Rehab Mohamed

النجاة من "جُب اليأس "

في الوقت اللي بنسمع فيه
أخبار حزينة أو نمر بظروف صعبة
بنبقى محتاجين نقف وقفة مع نفسنا ،

أول سورة بتيجي في بالي هي
سورة سيدنا يوسف
" أحسن القصص "

بعتبرها روشتة نفسيه لما بحس
إن الدنيا قفلت في وشي
بلاقي فيا معنى
المرونة النفسية (Resilience)

اما بيجي عليا وقت يحس فيه إني
في نفق ضلمه مش شايفه في أخره نور …
فأفتكر
" و لا تيأسوا من روح الله "

و بعرف إن الأمل قرار مش مجرد شعور
و إن في يسر كتير هيجي بعد كل عسر

و إن بعد ما سيدنا يوسف
اتباع عبد و إتظلم و اتسجن
موقفش يفكر بعقلية الضحية

لكن كان دايماً " من المحسنين "

و انه يكون نافع في المكان اللي هو فيه
و ازاي يكون عندي ( post- traumatic Growth )
و اقدر اقف من تاني بعد كل وقعة

و ان النجاة مش مجرد رجوع عادي
لكن رجوع انا فيه أقوى

و إن مهم جداً اعرف
اي المعنى من حياتي و ليه عايشه

زي ما دكتور فيكتور فرانكل بيقول إن

اللي عنده ( لماذا ) يقدر يعيش علشانها
و يتحمل أي( كيف )

سيدنا يوسف كان عنده
رسالة و يقين بالله

فإتعلمت إن الربط بالله بيساعدني
الاقي المعنى من الابتلاء فأقدر أكمل

و اتعلمت إن كل شر ظاهر
وراه خير كبير خفي

و إن حالة اليأس اللي بتجيلنا بتيجي بسبب
رؤيتنا الضيقة للحظة الحالية بس

عشان كده مهم أوي إننا دايما
نحمد ربنا على أدق التفاصيل في يومنا
اللي حقيقي بتسندنا في المواقف دي

لما سيدنا يعقوب قال
" إنما أشكو بثي و حزني إلى الله "

إتعلمت إن اللجوء بيكون للقوي " الله "

ثم المتخصصين اللي يقدروا يساعدوني مش للناس

و إن دايماً ربنا هيرسلي " السَيَّارَة "
اللي يساعدوني في محنتي
و يساعدوني انجو من الجُب

بس أنا استمر في السعي

" إن ربي لطيف لما يشاء "

اللطف أحياناً يكون على شكل تأخير ،
إبتلاء يقوي شخصيتك و يخليك أحسن ،

بلاش تيأس في نص الطريق
قبل ما توصل
لل " تمكين "

#الأمل

🧭 بوصلة الثبات

في وسط الاحداث الكثيره اللي ورا بعضها
احياناً بنفقد قدرتنا على التميز بين
"ما يجب فعله " و " ما يستهلكنا بلا فائدة "
النجاة الحقيقية في الاوقات دي بتتطلب شجاعه كبيرة
لمواجهة نفسك قبل مواجهة الأخبار
انتي محتاجة تعرفي …..

١- وعيك الذاتي و مدى صدقك مع نفسك مهم جدا
و هو أول خطوة لإتزانك النفسي ،
تحديد أولوياتك و قيمك و ترتيب أدوارك مهم جدا .

٢- فقه الأولويات ( Focus on what matters )

وقت الفتن هو وقت الإستثمار في المضمون
علم النفس الإيجابي بيساعدك تختاري ايه اللي محتاجه تركزي عليه
"مفهوم السيطرة"و هو إنك تركزي كل طاقتك في دايرة تحكمك و اللي ليكي فيها تأثير حقيقي .
و إن أولويتك تكون ثباتك النفسي ، صلاتك ، آمان أسرتك و إتقانك لدورك اللي بتقومي بيه اي كان هو ايه .
فلو مش هتكوني جزء من الحل متكونيش جزء من الدوشه.

٣- فلسفة "لا تستخبر و لا تخبر "

الفلترة الذهنية مهمة جدا لإن الدماغ ليها سعة إستعابية ،
لو ملتيها بالأخبار المضلله و الأراء المتضاربه و المعلومات الغير مؤكدة مش هيكون في مساحة للسكينة و مش هتعرفي تقومي بأدوارك الأساسية .

