هديل جنّود - Hadeel Jannoud

شهر 9 من الاشهر المحببة لقلبي، فيها منودع كل شي ماعاد يخدم رحلتنا بهالمرحلة.

بس بالغالب ما منتعامل مع هي المشاعر بلطف، ومنعيش حالة من الانهيار او الغربة النفسية.

ولهالسبب بعتقد صار بدها تحدي جماعي نطبقوا سوا هالشهر، جاهزين 😌

شاركوني بالتعليقات مشاعركم الفترة الاخيرة

ّود

الحليب الأسود لإليف شافاق مو رواية تقليدية عن امرأة صارت أم، وإنما رحلة داخلية لكاتبة وجدت نفسها فجأة أمام صراع بين أجزاء متعددة من شخصيتها.

بعد زواجها وحملها وولادتها، وجدت أليف نفسها ممزقة بين رغبتها بالأمومة وحياتها ككاتبة، وبين حاجتها للاستقلال وطموحها المهني وحبها للمعرفة والبحث عن المعنى.

ولحتى تجسّد هالصراع، ابتكرت شافاق مجموعة من الشخصيات النسائية اللي سمّتهم «نساء الأصابع».

كل وحدة منهن كانت تمثل جانباً من داخلها:

ماما رز بحليب تمثل الأمومة والرعاية.
الآنسة المثقفة الساخرة تمثل العقل والاستقلال الفكري.
جناب التشيخوفية الطموح تمثل الإنجاز والعمل المستمر.
الآنسة العملية تمثل البساطة والواقعية.
بلو بيلي بوفاري تمثل الأنوثة والجمال والاهتمام بالجسد.
أما الدرويشة الصوفية فتمثل الجانب الروحي والصوفي، والإيمان والتسليم.

وما بيوقف الصراع هون
كل شخصية بدها تكون هي صاحبة القرار، ومع تغيّر مراحل حياة أليف، بيتغير نفوذ كل واحدة منهن.

وبعد الولادة، بتدخل شخصية جديدة على الرواية: لورد بوتون، الجني الذي يجسّد اكتئاب ما بعد الولادة، لتبدأ مرحلة مختلفة تماماً من الصراع النفسي، مليانة تعب وفقدان للطاقة والتركيز والشعور بالذنب والارتباك.

الجميل بالرواية إن شافاق ما تعاملت مع هالأجزاء كأن واحد منها هو «الصحيح» والباقي غلط.
بل بتورجينا كيف ممكن نكون بنفس الوقت:

طموحين وأمهات.
مثقفين ورومانسيين.
مستقلين ومحتاجين للحب.
روحانيين وعمليين.

ومن هون بتطلع واحدة من أهم أفكار الرواية بالنسبة إلي:

الإنسان مو صوت واحد.
جواتنا أجزاء كتيرة، تشكلت من تربيتنا، تجاربنا، رغباتنا، مخاوفنا والقيم اللي حملناها معنا.

والصراع الداخلي أحياناً ما بيكون لأننا ما منعرف شو بدنا
بل لأن أجزاء مختلفة فينا بدها أشياء مختلفة بنفس الوقت.

وهون بتكون رحلة أليف من محاولة اختيار «نسخة واحدة» من نفسها، إلى محاولة فهم واستيعاب كل هالأجزاء.

الحليب الأسود رواية عن الأمومة، والهوية، والكتابة، والأنوثة، والاكتئاب، والصراع بين العقل والقلب والروح…

لكن قبل كل شي، هي رواية عن السؤال:
كيف ما أخسر نفسي بين كل هالشخصيات!

خبريني رأيك اذا قريتي الرواية بالتعليقات 💚

من العبارات اللي منسمعها كتير ببداية كل سنة:

New Year, New Me.

وبدي أعترفلكم بشغلة
أنا بمرحلة من حياتي كنت من الناس اللي بتصدقها فعلًا 😂

كنت فكر إنه طالما كتبت أهداف جديدة، وعملت خطة، وقررت شو بدي أعمل بالسنة الجديدة, معناته أنا فعلًا بلشت أتغير.
بس مع الوقت اكتشفت إنو مو هيك بيصير التغيير.

لأنك فيك تكتب ٢٠ هدف، وتشتري بلانر جديد، وتعمل vision board رهيب
وترجع بعد شهر تعمل نفس الأشياء القديمة.ليش؟

لأن التغيير مو بس قرار.
التغيير الحقيقي بيبلش من جوّا، وبعدين بيظهر برا.

