Uşaq Gənclər İdman Məktəbi

Naxçıvanda bir qrup idman xadimi mükafatlandırılıb

Martın 11-də Naxçıvan şəhərində yerləşən İlham Əliyev adına Olimpiya İdman Kompleksində idman ictimaiyyəti ilə görüş keçirilib. 5 Mart – Bədən Tərbiyəsi və İdman Günü münasibətilə təşkil olunan tədbirdə bir qrup idman xadimi mükafatlandırılıb.

Əvvəlcə ümummilli lider Heydər Əliyevin və şəhidlərimizin xatirəsi bir dəqiqəlik sükutla anılıb, Dövlət Himni səsləndirilib.

Tədbirdə çıxış edən Naxçıvan Muxtar Respublikası gənclər və idman nazirinin müavini, nazir vəzifələrini müvəqqəti icra edən Məcid Seyidov Azərbaycanda idmanın inkişaf strategiyasının ümummilli lider Heydər Əliyev tərəfindən müəyyənləşdirildiyini, Prezident İlham Əliyevin rəhbərliyi ilə bu sahənin yeni inkişaf mərhələsinə qədəm qoyduğunu bildirib. Qeyd olunub ki, ölkədə müasir idman infrastrukturu yaradılıb, idmançılar beynəlxalq yarışlarda böyük uğurlar qazanırlar. Bildirilib ki, Naxçıvan Muxtar Respublikasında da idmanın inkişafı dövlət qayğısı ilə əhatə olunub, gənclərin sağlam həyat tərzinə təşviqi, idman infrastrukturu layihələrinin icrasına diqqət artırılmışdır. Qeyd olunub ki, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”na uyğun olaraq son iki il ərzində Naxçıvan şəhəri və muxtar respublikanın bütün regionlarını əhatə etməklə ümumilikdə 19 yerdə sadə tipli idman qurğularının, o cümlədən bu il Babək, Culfa və Şahbuzda “Sağlam məhəllə” layihəsi çərçivəsində idman zonalarının istifadəyə verilməsi idmanın inkişafına zəmin yaradan amillərdəndir. İdmançılarımız ölkə və beynəlxalq arenalardakı uğurlarından bəhs edən Məcid Seyidov bildirib ki, ötən il Naxçıvan idmançıları 198-i qızıl, 129-u gümüş, 117-si bürünc olmaqla, ümumilikdə 444 medal qazanıblar. 2026-cı ilin müvafiq dövründə isə 50 medal qazanılıb. Bu nəticələr görülən işlərlə yanaşı, idmana göstərilən dövlət dəstəyindən, məşqçi və idmançıların peşəkar hazırlığından irəli gəlir. Nazir müavini çıxışın sonunda Bədən Tərbiyəsi və İdman Günü münasibətilə təbriklərini ifadə edib, idmançılara, idman ictimaiyyətinin hər bir üzvünə uğurlar arzulayıb.

Tədbir çərçivəsində Naxçıvan Dövlət Filarmoniyasının solistləri tərəfindən ifa olunan vətənpərvərlik mahnıları və idman klublarının nümunəvi çıxışları tamaşaçılar tərəfindən alqışlarla qarşılanıb.

Sonda mükafatlandırma mərasimi keçirilib. İdman xadimlərindən İbrahim Mirzəyev, Nazim Əliyev, Heyrat Qulamov, Məmmədəli Rəhimov, Adil Sevdimalıyev, İbrahim Rzayev, Yaşar Səfərov, Zamin Rüstəmov, Həsən Kərimov, Cəmşid Əsədov, Ramiz Məmmədov və Abbas Bağırov uzunmüddətli və səmərəli fəaliyyətlərinə görə fəxri fərmanla təltif olunublar. Naxçıvan Şəhər Uşaq-Gənclər İdman Məktəbi, “Turan” döyüş klubu, “Qapıçıq” karate-do idman klubu, “Xatun” bədii gimnastika idman klubu və “Levent Bulut-Naxçıvan” döyüş klubu da uğurlu fəaliyyətə görə mükafatlandırılıblar.