٤- "مِن حُسنِ إسلامِ المرءِ تركُه ما لا يَعْنيه"

إتعلمي الصمت الإيجابي و إعرفي إن أحياناً الصمت بيكون هو قمة الإيجابية ،
و إن الإنسحاب الذكي هو الحل الأمثل للحوارات اللي مبتنتهيش و مفيش منها فايدة ،
ووقفي scrolling و متابعة الناس
اللي واخدين التلاعب بمشاعر الناس و عقولهم مصدر دخل و مصدر لإشباع نفسياتهم المريضة.

٥- حولي ضبابية القلق لغيمة سلام

إتعلمي تصنعي النور الخاص بيكي وسط كل عتمة
و تحولي طاقة قلقك و خوفك
لطاقة عمل و عبادة ،
و إفتكري حديث الرسول ﷺ: "العبادة في الهرج كهجرة إلي"

دمتم في رحاب الله

🤔🤔 عارفه إمتى تحسي إنك مقصرة مع أولادك !!!

❌ مش لما الغسيل يتراكم و دولاب اللبس يتبهدل،
❌ ولا إن الشقه مكركبة،
❌ و لا لما الأكل يتأخر شويه،
❌ ولا لما مياكلوش أكل صحي النهاردة،
❌ ولا لما يفوتكم التمرين،
❌ ولا لما يجيبوا درجات مش حلوة في الإمتحان،
❌ ولا لما يحرجوكي قدام الناس.

😞 طول اليوم بنجري …

بين اكل، تنظيف، مذاكرة، تدريبات، تمارين……
و في اخر اليوم نحس بتأنيب ضمير و إحساس التقصير
و الحقيقة إن اي تقصير دنيوي ممكن يهون

📍عارفه اي التقصير اللي يوجع بجد …..

🖋️ هو لما ننسى نزرع جوه قلوبهم إن الدنيا دي محطة و مزرعة بنزرع
فيها اللي عايزين نحصده في الآخرة .

🖋️ لما نعلمهم إزاي ينجحوا في المدرسة ،و ننسى نعلمهم إزاي ينجحوا
في الوقوف بين إيد ربنا.

🖋️ لما نبني لهم بيوت في الدنيا ، و ننسى نعلمهم إزاي يكونوا من أهل
الجنة.

🖋️ لما نهتم نبني مستقبلهم الوظيفي ، وننسى نبني مستقبلهم الأبدي.

🖋️ لما نهتم بصحة جسمهم ،و ننسى نغذي روحهم.

🖋️ التقصير لما يومنا يخلص من غير ما نربط قلوبهم بربنا.

🖋️ لما نحصر إدراكهم في " متعة لحظية " أو " إنجاز مادي "
من غير ما نربطهم بشئ أكبر من الذات،
فيعيشوا حياتهم مفتقدين المعنى الحقيقي من وجودهم،
"غياب الآخرة كهدف أسمى "
بيأثر على ولادنا في الدنيا قبل الآخرة
و يخلي عندهم قلق و خوف لما يتعرضوا لاي فشل دنيوي .

🖋️ التقصير في ربط قلوبهم بالآخرة.. هو تقصير
في أمانة "رعاية الرعية" اللي ربنا هيسألنا عنها.

🖋️ خسارتنا لأولادنا مش بس فراق،
لكن إننا نسيبهم للاذى،
من غير ما نعلمهم إزاي ينجو في الدنيا و الآخرة.

🤩 عارفه اي الإيجابي في إنك تحسي بالشعور ده !!!!

💡الشعور ده هيكون البوصلة اللي هتغير مسار حياتك.

💡شعور تقصيرك تجاة " آخرة أولادك " هتكون علامة
حياة جديدة في قلبك.

💡 هيخليكي تبصي للمستقبل ،
و تطلعي من الغفلة و قصر النظر الادراكي.

💡هتبني عندهم هدوء داخلي ونظام صمود نفسي قوي
يحميهم لإنك ربطتيهم بغاية كبيرة تتجاوز حدود الدنيا.

💡 إدراكهم لمعنى العدل المطلق لله و وجود الجنه،
هيساعدهم يمتلكوا صحة نفسية قوية
تخليهم يقدروا يواجهوا أي ظلم أو حرمان في الدنيا.

