درس آخر نوريكم إلى الفايكنغ ساندت حتى القروبات من بلدان شقيقة يعني مفهوم الحرية و الليبيرتا مولود فينا و طابع ماينجم حتى حد يفكا منا...
‎
‎وين زادا أعضاء المجموعة منجموش يدخلوا بالبرودوي طرح cab ڨال شنوة فيه تحريض سياسي و أنتم تابعين أنظمة و إلي يحلك بحث معادش يسكت
‎
‎وخرجنا و حكينا في بيان أنو المقاومة موش محصورة في سلاح و إلا على فلسطين المقاومة بيدها هي أن تدافع على المبادئ وحقك و حرياتك المهضومة من أي طرف كانو محاربة العنصرية و الجهويات و من بينها أنذاك القضية الفلسطينية إلي عمرها ماكانت تراند بل كنا من أصحاب القضية و ليس من بين من تبنوها.
‎
‎و خدمنا ميساج على بلادنا وزدنا كراكاج بألوان الأنتيفا
‎نجمة و هلال يحموها رجال
‎هو ميساج في أطراح الكاف بعد فشل عملية إرهابية
‎لهني وين بينا أنو كرهنا للأنظمة البلاد الفاسدة مايعنيش
‎كرهنا لتونس.
شباب الفازة إلي شدتني الطرح إلي فات أنو عاودت شفت نفس العفسات الڨديمة خاصة اللون متع الفيموجان البرتقالي

درسنا اليوم عفسة من الأرشيف القديم وين كان أول ظهور عندو نكهة خاصة في الباركور موش كان للجيل القديم حتى الجيل الجديد و القادم وين رفعنا بانز نارا فيهم اليوم في الستادات…
يعني كمية الفخر لتنجم تحس بيها كي تلقى روحك تابع العايلة الكبيرة هذي متتنجمش تتوصف و يكون شرف كبير ليك تتعرف روحك تنطوي ضمن الأقلية لجبدو على تشيفغارا و الليبرتا و الرستا زادا و الجانب الفاشي ضد السلطة و الحكومة في وقت الثورة و الكوكارد و علاقة الترابط الانهائية مع المجموعة و الجمعية و موفوش كان في الستاد وين لقيتهم في الشوارع و الغرافيتيات و البرودويات وين تنسجم معانا كنمط متع معيشة وجسدو مشاكلهم و عبرو إعتمادا على عدة مناضلين عالميين…. تنجم تقول كان فايتينكم بسنين ضوئية

التام هاذم بحر مايوفاش و مايموتش أما كنا من السابقين الأوّلين في وقت القمع و الربريسيون!

الفيرو فردي جاكم لاهو باش يسب و لاهو باش يعارك جاكم للتوعية و تنظيف الموفمون خاصة في كثرة الفوتيكس و أمثال سانشو بانزا