13/10/2026
Brug di Consciencia -Aruba
NOS HUBENTUD: EDUCACION, DEPORTE Y CONSCIENCIA PA UN ARUBA MAS FUERTE
Dedica na nos hubentud di Aruba
Nos hubentud ta e futuro di Aruba, pero tambe e presente di nos comunidad. Cada hoben ta carga den su interior un potencial, un talento y un posibilidad pa contribui na e construccion di un miho sociedad. Pero potencial solamente no ta suficiente. E mester ser guia, educa, motiva y sostene.
Educacion ta uno di e pilarnan mas importante den e formacion di un ser humano. E no ta solamente prepara un hoben pa haya un trabou of un titulo; educacion ta siña pensa, analisa, cuestiona, respet, coopera y tuma responsabilidad. Un hoben educa ta un ciudadano cu ta compronde cu su decisionnan di awe por determina e calidad di su mañan.
Pero educacion no ta solamente den klas. Deporte tambe ta un scol di bida.
Den deporte, un hoben ta siña disciplina, perseverancia, respet, puntualidad, cooperacion y autocontrol. Un atleta ta siña cu logro no ta bini di un dia pa otro. E mester preparacion, sacrificio, entrenamento, motivacion y determinacion.
E deseo pa gana un medaya of bira ganado por ta un forsa positivo, si e ta acompaña di humildad y respet. E berdadero triunfo no ta solamente pa ta riba un podio; e ta den e capacidad pa supera bo mes, siña di bo derota y bolbe purba, Cay y lanta bek riba bo propio forsa-, cu mas conocemento y fiha metanan nobo.
Un bon atleta no ta solamente esun cu ta gana. Ta esun cu sa di perde sin perde su dignidad, y cu ta uza cada reto como un oportunidad pa crece.
E retonan social
Nos comunidad y nos famianan ta enfrenta actualmente varios reto. Presion social, influencia di rednan social, aislamiento, violencia, abuso di substancianan, bullying, falta di motivacion, problema familiar y incertidumbre tocante futuro por afecta profundamente e desaroyo di un hoben.
No tur problema di un hoben ta visibel. Tin hoben cu tin sonrisa, ta studia, ta practica deporte y ta participa den sociedad, pero internamente ta lucha cu soledad, miedo, insiguridad of falta di sentido.
P’esey, salud mental di nos hubentud mester bira un prioridad.
Nos no por solamente haci e pregunta aki: “Kico ta pasa cu nos hoben?”
Nos mester haci e pregunta aki tambe:
“Kico nos, como adulto, famia, scol, comunidad y gobierno, ta haciendo pa e hoben no mester carga su problema su so?”
E solucion no ta pertenece na un solo actor. Famia, scol, entrenado-, organisacionnan deportivo, profesionalnan di salud, iglesia, sector priva, gobierno y e propio hubentud mester forma un red di sosten.
Nos mester crea mas espacio caminda un hoben por papia, bini hunto sin miedo di ser husga; caminda pedi ayudo no ta un señal di debilidad, sino di madurez.
CONSCIENCIA
Consciencia ta cuminsa cu comprension.
Nos mester compronde cu cada hoben ta diferente. No tur hende ta siña mesun manera, no tur tin e mesun oportunidad, y no tur ta crece den e mesun circunstancianan.
Un sociedad cu tin consciencia no ta solamente celebra su campeonnan; e ta cuida tambe e hoben cu ta luchando pa haya su caminda.
Nos mester cambia e pregunta di “Ken ta culpabel?” pa “Kico nos por haci hunto?”
E cambio real ta cuminsa ora nos mira e hoben no como un problema pa resolve, sino como un ser humano cu potencial pa desaroya.
RECOMENDACIONNAN
1. Fortalece educacion integral: combina conocemento academico cu educacion emocional, balornan, liderazgo, cultura, creatividad y responsabilidad social.
2. Inverti mas den deporte hubenil: crea mas programa deportivo accesibel, cu entrenadonan capacita y infrastructura adecuado, no solamente pa busca medaya, sino pa forma caracter.
3. Duna prioridad na salud mental: crea espacio di scucha y orientacion pa hubentud den scol, deporte y comunidad.
4. Fortalece famia: ofrece educacion pa mayornan riba comunicacion, disciplina positivo, limite sano y acompañamento emocional.
5. Crea mas programa di mentor: conecta hoben cu profesionalnan, atleta, educadonan y lidernan comunitario cu por bira modelo positivo.
6. Duna bos na nos hubentud: no solamente papia pa nan, sino papia cu nan. Nan experiencia y idea mester forma parti di e solucion.
7. Promove paz na cas y den comunidad: menos violencia verbal, menos huicio y mas dialogo, respet, pasenshi y cooperacion.
MENSAHE FINAL
Nos hubentud no ta solamente e Aruba di mañan.
Nan ta e Aruba di awe.
Si nos duna nan educacion, deporte, oportunidad, amor, disciplina, orientacion y confiansa, nos ta planta simia cu por transforma e futuro di nos isla.
Un medaya por briya un momento, pero un caracter fuerte por briya pa un bida largo.
Un diploma por habri un porta, pero consciencia por siña un hende con pa cana door di su bida.
Y un comunidad cu ta educa su hubentud, cu ta cuida nan salud mental, cu ta promove deporte y cu ta cultiva paz den cas, ta construyendo mucho mas cu un futuro economico.
Ta construyendo un futuro humano.
Nos reto ta grandi, pero nos potencial ta ainda mas grandi.
Educa. Motiva. Entrena. Scucha. Acompaña. Inspira.
Pasobra ora nos inverti den nos hubentud, nos no ta solamente cambia un bida.
Nos ta cambia Aruba.
NOS HUBENTUD — NOS SPERANSA, NOS FORSA, NOS FUTURO.
12 di october 2026
Sthanlux
Stanley Dabian
Comunicado di Conocemento y Consciencia
