Tsog Berlin

Ахмад сагсан бөмбөгчдийн Европын аварга шалгаруулах ХVI -р тэмцээн.

Стокхолм хотод зохион байгуулагдах Ахмад сагсан бөмбөгчдийн Европын аварга шалгаруулах ХVI -р тэмцээний мэдүүлэг авах сүүлийн өдөр.

Бүх баг тамирчиддаа амжилт хүсэе.

“We run for those who can’t” — Гүйж чаддаггүй хүмүүсийн төлөө бид гүйдэг.

Өнөөдөр болсон энэхүү сайн үйлсийн гүйлтэд Цог клубынхон Aхиллис Монгол клуб, Монголын Пара Усан Спортын Холбооны тамирчин Ө.Мөнхтөрийг дэмжин оролцлоо.

Мөнхтөр маань саяхан болсон алдарт Лондон марафонд амжилттай оролцоод, үргэлжлүүлэн 2026 оны 5 сарын 3–9-ний өдрүүдэд ХБНГУ-ын Берлин хотноо зохион байгуулагдсан Дэлхийн Пара Усанд Сэлэлтийн Цуврал тэмцээнд Монголын Пара Усан Спортын Үндэсний Холбооноос анх удаа харааны бэрхшээлтэй S11 ангилалын тамирчнаар оролцож, Монголын спортын түүхэнд шинэ мөр, шинэ хуудсыг нээсэн бахархам амжилтын эзэн болоод эх орондоо буцаж яваа билээ.

Мөн өнөөдөр дэлхийн хамгийн өвөрмөц сайн үйлсийн гүйлт болох “Wings for Life World Run”-д амжилттай оролцож, 23 км замыг тууллаа.

Энэхүү гүйлт нь дэлхий даяар нэгэн зэрэг эхэлдэг, уламжлалт барианы шугамгүйгээр “Catcher Car” хэмээх виртуал барианы машин гүйгчдийг гүйцэн барьснаар өндөрлөдөг онцлогтой бөгөөд нугасны гэмтлийн судалгаанд зориулсан дэлхийн хэмжээний хүмүүнлэгийн гүйлт юм байна.

Мөнхтөр маань энэ удаагийн гүйлтээр Монгол оролцогчдоос 5 дахь хамгийн урт замыг туулсан гүйгч болжээ.

Түүний хөтлөгч буюу Guide гүйгчээр Цог клубын тэргүүн, хөнгөн атлетикийн СМ М.Болд, клубын гишүүн Б.Энхтүвшин нар оролцсон бол бусад Цог клубын гишүүд маань өртөөлөн дэмжиж, хамтдаа нэгэн утга учиртай, дурсамж дүүрэн өдрийг өнгөрүүллээ.

“Бидний улс нэгэн зүг зориглон хөдөлвөөс хүрэхгүй газар үгүй” хэмээх Сүх жанжны үгийг бодитоор мэдрүүлсэн эв нэгдэл, нөхөрлөл, дэмжлэг дүүрэн өдөр байв.

Цог клубын нийт гишүүдийн зүгээс Ө.Мөнхтөрдөө спортын өндөр амжилт, эрүүл энх, сайн сайхан бүхнийг хүсэн ерөөе.

Мөн гүйх, тэсвэрлэх, хамтдаа хүрэхийн утга учрыг бидэнд өөр өнцгөөс мэдрүүлж, үлгэрлэл болсон танд чин сэтгэлийн талархал илэрхийлье.
Аян зам тань өлзийтэй байг!

Монголын пара усан спортын холбооны удирдлага, дасгалжуулагч , тамирчид ,биеийн тамир , спортыг дэмжигчид болон Ө.Мөнхтөр дүүдээ дараа дараагийн уралдаан тэмцээнд өндөр амжилт хүсэн ерөөе!

Хөх Монгол – Цог клубын ээлжит нөхөрсөг тоглолт, бэлтгэл тэмцээн амжилттай болж өндөрлөлөө.

