18/09/2024
Selebrashon pa SUBT su 100 aniversario a kuminsá den gran forma.
Djamars 17 sèptèmber 2024 Sport Unie Brion Trappers (SUBT) a selebrá su 99 aña di eksistensia ku un Santu Sakrifisio di Misa na Misa di Steenrijk. Un gran públiko a asistí na e selebrashon. E selebrashon na misa akí tabata momentu sumamente importante pa nos klup, kaminda nos a pidi nos Ser Supremo pa duna nos forsa i guia nos pa e selebrashon máksimo na kaminda. Tabata un misa yená ku èks hungadónan, hungadónan aktual, entrenadónan i tambe sostenedónan.
Banda di e bunita santu sakrifisio di misa, nos Minister di Enseñansa, Siensia, Kultura i Deporte señor Sithreey van Heydoorn a duna un diskurso insipirativo pa ku nos klup di SUBT. Nos presidente Erick “Eky” Oleana a hiba nos bèk den e historia di SUBT, reflekshonando riba e gran legado di SUBT i e mótibu ku awe nos ta inisiá nos legado di 100 aña di eksistensia. Presidente a para un ratu ketu riba hungadó ku a pasa den e trayektoria aki i a gradesí tambe tur e pèrsonanan ku di un forma òf otro a yuda SUBT yega na su di 99 aniversario.
Despues di misa a sigui un agasaho chikí karga ku ambiente, kaminda nos di un forma alegre por a disfrutá di músika, koi kome i tambe koi bebe. Tabata un momentu ameno kaminda e famia di SUBT por a rekòrda momentunan dushi, kontando otro di historianan fantastiko ku otro.
A medida ku nos ta aserkando 1 siglo di eksistensia, ta bon pa menshoná ku nos kalènder di selebrashon ta yenando ku tur e sugerensianan ku nos a risibí. Direktiva di SUBT ta gradesí tur esnan ku por a logra di selebrá ku nos i ta bisa e famia grandi di SUBT pa keda pendiente.