🔦 خلي شعورك بالتقصير هو ✨النور✨
اللي يخليكي تبدأي النهاردة بداية جديدة مع نفسك و مع أولادك
بخطوات بسيطة و مستمرة :-

1️⃣ " قاعدة الله يحبك و يراك "
مهم نزرع جواهم الحب لربنا
و نخليه هو الدافع اللي بيحركهم
بدل اسلوب التخويف و الترهيب،
مثلا تقولي
( سبحان الله بص ربنا كريم ازاي و رزقنا أكل حلو ،
إدعي ربنا هو سامعك و قريب منك،
ربنا بيحبك اوي عشان ساعدت أخوك، ……)
خلي ذكر ربنا في مواقف مرتبطه بالإمتنان و الجمال و الرحمة ….

2️⃣ " حكاية قبل النوم "
إحكي لهم حكايات بطريقه بسيطه تعرفهم عن الجنه،
و خليهم يتخيلوا اللي نفسهم فيه،
خلي قلوبهم تشتاق للمكان اللي اتخلقنا علشانه .

3️⃣ " ادعي معاهم بصوت مسموع و بطريقة سهلة "
( يارب يبارك لي فيكم و يجمعني بيكم في الفردوس الأعلى ) ،
لما يلاقوكي بتذكري الآخرة في دعاكي هيفهموا بشكل تلقائي
ايه هو (الشيء الاغلى في نظرك ).

🤝 حابه أفكر نفسي و أفكركم إن ….

✨أولادنا زي ما احنا عايشين مش زي ما احنا حابين ✨

و إننا غير مطالبين بالمثالية ولا الكمالية،
لكن مطالبين بالسعي و تحديد النية و الوجهه.

✨ ليه مصممه تخلي بيتك نسخة من بيوت مش شبهك ؟؟

مع صور البيوت المثالية سهل جدا نحس إن لازم بيتنا يبقى بصورة معينة نفس النظام ، الهدوء ، الاطفال المثاليين ،
جربتي تسألي نفسك :

🔘 إنتي فعلا بتصنعي ذكريات …. ولا بتتنافسي مع بيوت تانيه ؟

🔘 إنتي بتجري ورا صورة مثالية…. ولا ورا أمان حقيقي في بيتك ؟

🔘 إنتي عايزه بيت مريح …. ولا بيت يطلع حلو في الصور بس ؟

🔘 ليه بنقيس نفسنا بميزان مش بتاعنا ؟

❌ أخطر حاجه ممكن تعمليها إنك تحاولي تخلي بيتك نسخة من بيوت تانيه …… لان بيتك بصمتك إنتي .

🖋️ لما بتضغطي على نفسك بصورة مش شبهك :-

▪️ بتزودي توترك و إحساسك بعدم الرضا لما بتلاقي النتيجه غير الصورة المثالية اللي رسمتيها .

▪️ بيقلل إحساس الإنتماء و الأمان في البيت .

▪️ بتوصلي لأولادك بطريقة غير مباشرة إن المقارنة هي المعيار .

▪️ بتقللي عند أولادك فكرة تقبل الإختلاف .

🖋️ محتاجين ندخل رمضان السنة دي بروح مختلفة و نوايا جديدة ،

🖋️ و نخلق بيئة صحية تدعمنا و تدعم أولادنا .

🖋️ و بيوتنا تكون بيوت مبنية على المرونة و التجارب اللي بنشكلها حسب
القيم و الأهداف المختلفة المبنية حسب طبيعة كل أسرة .

🖋️ خلي بيتك بيت واعي مش كامل و لا مثالي في الشكل ، متأسس على القيم و نقاط كل واحد فيكم جوة البيت .

🖋️ إصنعي في بيتك ذكريات خاصة بيكي و بأولادك تعيش مع أولادك طول العمر ،
و حابه أفكرك ولادك مش هيفتكروا الاشياء لكن هيكملوا حياتهم بالمشاعر و القيم اللي اتزرعت جواهم .

🖋️ عززي شعور الامان و الإنتماء جوه بيتك مع أسرتك بعادات عائلية مميزه تدعم أفكارك و قيمك .

🖋️ خلي بيتك يشبه قلبك …. و كل ما تلاقي نفسك بتقارني قولي لنفسك "بيتي مختلف و ليه طبيعة خاصة"

الخطة عبارة عن خطوات و أسئلة مرتبة تقدري تطبقيها فورًا تساعدك في تحديد الهوية المناسبة لبيتك 🤍

📍علقي ب " بيتي بصمتي " أو تواصلي من خلال الرسائل و هتتبعتلك الخطة ،
🎁 و هتكون مجانية لكل أم حابة تبدأ بوعي جديد .

