Automotorsport Azerbaijan

Aston Martin komandası bu gün vacib bəyanat yayıb və komandaya yeni başçı təyin etdiyini bildirib. Komandanın icraçı direktoru Əndi Kovel köhnə vəzifəsində qalmaqla Mayk Krəki də vacib postda əvəz edəcək.

Əndi F1-də tanınmış şəxsiyyətdir. Onun hazırladığı Mercedes hibrid güc qurğusu almanlara ardıcıl 8 titul, sürücülərə isə ardıcıl 7 titul qazandırmışdı. Gələn ildən komanda Honda motorlarına keçir. Red Bull-a ardıcıl titullar qazandıran yaponlarla Əndinin əməkdaşlığı 2026-cı ilə gözəl perspektivlər vəd edir.

Aston Martin elan edib ki, Ferrari-nin keçmiş konstruktoru Enrike Kardile komandaya yeni texniki direktor təyin olunub və Ədrian Nyuinin rəhbərliyi altında gələn ilin maşını üzərində çalışacaq.

Dünyanın ən varlı neft şirkəti Aramco-nun yatırımlarını nəzərə alsaq Lourens Stroll əsl xəyalların komandasını (drim tim) qurub. Gələn il əgər maşın güc alınarsa, ən zəif bənd sürücülər olacaqlar - atasının gül balasına ümid heç yoxdur, bəs Fernando Alonso tək bacaracaqmı?

Əvvəllər sevinirdim ki, Ayrton Sennanı, Alen Prostu və Naycel Mənselli canlı izləmək imkanım olub.

Sonra sevinirdim ki, Mixael Şumaxerin rekordlarının hamısına canlı şahidlik etmişəm.

İndi də sevinirəm ki, Lyuis Həmiltonun bu şəkildə göstərilən və bir neçə dəfə də çox rekordlarına şahidlik etmişəm.

Bu gün canlı ƏFSANƏnin 40 yaşı tamam olur. Ümid edirəm ki, Lyuis məni qarşıda hələ çox rekordlarla sevindirəcək...

Beləliklə, artıq 2025-ci ilə qədəm qoyduq - çox tezliklə yeni maşınlar təqdim olunacaq, mövsümöncəsi testlər baş tutacaq və nəhayət, Avstraliyada, Melburnda mövsümün ilk Qran Prisi start götürəcək.

Bizi isə radikal reqlament dəyişikliklərindən əvvəl çoooox maraqlı bir mövsüm gözləyir. Ümid edirəm ki, bu il titul uğrunda mübarizə keçənilkindən daha gərgin və daha maraqlı olacaq.

Qarşıda yenə də 24 mərhələdən (6 sprint) ibarət mövsüm var - bizim yarış bu dəfə sentyabrın sonunda olacaq...

Bax, belə dostlar, gözəl bir mövsümü maraqlı bir yarışla möhtəşəm titulla başa vurduq - kimsə komandası ilə son yarışını keçirdi, kimsə karyerasında son yarışını keçirdi, kimsə də debüt yarışını arxada qoydu.

Lando Norris ən çətin işin öhdəsindən əla gəldi - startda mövqeyini qoruya bildi, bundan sonra sadəcə öz liqasında davam etdi və rəqibləri üçün əlçatmaz oldu. McLaren-in bir çox güclü olduğu yarışlarda itirilən vacib xallar ona baha başa gəlsə də, komanda olaraq əla işlədilər və yekunda komanda 26 illik həsrətdən sonra titula qovuşdu. Bryus MakLarenin əsasını qoyduğu komanda titulların sayında əzəli rəqibi Williams-a çatdı, indi hər ikisinin 9 titulu var, qarşıda isə yalnız Ferrari var )) Lando isə F1 tarixində 1000 xallıq səddi keçən 16-cı sürücü oldu və komandasına tarixin 189-cu qələbəsini qazandırdı.

Karlos Sayns əlindən gələni etdi, bu gün Ferrari-də son yarışını keçirən ispaniyalı sürücü uzun fasilədən sonra komandasına titul qazandıran sürücü kimi tarixə düşmək istəyirdi, amma alınmadı. Lakin komandası ilə əməkdaşlığı 25-ci podiumu ilə başa vurdu. Gələn il onu başqa bir tarixi komanda gözləyir, bəlkə bu tarixi geridönüş də onun qismətinə yazılıb.