Naxçıvan Şəhər Uşaq-Gənclər İdman Məktəbinin kollektivi ilə görüş keçirilib

Naxçıvan Muxtar Respublikası gənclər və idman nazirinin müavini, nazir vəzifələrini müvəqqəti icra edən Məcid Seyidov Naxçıvan Şəhər Uşaq-Gənclər İdman Məktəbinin (UGİM) kollektivi ilə görüşüb.

Nazir müavini son illər Naxçıvan Muxtar Respublikasında bədən tərbiyəsi və idmanın geniş vüsət aldığını, dövlətin bu sahəyə dəstəyi sayəsində infrastrukturunun gücləndirilidiyini, mövcud şəraitin daha da yaxşılaşdırıldığını diqqətə çatdırıb. Ötən il Naxçıvan idmançılarının ölkə və beynəlxalq miqyaslı yarışlarda 444 medal qazandığını xatırladan Məcid Seyidov bu göstəricidə UGİM-də çalışan müəllimlərin də pay sahibi olduğunu deyib. Nazir müavini qazanılan uğurlarla yanaşı məktəb müəllimlərinin öz işinə qarşı məsuliyyətini artırmalı, şagirdlərin fiziki, əqli və tərbiyəvi cəhətdən hazırlığına, o cümlədən dərs yükünün və mövcud tələblərin qarşılanmasına xüsusi diqqət yetirməli olduqlarını vurğulayıb.

Görüşdə nazirlik tərəfindən tabeliyindəki UGİM-də tədris-məşq prosesinin təşkili və davamiyyətlə bağlı aparılan monitorinqlərin nəticələri müzakirə olunub, müəllimlərin təklif və fikirləri dinlənilib.

Sonda Məcid Seyidov tələb və tapşırıqların vaxtında icra olunmasının vacibliyini diqqətə çatdırıb, kollektivə gələcək fəaliyyətində uğurlar arzulayıb.

🗓️ 2 mart 2026-cı il tarixdə 5 Mart – Bədən Tərbiyəsi və İdman Gününə həsr olunmuş “Səhər idmanı” layihəsi Naxçıvan Şəhər Gənclər və İdman İdarəsi və Uşaq-gənclər idman məktəbi tərəfindən təşkil olunub.

Layihənin məqsədi sağlam həyat tərzinin təbliği və gənclərin idmana marağının artırılması olub. İştirakçılar səhər gimnastikası və fiziki hərəkətlərdə fəal iştirak edərək günə enerjili başlayıblar.

5 mart - Bədən Tərbiyəsi və İdman günü münasibətilə “İdman həftəsi” çərçivəsində cüdo üzrə birincilik keçirilib.🥋

🗓️28 fevral 2026-cı il tarixində 5 Mart-Bədən Tərbiyəsi və İdman günü münasibətilə “İdman həftəsi” çərçivəsində Naxçıvan Şəhər Uşaq-gənclər idman məktəbində yeniyetmələr (2015-2016-cı illər) arasında cüdo üzrə Naxçıvan şəhər birinciliyi təşkil olunub.

🔹 Yarışın əsas məqsədi 5 Mart-Bədən Tərbiyəsi və İdman gününün qeyd edilməsi və gənc idmançıların sağlam ruhda formalaşmasına töhfə vermək olub.
Birincilik 9 çəki dərəcəsi üzrə keçirilib.
🥇 Qaliblər:
24 kq - Ammar Kəngərli
27 kq - Fuad Qələndərli
30 kq – Həmzə Həmzəyev
34 kq – Ədalət Məmməd
38 kq – Şahin Gözəlov
42 kq – Ziya Quliyev
46 kq –Amal Əliyev
50 kq – Ayxan Qibləliyev
+55 kq –Turan Qəhrəmanlı

✨ Yarış Naxçıvan Şəhər Gənclər və İdman İdarəsi və Uşaq-gənclər idman məktəbinin birgə təşkilatçılığı ilə keçirilib. Sonda hər çəki dərəcəsində I, II və III yerləri tutan idmançılar təşkilatçıların diplom və medalları ilə mükafatlandırılıb.

Şəhidlərin əziz xatirəsinə həsr olunmuş sərbəst güləş üzrə Naxçıvan şəhər açıq birinciliyi keçirilib.

