Arubaanse Voetbal Bond - AVB

Hadassah K**k Briyando den un Capitulo Nobo den Su Carera Futbolistico✨

Cu hopi orguyo, Arubaanse Voetbal Bond ta celebra un paso importante den carera di nos hungado di Seleccion Nacional Femenino di Aruba, cu a firma cu Go Ahead Eagles Vrouwen na Hulanda.

Despues di hopi trabou, dedicacion y perseverancia, un capitulo nobo ta habri. E Diasabra aki, e ta prepara pa haci su debut oficial den prome partido di temporada contra Jong Feyenoord, den Tweede Divisie.

Un momento special, no solamente den su carera, pero tambe como inspiracion pa e siguiente generacion di mucha muhenan na Aruba cu ta soña di yega leu den futbol.

Su mensaje ta simpel, pero poderoso:
“For the girls back home, our island may be small, but our dreams don’t have to be. Un isla chikito, pero potente.”

Nos ta desea bo hopi exito den e capitulo nobo aki. Disfruta cada momento, sigui representa Aruba cu orguyo y laga e soño sigui crece🇦🇼⚽

AVB ta despidi di Gustavo Monti🇦🇼⚽

Despues di hopi aña di compromiso y dedicacion na futbol Arubano, a yega momento pa Gustavo Monti, cariñosamente conoci como “Monti”, cuminsa un capitulo nobo y regresa na su pais natal, Argentina🇦🇷

Monti su trayectoria den arbitraje a cuminsa na 2015, despues di completa cu exito e curso di referee. A traves di añanan, Monti su compromiso cu arbitraje a sigui desaroya. Despues di su trayectoria como referee, na 2021 el a uni cu Referee Department di Arubaanse Voetbal Bond, unda el a aporta su experiencia, ideanan y dedicacion na diferente proyecto y iniciativa pa sigui fortalece e departamento.

Cu su salida, AVB ta despidi no solamente di un miembro valioso di Referee Department, sino tambe di un colega aprecia y respeta.

Monti, danki pa bo dedicacion y pa bo aporte na arbitraje Arubano. Nos ta desea bo tur exito den e siguiente capitulo di bo bida y carera na Argentina.

Bo lo haci falta! 🇦🇼🤝🇦🇷

Y manera Monti mes ta bisa…
¡Apaga y vámonos!”

Proteccion di Hungadornan Menor di Edad

Cada biaha mas, nos hungadornan hoben ta haya oportunidad pa desaroya nan talento futbolistico, tanto na Aruba como internacionalmente. AVB ta mira esaki como un desaroyo positivo, pero ta importante cu cada oportunidad wordo evalua cu cuido.

Prome cu acepta un trial, training, academia of representacion pafor di Aruba, AVB ta recomenda mayor y representante legal pa verifica:
• Ken ta haci e oferta y cua club of academia ta envolvi.
• Si e invitacion ta oficial y verificabel.
• Ken ta responsabel pa biahe, estadia y supervision di e menor.
• Si un agente of representante ta debidamente autorisa.

No firma documento, haci pago, entrega paspoort of solicita retiro cerca un club sin verifica e proceso.

Importante: retiro cerca un club local no ta elimina e historia di registracion cerca AVB. Transfer internacional mester sigui e proceduranan oficial, y pa hungadornan menor di 18 aña reglanan specifico di FIFA ta aplica.

Safeguarding ta prioridad. Cualkier actividad cu envolve un menor mester garantisa seguridad, bienestar, supervision apropiado y proteccion contra abuso of explotacion.

Tin duda? Contacta AVB prome cu tuma un decision na [email protected]

Nos ta stimula oportunidad. Proteccion di nos muchanan ta prioridad.

Educacion Personalisa ta crea mas espacio pa desaroyo Futbolistico⚽🇦🇼

Diabierna 21 di augustus, nos tabata presente na e lansamento oficial di e proyecto piloto di educacion personalisa, un iniciativa cu nos na Arubaanse Voetbal Bond (AVB) ta forma parti di dje hunto cu Juliana School, Ministerio di Educacion y Deporte, e atletanan y nan famianan.

E colaboracion ta brinda oportunidad pa explora un modelo unda e horario escolar y e programa deportivo por complementa otro. Esaki ta a base di un systema di educacion personalisa, riba nivel di cada studiante. Pa AVB, esaki por representa un paso importante den crea un trayectoria mas completo pa talentonan cu tin ambicion di sigui crece den futbol.

Actualmente, AVB tin un grupo di atletanan U14 cu ta combina scol y futbol na un manera personalisa, y durante e ultimo dos añanan nos por a mira un desaroyo inmenso den e atletanan aki.

Un futbolista hoben na Aruba generalmente ta y por practica entre 6 pa 8 ora pa siman cu Academia y cu nan Club. Cu un structura academico mas flexibel, esaki por aumenta te na 16 pa 20 ora, creando mas espacio pa desaroyo. E progreso aki no solamente ta beneficia e atleta, sino tambe su club y nivel general di futbol Arubano.

