KwetuHabari

🆕️
Mkurugenzi wa Kampuni ya Mkwawa, ambaye pia ni Mdhamini Mkuu wa mashindano ya Mkwawa Rally of Tanzania yanayohusiana na kalenda ya African Rally Championship (ARC) Ahmed Huwel Mkwawa, ameweka wazi dhamira yake ya kukuza na kuendeleza vipaji vya madereva chipukizi wa mbio za magari hapa nchini.

Huwel amesema lengo la mashindano hayo ni kuwawezesha kushiriki kwenye mashindano ya kimataifa na hatimaye kuliletea taifa heshima na ushindi.

Akizungumza mkoani Morogoro wakati wa kufunga mashindano hayo yaliyodumu kwa muda wa siku tatu, Ahmed amesema kuwa, Tanzania imebarikiwa kuwa na vijana wengi wenye vipaji ambao wakipewa nafasi, mafunzo na msaada wa kutosha, wana uwezo mkubwa wa kung'ara kimataifa.

Katika mashindano hayo, Ahmed pia ameshiriki na kuibuka mshindi wa tatu, jambo lililoonyesha dhamira yake sio tu k**a mdhamini bali pia k**a mshiriki mwenye uwezo mkubwa.

Ahmed ameongeza kuwa yeye pamoja na makampuni yake wako tayari kushirikiana na vijana wanaoonyesha vipaji katika mchezo wa mbio za magari, kwa kuwapatia mafunzo, vifaa na kuwafungulia fursa za kushiriki mashindano mbalimbali huku akitoa wito kwa taasisi za serikali, mashirika binafsi, kampuni na wadau wengine wa michezo kuungana katika juhudi hizo ili kuhakikisha kuwa Tanzania inakuwa na mashindano yenye viwango vya juu kimataifa.

🆕️
Mkuu wa Mkoa wa Arusha Mhe. CPA Amos Gabriel Makalla ameiagiza Mamlaka ya Maji safi na usafi wa Mazingira Wilaya ya Karatu kuongeza kasi katika mchakato wa kumpata Mkandarasi wa kupeleka Maji kwenye Matenki pamoja na usambazaji wa maji kwa wananchi wa Wilaya ya Karatu Mkoani Arusha kutoka kwenye chanzo cha Maji cha Bwawani.

CPA Makalla ametoa maelekezo hayo leo Jumatatu Septemba 22,2025 Mjini Karatu kwenye ziara yake ya kukagua utekelezaji wa shughuli mbalimbali za maendeleo, akitembelea na kukagua chanzo cha Maji cha Bwawani, Karatu Mjini, Chanzo ambacho kiliharibiwa na Mafuriko ya Mvua na kuathiri upatikanaji wa maji Karatu na hivyo kulazimu serikali kutenga fedha ili kunusuru chanzo hicho cha Maji ambacho kimekuwa tegemeo la uzalishaji maji kwa Mji wa Karatu pamoja na maeneo ya jirani.

Mhe. Makalla pia ameipongeza Mamlaka ya Maji safi na usafi wa mazingira Karatu kwa usimamizi mzuri wa utoaji wa huduma za Maji kwenye Wilaya hiyo ambao umefikia asilimia 71 kwasasa, akihimiza Jamii pia kushirikishwa na kupewa elimu katika utunzaji wa vyanzo vya maji vilivyopo kwenye maeneo yao.

"Niwasihi tushirikiane pia na wananchi wa maeneo haya kuona kwamba tunatunza vyanzo vya maji lakini pia na sisi wenyewe k**a Mamlaka ya Maji kuendelea kutoa elimu ya utunzaji wa vyanzo vya maji na kutokuchafua vyanzo vya maji." Amesisitiza CPA Makalla.

Awali katika taarifa yake, Meneja wa Mamlaka ya Maji Karatu Injinia Steven Siayi, amemueleza Mkuu wa Mkoa kuwa serikali imeshatoa zaidi ya Milioni 145 kwaajili ya kufikisha maji kutoka kwenye chanzo hicho kwenda kwenye tenki la ujazo wa maji Lita 225, 000 na baadae kusambaza Maji kwa wananchi, akisema kisima hicho kilichonusuriwa kina uwezo wa kuzalisha Maji Lita 28,000 kwa saa.