Şarl Lekler birinci dövrədə risk etdi, çəkinmədi, özünü tüstü gələn yerə soxdu və 1-ci dövrənin yekununda 19-cu yerdən 8-ci yerə yüksəlmiş oldu. Yekunda finişdə 3-cü olmağı bacarsa da, nə komandasının 16 illik titul həsrətinə son qoydu, nə də 2-ci dəfə vitse-çempion adını qazana bildi. Gələn il isə komanda yoldaşı yeddiqat dünya çempionu olacaq və məhz onunla müqayisədə Leklerin dəyərini biləcəyik.

Mənim üçün günün qəhrəmanı Lyuis Həmilton idi, adam geridən start alsa da, ruhdan düşmədi, elə də güclü olmayan maşınla gözəl ötmələr etdi. Komanda yoldaşı ilə fərqin böyüklüyü belə onun motivasiyasını azaltmadı və komandası da, komanda yoldaşı da ona maksimum nəticəni hədiyyə elədilər. Mixael Şumaxer də 5 titul qazandığı Ferrari-də son yarışında geridən gələrək 4-cü olmuşdu. Gələn il yeni komanda yoldaşı çox gənc ambisiyalı sürücü olacaq. İstəmirəm ki, Şumaxerin Mercedes-dəki aqibətini yaşasın, amma əlinə qələbə qazanmağa imkan verən maşın düşsə...

Günün daha bir qəhrəmanı isə Pyer Qasli oldu - həm uzun müddət 3-cü yerini qorudu, həm də finişdə qazandığı xallar hesabına komandasına 6-cı yeri təmin etdi. Hələ üstəlik, yekunda çempionatı da ilk 10-luqda başa vurdu ))

Bax, beləcə gözəl mövsümü başa vurduq, qış tətili, sonra yeni maşınların təqdimatı, mövsümöncəsi testlər və 3 aydan sonra yeni mövsüm, yubiley 75-ci il və yeni qəhrəmanlar, yeni yarışlar, yeni qələbələr bizi gözləyir.

Hamınıza təşəkkür edirəm ki, mövsümü bir yerdə olduq, hamınıza təşəkkür edirəm ki, belə gözəl idmanı izləyrisiniz, hamınıza təşəkkür edirəm ki, ən sürətli idmanı kütlələrə daşıyırsınız!

Gələn ildə, yeni mövsümdə görüşənədək!

Həftəsonunun ən çox gözlənilən xəbəri...

Mən yenə də haqlı oldum )) Maks Ferstappen stüardların cavabını elə trasdaca verdi, özü də elə ilk döngədə )))

Yarışın taleyi artıq startda həll olundu - dördqat dünya çempionu trasın çirkli hissəsindən elə start aldı ki, rəqiblərinə şans belə vermədi. Bundan sonra sadəcə vəziyyəti nəzarətdə saxladı, lazım olanda fərqi artırdı, lazım olanda sürətli dövrə ilə cavab verdi. Sarı təkərləri maksimum qorudu və Təhlükəsizlik Maşını rejimində boksa yollandı. Bununla da mövsümdə 9-cu, karyerasında isə 63-cü qələbəsinə sevindi. Yeri gəlmişkən, startdan finişədək liderlik etdiyi yarışların sayını da 14-ə çatdırdı, qarşısında yalnız Fettel (15), Senna (19) və Həmilton (23) var. Əlavə edim ki, bu mövsümdə Maks podiumların sayına görə də rəqibləri üçün əlçatmaz oldu (14).

Şarl Lekler, demək olar ki, yarışda heç nə ilə yadda qalmadı, amma o da lazım olan ana qədər trasda qalmağı bacardı və Təhlükəsizlik Maşını onun üçün ideal vaxtda trasa çıxdı. Düzdür, moneqask trasa 3-cü qayıtmışdı, amma bu da artıq podium idi və rəqibin cəriməsindən sonra 2-ci yerə çevrildi. Mühəndislər Kuboku üçün vacib xallar qazanıldı.

Oskar Piastri də ötmələrin çətin olduğu bir trasda heç nə ilə yadda qalmadı - yekunda komanda yoldaşının cəriməsi onu da podiuma daşıdı. Bu podium onun üçün yubiley - 10-cu oldu.