🗓️21 fevral 2026-cı il tarixində İlham Əliyev adına Olimpiya İdman Kompleksində şəhidlərin əziz xatirəsinə həsr olunmuş 2014-2015-ci il təvəllüdlü kiçikyaşlı yeniyetmələr arasında sərbəst güləş üzrə Naxçıvan şəhər açıq birinciliyi keçirilib.

Açılış mərasimində ümummilli lider Heydər Əliyevin və şəhidlərin əziz xatirəsi bir dəqiqəlik sükutla yad edilib. Açılış mərasimində çıxış edənlər böyük şücaət göstərən şəhidlərimizin gənc nəslə örnək olduğunu və onların daim böyük hörmətlə xatırlandığını qeyd ediblər. Ardınca tədbirə fəxri qonaq qismində dəvət olunan şəhid ailələri çıxış edərək təşkilatçılara təşəkkürlərini bildirib, qəhrəmanlarımızın gənc nəslə tanıdılması istiqamətində görülən işlərin sevindirici olduğunu vurğulayıblar. Şəhid valideynlərinə yarışdan xatirə olaraq fəxri fərmanlar təqdim edilib.

📌 Qaliblər:
🥇 26 kq - Novruzlu Mərdan
🥇 29 kq - Məmmədli Mikayıl
🥇 32 kq - Əlizadə Sərxan
🥇 35 kq - Rəhimov Hüseyn
🥇 38 kq - Məmmədov Rüzgar
🥇 42 kq - Nəzərov Sunay
🥇 47 kq - Abdullayev Səttar
🥇 52 kq - Mirzəyev Hüseyn
🥇 59 kq - Tağıyev Polad
🥇 63 kq - Babayev Həmid

Naxçıvan Şəhər İcra Hakimiyyəti, Gənclər və İdman İdarəsi və Uşaq-gənclər idman məktəbinin birgə təşkil etdiyi yarışda 10 çəki dərəcəsi üzrə 50 idmançı qüvvəsini sınayıb. İlk üç yerin sahibləri mükafatlandırılıblar.

Yeniyetmələr arasında Azərbaycan çempionatı.Gəncə şəhəri.

Naxçıvan 🇦🇿 güləşçiləri Türkiyədə 🇹🇷 keçirilən qarüstü qaraqucaq güləşi festivalında uğurla çıxış ediblər

Türkiyənin Artvin vilayətinin Şavşat rayonunda “Veliköy Qarüstü Qaraqucaq Güləşi Festivalı” keçirilib. Şavşat rayonuna bağlı Veliköy kəndində 300 illik qarüstü qaraqucaq güləşi ənənəsi 29-cu dəfə keçirilən beynəlxalq yarışla davam etdirilib. Azərbaycan və Gürcüstanla yanaşı, Türkiyənin Ərzurum, Amasya, İstanbul, Tokat, Samsun və Artvin vilayətlərindən 12 kateqoriya üzrə ümumilikdə 149 idmançının qatıldığı tədbir çərçivəsində qarla örtülü meydançada güləş yarışları təşkil olunub.

Azərbaycanı yarışda Naxçıvan Şəhər Uşaq-Gənclər İdman Məktəbinin məşqçi-müəllimi Hikmət Hüseynovun rəhbərliyi ilə “Naxçıvan” komandasının 6 idmançısı təmsil edib. Təmsilçilərimiz yarışın yekununda 1 qızıl🥇, 1 gümüş🥈 və 4 bürünc🥉 medal qazanıblar.

Uşaqların yarışında Murad Hacızadə 35 kq çəki dərəcəsi üzrə birinci yerə sahib çıxaraq qızıl medal qazanıb. Rüzgar Məmmədov eyni yaş və çəki kateqoriyasında üçüncü olub. Böyüklərin yarışında Hüseyn Rzayev 85 kq çəkidə gümüş medal qazanıb. Murad Quliyev (70 kq), Qoca Əhmədov (90 kq) və Kəramət Xudiyev (90 kq) isə yarışı araq bürünc medalla tamamlayıblar.

Naxçıvanda güləş hakimləri üçün seminar keçilib

İlham Əliyev adına Olimpiya İdman Kompleksində güləş hakimləri üçün yeni qaydaların tətbiqi ilə bağlı texniki seminar təşkil olunub. Seminar Azərbaycan Güləş Federasiyasının Hakimlər Komitəsinin sədri Asif Şirəliyev və komitə üzvü Sədi Quliyev tərəfindən aparılıb.