✨ 🌙كل عام و أنتم بخير ✨

مش كل ظاهر بيعبر عن باطن :-

🌙قبل دخول رمضان …..
حابّة أفكر نفسي وأفكركم بحاجة مهمة في علم النفس اسمها…..

📍“التحيّز للانطباع الأول”

و هي إننا أحيانًا بنحكم بسرعة… من الشكل بس.
لكن النضج الحقيقي إننا نفصل بين الصورة والمضمون،
ونقيّم الفكرة بذاتها،
ونرجع الاختصاص لأهله.

مش كل التزام ظاهر معناه علم،
ومش كل علم لازم يبان في الشكل،
و مش معنى إن حد شكله ملتزم يبقى مؤهل يتكلم في الدين،
ومش كل عابد يبقى فقيه،

الدين مسؤولية، والكلام فيه أمانة.
و الفتوى مكانها عند أهلها،
و قبل ما نصحح لغيرنا،
و قبل ما نحكم على نوايا الناس،
وقبل ما نشارك فتوى أو نختلف في حكم…
نسأل نفسنا:
هل أنا مؤهل أتكلم؟
ولا الأولى أرجع لأهل العلم و الفتوى؟

لما نقلل الأحكام السريعة،
ونركز على القيم والمعنى،
بنخلق مساحة أهدى و أنضج .
خلّينا نهدّي الأحكام،ونركّز أكتر في قلوبنا و عقولنا.

دمتم في رحاب الله



-discovery

نية مش مثاليه

🌙ازاي نعيش رمضان بقلب مطمئن مش مثالي …..

كتير مننا بيبدأ رمضان بمنتهى الحماس ، بعدها بنحس بفتور ، بعدها ضغط و تقصير و تبدأ هنا رحلتنا في جلد الذات مع نفسنا .
الحقيقة ان مع فرحتنا برمضان و الزينه و تجهيز البيوت بننسى نجهز النفوس .
بنعتمد على حماسنا و خطتنا المثالية،
بس بنلاقي ان الحماس ده مبيكملش معانا ،
و بيجي وقت و بنقع بعدها و مبنقدرش نكمل خطتنا المثالية اللي كانت في مخيلتنا .
و بنخرج من رمضان منهكين و مضغوطين و بعيد أكتر زي الاول و يمكن أكتر .

📍خمس نقاط أساسية محتاجين ناخد بالنا منها :-

1️⃣ إني مخططتش بمثالية ، و لا أضغط على نفسي و تكون أهدافي كبيرة و كتيرة أكتر من قدراتي .

2️⃣ إن نيتي مش لازم تكون مثالية ، ممكن يكون ده أبسط رمضان يعدي عليا ، بس أصدقهم و أخرج منه بقيم تساعدني في حياتي و تستمر معايا بعد رمضان .

3️⃣ إني أحاول أفهم طبيعتي البشرية و أكون رحيمة بنفسي .

4️⃣ أقرب على قدي ( و أكون عارفه فعلا اي استطاعتي )
و أعرف ازاي ارجع لما أقع .

5️⃣ رمضان بيجي يقربني مش يبعدني و لا يضغطني .


دمتم في رحاب الله



-discovery

مش كل اللي بيلمع هيفيدك ……

✖️ في زمن بيظهر فيه الكل في صورة الخبير ،
✖️و الحكم على الناس بقى بعدد المتابعين و مشهورين و لا لا ،
✖️في زمن الشهرة فيه بقت بديل للعلم ، و اهتمام الإنسان بإنه يكون مشهور أكتر من إهتمامه هو هيستفاد و هيقدر يفيد فعلا ولا لا …..
✖️و ان النجاح لازم يكون في صورة خارقة عشان أحس بنجاحي ،
✖️ومين ياخد أكبر عدد من الألقاب قبل إسمه ( أول إمرأة في الشرق الأوسط…..، صاحبة أحسن إختراع فانكوش ….. )
✖️لازم أكون المثالية في كل شيء و حياتي أحسن حياة و أولادي أحسن أولاد وشغلي و عربيتي …….

📍 كل ده بيحطك تحت ضغط كبير إنك دايما حاسة إنك بتجري و انتي مش عارفه دا يناسبك و لا لا .

📍 و بيحسسك ان الحياه صعبة بدل ما تتعلمي تواجهي و تكوني نسخه افضل من نفسك رغم صعوبة الحياة ، و بالتالي بتاخدي قرارات تدمري بيها حياتك و تخلقي لنفسك المبررات .

