توفيق زين · باحث رياضي · علم التدريب

08/09/2026

05/09/2026

المشاركات الخارجية التي نشاهدها اليوم لأبطالنا الرياضيين السوريين رائعة ومُفرحة، حتى مع الغياب الواضح للنتائج.

نحن من أكثر الدول التي فقدت خلال السنوات الماضية خبرة المشاركة والاستمرارية في البطولات والمسابقات الخارجية، ولذلك من الطبيعي ألّا تكون النتائج حاضرة مباشرة.

والحمدلله، اليوم عم نشوف أبطالنا السوريين في كل مكان، عم يرجعوا يشاركوا، ينافسوا، ويكتسبوا الخبرة من جديد.

لا تنتظروا نتائج كبيرة قبل 5 سنوات على الأقل، إذا انتظم العمل بشكل صحيح ومستمر.

أما إذا بقي العمل متقطعاً وبدون استراتيجية واضحة واستمرارية حقيقية، فبدنا لسا دهر من الانتظار.

النتائج الرياضية ما بتنبنى بيوم وليلة…
بتنبنى بالاستمرارية، والخبرة، والتخطيط، والعمل العلمي.

29/08/2026

بتعرف وزارة الرياضة والشباب السورية المحترمة شو مسمية الزورق تبعها يلي عم تنافس فيه باسم سوريا المحررة؟ 😊 باسم شبيحة كانت تطلع تروج للنظام البائد، غادة شعاع ما غيرها

29/08/2026

مع واحد من أبرز قامات السباحة والرياضة في سوريا 💙🇸🇾

الكابتن Adham Zidan، بطل سابق، مدرب، خريج كلية التربية الرياضية، وصاحب خبرة أكاديمية وميدانية كبيرة، ومن مؤسسي نادي Ox gym، أحد الأندية المتميزة في مجال الفتنس والرياضة في سوريا.

الأخ، الماستر، والكابتن 💙
شخصية رياضية تركت بصمتها في عالم السباحة، وما زالت تحمل الكثير من الخبرة والشغف تجاه الرياضة السورية.

من أجمل القعدات والحوارات في زيارتي الأخيرة كانت مع كابتنا الغالي أبو عمر 💙
حوارات غنية عن الرياضة السورية، واقعها، تجاربها ومستقبلها… من تلك الحوارات التي لا تملّ منها، لأن كل دقيقة فيها تحمل تجربة أو قصة أو فكرة جديدة.

كل المحبة والاحترام للكابتن والأخ الغالي Adham Zidan 💙
ودائماً للحديث مع أصحاب الخبرة طعم مختلف. 🏊‍♂️💪

https://www.instagram.com/oxgym.pro?igsi=ZG04Z2QxYjFoemh2

24/08/2026

أحيانًا بحس إن أكبر مشكلة بالرياضة عنا ما نقص المواهب… ولا نقص الكفاءات… ولا حتى نقص الإمكانيات.
المشكلة إننا لسا عم ندير الرياضة بعقلية عمرها عشرات السنين، وبنفس الوقت متوقعين ننافس العالم!

وبقول بيني وبين حالي: قدّيش في شغل عنا بالقطاع الرياضي!

في أكاديميين، مدربين، مختصين وخبرات رياضية اشتغلوا داخل البلد وخارجها، وشافوا تجارب متقدمة، وعندهم معرفة ممكن تكون أساس حقيقي لنهضة رياضية حقيقية.

والأجمل؟ إن كثير منا مستعدين ننقل هالخبرات لبلدنا بكل رحابة صدر، ومن دون حسابات شخصية، لأن الهدف بالنهاية أكبر من أي شخص: نريد رياضة علمية، حديثة، وتواكب العالم.

بس بعدين… منوصل للواقع.

منشوف كمية المنغصات، والخلافات، والصراعات داخل المؤسسات الرياضية، وأحيانًا بتحس إن المشكلة مو بنقص الخبرات… المشكلة إن الخبرات نفسها عم تحاول تشتغل ضمن منظومة ما بدها تتغيّر.

وأحيانًا بقول:
يمكن الحل الوحيد إننا نجمع كل المسؤولين الرياضيين على عزيمة، ونشغّل لهم “حفلة الزفاف الأحمر” من Game of Thrones 😂😂
غير هيك… ما بعرف إذا في حل!

بس بعيدًا عن المزح، بلدنا بحاجة لكل شخص عنده علم وخبرة ورغبة حقيقية بالتطوير.

الرياضة السورية ما بدها معجزات… بدها ناس تسمح للكفاءة إنها تشتغل.🏆🇸🇾

انت شو رأيك؟

23/08/2026

هاد الشي مو اختراع جديد، وإنما هو النظام المتّبع في معظم الدول المتقدمة رياضياً.

وزارة الرياضة والشباب تضع القوانين والمعايير بوضوح،
وأي مجموعة أو أشخاص حابين يؤسسوا نادٍ رياضي، وملتزمين بتحقيق هذه الشروط والقوانين، يحصلون على الترخيص ويبدؤون عملهم بشكل رسمي.

بهالطريقة بتكون القوانين هي الأساس، وليس الأشخاص، وبتكون الفرصة متاحة لكل من يملك الكفاءة والرغبة بالعمل وتطوير الرياضة

23/08/2026

كل ناد رياضي بسوريا… نفس القصة، نفس الأشخاص، ونفس النتيجة!

فرق إدارية بتضل قاعدة على كراسيها من أول يوم لتقاعدهم بدون أي تغيير حقيقي.

عقود من الزمن… ونتائج تعدّ على الأصابع.
وقلة قليلة منهم عندها خلفية أكاديمية حقيقية بعلوم الرياضة والإدارة.

بس المفاجأة؟

كل ما صارت أزمة أو نتيجة سيئة، أول وآخر حل عندهم: تغيير المدرب.

ولا مرة، ولا مرة واحدة، حدا سأل: شو دور الإدارة بهالفشل؟
شو الخطة؟ شو الرؤية؟ وين الاستثمار الحقيقي بالكوادر والشباب؟

المدرب بيجي وبيروح… بس المشكلة الحقيقية قاعدة بمكان تاني، وما حدا جريء يحكي عنها.

متى رح نوقف نلوم النتيجة، ونبلش نسأل عن السبب؟