Хаврын шаргал нар моддын үзүүрт туяаран саатах тэр л сайхан цаг дор Зүүн Европын хөрш орнууд болон Герман, Чех улсад суугаа Монголчуудын нэгдэл болсон Хөх Монгол – Цог клубын ээлжит уулзалт, нөхөрсөг тоглолт, бэлтгэл тэмцээн халуун дулаан уур амьсгал дунд зохион байгуулагдаж, дурсамж дүүрэн өндөрлөв.

Энэ удаагийн уулзалт нь зөвхөн спортын өрсөлдөөн бус, сэтгэл зүрхэнд эрч хүч, урам зориг бэлэглэсэн анд нөхдийн баяр байлаа. “Нэг өдрийн уулзалт — мянган өдрийн нөхөрлөл” хэмээх үнэ цэнийг улам бататгасан энэхүү үйл ажиллагаа Европ дахь Цог, Хөх Монгол нийгэмлэгийн хамт олны эв нэгдэл, нөхөрлөлийн илэрхийлэл болов.

Хөх Монгол нийгэмлэгийн урилгаарх хүрэлцэн очсон бидний нөхдийг Чех улсын хилийн дээс давахаас буцах хүртэл Mugi Samdanjamts, Luvsantuvaan Batbaatar ахлагчтай хамт олон халуун дотноор угтан авч, ая тухтай байдлыг бүрэн ханган хүндэтгэл үзүүлсэнд гүн талархал илэрхийлье.

Аяллын хүрээнд оролцогчид Чехийн үзэсгэлэнт байгалийн нэгэн бахархал болох 1050 метрийн өндөрлөг уулын оргилд хүрч, байгалийн сайхныг мэдрэн, дурсгалын зургаа татуулан нэгэн цагийг мартагдашгүй өнгөрүүлэв. Тус газар нь өвлийн улиралд цанын бааз, зуны улиралд явган аялал, уулын спортын төв болдог онцлогтой ажээ.

Үргэлжлүүлэн зарим багийнхан буудалдаа амарч, нөгөө хэсэг нь Burg Kokořín, Bezděz Castle хэмээх түүхэн дурсгалт цайзуудыг зорин аяллаа баяжуулав. Орой нь Чехийн уламжлалт хоол, эрүүл агаартай хослон Máchovo jezero (мөн л 14-р зуунаар аялав) хиймэл нуурын хөвөөнд чөлөөт дасгал хийж, алжаалаа тайлсан нь аяллын нэгэн онцгой хэсэг байлаа.

Маргааш өглөө эртлэн босч, нуурийн эргээр хүн бүр өөрийн хэмнэлээр гүйж, бие халаалт хийсний дараа 10 цагаас нөхөрсөг тоглолтоо эхлүүлэв. Хөх Монгол клубын урилгаар Чехийн эмэгтэйчүүдийн шилдэг баг хүрэлцэн ирж, манай мастер болон дунд ангиллын эмэгтэй багуудтай тоглосон нь харилцан туршлага солилцсон үнэ цэнтэй мөч болов. Эрэгтэй багууд ч ширүүн өрсөлдөөн өрнүүлж, спортын нөхөрлөлийг улам бататгалаа.

Энэхүү нөхөрсөг тоглолт, бэлтгэл тэмцээн нь удахгүй Шведийн хаант улс-д зохион байгуулагдах Европын Монголчуудын ахмад сагсан бөмбөгчдийн аварга шалгаруулах уламжлалт тэмцээний өмнөх чухал бэлтгэл болсноороо онцгой ач холбогдолтой байлаа. Оролцогч багуудын хувьд ур чадвараа сорих, тактик туршлагаа сайжруулах, багийн уялдаа холбоогоо бэхжүүлэх үнэт боломжийг бүрдүүлэв.

Оройн арга хэмжээг Хөх Монголын хамт олон чин сэтгэлээсээ зохион байгуулж, зочиддоо мартагдашгүй үдшийг бэлэглэсэнд онцгойлон талархаж байна. Шөнө дунд хүртэл үргэлжилсэн баярын маргааш өглөө спорт анд нөхөддөө удахгүй дахин уулзахын ерөөл өргөн, халуун дотноор үдэлцгээв.