Nos ta considera e proyecto piloto un inversion den futuro. E aspiracion ta pa, den añanan binidero, Aruba por conta cu un base mas amplio di futbolistanan bon prepara y, como resultado, seleccionnan nacional mas competitivo den tur categoria, tanto masculino como femenino.

Arbitro Terrence Tromp a wordo designa pa e final di CFU U14 Challenge Series – Tier 1 entre Jamaica y Haiti, awe pa 11:30.

Nos ta felicita Terrence y ta desea e hopi exito den e final!🇦🇼⚽️

Call for bids for Security services for the 2026–2027 Championship⚽

Cu aproximadamente 272 wega oficial programa pa e temporada, Arubaanse Voetbal Bond (AVB) ta invita companianan cualifica den ramo di seguridad pa presenta nan oferta pa brinda servicio di seguridad durante e Temporada di Campeonato 2026–2027.

Companianan interesa por manda nan propuesta na [email protected].

Hunto nos ta sigui traha pa un ambiente sigur y profesional pa futbol na Aruba.

AVB ta Marca un Momento Historico cu Aprobacion di Financial Statements 2025 den su Reunion General Ordinario 2026

Diasabra, 15 di augustus 2026, AVB a organisa su Reunion General Ordinario hunto cu su clubnan miembro, unda diferente punto importante pa futuro y gobernacion di futbol Arubano a wordo trata y aproba.

Un logro importante pa nos ta e aprobacion di e Financial Statements 2025. Pa prome biaha den historia di AVB, e Independent External Auditor a entrega un “goedkeurende verklaring” pa e Financial Statements 2025. Despues di su revision, Audit & Compliance Committee tambe a recomenda aprobacion di e Financial Statements 2025. Un paso importante den nos compromiso continuo cu transparencia, responsabilidad y bon gobernacion financiero.

Pa prome biaha tambe, nos Directiva di AVB a presenta un “Progress Report” unda ta refleha e progreso di Directiva su plan strategico den percentahe hunto cu su Plan pa 2027, brindando clubnan miembro un bista riba e progreso y e direccion y prioridadnan pa sigui desaroya futbol Arubano.

Durante e Reunion General, clubnan miembro a aproba e Financial Statements 2025 y e Budget 2026, reafirmando nan confiansa den e direccion y maneho financiero di AVB.

Ademas, Jerwin Giel a wordo nombra oficialmente como miembro di Directiva di AVB pa e resto di e termino, cu aprobacion di clubnan miembro durante e Reunion General.

AVB ta aprecia participacion y confiansa di su clubnan miembro y ta sigui comprometi pa traha hunto pa un federacion fuerte y pa progreso di futbol na Aruba.

Un momento di ORGUYO! 🇦🇼

Aruba riba veld y den tribune! Pabien Mika, cu bo debute den Vrouwen Eredivisie! Sigui cu e bon trabou deportivo! 🙌🏼⚽️

✨ UN MOMENTO DI HOPI ORGUYO PA ARUBA! ⚽🇦🇼

Nos hungado di Seleccion Nacional di Aruba, Michaela “Mika” Netto, a logra un otro gran paso den su carera futbolistico! Mika, cu ta hunga den e team hubenil di FC Utrecht, a wordo yama pa forma parti di e 11 titular pa hunga den Women’s Eredivisie contra Ajax! 👏🏼

For di nos isla chikito Aruba, te na un di e nivelnan mas halto di futbol femenino na Hulanda; un momento di orguyo! Y pa tende ARUBA wordo menciona live riba television Hulandes ta haci e momento aki mas special!

Por mira e wega via ESPN 1 Hulanda y duna nos Mika tur nos sosten!

Nos ta sigui briya pafo di nos frontera y representando Aruba cu hopi orguyo!

Nos ta cu bo, Mika! Sigui briya, sigui inspira y sigui haci Aruba orguyoso! 🇦🇼

Step Into Her Game – Inspirando e siguiente generacion di futbol femenino na Aruba 🇦🇼⚽💖

Diasabra 8 di augustus 2026, AVB a organisa “Step Into Her Game – Girls’ Open Day” na Compleho Deportivo Frans Figaroa, como parti di e FIFA Women’s Football Campaign.

E iniciativa a brinda mucha muhenan di 11 aña bay ariba e oportunidad pa experimenta futbol den un ambiente divertido y positivo. Durante e mainta, e participantenan a disfruta di sesionnan practico riba veld, conoce clubnan local y haya mas informacion tocante e oportunidadnan cu tin pa nan dentro di futbol.

Ademas, durante un panel interactivo, diferente profesionalnan y personanan involucra den futbol a comparti experiencia y informacion tocante temanan manera bienestar, sosten di famia, safeguarding, salud menstrual y desaroyo di futbol femenino na Aruba.

A traves di e FIFA Women’s Football Campaign, AVB ta sigui crea oportunidad pa mas mucha muhe descubri futbol y contribui na fortalecemento di futbol femenino na Aruba.

Pa mas informacion tocante AVB su Women’s Football Development Strategy na [email protected] y proximo iniciativanan, tuma contacto cu nos Women’s Coordinator y keda pendiente pa e di dos edicion di “Step Into Her Game” luna venidero. 💖⚽🇦🇼