Mühəndislər Kubokunda titula namizəd iki komanda qaldı - McLaren son yarışa cəmi 21 xallıq üstünlüklə yollanır. Maksimum 44 xal toplamaq mümkündür. Görək finişdə italyanlar, yoxsa britaniyalılar sevinəcəklər.

Günün qəhrəmanları isə bu dəfə Quanyu Çjou və Pyer Qaslidir. Birinci mövsümdə həm özünə, həm də komandasına ilk xalları qazandı, ikinci isə əla nəticə ilə komandasını son yarış ərəfəsində yenə də 6-cı yerə yüksəltdi.

Bizi isə mövsümün yalnız son yarışı gözləyir - bu həftəsonu Lusaildən Əbu Dabiyə yollanırıq...

Mövsümün sonuncu sprinti də arxada qaldı - qarşıda cəmi iki yarışımız qaldı: biri sabah axşam, biri də gələn həftə.

Bu gün yarışın taleyi elə startdaca həll olundu - daha doğrusu McLaren komandasının sürücüsü Oskar Piastri təmiz yerdən start almağın üstünlüyündən tam yararlandı və irəli çıxdı. Bütün yarış boyu Corc Rassell nə qədər çalışsa da, komanda yoldaşının DRS-ində oturan Oskarı keçə bilmədi. Qısa start düzlüyü buna imkan vermirdi. Sonda isə startdan liderliyini heç kimə verməyən Lando Norris komanda yoldaşını irəli buraxdı və sanki, borcunu geri qaytardı.

Beləliklə, düz bir il əvvəl burada ilk sprint qələbəsinə sevinən Oskar yenə də finişdə qələbəyə sevindi.

McLaren sürücülərinə isə sabahkı yarışda 26 illik həsrətə son qoymaq üçün artıq 1-ci və 3-cü yer də kifayət edəcək, amma Mercedes komandası bu prosesi daha da asanlaşdıra bilər.

Bizi isə axşam Mədəniyyət kanalının CANLI efirində əsas yarışın sıralanma turu gözləyir.

McLaren sonuncu dəfə 1998-ci ildə, Ferrari isə 2008-ci ildə Mühəndislər Kubokunu qazanıb - mövsümün son iki yarışında kimin həsrətinin bitəcəyinə aydınlıq gələcək, hələlik üstünlük britaniyalılardadır...

McLaren keçən il də Qətərin Lusail trasında güclü idi - bu dəfə proqnozlar doğru çıxıb. Lando Norris mükəmməl dövrə ilə 3-cü sprint poulunu qazandı - amma startlarda onun zəif olmasını nəzərə alsaq, qısa yarışda qələbə şansını da 50% dəyərləndirmək olar.

Çünki ikinci yerdən Corc Rassell start alacaq - mövsümün sonunda soyuq havada baş tutan yarışlarda Mercedes-in ikinci nəfəsi açılıb, Corc da dalğanı tutub uçur ))

Keçən il burada ilk dəfə sprintdə qələbəyə sevinən Oskar Piastri yenə də iddialılar arasındadır - onsuz da sürücülərin çempionatında mübarizə başa çatıb və indi komanda yoldaşını rahat qabaqlaya bilər.

İstənilən halda, bu gün saat 18:00-da hamınızı İdman TV-nin efirində CANLI yayımlanacaq sprint yarışı izləməyə dəvət edirəm - həm start, həm də yarış maraqlı olacaq )))

Mexikoda baş tutan yarışın finişində qalib gələn sürücü titul uğrunda mübarizədən kənar qalıb - bəzən belə də olur. İstənilən halda, namizədlərin sayı elə mövsümün sonuna qalan yarışların sayı qədərdir - qarşıdakı həftədə daha bir namizədi itirəcəyik...

Karlos Sayns startda yerini itirsə də, restartdan sonra liderliyi geri qaytardı və rəqiblərinə heç bir şans vermədi. Sayns mövsümdə 2-ci, karyerasında isə 4-cü qələbəsinə sevindi - amma bu qələbə ona çempionluq mübarizəsində qalmağa imkan vermədi. Podiumlarının sayını 25-ə çatdıran ispaniyalı sürücü, yəqin ki, gələn il bu uğurlar üçün darıxacaq. Amma onun nə dərəcədə çalışqan olmasını bilirik və ümid edirik ki, tezliklə yeni komandasını da podium və qələbələrə çatdıra biləcək...

