Rana Mahmoud - Self love & Relationship Coach

بتكتبي خطة كل أسبوع…
وتاني يوم بتحسي إن ولا حاجة ماشية زي ما كتبتي؟ 😅

بتبقي متحمسة جدًا في أول يوم،
لكن بعد كام يوم الخطة تقع منك،
وتبدأي تلومي نفسك: “أنا مش ملتزمة… يمكن أنا مش منظمة.”

بس الحقيقة؟
الخطة مش فاشلة…
هي بس مش بتاعتك.

لأنك يمكن كتبتي خطة مثالية على الورق،
مش خطة بتفهم واقعك وطاقتك 💛

في سيشن “الخطة الأسبوعية” من لنسعى،
هتتعلمي إزاي تعملي خطة بتمشي معاكي،
وتديكي وقت لنفسك وسط كل مسؤولياتك 🌿

لو نفسك الخطة تبقى حقيقية مش نظرية ✍️
اكتبيلي “لنسعى” وهبعتلك اللينك 💛

عمرك حسيتي إنك أول ما تتضايقي… كل اللي كنتي ماشيه عليه بيتوقف؟
و تقعدي تعملي scrolling و تأنبي في نفسك ؟

تفتحي الخطة، تقولي “بكرا”، وبكرا ييجي بنفس الإحساس.
وتبدأي تلومي نفسك…
“أنا مش بعرف أكمل، كل مرة ببوّظها.”

بس الحقيقة إنك ما بتبوّظيش حاجة…
إنتي بس مش فاهمة مشاعرك بتقولك إيه.

في سيشن “المشاعر” من لنسعى 💛
هنتعلّم مع بعض إزاي نتعامل مع الإحباط والملل والحزن
من غير ما نغرق فيهم، ولا نهرب منهم.

هتعرفي ٥ خطوات عملية،
تخليكي تمشي بخطوات ثابتة حتى في الأيام التقيلة 🕊️

لأن اللي بيكمّل مش اللي ما بيحسش…
اللي بيكمّل هو اللي بيتعلم يتحرك رغم إحساسه 💛

بدأت كلامها " انا يأست من نفسي😔"

و ختمت كلامها ب " حاسه براحة و حماس و فهمت اني مش انا المشكلة 😍"

في سيشن مع أم مثابرة بدأت كلامها

" انا نفسي اعمل حاجات كتير اوي بس بسوف طول الوقت يا رنا .. انا يأست من نفسي 😔"

بدأنا السيشن و هي كانت حاسه ب غضب و إحباط و يأس 😓

اختارت الهدف اللي كان نفسها تشتغل عليه و هو انها تسمع كورسات هي كانت اشتركت فيها و مكملتش حضورها

بدأنا نستكشف ايه الأفكار اللي موقفاها

لقينا لواازم كتييير
انا لازم اكون مركزة عشان استفيد
انا لازم اكتب يا إما اكني مسمعتش
انا لازم يكون مزاجي حلو عشان اعرف انجز و انا مزاجي معظم الوقت مش حلو
انا يمكن مش جاهزة .. انا فيا مشكلة

و بعد مطلعت كل الأفكار و القناعات دي بدأنا نتناقش و نفك واحدة واحدة منهم

و هي بنفسها اللي حولت كل فكرة معطلة لفكرة تانية مبنيه على حقايق و داعمة 😍😍👏@

✅ لازم اكون مركزة >> انا مش هقدر اقيس تركيزي غير لما ابدأ اصلا .. و التركيز شئ مش ثابت اصلا طول الوقت .. انا هقدر اقيمه و اتعامل معاه لما ابدأ مش قبل مبدأ

✅ لاازم اكتب >> انا ممكن اسمع الشرح و هستفيد كتير ( من المحتوى و من فكرة الإنجاز نفسها ) و اما يكون نِفسي اكتب حته ( عشان انا بحب اكتب لكن مش لازم) هوقف و اكتبها حتى لو على الموبيل و هحدد وقت مناسب للكتابة فقط للتطبيق

✅ مليش مزاج >> المزاج الحلو هيجيلي بعد منجز مش قبل ابدا .. مش محتاجة الحماس قبل البدء .. مجرد مهبدأ اصلا غالبا مراجي هيتحسن

✅ انا اللي فيا المشكلة >> انا معنديش مشكلة .. انا محتاجة بس اتعامل مع افكاري بطريقة صح

دا كان كلامها هي اللي هي قالته بعد متناقشنا في القناعات و الأفكار

و بعد توقف فترة طويييله عن اي انجاز الحمدلله ربنا رزقها الفتح و بعتتلي الكلام اللي في الصور تحت 😍😍

بفكرك ❤️
المشكلة مش فيكي انتي .. المشكلة في الأفكار المعطلة .. اللي انتي مسؤولة تغيريها 💙

قفشتي حاجة من الأفكار اللي فوق دي عندك و بتعطلك ؟؟

لما تتعلمي عن الإحتياجات النفسية انتي مش بس هتتعرفي على إحتياجاتك و تعرفي هي ازاي معطلاكي و يبقى عندك خطوات واضحة لفك العطلة دي .