يعني مو بس: “بدي أعمل.”

في كمان:
شو عم فكر؟
شو عم صدّق عن حالي؟
شو عم حس؟
وشو العادات اللي عم كررها كل يوم؟

لأنه بالنهاية
إذا أنا عم حاول ابني حياة جديدة،
بس عم استخدم نفس الأفكار، نفس المخاوف، ونفس طريقة التصرف القديمة…

غالبًا رح آخد معي حياتي القديمة للمكان الجديد.
و أوضح مثال على هالشي:

كم شخص قال: “لو سافرت من هون، كل شي رح يتغير.”

وسافر فعلًا…
وبعد فترة اكتشف إن القلق لسا معه.
الخوف لسا معه.
نفس العلاقات عم تتكرر.
ونفس طريقة التفكير عم تلاحقه.

لأنه المشكلة ما كانت بالمكان, كان في نمط داخلي تعودنا عليه،
وصار الوقت نفهمه ونغيره.

وبما انه قرب فصل الخرف
مو مطلوب منك تصير شخص جديد.

جرب ترجع تكون أقرب الك، وتتعرف على حالك

ّود

دروس بتتعلميها بالتلاتينات، وما حدا بيخبرك عليها.

بتتعلمي شوي شوي إن اختيارك لنفسك مو أنانية.
وإنك لما تحطي حدود، أو تقولي «لا»، أو تختار راحتك، مو ضروري تكوني عم تئذي حدا.

بتتعلمي إن الشعور بالذنب مو دليل إنك عملتي شي غلط.
أحيانًا هو بس شعور جديد عم يرافق قرار جديد ما تعودتي تاخده.

وبتتعلمي كمان إنك ما لازم تكوني قاسية على حالك وتمشي برتمك الخاص، وتتذكري انه العادات بدها وقت لتتغير.

حتتعلمي انه مو كل الناس بتستاهل طاقتك، وانه جسمك هو حق شخصي ما لازم يندرج تحت مقايس مجتمعية بالية.

فإذا اليوم صرتي تعرفي تقولي:
«هاد الشي ما بناسبني»
أو
«أنا محتاجة أرتاح»
أو حتى «ما بدي»
فمبروك عليكي الوعي الجديد 💚

واذا لسا عندك تحدي مع الموضوع، تواصلي معي لساعدك
ّود #دروس

يمكن وأنت عم تقرأ هالأسئلة، تلاقي حالك بأكتر من وحدة

بتزعل وما بتعرف ليش.
بتكتم لحتى تنفجر.
بتحس بشي قوي وما بتعرف تسميه.
بتقول “ما في شي” بينما من جواك في كتير أشياء.
أو بتاخد قرار وأنت تحت تأثير شعور قوي، وبعدين بتندم.
ويمكن كل اللي كنت تحتاجه من البداية مو إنك تتخلص من مشاعرك، انت محتاج تفهمها.

لأن #الشعور مو عدو لازم نحاربه، ولا أمر لازم ننفذه فورًا.
هو #رسالة الك مطلوب تسمعها.

وكل ما فهمنا الرسالة، صار عندنا مساحة أكبر نختار كيف نتصرف.

خبروني بالتعليقات اجاباتكم، وشاركوني ياترى شو هو الشعور لي ما منعرف حقيقته برايكم!؟

ّود

أنا إنسانة قبل ما كون معالجة بالمجال النفسي والروحي،

إنسانة يعني عندي احتياجات وجروح ورغبات وآمال،
وبمرق بمطبات بحياتي.

إنسانة يعني عندي قدرات واهتمامات وهوايات،
ومن الأكيد متل ما عندكم تحديات حياتية انا كمان عندي.

في مرحلة من سنوات حياتي، همّشت هالانسانة وصرت اتعامل مع حالي على اساس انه لازم كون كاملة وما اغلط ولا اتقبل السقطات النفسية.

بس الحمدالله لانه الحياة بتضل بتعلمنا، تحررت من هالقيد، واسترجعت هديل الانسانة قبل هديل المعالجة.

وهالكلام لكل شخص عم ينسا حاله ضمن قوالب، قوالب عم يرسمها لذاته او المجتمع عم يرسمله ياها.

هي القوالب ممكن تتحول لسجن بدون ماتحس، وهالكلام اعتبره رسالة الك، صار الوقت تكون لطيف مع حالك وترجع لجمالك وعفويتك.

