United Curva Soussa

صباح الخير
بالنسبة للي صار في محطة صفاقس : لي هلك "الموفما" و حشاهولكم في الديبلاسمونات هو لي مصبّح للـ 4 متع الصباح بش يحندر و يفك tondar، موش لي عمل ردّة فعل و دافع على روحو.
Sinon تهناو أهوكا ربيناهولكم و في بلادو زادة.
بالنسبة للجمعية و لي صاير فيها : و الله لا نحب نتزنطر و ندخلو في تهديدات و ضرب و مضروب في الentraînement أما والله مانش بعاد علاها.
1000 ماتش amical و صيف كامل يحضرو في السيزون بش يجيبلي نقطة في ثلاثة أطراح . سؤالي لنا للمسؤولين و لسي لسعد جعوب هل واعين بالعام لي أحنا فيه و عمر و تاريخ الجمعية ؟
كان فيبالكم ستانسنا بالهم و ولينا كي نخلطو على الcaf نفرحو راكم غالطين ، مانيش بش نحكي على لي عاملينو معاكم بين عمناول و السنا بين قروبات و جمهور و ناس الغربة خاطرو واجب وطني، أما خريتو فيه و للعام الثالث على التوالي، نسبقو العباد و نقعدو نجريو على بلاصة في الأفريك..
ما تجسوناش يهديكم في النفس لي نتنفسو فيه رانا والله لا يوقفنا حد عليكم كان ربي.
يتبع…..

Base bech tezha layem, base bech tezha loumour
Yarja3 virage mezyen, Publico Matador
Jma3na nafs el chi3ar, jma3na nafs el maryoul
Ozdom ansa li sar, Tifosi ya mahboul ❤️

تقديم المنتوج الجديد للبريڨاد روج 🐾
تقديم الأغنية الجديدة للساحليانو 🔱
صحيح موش نفس الموضوع، أما محلانا كي نتنافسو في الإبداع موش في الإجرام.
RESPECT.

بلاصة في الـ CAF ولا الـ Champions League ؟ ولا البطولة؟ هذا لكل ما يهمناش.
يهمنا في حاجة وحدة: كورة في الشبكة و 12 نقطة والباقي تو يجي.
إسمنا ليتوال.

في خاطر لي يحبوها لولاد جيبوها 🙏

قال رسول الله ﷺ: "سباب المسلم فسوق، وقتاله كفر" – رواه البخاري ومسلم.

بش تحرّر غزة لازم البلدان العرب يد وحدة،
بش توحّد العرب لازم الشعوب في بلدانها يد وحدة،
بش توحّد الشعب لازم الجهات و آلولايات لكل يد وحدة،
بش توحّد الجهات و آلولايات لازم الحوم لكل يد وحدة،
بش توحد الحوم، لازم الڨروبات لي في وسطها يكونو يد وحدة مهما كانت الجمعيّة، خلّي عاد كان ڨروبات من نفس الكورفا..
فهمتو تو قداه أحنا بعاد على الرشمة؟
فيراجك محتل كي فلسطين ما فماش فرق كبير، محتل بسياسة فرّق تسد لي كل ما نقولو الكيان هذا ما يفرقو شيئ شوية وقت و نشوفوه تفرڨع لكيانات أصغر ..
كلامي ممكن يوجع، أما ظاهرلي الفرق بيناتنا و بين فلسطين لي هوما بالرسمي SOLIDAIRE و RESISTENZA ، و أحنا عملناها لوغة و تصويرة بش العباد تبرتاجي و نغذيو النقص لي فينا كي يقولولك "Respect" في commentaire .
سامحونا قصينا عليكم، تفضلو كملو تڨاتلو! خلي نشوفو شكون ڨروبو و حومتو أڨرح و شكون الرخ لا.
سامحونا أحنا الجبورة و خاطينا الموفما و MENTALITA.
يلّا ! شرّع و أرمي كعبة فلام تشعل في وجه ولد جمعيتك المسلم كيفك!
هو كان مات نرمال تا نعملولو Graffiti ، و إنتي كي تطيح و تتحكم بعمرك حبس تو لولاد يعملولك ميساج فيه LIBERTA PER LAJ3EB

لا كبار الحومة ماتو، و لا وليتو شرفا ..

عمرها ١٠٠ سنة، عاشتهم تلمع في سمانا بش تضوينا و تلمع في سماهم بش تجهرهم.
و ما وصلت لمعت كان بينا، بالبريغاد و بالساحليانو و بالفناتيك، و بالهولز ب النو فير و بالراد فانز زادة ..
أغزرولو مليح الشعار هذا. أكبر منا الكل و أكبر من كل مشكلة موجودة و صارت و تنجم تصير.
مختصر الحديث، كان إنتوما لي حبيتوها و إنتوما لي سافرتو لآخر الدنيا علا جالها و شديتو الحبوسات و بتو في البرد في الدخلات و منعتوها مالموت من جيوبكم، كملو لي بنيناه ١٠٠ سنة و قدروها و هيا نلقاو حل و نتسامحو الناس الكل.
مانيش بش نحكي على حتى مشكل بينات الزوز، أما نحكي عالحل.
و الله العظيم لا فيكم واحد بش يخرج موش نورمال و باندي و ما يرشفهاش لحد بلي صار، أما لكلنا بش نخرجو ظالمين الشعار هذا كان ما نصليوش على النبي و ننساو أي حقد و أي تشنج صار مابين الزوز السنين لي فاتو
لكل.
مانيش بش نقلكم مع بعضنا أقوى، خاطر حتى قارة كاملة بلي يكرهنا فيها يعرفها الحكاية هذي.
ليتوال يا دولة ، و ستاد سوسة يولي يرعش براس الكلب و poseidon في الفيراج ، و براس الصيد في الشنوة.

REMINDER.

أحلىsecteur قربة 😂😂😂