انما كمان هتقدري تتعرفي على الإحتياجات النفسية اللي ممكن تكون عند جوزك او مامتك او بابكي او اختك و بالتالي تقدري تبني معاهم علاقة اقوى بكتير مبنية على المعرفة الحقيقية

تخيلي انك عرفتي ايه اعلى احتياج عند جوزك و بدأتي تشوفي قلقه الزيادة و سيطرته بطرييقة تانية خالص .. بدأتي تشوفي الإحتياج اللي بيزقه على انه يعمل الحاجات اللي بتضايقك و بالتالي تقدري تتعاملي مع المشاكل من غير شخصنة .. تتعاملي بوعي و نضج ..

كمان هتقدري تتعرفي على اعلى إحتياجات عند بنتك او ابنك و بالتالي تقدري تُلبي الإحتياجات دي و تبقي عارفة ايه المهارات اللي محتاجة تعلميها ل ابنك او بنتك بناءا على معرفتك ل إحتياجته النفسيه

انك تتعلمي عن الإحتياجات النفسية و تطبقي خطوات النضج و التواصل اللي فيها ف انتي كدا اكنك بتلعبي بكارت ال joker في حياتك 💙

لو جاهزة اكتبيلي joker في ال comments

‎كورس الإحتياجات النفسية مش مجرد كورس هتتعرفي فيه على احتياجاتك ..

‎الإحتياجات النفسية هو كورس هتاخدي بيه اول خطواتك لنضجك النفسي

‎الإحتياجات النفسية هو كورس هتعرفي فيه نمط شخصيتك و اللي معطلك و ازاي تفكي العطلة دي

‎الإحتياجات النفسية هو كورس هيساعدك تخططي لحياه انتي حاسة فيها بالرضا عن نفسك و في علاقاتك

‎لو جاهزة تفتحي عنيكي جواكي و تسعي في خطوات حقيقية عميقة للتعرف على نفسك اكتبيلي " جاهزة 💙" و انا هبعتلك التفاصيل

✨لو انتي بتحاولي و بتسعي و بتتعلمي بس متعطَّلة و بتسألي نفسك دايما هي العطلة جاية منين ف في الفيديو دا هحاول اجاوبك على السؤال دا

✨كل شخص ليه قصته في الحياه و اللي معطله غير اللي معطل غيره .. كل حد فينا عنده إحتياجات نفسية .. و على حسب اعلى احتياج عندك هتكون العطلة اللي انتي فيها جاية منه

✨اللي عنده إحتياج للحب و التواصل عالي ف العطلة عنده هتكون في إنه مش متعود يحب و يتواصل مع نفسه .. بيعمل كدا مع الناس بس مش مع نفسه

✨اللي عنده إحتياج لليقين عالي هتلاقي العطلة جاية عنده من احتياجه الشديد للطمأنينة و الوضووووح و التفاصيييييل اللي زيادة عن اللزوم لدرجة التعطيل

✨اللي عنده إحتياج الأهمية عالي هتلاقي العطلة عنده هي الخوف من الفشل .. مش هجرب عشان مفشلش ..

✨و اللي عنده إحتياج التنوع عالي العطله عنده في حياته و علاقاته جاية ب انه مبيستحملش الملل … مبيقدرش يعيش معاه .. اول مبيحس ب ملل بيجررررري

✨و اللي عنده إحتياج النمو و التطوير هتلاقي العطله عنده في علاقاته … شغاااال يطور في نفسه .. و في الآخر في حاجة مهمة اوي نسي يطورها … علاقاته

✨و اللي عنده إحتياج ترك الأثر عالي .. عاوز أثر كبيييير .. عظييييم .. عاوز يبقى زويل .. بس مش قادرة تشوف انه ترك الأثر الأولى يكون لنفسها و الأقربون منها

✨كلنا عندنا من كله … بس بدرجات .. و على حسب إحتياجك النفسي بتعرفي العطله جيالك منين و تتعاملي معاها إزاي

خلينا نتفق ان المشاعر اللي بنحسها في او وقت زي الزعل او الغضب من اي كلام مش عاجبنا طبيعية جدا .. و هتفضل موجودة إنما فيه حاجتين مهمين اوي عشان الموضوع ميبقاش مأثر عليا و معطلني في حياتي

الحاجة الأولى انه اكون عارفة و مُدركه انه من انشغل بعيوب الناس انشغل عن عيوب نفسه و من انشغل بعيوب نفسه انشغل عن عيوب الناس

و من اراد الله به خيرا بصره بعيوبه

هي طاقة واحدة .. هتحطيها فين في حالي ولا في حال غيرك ؟؟؟ و حالي دا مش بس عيوب و لكنه حاجات كويسة بحسنها و حاجات عيوب ف أصلحها.. مش جنب واحد بس

و الحاجة التانية هي اني محتاجة اتعلم مهارة توكيد الذات .. و ايه يا رنا توكيد الذات دا ؟

يعني اكون بعرف آخد حقي ب إحترام مع الحفاظ على حقوق الآخرين .. باخد حقي ب قيمي .. يعني لو من قيمي اللطف و الحب .. ارد بس بلطف و حب .. لو انا من قيمي العطاء .. أرد و ادي باللي يناسبني و اللي اقدر عليه

في الآخر القصة كلها عندي انا .. انا مركزة على ايه و بشتغل على ايه .. إصلاح نفسي ولا الآخرين