الحياة حنعيشها مرة وحدة، كون لطيف مع حالك فيها 💚
ّود

رسالة اليوم لك:
كن مُغيّراً للوضع الراهن، ومُخالفاً للقواعد، وصوتاً للسلام وسط الفوضى، ونوراً في الظلام. عندها فقط ستغمرك السعادة والرضا لدرجة أنك لن تُبالي برأي الآخرين في خياراتك.

ّود

مو طبيعي تخافي من الحيوانات وتفكري إنه ما في حل.

كتير ناس عاشوا سنوات وهنن مقتنعين
إن هالخوف جزء من شخصيتهم وصاروا يلغوا زياراتهم، يغيروا طريقهم، أو يعيشوا بقلق مستمر بس لأنهم بيعتقدوا إنه “هيك خلقوا” ومافي حل.

بس بالحقيقة الرهاب والخوف من الحيوانات مو ضعف ولا هو حكم ابدي.

لما تعرفي كيف تشكل هالخوف، وتشتغلي عليه بطريقة صحيحة، ممكن يخف تأثيره بشكل كبير، ويمكن تتحولي لشخص محب للحيوانات ويصيروا موجودين ببيتك ببساطة.

كيف؟ تواصلي معي اليوم لساعدك تتحرري من هالخوف ضمن جلسات علاجية نفسية.

هالمنشور يمكن يكون أول خطوة الك باتجاه التغيير، خبريني بالتعليقات شو مشاعرك اتجاه الحيوانات!؟

ّود

3 أفكار ملهمة من #كتاب “ترنيمة سلام”
ساعدتني غير من نظرتي الضغوط الحياتية وببساطة كلهم بيعكسوا نقطة مهمة إنه نحنا مننسى نعيش اللحظة بسلام ومتعة ومنكرر:
“لما تخلص هالمشكلة…”
“لما أرتاح…”
“لما تتحسن ظروفي…”

بس يمكن #السلام مو محطة رح نوصلها بوقت معين، السلام
يمكن هو طريقة نتعامل فيها مع حالنا، بعز العجقة والضغط.
هالشي مابيعني ما نزعل أو ما نخاف

لكن معناته ما نعيش بحرب مستمرة مع مشاعرنا.
وبالصور شاركت معكم ٣ #اقتباسات من رواية ترنيمة سلام وبنصحكم تقروها قريبا وتخبروني بالتعليقات شو عجبكم فيها.

ّود

سؤال واحد كسر نمط متكرر عندي و غيّر طريقة تعاملي مع كتير مواقف.

بكل موقف بيصير معي، انا تعلمت اسئل حالي هل انا عم افترض الاحداث! او متأكدة من المعلومة لي عندي؟

و اكتشفت انه أوقات كتيرة انا معتمدة على الافتراضات و القصة اللي بحكيا مع حالي.

مثلاً:

بالعلاقات لما شخص يتأخر بالرد او التواصل:

المعلومة بتقول الشخص تأخر بالرد.

اما الافتراض بيقول: أكيد ما عاد مهتم فيني او يمكن بده يخفف تواصل.

⸻

💼 بالشغل لما يصير اجتماع مع المدير

المعلومة بتقول: المدير طلب يحكي معي.

انما الافتراض ببدا يقول: أكيد في مشكلة ويمكن مقصر.

⸻

💰 بالمال لما تشعر وضعك مو مريح

المعلومة بتقول: هاد الشهر المصاريف كانت أكتر من المعتاد.

الافتراض العقلي بيبدا يقول: أنا عم ضيع ورح ضل طول عمري هيك خسران ماليا.

⸻

لما بلشت فرق بين الافتراض والمعلومات كسرت نمط حارق جهازي العصبي ومأثر عليي سلبا لسنين طويلة.

وانت كمان:
كل مرة بتحس بمشاعر قوية

وقف لحظة واسأل حالك:

شو اللي بعرفه أكيد؟

و شو اللي أنا عم افترضه؟

مو كل افتراض غلط، بس لما نخلط بين الحقيقة وبين اللي عم نتخيله، منبلش نتصرف مع الخوف كأنه واقع.

وأوقات مجرد هالسؤال

بيخفف نص التوتر، وبيكسر شعورك السلبي الداخلي بالرفض، الهجر او حتى الاذى وبالتالي انت اقرب للتوازن.

خبرني بالتعليقات شو الافتراضات لي عم تكررها كل يوم او كل اسبوع مرة وعم تاثر عليك سلبا؟
ّود