📍ضعف ثقتك بنفسك و إنك شايفه نفسك فاشله و مش محققه حاجه و إنك بتلومي نفسك على الفشل بدل ما تحاولي تفهمي طبيعتك البشرية .

دا بيحصل لاسباب كتير منها :-

١- تأثير الهالة (Halo Effect)

و هي إننا بنميل تلقائيا إننا نصدق الشخص المشهور أو اللي شكله واثق من كلامه ، و لما نشوف ناس كتير متابعة الشخص ده ، عقلنا يفسر ده إن ((أكيد هو صح ))
وبنفترض تلقائيًا إنه فاهم في كل حاجة ، حتى لو مفيش دليل علمي على كلامه .

٢- الثقة الزائفة (Overconfidence Bias)

فيه ناس بتتكلم بثقة عالية جدًا ، والثقة دي بتأثر علينا نفسيًا
حتى لو المحتوى سطحي أو غير دقيق علميًا بنصدقه.
بيعتمدوا فيه على العوامل الخارجية السطحية زي المظهر أو الإنجازات الوهمية و الإيجابية المزيفة و إنك اما تفكري بإيجابيه كل حاجه في حياتك هتتحل و مش مهم بقى ظروفك الحقيقيه و الواقع اللي إنتي عايشاه .
مع ان علم النفس الإيجابي نفسه بيحذر من التبسيط المخل اللي بيشوه المعنى اصلا ، عشان ده علم مبني على أبحاث وتجارب ،
مش جُمل تحفيزية جاهزة و حلول سحريه سريعه و سعادة وهمية وإيجابية سامة (Toxic Positivity).

الحقيقة ان :-

▪️عدد المتابعين مش دليل على علم حقيقي ، و مش شهادة خبرة ولا دليل إن الشخص ده فاهم .
▪️الانتشار سهل، لكن العلم الحقيقي محتاج دراسة، خبرة، وتطبيق واعي… و المعلومة الغلط بتضرك أكتر من الجهل نفسه .
▪️قبل ما تاخدي نصيحة نفسية أو تمشي ورا كلام حد ، انتي محتاجه تسألي نفسك..
هل ده مبني على علم؟ ولا مجرد كلام حلو بارتاح و أنا بسمعه ؟

اختاري اللي تتابعيه بوعي و عقل فاهم ، لان حياتك أغلى بكتير من إنها تكون مبنيه على ترندات .
و متكونيش جزء من صناعة التفاهة

دمتم في رحاب الله



-discovery

🖋️ رسالتي …..

لكل أم بتتمنى تعيش حياة طيبة …. بيت هادي تحس فيه بالآمان .
لان الأسرة السوية تبدأ ب ( أم واعية و مرتاحة )

و من خلال دراستي لعلم النفس الإيجابي و علوم الأسرة و التربية ،
و ككوتش و مدربة معتمدة ، و ممارسة للانياجرام ،

هساعدك :-
📍تحولي التوتر و الضغط —> لطمأنينة ،
و الفوضى —> لنظام هادي ،
و الانشغال —> للإتزان .
📍تتعرفي على قيمك و قيمتك .
📍تعززي ثقتك بنفسك و تحافظي على توازنك النفسي .
📍تخططي لهدفك صح .
📍 تبني تواصل أفضل جوه البيت .
📍تحطي حدود صحية من غير خسارة .
📍تربي تربية واعية مبنية على القيم و الأخلاق .

🤍 إنتي مش لوحدك …. أنا هنا عشان أكون معاكي في رحلتك 🤍

أيام جايه تقربك 🤍
مش تكسرك 😔

🧐 فاكره أول يوم حطيتي فيه هدف وقولتي لازم أحققه ؟

😍 قلبك كان فرحان و عندك همه و نشاط ؟

🫩 و بعد شويه … حسيتي بتعب ، كسل ، إحباط ، و إنك مش قادرة إنك تكملي …. فمبتكمليش 😔 ؟

😏 سألتي نفسك ليه بتحمس في البداية و بعدها مبتستمريش ؟

😣 حسيتي بيأس و انتي بتقارني نفسك بغيرك و ليه هما مبسوطين و عرفوا يعملوا ده و انتي لا ؟

🔦 إجابات كل الإسئلة دي و أكتر … هنعرفها مع بعض في اللي جاي ،

🤍 رحلتنا مع بعض مش مبنية على كلام تحفيزي بس ……. عشان ببساطة مش كل يوم هيكون عندنا نفس الهمه العاليه - الشغف - ☺️
لكن كل يوم تقدري تختاري تكملي و لو بخطوة واحدة بس صغيرة 😉

🖋️ هنعرف ازاي نمشي خطوات بسيطة تخليكي قادرة تكملي من غير ضغط و لا إحباط .

