13/07/2026
In Memoriam – Gjon Luli
Një javë pas lajmit të trishtë të ndarjes nga jeta të mjeshtrit Gjon Luli, Shoqata Teuta Basket u mblodh për të nderuar kujtimin e një prej figurave më të shquara të basketbollit durrsak.
Basketbollist, trajner, arbitër dhe edukator i brezave të tërë, Gjon Luli ia kushtoi jetën basketbollit, duke lënë një trashëgimi të çmuar sportive dhe njerëzore. Me punën, përkushtimin dhe integritetin e tij, ai kontribuoi në formimin e qindra sportistëve dhe mbeti një model për të gjithë komunitetin e basketbollit.
Në mbledhjen e zhvilluar ditën e hënë, Kryesia e Shoqatës Teuta Basket vendosi unanimisht t’i akordojë mjeshtrit Gjon Luli titullin “Nderi i Shoqatës Teuta Basket”, si shenjë mirënjohjeje dhe respekti për kontributin e jashtëzakonshëm që dha ndër vite për basketbollin e qytetit të Durrësit.
Gjithashtu, Shoqata vendosi unanimisht që të propozojë emrin e tij pranë Shoqatës “Durrësi Autokton” për akordimin e çmimit “Nderi i Qytetit të Durrësit”, si një vlerësim i merituar për jetën dhe veprën e tij në shërbim të sportit dhe qytetit.
Emri dhe kontributi i Gjon Lulit do të mbeten përherë pjesë e historisë së basketbollit durrsak dhe burim frymëzimi për brezat që do të vijnë.
I përjetshëm qoftë kujtimi i tij.
