07/05/2026
Qol güləşi üzrə Milli yığma komandanın üzvləri Avropa çempionatı öncəsi Ulu Öndər Heydər Əliyevin məzarını ziyarət etdilər
Azərbaycan Qol Güləşi Federasiyasının prezidenti Cəsarət Əhmədovun rəhbərliyi ilə Qol güləşi üzrə milli yığma komandanın üzvləri və məşqçiləri Fəxri Xiyabanda olublar. Məqsəd idmançılarımızın Budapeşt şəhərində keçiriləcək 35-ci rəsmi Avropa çempionatında iştirak etmək üçün may ayının 9-da Macarıstana edəcəkləri səfərdən öncə Ulu Öndər Heydər Əliyevin məzarını ziyarət etməkdir. Qeyd edək ki, 11 nəfərdən ibarət heyətin Avropa çempionatında iştirakı üçün tələb olunan bütün vəsait, o cümlədən aviabiletlərin alınmasına, otel və transfer məsrəflərinə, qidalanmaya, idman formalarına, idman qida əlavələrinə və digər məqsədlərə çəkilən məsrəflər bütünlüklə Cəsarət Əhmədovun şəxsi vəsaitləri hesabına ödənilib.
İdmançılara etdiyi müraciətində Cəsarət Əhmədov bunları deyib: “Ulu Öndər bu dövləti bizlər üçün qurub yaratdı, bizlərə miras qoydu. Buna görə də kimliyindən asılı olmayaraq Vətənini, xalqını və dövlətini sevən hər bir insan öz həyatının mənasını gecə-gündüz çalışmaqda, Vətəninə, xalqına və dövlətinə sədaqətlə xidmət etməkdə görməlidir. Xüsusilə mən bunu idman sahəsində çalışan rəhbər şəxslərə də şamil etmək istərdim. Bu gün hər bir qeyri-olimpiya idman federasiyası ilk növbədə öz idman növünü inkişaf etdirmək, idmançıları yeni nailiyyətlərə ruhlandırmaq üçün var gücü ilə çalışmalıdır. Bilirsiniz ki, mənim təsis etdiyim və prezidenti olduğum Azərbaycan Qol Güləşi Federasiyası artıq 18 ildir ki, bir ailə kimi mövcuddur. Bu ailə dünyanın 101 ölkəsindən milli federasiyaların qeydiyyatdan keçdiyi Dünya Armrestlinq Federasiyasının fəal və nüfuzlu üzvüdür və bu ailə hər zaman öz Vətəninə, xalqına və dövlətinə sədaqətlə xidmət göstərir. Bu gün mən 10 nəfər idmançını öz vəsaitlərim hesabına rəsmi Avropa çempionatına aparıramsa, düşünürəm ki, növbəti illərdə iqtisadiyyatımız daha da gücləndikcə bu rəqəm daha da artacaq, Avropa və dünya çempionatlarında ölkəmizi daha çox idmançı ilə təmsil edəcəyik. Qeyd edim ki, bu Avropa çempionatında iştirak edən idmançılardan birinin, Nihad Əmiraslanovun xərclərini onun atası qarşılayır və mən söz vermişəm ki, Nihadın yüksək nəticə göstərəcəyi təqdirdə, onu dünya çempionatına artıq mən özüm öz vəsaitlərim hesabına aparacağam. Çünki maddiyyat, güclü iqtisadiyyat mənə yalnız bunun üçün - Vətənimə, xalqıma, dövlətimə və idmançılarımıza ləyaqətlə xidmət edə bilmək üçün lazımdır. Mən bundan fərəhlənirəm və bu xidməti özümə namus borcu, şərəf borcu bilirəm. İnanıram ki, idmançılarımız da bu Avropa çempionatında uğurlara imza atacaqlar və bizim uğurlarımız artdıqca, dövlətimiz də vaxtı gələndə nailiyyətlərimizi layiqincə qiymətləndirəcək. Mən üzümü bütün idmançılara tutub deyirəm ki, onlar yalnız Dünya Antidopinq Agentliyi (WADA) və Dünya Armrestlinq Federasiyası (WAF) tərəfindən tanınan rəsmi yarışlarda iştirak etsinlər. Əziz dostlar, mən bir daha bildirmək istəyirəm ki, Azərbaycan Qol Güləşi Federasiyası böyük bir ailədir və bütün idmançılar mənim üçün dost, qardaş və doğma insanlardır. Ailə isə hər zaman birlikdə olmalıdır. Çünki bizim gücümüz də birliyimizdədir.”
Qeyd edək ki, Qol güləşi üzrə 35-ci rəsmi Avropa çempionatında ölkəmizi aşağıdakı idmançılar təmsil edəcəklər:
1.Qurbanov Kamram (məşqçi-idmançı) +110 kq;
2.Məhsimov Zöhrab (məşqçi-idmançı) 80 kq;
3.İsmayılov Elşən (mşqçi-idmançı) 100 kq;
4.Əmiraslanov Nihad (idmançı) 55 kq;
5.Fərzəli Atabəy (idmançı) 55 kq;
6.Fətəliyev Rafiq (idmançı) 55 kq;
7.Qurbanlı Musa (idmançı) 50 kq;
8.Hüseynov Səfər (idmançı) 50 kq;
9.Rəşidov Nicat (idmançı) 55 kq;
10.Şahgəldiyev Təsəllim (idmançı) 90 kq.
Bütün idmançılarımıza uğurlar diləyirik!