Энэхүү уулзалт нь нөхөрлөлийг арчилж, хамтын үнэ цэнийг эрхэмлэхийн чухлыг дахин сануулсан үйл явдал байлаа.

Дараагийн нөхөрсөг уулзалт, тэмцээн Берлин хотноо зохион байгуулагдах тул анд нөхөд, түнш нийгэмлэгүүдээ өргөнөөр оролцохыг урьж байна. Ялангуяа арын албаны эрхэм хүмүүс та бүхэн гэр бүл, үр хүүхдийн хамт хүрэлцэн ирж, хамтын уур амьсгалыг улам баяжуулан оролцохыг урьж байгааг онцлон тэмдэглэе.

Та бүхэнд эрүүл энх, амжилт бүтээлийн дээдийг хүсэн ерөөе.

“Freundschaft muss gepflegt werden” - “Нөхөрлөлийг арчилж байх хэрэгтэй” Германчуудын нийтлэг хэллэгээс...

Берлин Цог болон МонБавари клубын мастер эмэгтэй багуудын ээлжит нөхөрсөг тоглолт, хамтарсан бэлтгэл Берлин хот дахь Цог клубын бэлтгэлийн зааланд амжилттай зохион байгуулагдлаа.

Энэ удаагийн уулзалт нь хоёр багийн дөрөв дэх хамтарсан бэлтгэл бөгөөд зочин баг маань зөвхөн 48+ багтай тоглоод зогсохгүй, Цог клубын 38+ багтай мөн хүч сорин, үнэ цэнтэй туршлага хуримтлууллаа. Тоглолт бүр 4 үе, үе тус бүр 8 минут үргэлжилсэн нь ирэх зургаадугаар сард Шведийн Хаант Улсад болох Европын Монголчуудын аварга шалгаруулах тэмцээний хэмнэл, нөхцөлд бэлтгэж буй чухал алхам байв. Ийнхүү харилцан туршлага солилцож, спортын нөхөрлөлөө улам бататгасан, дурсамж дүүрэн нэгэн өдрийг хамтдаа өнгөрөөлөө.

Герман ардын түгээмэл хэллэг, зарчимд “Freundschaft muss gepflegt werden” буюу “Нөхөрлөлийг арчилж тордож байх хэрэгтэй” хэмээн өгүүлдэг. 500 км-ийн алсаас цаг зав, хүч хөдөлмөр, хөрөнгө мөнгөө зориулан хүрэлцэн ирж буй нь нэг талаасаа сайн дурын, чин сэтгэлийн үйл хэрэг боловч нөгөө талаасаа Монголчууд бид бие биедээ ойр байж, эв нэгдлийн гинжин хэлхээг спортоор дамжуулан бататгаж буйн тод жишээ юм. Та бүхэндээ чин сэтгэлийн талархал илэрхийлье.

2022 оноос хойш багаа бүрдүүлэн, тогтмол бэлтгэл сургуулилалт хийж, идэвхтэй үйл ажиллагаа явуулж буй МонБавари клубын спортын андууддаа ирэх тэмцээнд нь өндөр амжилт, эрүүл энх, аз жаргал, сайн сайхан бүхнийг хүсэн ерөөе.

Клубын бодлогын нэгэн чухал хэсэг төдийгүй Европ дахь спортын олон зүтгэлтнүүдийн эрхэмлэн анхаарч, хэрэгжүүлж ирсэн үнэт зүйл бол клуб, багуудын хоорондын харилцаа холбоо, хамтын ажиллагаа билээ.

Энэ хүрээнд манай Цог клубын олон жилийн анд нөхөд, ахан дүүсийн холбоотой Хөх Монгол клубын хамт олонтойгоо ээлжит нөхөрсөг тоглолт, хамтарсан бэлтгэлээ хийхээр бэлтгэж байна. Удахгүй энэ аяллынхаа дурсгалтай мөчүүд, ховор нандин хүмүүстэй авхуулсан гэрэл зургууд болон сайхан мэдээгээ та бүхэнтэйгээ хуваалцах болно.