Məlumatlandırıcı sessiyada muxtar respublikada məşqçi və ya hakim kimi fəaliyyət göstərən 14 nəfər iştirak edib. Seminar zamanı beynəlxalq güləş qaydalarına edilmiş son dəyişikliklər, onların yarışlarda tətbiq mexanizmi, hakim qərarlarının düzgün və vahid formada verilməsinin əhəmiyyəti ətraflı izah olunub, praktiki nümunələr əsasında müzakirələr aparılıb.

Tədbirin əsas məqsədi hakim və məşqçilərin peşəkar bilik və bacarıqlarını artırmaq, eyni zamanda muxtar respublikada keçirilən güləş yarışlarında obyektivliyin və ədalətli idarəetmənin təmin olunmasına töhfə verməkdir.

Naxçıvanlı cüdoçular ölkə 🇦🇿 liqasının mükafatçıları arasında 🏅

✅ Bakı şəhərində cüdo üzrə U-14 yeniyetmələr arasında Liqa yarışının IV – sonuncu turuna yekun vurulub. Abşeron Olimpiya İdman Kompleksində keçirilən yarışa Naxçıvandan məşqçi Orxan Quliyevin rəhbərliyi ilə 5 cüdoçu qatılıb. Onlardan 2-si mükafatçı olmağı bacarıb.

🥋 Təmsilçilərimizdən Ləman Bağırova qızların yarışında 28 kq çəki dərəcəsində 4 görüş keçirib. İdmançı finaladək qələbə ilə irəliləsə də, həlledici görüşdə istəyinə çata bilməyib və gümüş🥈medal qazanıb. Oğlanların yarışında mübarizə aparan İsmayıl Şükürlü də eyni qaydada çıxış edib 60 kq çəkidə gümüş🥈medalçı olub.

📌 Qeyd edək ki, Ləman Bağırova sonuncu turdan öncə reytinq sıralamasına başçılıq edir. Yekun sıralama Azərbaycan Cüdo Federasiyası tərəfindən açıqlanacaqdır.

Naxçıvan Muxtar Respublikası Gənclər və İdman Nazirliyinin mətbuat xidməti

Naxçıvanlı 🇦🇿 kikbokçulardan 9-u Gürcüstanda keçirilən beynəlxalq turnirin qalibi olub

✅ Gürcüstanın 🇬🇪 Tbilisi şəhərində “Kaspi International Tournament of Kickboxing” adlı beynəlxalq kikboksinq turniri keçirilib. Gücüstanla yanaşı, Azərbaycan, Türkiyə və İran komandalarının iştirak etdiyi turnirdə ölkəmizi təmsil edən Naxçıvanın “Araz” Kikboksinq Klubunun idmançıları uğurlu nəticələrə imza atıblar.

🏅 Yarışda klubun baş məşçisi və təsisçisi Elvin Qoçəliyevin rəhbərliyi ilə 18 idmançı iştirak edib. Təkli döyüş formatında keçən turnirdə təmsilçilərimizdən 9-u qalib gələrək birinci, 9-u isə ikinci yerə layiq görülüblər. İdmançılarımıza diplom, medal və kubok təqdim olunub. Komanda heyəti turnir yekunlaşdıqdan sonra ümummilli lider Heydər Əliyevin Tbilisi şəhərindəki abidəsini ziayarət edib, dahi şəxsiyyətin xatirəsinə ehtiramını ifadə edib.

🏆 Qeyd edək ki, idmançılarımızdan Oğuz Cavadlı, Qurban Kəngərli, Həsən İsmayılov, Ülvü Əliyev, Polad Həsənli, İlham Şükürlü, Ayhan Xəlilli, Orxan Xəlilli və Rafiq Cəfərzadə birinci yerin sahibi kimi diplom və kubok, Nəsir Əliyev, Ağababa Həsənov, Adəm Cəfərov, Xəyal Seyidov, Hüseyn Mehdizadə, Ziya Məmmədzadə, Turan Həziyev, Əli Vəliyev və Ələmdar Nəcəfov isə ikincilər kimi diplom və medalla mükafatlandırılıblar.