🤍 نختار قيم تشبهنا مش تضغطنا 🤍

حجز الجلسات الفردية عن طريق الخاص

‏

🤍 بيني و بين 2025 🤍

🖋️ وجدت السكينة الحقيقية و الامان الغير مشروط في القرب من ربنا،
و إن علاقتي بربنا علاقة مش محتاجة مثالية و لا كمالية لكنها بتتبني على إخلاص للنية و قلب صادق و رجوع دايم،
يمكن علاقتي بربنا مكنتش دايماً ثابته لكن مهم تكون دايماً موجوده .

🖋️ إنشغلت بتهذيب نفسي و إرتقاء عقلي، فأحترمت نفسي و فرضت إحترامي .
مشغلتش نفسي بأخبار الناس و لا كان عندي فضول اعرف أمور متخصنيش،
فتجاهلت الجاهلين و الفارغين ، و صاحبت أصحاب النفوس النقية و العقول الراقية.

🖋️ معتبرتش رضا الناس مميزات ليا لأني لو استمديت منهم قيمتي تعبوني و لو خفت ذمهم قيدوني .

🖋️ أيقنت إن الحياه عمرها ما هتكون كامله و الطبيعي إن فيها نقص
مش هيكمل غير بالرضا ،
و إني أكون على يقين دايماً إن اللي أنا فيه حاليا هو أفضل إختيار
كان ممكن يحصل لي .

🖋️ اتعلمت إن أحياناً بعض الخسارات ( خسارة أشخاص ، مواقف ، فرص كنت بحلم بيها …..)
أرباح متأجلة أو حماية ليا أو لحكمة أنا معرفهاش دلوقتي و ممكن معرفهاش خالص ، بس الأكيد إنها الأنسب و الأصلح ليا .

🖋️ مبقتش أقيس النوايا بالكلام ،
النوايا الله وحده اللي يعلم بيها ، لكن الأفعال بس اللي بتكشف الصادق من المتصنع .
" فكثير من الود يقال و قليل منه يثبت عند الشدة "

🖋️ الخلافات و وجهات النظر المختلفة خليتني عندي نظرة أوسع ، علمتني أواجه ،
و إن كل خذلان علمني الحدود ، و كل فشل علمني أراجع طريقي بلطف .

🖋️ الصبر ….. عرفني نفسي ،
الصبر على البلاء ، الصبر على الأذى من القريب و سوء فهم
الغريب ، الصبر على حاجة اتمنيتها ، الصبر على إنك تقف كل مرة وقعت فيها و تحاول تاني .
و إن القوه الحقيقية في الثبات و الصمود مش المثالية .

🖋️ السكوت أحياناً صوته أقوى من الكلام ،
السكوت مش دايما علامة رضا ،
ممكن يكون رفض ، وجع ، نضج ، إحترام ذات…..و أحياناً بيكون
فيه رساله أوضح و أقوى من أي كلام ممكن يتقال ،
لكنه مش دايماً ضعف .

🖋️ مش عايشين مع ملايكة بس مش وسط شياطين ،
هتقابل المعجب بشخصيتك و شايفك قدوة —>ساعده و شجعه.
و في اللي نفسة يكون زيك و في مكانك —> إتمناله الخير و إدعيله .
و في اللي هيشوف مدى قبحه قدام نقائك فهيحاول يشوه صورتك —> دا هيفضل وراك
فمتشغلش بالك بيه لانه مش هيعرف يواجهك عشان تأثيرك
أقوى من قدرته على المواجهة فسيبه وراك و ركز في طريقك ،
(و أعرض عن الجاهلين ).

🤲 اللهم لك الحمد على عام مليان ستر و صحة و رزق
وحفظ و لطف و رحمة و عفو و نعم لا تعد و لا تحصى ….

🤲 ﴿فاللَّهُمَّ إِنِّي أَعُوذُ بِكَ مِنْ زَوَالِ نِعْمَتِكَ، وَتَحَوُّلِ عَافِيَتِكَ، وَفُجَاءَةِ
نِقْمَتِكَ، وَجَمِيعِ سَخَطِكَ﴾