Берлин Цог Монгол Спорт клуб
2026 оны 4 сарын 26

Биеийн тамир, спортыг хөгжүүлэх, Олимпийн хөдөлгөөнийг түгээн дэлгэрүүлэх үйлсэд оруулсан үнэтэй хувь нэмрийг нь өндрөөр үнэлж ХБНГУ -д суугаа Онц бөгөөд бүрэн эрхт элчин сайд Б. Мандахбилэгийг Монголын Үндэсний Олимпийн Хорооны 70 жилийн ойн хүндэт медалиар шагнасныг МҮОХ-г төлөөлөн гавьяат дасгалжуулагч С. Баясгалан гардуулж , чин сэтгэлийн баяр хүргэн, цаашдын ажил , амьдралд нь амжилт бүтээл арвин байхыг хүсэн ерөөлөө.

ЕВРОП ДАХЬ МОНГОЛ ХҮҮХДҮҮДИЙН ӨСВӨРИЙН АНХДУГААР АВАРГА ШАЛГАРУУЛАХ ВОЛЕЙБОЛЫН ТЭМЦЭЭНИЙ УДИРДАМЖ 🏐

Мэдээлэл дамжуулж байна.

https://www.facebook.com/share/p/18dfjsrddM/

Берлин Цог клубынхон өнөөдөр дахин нэг удаа гүйлтийн хэмнэлээр амьсгаллаа

S25 Berlin тэмцээний уур амьсгал дунд Берлин Цог Монгол Спорт клубын тэргүүн, БНМАУ-ын Спортын мастер М.Болд хагас марафон зайд амжилттай оролцож, олон жилийн дараа дахин том тайзан дээр гүйсэн сэтгэл догдлом мөчийг бүтээлээ.

Нэгэн цагт Монгол Улсын хөнгөн атлетикийн 100 метрийн зайн залуучуудын дээд амжилтыг удаан хугацаанд эзэмшиж явсан тэрээр барианд орсныхоо дараа

“35 жилийн дараа дахин энгэрийн номер зүүж, хөнгөн атлетикийнхаа ноён оргил хагас марафонд гүйж, Олимп болон дэлхийн аваргуудын мөр гаргасан цэнгэлдэх хүрээлэнд, тартан зам дээр дахин гүйх үнэхээр гайхалтай байлаа. Энэ жил Монголынхоо олон олон тамирчид, Элит гүйгч нарынхаа хамт оролцох алдарт Берлин марафоны маань бэлтгэл ийнхүү эхэлж буйд туйлын баяртай байна.” хэмээн сэтгэгдэлээ хуваалцлаа.

2026 онд 45 дахь удаагаа зохион байгуулагдсан энэ удаагийн S25 Berlin нь олон мянган гүйгчийг нэг дор цуглуулсан, жинхэнэ спортын баяр болж өнгөрлөө. Анх 25 км зайнаас эхэлж S25 хэмээн нэрлэгдсэн энэ тэмцээн өнөөдөр 5 км-ээс хагас марафон хүртэл төрөлжсөн, хүн бүр оролцох боломжтой гүйлтийн томоохон фестиваль болон өргөжжээ.

Өглөөний сэрүүн агаарт гараанаас хөдөлсөн гүйгчид хотын гудамж, ногоон ойг туулсаар… эцэст нь нэг л цэгт хүрнэ. Тэр бол — Olympiastadion Berlin.

Стадионы хаалгаар орж, олон мянган хүний алга ташилтан дунд барианд орно гэдэг бол зүгээр нэг гүйлт биш — өөрийгөө ялсан агшин байдаг.

Ийм л учраас S25 Berlin нь жил бүр олон хүний хүсэн хүлээдэг, дурсамж, урам зориг, шинэ зорилгын эхлэл болсоор байна.

Оролцсон Цогчууддаа болон нийт Монголчууд, Монголчуудын найз нөхөддөө халуун баяр хүргэе.

Алдарт Болд Mungun Bold мастертаа цаашдын спортын өндөр амжилт, спортод оруулж буй үнэт хувь нэмэрт нь талархал илэрхийлж, сүүн цагаан замнал бүхнийг хүсэн ерөөе.

Берлин Цог Монгол Спорт клуб
2026 оны 4 сарын 19-ны өдөр