Lando Norris yarışı əla keçirdi. Əgər yarışın əvvəlində əsas rəqibi ilə mübarizədə vaxt itirməsə idi, yarışın sonunda qələbə uğrunda mübarizədə iştirak edə bilərdi. Amma 2-ci yerə də imkan verdi ki, əsas rəqibi ilə xal fərqini xeyli azaltsın və son 4 yarışa ümidlərini xeyli artırıb.

Şarl Lekler isə bir daha hələ tam formalaşmadığını sübut etdi - pressinq altında səhvə yol verməklə, həm özünün, həm də komandasının titul şanslarını bir qədər azaltdı. Yarışın əvvəlində rəqiblərin mübarizəsindən istifadə edərək 2-ciliyə yüksəldi, bir qədər fərqi artırdı. Amma yarışın sonunda Lando daha sürətli idi, Şarlın müdafiəsi alınmadı, son döngədə səhvə yol verdi və komandanın dublu əldən getdi.

Mühəndislər Kubokunda son yarışlar sayəsində Ferrari artıq ikinci yerə yüksəldi - Red Bull bir sürücü ilə onlara çatası deyil, amma McLaren-lə gərgin mübarizə olacaq.

Sürücülərin çempionatında Maksla Landonu 47 xal ayırır, Şarl da uzaqda deyil, qarşıda isə bizi sprintli Braziliya gözləyir!

Çoxdandır belə maraqlı mövsüm izləmirdik - hər sıralanma turunda, hər yarışda qələbəyə bir neçə komandanın bir neçə sürücüsü namizəddir və əvvəlcədən kimin qalib olmasını söyləmək qeyri-mümkündür ))

Karlos Sayns sessiyadan sonra öz dövrəsini ideala yaxın adlandırmaqla, əslində, təvazökarlıq etdi - doğrudan da, çox möhtəşəm bir dövrə vurdu. Uzunluğu cəmi 4 km olan bir trasda ən yaxın izləyicisini saniyənin dörddəbiri qədər üstələmək başqa cür mümkün olmazdı. Sayns, ümumiyyətlə, bu cür trasları xoşlayır və ispaniyalı sürücü bir daha sübut etdi ki, onun qırmızı maşını mövsümün sonunda ən sürətli maşındır. Karlos bu il qazandığı ilk (karyerasında 6-cı) poulunu bazar günü mövsümdə 2-ci (karyerasında 4-cü) qələbəyə çevirmək üçün çox çalışacaq.

Maks Ferstappen isə bir daha sübut etdi ki, peletonda sürətinə görə 3-cü (bəzən isə hətta 4-cü) olan maşınla da ilk cərgəyə düşmək olar. Sessiyadan sonra təəccübünü belə gizlətmirdi. Əlbəttə, çox şey yarışın startında, təkərlərin effektivliyindən və strategiyadan asılı olacaq. Amma bu trasda ən çox (5) qələbə qazanan sürücü olsa da, bu dəfə onun məqsədi qələbə deyil, sadəcə titul uğrunda mübarizədə əsas rəqibi olan sürücünü arxasında saxlamaq olacaq.

Çünki Lando Norris daha təmiz 3-cü yerdən start alacaq və bazar günü qələbəyə əsas namizəd olacaq. Əslində, Norris yenə də poula əsas namizəd idi, amma ənənəvi olaraq heç bir dövrəsini səhvsiz vurmadı və əsas cəhdində öndəki sürücülərə uduzdu. Amma uğurlu start və komandanın düzgün strategiyası onu önə çıxara bilər və unutmuruq ki, McLaren təkərlə ən yaxşı davranan maşındır.

Çox maraqlıdır ki, titula əsas namizəd olan hər iki sürücünün komanda yoldaşları geridədirlər və onların köməyinə ümid etmək alınmayacaq. Amma Ferrari-lər hər iki sürücüsü ilə titula namizədlərlə oynaya və növbəti dubla imza ata bilərlər.

İstənilən halda, bizi bazar günü çox maraqlı start və ondan da qat-qat maraqlı yarış gözləyir...